Xikwembu Xi Ndzi Pfunile Leswaku Ndzi Hlula Miringo

Hi ku vula ka Vazir Asanov

Loko ndzi bulumuka emubedweni, ndzi tsimbe Bibele emasengeni kutani ndzi ambala hi ku hatlisa. Loko ndzi nga si tlula hi fasitere, ndzi endle xiputsa hi swiambalo ivi ndzi xi veka ehenhla ka mubedo kutani ndzi xi funengeta hi minkumba leswaku xi vonaka onge ndza ha etlele. Hiloko ndzi tsutsumela eHolweni ya Mfumo, ndzi ri karhi ndzi khongela eka Xikwembu leswaku xi ndzi seketela. Sweswo swi humelele hi 1991 loko ndza ha ri na 14 wa malembe.

NDZI velekiwe endyangwini wa Makurd edorobeni ra le dzongeni wa ndhawu leyi sweswi yi vuriwaka Kazakhstan, leyi hi nkarhi wolowo a yi vumbiwa hi tirhiphabliki ta 15 ta Soviet Union. Vatswari va mina swin’we ni maxaka ya mina va ndzi dyondzise leswaku enkarhini lowu taka ndzi nga va murhangeri ni muponisi wa vanhu va ka hina. Ndzi sungule ku venga valala va Makurd swinene lerova a ndzi tiyimisele ku va dlaya leswaku ndzi ntshunxa vanhu va ka hina eku tshikileriweni.

Eku heleni ka va-1980, mina, manana ni ndzisana ya mina hi sungule ku dyondza Bibele ni Timbhoni ta Yehovha. Kambe, Tatana a a nga hi pfumeleli leswaku hi hlangana ni Vakreste. Hambiswiritano, ndzi hambete ndzi dyondza Bibele. Emindyangwini ya Makurd nhloko ya ndyangu ya yingisiwa minkarhi hinkwayo. Tatana a a ndzi n’wi rhandza, kambe a a ndzi rhandza ni tidyondzo ta Bibele leti a ndzi ri karhi ndzi ti dyondza.

Ku Kanetiwa eKaya Ni Le Xikolweni

Siku rin’wana mudyondzisi u vone kopi ya magazini wa Xihondzo xo Rindza enkwameni lowu ndzi hoxaka tibuku ta xikolo eka wona, kutani a byela vatswari va mina hi mhaka leyi. Hi ku hlundzuka, Tatana u ndzi be hi matimba lerova ndzi huma ngati hi tinhompfu. U huwelerile a ku: “Xana wa ha ya emahlweni ni vukhongeri lebyiya?”

Endzhaku ka sweswo, Tatana u byele ndyangu wa yena leswaku a nga ha ndzi teki tanihi n’wana wa yena. Sweswo swi ndzi twise ku vava! Hi nkarhi wolowo, vana vo tala lava a ndzi dyondza na vona xikolo va sungule ku ndzi papalata, naswona van’wana a va ndzi tseketsela. Vadyondzisi va mina a va ndzi nyika timaraka ta le hansi naswona minkarhi yo tala loko hi ri etlilasini a va vungunya vukhongeri bya mina, va ringeta ku ndzi hundzula ndzi pfumela leswaku Xikwembu a xi kona.

Hambileswi a ndzi kanetiwa hi ndlela yoleyo, a ndzi ringeta ku ya eminhlanganweni ya Vukreste ni ku chumayela van’wana hi tidyondzo leti ndza ha ku ti dyondzaka. Endzhakunyana ka sweswo, Tatana u kume leswaku ndza ha ya emahlweni ndzi hlangana ni Timbhoni ni ku hlaya Bibele. Siku rin’wana hi Sonto, ndzi sungule ku anakanya hi ku xisa Tatana leswaku ndzi kota ku huma ekaya ndzi ya enhlanganweni. Hi nkarhinyana wolowo, Tatana u ndzi byele leswaku ndzi ya eku etleleni. U te: “Ku sukela sweswi, hi Sonto yin’wana ni yin’wana hi nkarhi lowu u fanele u va u etlele.” U ndzi byele leswaku loko ndzi nga yingisi u ta ndzi twisa ku vava, naswona a ndzi kholwa leswaku u ta swi endla sweswo.

