“Yehovha, U Ndzi Kumile!”

Hi ku vula ka Nelly Lenz

“Xana mi Timbhoni ta Yehovha?” Ndzi vutise vavanuna vambirhi lava ngheneke ekaya ka hina. Va hlamule va ku: “Ina.” Ndzi huwelele ndzi ku, “Na mina!” A ndzi ri na 13 wa malembe naswona a ndzi nga yi eminhlanganweni eHolweni ya Mfumo. Vatswari va mina a va nga ri Timbhoni ta Yehovha. Kutani, ha yini a ndzi ti vitana Mbhoni?

LOKO a ku nga ri Timbhoni ta Yehovha, kumbexana ingi ndzi nga tswariwanga. Manana u tike khwiri ra mina loko a ha tshama eMontreal, le Quebec eCanada. A a ri ni malembe ya 17 ntsena. Vandyangu wa ka vona va n’wi tshikilerile va n’wi sindzisa leswaku a humesa khwiri. U pfumerile.

Manana u kombele ku xwa siku rin’we entirhweni leswaku a ya humesa khwiri. Foromani yakwe leyi a yi ri Mbhoni ya Yehovha, swi vonaka yi swi kumile leswi Manana a a kombelela swona ku xwa entirhweni. Yi hlamusele Manana hi ku komisa ndlela leyi vutomi byi nga bya risima ha yona. (Pisalema 139:13-16) Loko a ri endleleni yo ya etliliniki, Manana u gayele hi mhaka leyi muthori wakwe a n’wi byeleke yona. U kunguhate ku ka a nga ri humesi khwiri. Endzhaku ko tswariwa ka mina hi 1964, manana u ndzi yise evuhlayiselweni bya vana lava nga riki na vatswari.

Ndzi Kuma Ntiyiso Wa Bibele Ro Sungula

Loko ndzi ri ni malembe mambirhi, manana swin’we ni nuna wakwe lontshwa va ndzi humesile evuhlayiselweni bya vana lava nga riki na vatswari. Loko hi tshama eSainte-Marguerite-du-Lac-Masson, va sungule ku dyondza Bibele ni Timbhoni ta Yehovha naswona a va ya eminhlanganweni ya vandlha. Hambiswiritano, ku nga ri khale hi rhurhele eBoisbriand kutani vatswari va mina va tshike ku dyondza.

Endzhaku ka malembe yo hlayanyana, va tlhele va sungula ku dyondza. A ndzi rhiya ndleve leswaku ndzi twa leswi vuriwaka malunghana ni ntshembo wa le Bibeleni hi paradeyisi emisaveni. (Luka 23:43) Ndzi sungule ku rhandza Yehovha swinene.

Hambiswiritano, siku rin’wana Manana u ndzi byele leswaku va tshike ku dyondza ni Timbhoni xisweswo a hi nge he yi eHolweni ya Mfumo. Eku sunguleni, a ndzi tsakile. Leswi a ndza ha ri ni nhungu wa malembe, a ndzi pfa ndzi vona minhlangano yi hlwela ku huma. Kambe, eka vusiku byebyo a ndzi lava ku vulavula na Yehovha hi xikhongelo kambe a ndzi ehleketa leswaku a nge ndzi yingisi.

Hi Sonto leyi landzelaka ninhlikanhi, ndzi vone vaakelani va hina lava a va ri Timbhoni ta Yehovha va huma va ya eminhlanganweni ya vona eHolweni ya Mfumo. Ndzi sungule ku rila kutani ndzi kombela eka Xikwembu ndzi ku, “Ha yini vana va vona va ya eminhlanganweni kutani mina ndzi nga swi koti ku ya?” Nilokoswiritano, marito ya Pisalema 33:18 ma vurisa: “Waswivo! Tihlo ra Yehovha ri le henhla ka lava va n’wi chavaka, lava rindzelaka musa wakwe wa rirhandzu.”

Ku Tlhelela eHolweni Ya Mfumo

Endzhaku ka mavhiki manharhu, ndzi endzele vaakelani va hina kutani ndzi byele mana wa kona, Lilianne, leswaku ndzi lava ku ya eminhlanganweni. Lilianne u vule leswaku a swi nga ta koteka hikuva manana a a nga lavi no twa hi Timbhoni ta Yehovha. Kambe, ndzi sindzisile. Kutani u fambe na mina ekaya kutani a kombela Manana loko swi nga koteka leswaku ndzi famba na vona. Lexi ndzi hlamariseke, Manana u pfumerile. U vule leswaku minhlangano a yi ta ndzi dyondzisa misinya ya milawu leyinene. Kutani a ndzi ya eminhlanganweni Sonto yin’wana ni yin’wana.

Ndzi kote ku ya eminhlanganweni ya vandlha ku ringana kwalomu ka malembe manharhu. Kambe loko ndzi ri ni malembe ya 11, vatswari va mina va dlaye vukati kutani manana u rhurhile. Nakambe, Timbhoni ta Yehovha ti ndzi lahlekerile.

