Langutelo Ra Bibele

Xana Xikwembu Xi Fanele Xi Gandzeriwa Hi Ku Tirhisa Swifaniso?

“Ndzi dyondzisiwe leswaku swifaniso swi ta endla leswaku ndzi titwa ndzi ri ekusuhi ni Xikwembu.”—Mack.

“Ekaya a ku tele swifaniso swa vukhongeri. A hi anakanya leswaku sweswo a swi endla leswaku yindlu ya ka hina yi tsakisa Xikwembu.”—Herta.

“A a hi pfa hi khongela swifaniso swin’wana. A hi nga si tshama hi tivutisa leswaku Xikwembu xi titwa njhani hi xiendlo lexi.”—Sandra.

XANA u titwa njhani hi marito lawa? Vo tala va anakanya leswaku swifaniso swa vukhongeri swa va pfuna leswaku va gandzela Xikwembu. Xana va tiyisile? Xa nkoka swinene, xana Xikwembu xi titwa njhani hi mhaka leyi? Xiya leswi Rito ra xona leri tsariweke, ku nga Bibele yo Kwetsima, ri swi vulaka.

Ndlela Leyi Xikwembu Xi Swi Tekaka Ha Yona Swifaniso Swa Vukhongeri

Swifaniso swa vukhongeri i nchumu wun’wana ni wun’wana lowu vanhu va tinyiketelaka eka wona kumbe va wu gandzelaka. Swi katsa swihambano, swifaniso kumbe swifaniso leswi fanaka ni xilo xihi ni xihi etilweni kumbe emisaveni.a Mijeko i swilo swin’wana leswi vanhu va swi gandzelaka.

Vanhu se va ni magidi ya malembe va ri karhi va tirhisa swifaniso evugandzerini. Hikwalaho, hi 1513 B.C.E., loko Xikwembu xi nyika rixaka lerintshwa ra Israyele Swileriso swa Khume, xi yi hlamusele kahle ndlela leyi xi titwaka ha yona hi swifaniso swa vukhongeri. Xi te: “U nga tshuki u tiendlela xifaniso lexi vatliweke kumbe xivumbeko lexi fanaka ni xilo xihi ni xihi lexi nga ehenhla ematilweni kumbe lexi nga ehansi emisaveni kumbe ematini ehansi ka misava. U nga tshuki u swi nkhinsamela kumbe u yengiwa ku swi tirhela, hikuva mina Yehovha Xikwembu xa wena ndzi Xikwembu lexi lavaka ku tinyiketela loku hlawulekeke.”—Eksoda 20:4, 5.

Xiya swilo swimbirhi leswi Xikwembu xi nga vula leswaku swi nga endliwi: Xo sungula, vanhu va xona a va nga fanelanga va endla swifaniso leswaku va swi gandzela, naswona xa vumbirhi, a va nga fanelanga va swi “nkhinsamela” kumbe ku swi gandzela. Ha yini Muvumbi wa hina a sivela ku endliwa ka swifaniso? Xivangelo xin’wana xa leswaku Xikwembu xi sivela ku endliwa ka swifaniso hileswi ‘ku nga riki na munhu la tshameke a vona Xikwembu.’ Yehovha a nga na miri wa nyama kambe i xivumbiwa xa moya naswona u tshama exivandleni xa moya. (Yohane 1:18; 4:24) Xivangelo xin’wana xa Xikwembu xo sivela ku endla xifaniso xin’wana ni xin’wana hileswaku xi lava “ku tinyiketela loku hlawulekeke.” Xi ri: “Ku vangama ka mina a ndzi ku nyiki un’wana, ni ku dzunisa ka mina a ndzi ku nyiki swifaniso leswi vatliweke.” (Esaya 42:8) Hikwalaho ka sweswo, swi hoxile ku endla xifaniso leswaku u xi gandzela. Loko Aroni loyi a a ri murhangeri wa Vaisrayele a endle xifaniso, Yehovha u hlundzuke ngopfu.—Eksoda 32:4-10.

Ha Yini Hi Nga Fanelanga Hi Swi Nkhinsamela?

Loko Bibele yi vulavula hi swifaniso yi ri: “Swi ni nomu, kambe a swi vulavuli; swi ni mahlo, kambe a swi voni; swi ni tindleve, kambe a swi twi.” Kutani yi engetela hi ku lemukisa yi ku: “Lava va swi endlaka va ta fana na swona”—va ta fa.—Pisalema 115:4-8.