Loko ndzi ri karhi ndzi rila, ndzi khongele eka Yehovha Xikwembu xa ntiyiso, leswaku a verhamisa mbilu ya Tatana, kambe a nga cincanga. Ndzi tsundzuke ntshikilelo lowu Vaisrayele a va ri ehansi ka wona le Egipta. Swiendlo swa Tatana a swi endla ndzi tsundzuka Faro, loyi a aleke ku tshika Vaisrayele va ya gandzela Yehovha.—Eksoda 5:1, 2.

Ku Endla Swiboho

Hi Sonto yin’wana ndzi endle xiboho xo ya enhlanganweni. A ndzi ri karhi ndzi vilela loko ndzi etlele emubedweni ndzi khongela eka Yehovha hi mbilu. Loko vatswari va mina va nghena ekamareni ra mina, ndzi endle onge ndzi etlele. Hi ku tsaka Tatana u te, “Jaha ra mina ra yingisa hakunene.” Hiloko a ndzi ntswontswa kutani va famba. Ndzi ye emahlweni ndzi khongela swi huma embilwini.

Endzhakunyana loko vatswari va mina va humile ekamareni ra mina, hilaha swi boxiweke hakona eku sunguleni, ndzi pfukile, ndzi teka tintangu ta mina ehansi ka mubedo kutani ndzi huma hi fasitere. Tiawara timbirhi ta minhlangano ti hele hi ku hatlisa, naswona a ndzi tivutisa leswaku ku ta humelela yini loko ndzi tlhelela ekaya. Lexi tsakisaka hileswaku hambileswi Manana a swi voneke leswaku a ku ri swiambalo leswi a swi ri emubedweni, a nga n’wi byelanga Tatana. Hambiswiritano, u ndzi tshinyile leswaku loko ndzo ya emahlweni ndzi endla sweswo u ta byela Tatana hi ta swiendlo sweswo.

Hi 1992, ndzi byele vatswari va mina leswaku munghana wa mina u rhambiwe enkhubyeni wo hlawuleka naswona na mina a ndzi fanele ku famba na yena. Entiyisweni, xiendlakalo xa kona xo hlawuleka lexi a ndzi lava ku ya eka xona a ku ri nhlengeletano ya Timbhoni ta Yehovha edorobeni ra Taraz, leri nga kwalomu ka tikhilomitara ta 100 ku suka ekaya le Karatau. A ndzi ta khuvuriwa entsombanweni wolowo ndzi kombisa leswaku ndzi tinyiketela eka Yehovha. Ndzi kombele eka Manana leswaku a ndzi nyika bakiti ra tindzoho ta sunflower exitlatini. Ndzi katinge tindzoho teto kutani ndzi ti xavisa emakete, kutani yoleyo hi yona ndlela leyi ndzi koteke ku kuma mali yo ya enhlengeletanweni.

Loko ndzi vuya ekaya, Tatana u ndzi vutisile loko mina ni munghana wa mina hi tiphinile. Ndzi n’wi tiyisekisile leswaku hi tiphinile. Ndzi swi vonile leswaku Yehovha u ndzi seketerile, hikuva Tatana a nga ha ndzi vutisanga swo tala. A ndzi ma rhandza swinene marito ya Swivuriso 3:5, 6 lama nge: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.”

Vuxaka Bya Mina Na Yehovha Byi Tsana

Endzhaku ka loko ndzi khuvuriwile Tatana a nga tshikanga ku ndzi kaneta. Loko ndzi ri karhi ndzi hlanganyela ni Timbhoni, Tatana a a ndzi ba swinene, loko ku ri ni vanhu van’wana niloko hi ri vambirhi. Siku ni siku a ndzi khomisiwa tingana ni ku tshikileriwa naswona hakanyingi a a ndzi rila. Hi nkarhi wolowo tiko ra Kazakhstan ri sungule ku tifuma ri nga ha vi ehansi ka Soviet Union, naswona vatswari va mina ni maxaka va ringete ku ndzi kucetela leswaku ndzi fikelela tipakani to va n’watipolitiki. A a va anakanya leswaku ndzi hundziwa hi swilo swa nkoka.

