Langutelo Ra Bibele

Xana U Nga Tisirhelela Loko Swi Te Yini?

HI LE xikarhi ka vusiku, wa ha byi phahile, hiloko u pfuxiwa hi pongo. U twa swigingi. Ku ni munhu loyi a tshoveke a nghena endlwini ya wena. Hambileswi u nga ha tikotiki hi ku chuha u le ku tivutiseni leswaku u ta endla yini.

Munhu wihi na wihi a nga ha langutana ni xiyimo lexi. Vugevenga a bya ha endleki ematikweni yo karhi kumbe emadorobeni ntsena. Leswi vo tala va byi chavaka, va tisirhelela hi ku xava swibalesa kumbe hi ku dyondza tindlela to tisirhelela. Tihulumendhe tin’wana ti veke milawu leyi pfumelelaka vaaki ku tisirhelela hi ku tirhisa swilo leswi nga dlayaka vahlaseri va vona. Kambe, xana Bibele yi ri yini hi mhaka leyi? Xana munhu a nga va a hoxile loko a tilwela leswaku a tisirhelela kumbe ku sirhelela ndyangu wakwe?

Xikwembu Xa Ma Venga Madzolonga

Bibele yi sola madzolonga swin’we ni vanhu lava ma endlaka. Mupisalema Davhida u vulavule malunghana na Yehovha Xikwembu, a ku: “Kunene moya-xiviri Wakwe wa n’wi venga un’wana ni un’wana la rhandzaka madzolonga.” (Pisalema 11:5) Xikwembu xi avanyise matiko yo tala ya khale ku katsa ni vanhu va xona hikwalaho ko va ni madzolonga ni ku dlaya. (Yuwele 3:19; Mikiya 6:12; Nahume 3:1) Hambi ku ri ku dlaya munhu hi xihoxo hikwalaho ka vusopfa, a ku ri nandzu lowukulu hi ku ya hi Nawu lowu a wu nyikiwe Vaisrayele.—Deteronoma 22:8.

Bibele yi khutaza vanhu leswaku va papalata timholovo leti nga ha vaka kona hi ku hlakulela ku va ni ku rhula masiku hinkwawo. Hakanyingi vanhu va rhanga hi ku holova loko va nga si lwa. Bibele yi ri: “Laha tihunyi ti nga riki kona, ndzilo wa timeka, naswona laha ku nga riki na mulumbeti, mholovo a yi vi kona.” (Swivuriso 26:20) Minkarhi yo tala ku rhula ku herisa ku hlundzuka ku tlhela ku sivela timholovo. Muapostola Pawulo u tsarile: “Loko swi koteka, swi titshege hi n’wina, vanani ni ku rhula ni vanhu hinkwavo.”—Varhoma 12:18.

Loko U Xungetiwa

Loko u ri munhu wo rhula a swi vuli leswaku a wu nge pfuki u hlaseriwile hi ndlela ya tihanyi. Ematin’wini hinkwawo, vagandzeri lava tshembekaka va Xikwembu va tshame va hlaseriwa. (Genesa 4:8; Yobo 1:14, 15, 17) Loko munhu a xungetiwa hi xigevenga lexi hlomeke, xana u fanele a endla yini? Yesu u lerise a ku: “Mi nga n’wi kaneti la hombolokeke.” (Matewu 5:39) U tlhele a ku: “Loyi a tekaka nguvu ya wena ya le handle, u nga n’wi tsoni hambi nguvu ya le ndzeni.” (Luka 6:29) Yesu a nga vulanga leswaku hi tirhisa matlhari leswaku hi sirhelela nhundzu ya hina. Loko munhu la tlhariheke a langutane ni xigevenga lexi hlomeke lexi lavaka swilo swakwe swa risima a nge ali ku xi nyika swona. Hakunene vutomi i bya risima ku tlula swilo leswi hi nga na swona!

Hi hala tlhelo, ku vuriwa yini loko vutomi bya munhu byi xungetiwa hi xigevenga? Nawu lowu Xikwembu xi wu nyikeke Vaisrayele wu hlamula xivutiso lexi. Loko khamba ro khomiwa ninhlikanhi kutani ri dlayiwa, loyi a ri dlayeke a a ta va ni nandzu wo dlaya. Nawu lowu a wu twala hikuva nandzu wa vukhamba a wu nga faneriwi hi rifu, naswona khamba a ri ta khomiwa ri ya avanyisiwa hi ku ya hi nawu. Hambiswiritano, loko khamba ro dlayiwa nivusiku, n’wini wa muti a a ta rivaleriwa hikuva a a nga ta va a ri vonile leswaku khamba rero a ri endla yini naswona a ri te hi xikongomelo xihi. N’wini wa muti a a ta vula leswaku ndyangu wa yena a a wu ri ekhombyeni kutani a a ri eku wu sirheleleni.—Eksoda 22:2, 3.

Hikwalaho Bibele yi kombisa leswaku munhu a nga ha tisirhelela loko a hlaseriwa kumbe loko ndyangu wakwe wu hlaseriwa. A nga vhika kumbe a ba muhlaseri leswaku a tisirhelela, kumbe a n’wi sivela hi ndlela yin’wana leswaku a nga yi emahlweni a n’wi hlasela. Xikongomelo xa yena ku ta va ku ri ku n’wi sivela leswaku a nga n’wi hlaseli. Loko muhlaseri yoloye o vavisiwa ngopfu kumbe a fa, u ta va a nga dlayiwanga hi vomu.

Nsirhelelo Wo Tlula Hinkwayo

Ku ni swiyimo swin’wana laha swi faneleke leswaku munhu a tisirhelela eka swona. Vanhu va ni mfanelo yo tisirhelela ni ku sirhelela mindyangu ya vona loko va ri ekhombyeni niloko va lava ku dlayiwa. A wu kona nawu wa le Bibeleni lowu hi sivelaka leswaku hi tisirhelela, loko swi nga koteki ku balekela xiyimo xa kona. Kambe nchumu wa vutlhari i ku endla hinkwaswo leswi hi nga swi kotaka leswaku hi papalata swiyimo swa madzolonga.—Swivuriso 16:32.

Bibele yi hi khutaza leswaku hi ‘lava ku rhula hi tlhela hi ku landzelela’ evuton’wini bya hina. (1 Petro 3:11) Leyi i ndlela leyinene leyi tirhaka yo hanya hi ku rhula.

XANA U TSHAME U TIVUTISA?

◼ Ha yini hi fanele hi papalata madzolonga?—Pisalema 11:5.

◼ Hi rihi goza ra vutlhari leri munhu a nga ri tekaka leswaku a sirhelela nhundzu yakwe?—Swivuriso 16:32; Luka 12:15.

◼ Munhu u fanele a va ni langutelo rihi hi timholovo leswaku a papalata khombo?—Varhoma 12:18.

[Marito lama tshahiweke exihlokweni lama nga eka tluka 11]

Bibele yi kombisa leswaku munhu a nga ha tisirhelela loko a hlaseriwa kumbe loko ndyangu wakwe wu hlaseriwa