Ku gandzela swifaniso na swona swi kombisa ku homboloka. Tivutise, ‘Xana a ndzi ta titwa njhani loko ndzo nyika n’wana wa mina nyiko yo durha kutani a famba a ya nkhensa munhu wumbe kumbe nchumu lowu nga hanyiki?’ Sweswo swi nga ku pfuna leswaku u twisisa ndlela leyi Muvumbi wa hina tlhelo Munyiki wa Vutomi a titwaka ha yona loko van’wana—ku katsa ni swifaniso leswi nga hanyiki—va dzunisiwa ni ku gandzeriwa ematshan’weni ya yena.—Nhlavutelo 4:11.

Nakambe, anakanya hi ndlela leyi swi kombisaka ku delela ha yona loko munhu—loyi a endliweke hi xifaniso xa Xikwembu—a gandzela xifaniso lexi nga hanyiki! (Genesa 1:27) Malunghana ni van’wana lava endleke tano, muprofeta Esaya u tsarile a ku: “Va nkhinsamela ntirho wa mavoko ya munhu, lowu endliweke hi tintiho ta munhu. Munhu wa la misaveni wa nkhinsama, munhu u va exiyin’weni xa le hansi, naswona [wena Yehovha Xikwembu] a wu nge pfuki u va rivalerile.”—Esaya 2:8, 9.

Nchumu wun’wana lowu endlaka vugandzeri bya mavunwa byi xi hlundzukisa ngopfu Xikwembu, entiyisweni hileswi ku gandzeriwaka madimona, ku nga valala va Xikwembu. Deteronoma 32:17 yi vula leswaku loko Vaisrayele va fularhele Yehovha va gandzela swifaniso “va ye emahlweni va endlela madimona switlhavelo, hayi Xikwembu.”

Xana valandzeri va Yesu Kreste vo sungula va gandzele swifaniso kumbe ku swi tirhisa evugandzerini? Doo! Yohane muapostola wa Yesu u tsarile a ku: “Vana lavatsongo, tivoneleni swifaniso.” (1 Yohane 5:21) Buku leyi nge Early Church History to the Death of Constantine yi ri: “Nchumu lowu a wu va nyenyetsa ngopfu vadyondzisiwa vo sungula a ku ri ku gandzela swifaniso.”

Ndlela Leyinene Yo Gandzela

Yesu u te: ‘Vagandzeri va ntiyiso va ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.’ (Yohane 4:23) Ina, Xikwembu xi lava leswaku hi xi tiva kahle—leswi xi swi rhandzaka, leswi xi nga swi rhandziki, milawu ya xona ni xikongomelo xa xona hi hina. (Yohane 17:3) Entiyisweni, hi yona mhaka leyi xi endleke leswaku ku tsariwa Bibele. (2 Timotiya 3:16) Nakambe, leswi Xikwembu “xi nga riki kule ngopfu ni un’wana ni un’wana wa hina,” hi nga khongela eka xona nkarhi wun’wana ni wun’wana, endhawini yin’wana ni yin’wana naswona hi nga pfuniwi hi swifaniso swa vukhongeri.—Mintirho 17:27.

Sandra loyi a boxiweke eku sunguleni u te: “Loko ndzi nghena eHolweni ya Mfumo ya Timbhoni ta Yehovha, a ndzi swi vonanga swifaniso swa vukhongeri. Timbhoni ti tirhise Bibele leswaku ti ndzi komba timfanelo ta Xikwembu nileswi xi swi languteleke eka hina. Kutani, ndzi dyondze ndlela leyi ndzi nga khongelaka ha yona leswaku ndzi twiwa hi Xikwembu. Sweswi ndzi n’wi tiva ku antswa Muvumbi naswona ndzi ni vuxaka lebyikulu na yena.” Ina, Sandra u dyondze ndlela leyi ntiyiso wa le Bibeleni wu phyuphyisaka wu tlhela wu ntshunxa vanhu ha yona. (Yohane 8:32) Na wena u nga wu dyondza.

[Nhlamuselo ya le hansi]

XANA U TSHAME U TIVUTISA?

◼ Ha yini hi fanele hi papalata tindlela hinkwato to gandzela hi ku tirhisa swifaniso?—Pisalema 115:4-8; 1 Yohane 5:21.

◼ Xikwembu xa ntiyiso xi fanele xi gandzeriwa njhani?—Yohane 4:24.

◼ U nga wu dyondza njhani ntiyiso hi Xikwembu naswona u nga vuyeriwa njhani?—Yohane 8:32; 17:3.