Buti wa mina a a ri ni ndhuma eka swa mintlango naswona hakanyingi Tatana a a vula leswaku ndzi n’wi tekelela. Kutani, eku heleni ka 1994, na mina ndzi sungule ku nghenelela eka mintlango. Leswi a a ndzi ri ni vuswikoti hi ntumbuluko, hi ku hatlisa ndzi wine masagwadi kutani ndzi bumabumeriwa hileswi ndzi nga ni vuswikoti byo tlanga bolo ya milenge ni ku endla vutiolori. Nakambe ndzi sungule ku dyondzela timhaka ta nawu leswaku ndzi ta kota ku sirhelela Makurd. Ndzi kale ndzi tsakela timhaka ta politiki kutani ndzi sungula ku nghenelela eka tona, ndzi lave no sungula vandla ra vantshwa va Makurd. Kutani Tatana u sungule ku ndzi bumabumela.

“Tatana, U Ndzi Kotile”

Vuxaka bya mina na Yehovha se a byi tsanile naswona a ndzi tshike ku dyondza Bibele ni ku ya eminhlanganweni ya Timbhoni ta Yehovha. A a ndzi tichavelela hi ku vula leswaku ndzi ta tlhela ndzi tirhela Yehovha loko se ndzi kurile. Siku rin’wana Tatana u ndzi vutisile loko ndza ha hlanganyela ni Timbhoni ta Yehovha. Ndzi n’wi hlamurile ndzi ku, “E-e, Tatana, u ndzi kotile. Se u tsakile ke?” Loko a twa leswi, Tatana u tsake ngopfu. Hi ku tsaka u te: “Sweswi se u n’wana wa mina!”

Ndzi hete malembe mambirhi ndzi nga yi eminhlanganweni, hambileswi minkarhi yin’wana a ndzi swi lava ku ya. Kambe a ndzi khomiwa hi tingana. A ndzi tibyele leswaku lava nga le vandlheni a va nge xi twisisi xiyimo xa mina.

Hi hala tlhelo, a a ndzi kholwa leswaku ku hava nchumu lowu tlulaka ku tirhela Yehovha. Minkarhi yo tala a ndzi tibyela leswaku, ‘Phela, ndza n’wi rhandza Yehovha!’ Kutani Tatana u sungule ku ndzi sindzisa leswaku ndzi ya eyunivhesiti. Ndzi pfumerile ndzi tlhela ndzi tshembisa leswaku ndzi ta endla na digri ya honors. Hambiswiritano, embilwini a ndzi tibyela leswaku loko ndzi fika eyunivhesiti le Almaty, ku nga doroba lerikulu ra manguva lawa ra le dzongeni wa Kazakhstan, ndzi ta kuma Timbhoni.

Ku Cinca Ka Swiyimo Loku Tsakisaka

Loko ndza ha ku sungula ku dyondza eyunivhesiti, ndzi hlangane ni Timbhoni timbirhi loko ti ri karhi ti chumayela exitarateni le Almaty. Ti te eka mina kutani ti ndzi vutisa ti ku, “U anakanya leswaku i mani loyi a fumaka misava?”

Ndzi hlamule ndzi ku, “I Sathana Diyavulosi, nala wa Yehovha ni wa vanhu hinkwavo.” (2 Vakorinto 4:3, 4) Ndzi hlamusele leswaku ndzi Mbhoni leyi khuvuriweke kambe a ndzi nga ha hiseki.

Eku heleni ka 1996, ndzi tlhele ndzi sungula ku dyondza Bibele ni Timbhoni. Loko ndzi dyondze ko hlayanyana, ndzi tlhele ndzi sungula ku navela ku tirhela Yehovha hi mbilu hinkwayo, kutani ndzi sungule ku hlanganyela eka mintirho hinkwayo ya Timbhoni le Almaty. Hi September 1997, ndzi sungule ku va phayona kumbe mutirheli wa nkarhi hinkwawo.

Endzhaku ka lembe, Tatana u ndzi endzerile. Ndzi tsutsumele eka yena kutani hi vukarhana. U kombele leswaku ndzi n’wi rivalela eka ndlela leyi a ndzi khomeke ha yona eka malembe hinkwawo lama hundzeke. U vule leswaku a a nga ndzi twisisi naswona a a nga swi twisisi leswi a ndzi swi pfumela. Ndzi te, “Ndzi ku rhandza swinene Tatana.”

