Ku Tlangela Nseketelo Wa Yehovha Lowu Tshembekaka

HI KU VULA KA SHARON GASKINS

PARADEYISI emisaveni! Ndzi tivone ndzi tlulatlula ebyanyini, ndzi hlongorisa tiphaphatana, ndzi tlanga-tlanga ni swinghalana. Ndzi swi twe swi tsakisa! Kambe a ndzi kanakana. I kangani ntshembo wa mina wu hela hi ku hetiwa matimba!

Hi laha ndzi tsundzukaka ha kona, xitulu xa vavabyi a xi ri munghana wa mina wa siku na siku. Ku sukela loko ndzi velekiwile, ku vaviseka byongo bya mina ndza ha ri ntsongo swi ndzi tsone mintsako ya vutsongwana. Vana van’wana a va tiphina hi ku rheta-rheta eayisini ni hi swikanyakanya, kambe mina a ndzi tshama ndzi ri swanga ndzi nga swi koti ku famba. Kutani loko Manana a ndzi yise eka vahanyisi va ripfumelo hi ku hamba-hambana ka vona, a hi tshemba leswaku ku ta humelela hlori. Kambe, nkarhi na nkarhi a a ndzi suka va nga endlanga nchumu. A swi ndzi heta matimba, kambe yena a swi n’wi tshova mbilu!

Hi ku navela ntshembo wa ntiyiso, mana wa mina u sungule ku dyondza Bibele ni Timbhoni ta Yehovha eku sunguleni ka 1964. Hi nkarhi wolowo a ndzi ri ni malembe ya tsevu ni hafu.

A swi tsakisa ku tiva leswaku ku tshame ku va ni paradeyisi yo xonga la misaveni. Khombo ra kona, munhu wo sungula Adamu, u yi lahlile, kambe a ndzi navela ku tshinelelana loku a tshameke a va na kona ni Xikwembu. Xana a swi ta va njhani ku va ni vuxaka ni Xikwembu? Kumbe ku hanya enkarhini lowu N’wana wa xona a fambeke ha wona emisaveni? Milorho ya mina ya nhlikanhi yi ndzi yise ni le ka masiku ya Paradeyisi leyi taka. Hambi ku ri eka malembe wolawo yo sungula, a ndzi swi vona leswaku hi kume ntiyiso.

Manana u sungule ku famba ni ndyangu eHolweni ya Mfumo ya Timbhoni ta Yehovha. Minhlangano ya vona a swi hambane ekule ni leswi hi swi voneke etikerekeni! Vanhu va kona ni ndhawu ya kona swi ndzi khumbile swinene.

Eku sunguleni, ku hi yisa eHolweni ya Mfumo a ku ri ntirho eka manana. Handle ka mina, a ku ri ni vana van’wana vanharhu lavatsongo, naswona a hi nga ri na movha. A hi famba hi thekisi loko a ri na mali. Ndzi tsundzuka Sonto yin’wana leyi a nga khoma ku tika. A ku nga vonaki thekisi ni yin’we. Kutani, hi nga swi rindzelanga, ku ta fika munhu un’wana hi lori yakwe a hi khandziyisa. A hi fikanga hi nkarhi eminhlanganweni, kambe kona hi fikile. Hi nkhense Yehovha swinene!

Hi ku hatlisa vamakwerhu va hina lava rhandzekaka va moya lava a va ri ni timovha, hi rirhandzu a va siyerisana va hi rhwala. Xikhutazo xa manana xa leswaku hi nga kayeli minhlangano handle ka loko hi vabya ngopfu swi ndzi kombe nkoka wa ‘ku hlengeletana ka hina swin’we.’ (Vaheveru 10:24, 25) Hi ku susumetiwa hi leswi a swi dyondzeke, mana wa mina u nyiketele vutomi byakwe eka Yehovha naswona u khuvuriwile hi 1965.

Hi nkarhi wolowo a ndzi kurile ndzi kota ku tlangela minhlangano hi xitalo. Le Vandlheni ra Cypress Hills le Brooklyn, New York, a ku ri ni Valungu, vantima, Vahispanic ni van’wana va gandzela swin’we. A swi ri swinene leswaku vanhu lava chavaka Xikwembu va hanya hi vumakwerhu byo tano bya ntiyiso.—Pisalema 133:1.