Hi Hlangana Ndzi Nga Swi Rindzelanga

Siku rin’wana loko ndzi tshame emahlweni ka yindlu ya ka hina exitupini, Timbhoni timbirhi—ku nga Eddie Besson na Don Fisher—va tile kutani va ndzi vutisa loko vatswari va mina va ri kona ekaya. Loko ndzi va byele leswaku a va kona, vavanuna lava va hundzulukile, va famba. Kambe ndzi tsutsume ndzi ya eka vona, hi kona laha rungula leri ndzi ri boxeke eku sunguleni ri paluxekeke kona.

Entiyisweni, vavanuna lavambirhi va hlamarile ku ndzi twa ndzi tivula Mbhoni ya Yehovha. Ndzi hlamusele xiyimo xa mina kutani ndzi va kombele ku tlhela va vuya madyambu wolawo. Loko ndzi byele Manana leswaku Timbhoni ti ta hi endzela, u hlundzukile kutani a vula leswaku a nge ti pfumeleli ti nghena ekaya ra hina. Entiyisweni, u kunguhate ku famba ti nga si fika. Ndzi rilele Manana, ndzi n’wi kombela leswaku a nga fambi. Loko a ha tilunghiselela ku famba, ku twakale ku gongondza, a ku ri Eddie Besson. Mawaku ndlela leyi ndzi tsakeke ha yona loko Manana a amukela dyondzo ya Bibele!

Eku heteleleni ndzi tlhele ndzi sungula ku va kona eminhlanganweni ya vandlha! Hambiswiritano, manana u tlhele a tshika ku dyondza ku nga si hela ni lembe. Enkarhini lowu, u ndzi sivele ku vulavurisana ni Timbhoni a tlhela a cukumeta minkandziyiso hinkwayo ya Timbhoni ta Yehovha leyi a yi kumaka. Kambe ndzi kote ku tumbeta Bibele, risimu, tivholumo timbirhi ta Xihondzo xo Rindza, tibuku timbirhi ta Buku Ya Lembe Ya Timbhoni Ta Yehovha ni buku leyi nge Ntiyiso Lowu Yisaka eVuton’wini Lebyi Nga Heriki.a Siku leri ndzi heteleleke ha rona ku dyondza, ndzi vutise Eddie Besson leswaku ndzi nga endla yini hikuva a ndzi rhandza Yehovha hi mbilu ya mina hinkwayo. U ndzi khutaze leswaku ndzi dyondza ndzi ri ndzexe ni ku khongela nkarhi ni nkarhi. U ndzi tiyisekisile leswaku Yehovha u ta ndzi khathalela. Hi nkarhi wolowo a ndzi ri ni 14 wa malembe.

Ku Fambisa “Minhlangano” Ya Mina Ndzi Ri Ndzexe

Ku sukela kwalaho, Sonto yin’wana ni yin’wana a ndzi nghena ekamareni ra mina kutani ndzi endla onge ndzi le minhlanganweni. A ndzi pfula ni ku pfala hi risimu leri nge “Tshama U Langute Hakelo!” hikuva hi rona ntsena risimu ra Mfumo leri a ndzi ri tsundzuka. Ninamuntlha, loko ndzi ri yimbelela ndzi xiririka mihloti. Nakambe ndzi dyondze ni swihloko swa Xihondzo xo Rindza eka tivholumo leti a ndzi ri na tona. A ndzi gimeta “nhlangano” wa mina hi xikhongelo. Hambileswi a ndzi nga ha hlangani ni Timbhoni, a ndzi swi twa leswaku onge Yehovha u le kusuhi na mina.

Loko ndzi ri ni 17 wa malembe, mina na Manana hi rhurhele eMontreal. Malembe wolawo a ma nononh’wa tanihi leswi a ku nga ri na rirhandzu ekaya.

U Ndzi Kumile!

Siku rin’wana Manana u amukele buku leyi nge U Nga Hanya Hi Masiku eParadeyisini eMisaveni eka Timbhoni ta Yehovha. Loko ndzi vuya, ndzi yi vone ehenhla ka tafula kutani ndzi sungule ku yi hlaya. Loko ndzi vone leswaku yi tirhisa vito ra Xikwembu, ku nga Yehovha, ndzi sungule ku rila naswona ndzi khongela embilwini ndzi ku, “Yehovha u ndzi kumile!”

A ndzi lava ku hlangana ni vamakwerhu va Vakreste. Kambe, njhani? Manana u ndzi byele leswaku swi nga ha endleka muakelani wa hina a ri Mbhoni ya Yehovha. Kutani loko ndzi ri endleleni yo ya entirhweni, ndzi hundze ekaya ra muakelani wa hina kutani ndzi gongondza. Wanuna un’wana loyi a biwe hi vurhongo, u pfule nyangwa. U hlamarile loko ndzi n’wi byela leswaku ndzi Mbhoni ya Yehovha naswona ndzi lava ku khuvuriwa! U hlele leswaku Mukreste wa xisati loyi a vuriwaka Josée Miron a dyondza na mina Bibele. Nakambe Manana u sungule ku lwisana ni dyondzo ya mina ya Bibele. U ndzi byele leswaku ndzi fanele ndzi rindza kukondza ndzi va ni 18 wa malembe hi kona ndzi nga vaka Mbhoni.