Ndzi tsake ngopfu loko Tatana a amukele buku leyi sekeriweke eBibeleni kutani a kombela ni Bibele, a vula leswaku u lava ku yi hlaya hinkwayo! Endzhaku ka lembe, u tlhele a ndzi endzela, enkarhini wolowo u te na Manana. Loko hi ri eHolweni ya Mfumo, vanhu va tinxaka to hambana-hambana va va xewetile va tlhela va titivisa. Sweswo swi tsakise Tatana, naswona u sungule ku swi tsakela swinene ku hlaya tibuku ta Timbhoni.

Mikateko Leyi Fuweke

Hi September 2001, ndzi tekane na nhwanyana lonene wa Murhaxiya la vuriwaka Yelena. U khuvuriwe hi 1997 naswona u sungule ku phayona hi May 2003. Lexi hi tsakiseke ngopfu, hi kume leswaku vatswari va mina va sungule ku dyondza Bibele ni Timbhoni naswona a a va sungula ku va ni vuxaka na Yehovha. Entiyisweni, a a ndzi nga kholwi kukondza Tatana a ndzi byela hi yexe. U ndzi bele riqingho a ndzi byela leswaku Yehovha i Xikwembu xin’we xa ntiyiso!

Ndzi tsake ngopfu leswi laha Almaty ndzi koteke ku dyondza Bibele ni vanhu lava humaka etindhawini to tala, ku katsa ni le Chayina, Iran, Pakistan, Siriya ni le Turkey. Ku nga ri khale, mufundhisi wa le Iran u ndzi kombele leswaku ndzi dyondza Bibele na yena hi ririmi rakwe ra Xiperesiya. Khale ka ndhuna-nkulu ya le Afghanistan yi tsakisiwe ngopfu hi leswi yi swi dyondzeke malunghana na Yehovha. Nakambe a ndzi tsake ngopfu loko ndzi dyondza ni munhu un’wana la humaka eSiriya hi ririmi ra manana ra Xikurd swin’we ni ku dyondza ni vanhu hi Xikazakh ni Xirhaxiya, ku nga tindzimi tin’wana leti ndzi ti dyondzeke ndza ha ri ntsongo.

Sweswi, mina na Yelena hi hlanganyela evandlheni leri tirhisaka Xikazakh, ku nga rin’wana ra mavandlha yo tlula 35 ya Timbhoni ta Yehovha eAlmaty. N’wexemu, mina na Yelena hi ve ni lunghelo ro tirha swa xinkarhana ehofisini ya Timbhoni ta Yehovha leya ha ku hetiwaka ku akiwa leyi nga ekusuhi ni le Almaty.

Ndzi tshame ndzi dyondzisiwa ku venga valala va mina, kambe Yehovha u ndzi dyondzise ku rhandza vanhu hinkwavo. Ndza khorwiseka leswaku a hi fanelanga hi kuceteriwa ku tshika ku tsakisa Yehovha Xikwembu, hambiloko hi tshikileriwa hi maxaka ni vanghana lava hi navelelaka leswinene. (Vagalatiya 6:9) Sweswi ndzi tsake ngopfu leswi mina ni nkatanga hi nga ni “swo tala swo swi endla entirhweni wa Hosi.”—1 Vakorinto 15:58.

[Marito lama tshahiweke exihlokweni lama nga eka tluka 13]

Manana u ndzi tshinyile leswaku loko ndzo ya emahlweni ndzi endla sweswo u ta byela Tatana hi ta swiendlo sweswo

[Xifaniso lexi nga eka tluka 15]

Holo ya Mfumo eKaratau, laha a a ndzi hlanganyela kona loko ndza ha ri ntsongo

[Xifaniso lexi nga eka tluka 15]

Vatswari va mina, lava sweswi va rhandzaka ntirho wa hina

[Xifaniso lexi nga eka tluka 15]

Mina na Yelena hi siku ra hina ra mucato

[Xifaniso lexi nga eka tluka 15]

Ndzi ri na Yelena emiakweni leyintshwa ya hofisi leyi nga ekusuhi ni le Almaty