Manana u ndzi dyondzise ku lunghiselela minhlangano. Leswi a swi nga karhati emiehleketweni, kambe emirini a swi karhata. Vuvabyi bya byongo byi hundzula swilo switsongo swi va leswikulu. A ndzi nga swi koti, hambi ku ri sweswi, ku tsala layini leyi ololokeke leswaku ndzi fungha tinhlamulo eka tibuku ta hina ta Bibele. Hambi swi ri tano, hi ku titoloveta ndzi antswise matsalelo ya tilayini.

Miehleketo ya mina a yi pfhupfhuma hi swilo swo swi vula. Kambe loko swi ta enon’wini, marito a ma khomana. A swi lava ndzi nonokanyana leswaku misiha ya mina yi nga tiyi. Nakambe a ndzi fanele ndzi xiya ku vitana rito rin’wana ni rin’wana khwatsi hi laha ndzi kotaka ha kona. A ndzi karhateka loko nhlamulo yi nga humanga hi mfanelo kumbe loko ndzi tiva leswaku vanhu a va ma twisisanga marito ya mina. Kambe, loko se va ndzi tiva vamakwerhu va xinuna ni va xisati evandlheni va swi kotilenyana ku twisisa mavulavulelo ya mina. Hambi swi ri tano, ndza ha nonon’hweriwa hi xiphiqo lexi.

Tin’hweti Ta Tsevu Leti Hlundzukisaka

Loko ndzi ri ni malembe ya nhungu hi vukhale, ndzi ve ni ntokoto wa tin’hweti ta tsevu lowu ndzi khumbeke ku ta fika namuntlha. Ku nga khathariseki vutshunguri hinkwabyo bya miri, bya ndhawu ni bya ririmi lebyi ndzi byi kumeke, madokodela ma ndzi yise exibedlhele xo hanyisa le Vupela-dyambu bya Haverstraw, New York. Mina ni mana wa mina a hi tshoveke timbilu. Emalembeni ya le mahlweni, loko madokodela ma hoxisile ma vula leswaku a swi fambi kahle emiehleketweni, u ndzi byele leswaku a nge ndzi fambisi. Kutani hambi ku ri ku hambana ka xinkarhananyana a ku tika eka yena. Hambi swi ri tano, u swi vonile leswaku ku hanya vutomi lebyi humelelaka handle ka yena ni tata wa mina a swi vula ku kota ku tihlayisa.

Ndhawu ya kona a yi ri kahle, kambe ndzi titwe ndzi cukumetiwile. Ku kolola ni ximbilwambilwana swi paluxe ndlela leyi ndzi titwaka ha yona hi ndhawu leyi. Vatswari va mina a va nga tali ku teka riendzo ra tiawara tinharhu hi bazi va ndzi endzela, ngopfu-ngopfu leswi Manana a tikile hi n’wana wakwe wa vuntlhanu. Loko va famba, ndzi karhateke ngopfu hikuva dokodela u vule leswaku va fanele va nga ti ko tala ngopfu. Ndzi pfumeleriwe ku ya ekaya kambirhi ntsena.

Vatshunguri va ndzi dyondzise ku famba hi minxongotelo ni tinhonga ta swigono. A ti vonaka ti tika ngopfu. Hambi swi ri tano, ntiko lowu wu ndzi pfune ku yima ndzi tiyile, ndzi nga wi. Leri a ku ri goza ro sungula ro famba ndzexe handle ka minxongotelo.

Ku tsemelela swakudya, ku fasa tinkunupu—ntirho wun’wana ni wun’wana lowu lavaka tintiho—a wu tika kumbe wu nga koteki. Kambe hi ndlela yo karhi ndzi kote ku tidyisa ni ku tiambexa. Leswi endzhaku swi ndzi pfunile entirhweni wa Xikwembu.

Ku leteriwa ka mina a ku herile, kambe a ndzi tlhelele ekaya nakambe. Manana u ndzi tirhise hi tindlela ta mina letintshwa. Ku endla sweswo a ku ri nyimpi ya mintlhaveko, hikuva hambi leswi a ndzi lava ku tiendlela swilo, a ndzi tsandzeka ku swi endla kahle, swi dya nkarhi ni ku karhalisa. Phela, loko ndzi ambalela ku ya eminhlanganweni a swi ndzi tekela tiawara timbirhi!

Loko hi famba hi tlula xitarata xa Holo ya Mfumo, ndzi ri karhi ndzi tifambela. A ku ri nchumu lowukulu hakunene!

