“Ku Humelele Yini Hi N’wananga?”

Scott na Sandraa va yime tindleve loko va vona leswi n’wana wa vona wa malembe ya 15 a a ri xiswona loko a nghena endlwini. A a daye misisi yakwe yi va yo tshwuka! Lexi a xi hlamarisa no tlurisa hileswi a a cince ni mavulavulelo.

“Xana hi ku nyike mpfumelelo wo daya misisi ya wena?”

“A mi si tshama mi vula leswaku ndzi nga yi dayi.”

“Ha yini u nga rhanganga u hi vutisa loko u lava ku daya misisi ya wena?”

“Hikuva a ndzi swi tiva leswaku mi ta ala!”

HILAHA Scott na Sandra va nga swi tiyisekisaka hakona, malembe ya kondlo-a-ndzi-dyi ya tika, i tlakula va xurhe naswona a ma tikeli vantshwa ntsena kambe ni vatswari va vona. Entiyisweni vatatana ni vamanana vo tala va vula leswaku a va ku lunghekelanga hi ku helela ku cinca loku lokukulu, loku humelelaka loko vana va vona va fika emalembeni wolawo. Manana un’wana wa le Canada la vuriwaka Barbara, u ri: “N’wana wa hina wa nhwanyana u lo na swipfuketana o cinca. Ndzi tivutisile ndzi ku, ‘Ku humelele yini hi n’wananga?’ Swi tikombe onge loko ha ha etlele nivusiku u tekiwile ivi hi siyeriwa n’wana un’wana!”

Leswi a swi humelelanga Barbara ntsena. Xiya leswi vatswari emisaveni hinkwayo va swi byeleke vatsari va Xalamuka!

“Loko n’wana wa hina wa mufana a nghena emalembeni ya kondlo-a-ndzi-dyi, u lo na swipfuketana a sungula ku lava ku tiva swivangelo ni milawu leyi hi n’wi vekelaka yona.”—Lia wa le Britain.

“Vana va hina va vanhwanyana va sungule ku karhateka hi ndlela leyi va langutekaka ha yona.”—John wa le Ghana.

“N’wana wa hina wa mufana a a lava ku tiendlela swiboho. A a nga ha lavi ku byeriwa nchumu.”—Celine wa le Brazil.

“Ntombhi ya hina a yi nga ha swi tsakeli ku angarhiwa ni ku ntswontswiwa hi hina.”—Andrew wa le Canada.

“Vana va hina va vafana va sungule ku va ni ntshiva. Ematshan’weni yo amukela swiboho swa hina, a va phikizana na hina.”—Steve wa le Australia.

“N’wana wa mina wa nhwanyana a a ndzi fihlela ndlela leyi a titwaka ha yona. A a nyangatseka loko ndzi ringeta ku endla leswaku a ndzi phofulela ta le mbilwini ya yena.”—Joanne wa le Mexico.

“Vana va hina va sungule ku va ni swihundla naswona minkarhi yo tala a va lava ku va voxe. Hakanyingi a va tsakela ku va swin’we ni vanghana va vona ku tlula ku va na hina.”—Daniel wa le Philippine.

Tanihi mutswari wa n’wana wa kondlo-a-ndzi-dyi, u ta kuma leswaku swin’wana swa leswi vuriweke laha henhla swa humelela ni le ka vana va wena. Loko swi ri tano, tiyiseka leswaku swa koteka ku twisisa ku cinca loku u ku vonaka eka n’wana wa wena loyi a nga emalembeni ya kondlo-a-ndzi-dyi. Bibele yi nga ku pfuna. Njhani?

Vutlhari Ni Ku Twisisa

Xivuriso xa le Bibeleni xi ri: “Kuma vutlhari, kuma ku twisisa.” (Swivuriso 4:5) Timfanelo leti hatimbirhi i ta nkoka emhakeni yo pfuna vana va kondlo-a-ndzi-dyi. U fanele u twisisa leswaku u kota ku tiva leswi endlekaka eka n’wana wa wena. Nakambe u fanele u va ni vutlhari leswaku u pfuna n’wana wa wena wa kondlo-a-ndzi-dyi leswaku a kula a ri ni vutihlamuleri.

U nga tixisi u ehleketa leswaku leswi n’wana wa wena a lavaka ku tilawula a nga ha wu lavi nkongomiso wa wena. Mhaka ya xiheri hileswaku vana va malembe ya kondlo-a-ndzi-dyi va fanele va kuma mpfuno wa vatswari va vona loko va ri emalembeni wolawo. Xana ku twisisa ni vutlhari swi nga ku pfuna njhani leswaku u va nyika nkongomiso wolowo?

[Nhlamuselo ya le hansi]