Xana A Ndzi Fanele Ndzi Fularhela Yehovha Hikwalaho Ka Ndyangu?

Muthori wa mina u swi xiyile leswaku xiyimo xa le kaya a xi nyanya. Minkarhi hinkwayo a a ndzi rhamba leswaku ndzi hungasa na yena swin’we ni nsati wakwe hi mahelo-vhiki. Leswi a ndzi rhandza tihanci, a hi tala ku ya gada tihanci swin’we. Ndzi va teke va ri vatswari va mina.

Siku rin’wana muthori wa mina u ndzi byele leswaku yena ni nsati wakwe va ndzi rhandza ngopfu naswona va lava ndzi ta tshama na vona. A a ndzi nyika nchumu lowu ku nga khale ndzi wu lava—ndyangu lowu wu ndzi rhandzaka. Kambe a ku ri ni xipimelo xin’we—a ndzi fanele ndzi tshika ku tihlanganisa ni Timbhoni ta Yehovha. Va ndzi nyike vhiki leswaku ndzi ya ehleketa ha swona, kambe a ndzi nga lavi hambi ku ri siku ku ehleketa hi mhaka leyi. Ndzi va hlamule hi nkarhi wolowo. Yehovha a nga ndzi fularhelanga naswona a ndzi nge n’wi fularheli.

Ndzi Tirhela Xikwembu

Leswi a ndzi karhatiwa ekaya, ndzi fambile ndzi ya tshama na tata wa mina wa vumbirhi. U ndzi khutaze leswaku ndzi hambeta ndzi dyondza naswona hi December 17, 1983, loko ndzi ri ni 19 wa malembe, ndzi khuvuriwile. A ndzi tsake ngopfu loko ndzi vona Eddie Besson hi siku leri ndzi khuvuriweke ha rona. Hi nkarhi wolowo a a nga kanakani leswaku ndzi Mbhoni ya Yehovha!

Hambiswiritano, tata wa mina wa vumbirhi u cince mahanyelo endzhaku ka loko ndzi khuvuriwile. Nkarhi un’wana ni un’wana loko a ndzi vona ndzi khongela, a a ba pongo naswona a ndzi hoxa hi swilo! Nakambe u sindzise leswaku ndzi yisa tidyondzo ta mina emahlweni hi ndlela leyi nga ta kavanyeta tipakani ta mina to va phayona, ku nga muvuri wa evhangeli wa nkarhi hinkwawo. Eku heteleleni, u ndzi hlongole ekaya. U ndzi nyike cheke ya $100 kutani a ndzi byela leswaku loko ndzo yi tirhisa ndzi ta swi tiva leswaku Yehovha a nga ndzi khathaleli.

Ndzi ve phayona hi September 1, 1986 naswona a ndzi si yi tirhisa cheke yoleyo ku fikela ninamuntlha! Minkarhi yin’wana a swi tika ku phayona ematiko-xikaya ndzi nga ri na movha. Kambe swirho swa vandlha ra kwalaho a swi ndzi seketela swinene ni ku ndzi pfuna.

Hi ku famba ka nkarhi, ndzi hlangane ni wanuna wa tintswalo la nga Mukreste, la vuriwaka Ruben Lenz. Hi tekane hi 1989. Sweswi Ruben i nkulu evandlheni ra le Milton, eOntario le Canada, laha hi fikeke kona hi 2002. Vukati bya hina i yin’wana ya mikateko leyikulu leyi Yehovha a ndzi nyikeke yona. Ndzi ye emahlweni ni ntirho wa nkarhi hinkwawo kukondza hi kuma n’wana wa hina wo sungula, Erika, hi 1993. Endzhaku ka malembe manharhu hi ve ni n’wana un’wana wa mufana la vuriwaka Mika. Endzhaku ka nkarhi wo leha ndzi biwa hi xivundza, Yehovha Xikwembu u ndzi katekise hi ndyangu lowu n’wi rhandzaka swinene hilaha ndzi n’wi rhandzaka hakona na mina.

Hambileswi nkarhi ni nkarhi a ndzi hambana ni vanhu va Yehovha loko ndza ha kula, a ndzi si tshama ndzi tshika ku tshembela eka Xikwembu ni ku namarhela eka ntshembo wa vutomi lebyi nga heriki eParadeyisini. (Yohane 3:36) Ndzi nkhensa swinene hileswi Yehovha a ndzi ‘kumeke’!

[Nhlamuselo ya le hansi]

[Xifaniso lexi nga eka tluka 15]

Ndzi gade hanci ya muthori wa mina

[Xifaniso lexi nga eka tluka 15]

Nelly Lenz a ri ni nuna wakwe, Ruben swin’we ni vana va vona Erika na Mika