Siku Ro Tsakisa Swinene eVuton’wini Bya Mina

Mana wa mina a tiyiseka leswaku ndyangu wu va ni swakudya swa moya leswi ringaneleke. U dyondze na mina naswona a lava leswaku ndzi hlaya nkandziyiso wun’wana ni wun’wana wa timagazini ta hina, Xihondzo xo Rindza ni Xalamuka! A ndzi fanele ku lunghiselela minhlangano ni ku ya eka yona. Hambi leswi miehleketo ni mbilu ya mina swi tswongeke vutivi lebyi, a ku sele mianakanyo leyikulu ya ku nyiketela vutomi bya mina eka Yehovha ni ku swi kombisa hi nkhuvulo wa mati. Manana u ndzi pfunile ku vona leswaku ku nga khathariseki vugono bya mina, Xikwembu a xi lava ndzi tilangutela emoyeni. A ndzi nga ta langutela ku nghena emisaveni leyintshwa hikwalaho ka yena, ndzi nghena eka yona ndzi khomelele yena.

A ndzi xi rhandza Xikwembu, kambe xiyimo xa mina xi ndzi hambanise ni van’wana—nchumu lowu vavaka swinene loko wu humelela eka n’wana wa kondlo-a-ndzi-dyi. A swi tika ku pfumela ku tsana ka mina. Hakanyingi a ndzi hlundzuka, naswona ndzi boheke ku swi lawula ndzi nga si khuvuriwa. (Vagalatiya 5:19, 20) Naswona ku vuriwa yini loko a ndzi nga ta swi kota ku khomelela eku tinyiketeleni ka mina eka Yehovha?

Nkulu wa vandlha u vulavule na mina, a komberiwe hi manana. U tshahe xivutiso xa muprofeta Eliya, lexi a xi vutiseke Vaisrayele: “Mi ta khuta hi milenge mimbiri ku yisa kwihi šana?” (1 Tihosi 18:21) Ina, Yehovha a nga swi tsakeli ku tshama ndzi nga tivi leswaku ndzi yime kwihi.

Ndzi xalamukile emoyeni ivi ndzi khongelela swinene ku pfuniwa hi Yehovha ni ku tiyimisela ku nyiketela vutomi bya mina eka yena. Makwerhu un’wana wa xisati evandlheni u dyondze na mina. A a ri ntsongo ka mina naswona a a feriwe hi mana wakwe a ha ri ntsongo. Hambi swi ri tano, a a tinyiketerile eka Xikwembu a ha ri ntsongo swinene.

Loko ndzi ri ni malembe ya 17, ndzi ehlekete kahle. A ndzi lava ku tirhela Yehovha hi laha ndzi kotaka ha kona. August 9, 1974—siku leri ndzi khuvuriweke ha rona—a ku ri siku ro tsakisa swinene evuton’wini bya mina.

Ntsako eVutirhelini

Ku hlanganyela evutirhelini swi pfuxe swihinga swin’wana leswikulu. Xiphiqo lexikulu a ku ri ku endla leswaku ndzi twisisiwa. A ndzi vulavula khwatsi hi laha swi kotekaka ha kona. Kutani, loko swi fanerile, loyi ndzi fambaka na yena evutirhelini a a phindha marito ya mina eka n’wini wa muti. Van’wana a va nga hlamuli kahle, a va ndzi languta tanihi xitirhisiwa xa Timbhoni. Kambe ku chumayela i mfanelo ya mina ni ku navela loku humaka embilwini yanga.

Ku famba hi yindlu na yindlu eka xitarata xin’we ntsena swa ndzi dlaya. Tindlu to tala ensin’wini leyi hi vekaka ka yona vumbhoni ti ni switepisi, swi endla leswaku ndzi nga ti fikeleli. Hi vuxika, switarata leswi lemiweke hi ayisi a swi endla leswaku ntirho wa yindlu na yindlu ndzi nga wu koti. (Mintirho 20:20) Hambi swi ri tano, vamakwerhu va moya va pfunile swinene naswona Yehovha sweswi u ndzi katekisile hi rihlaka ro kotisa movha leri olovisaka vutirheli.

Hi ku famba ka nkarhi ndzi sungule ku veka vumbhoni hi ku tsala mapapila. Ku tsala mapapila hi voko a swi nga ta pfuna hikuva matsalelo ya mina a ma nga hlayeki eka vanhu vo tala. Kutani ndzi sungule ku tsala hi muchini wo thayipa wa ghezi. Ndzi thayipa hi ku nonoka hikwalaho ka mavoko ya mina lama nga lawulekiki kahle. Hakanyingi, loko ndzi lava ku ba letere ro karhi, a ndzi ba rin’wana. Swi nga ha teka awara kumbe ku tlula ku thayipa tluka rin’we.

Ku nga khathariseki ku pfumala ntamu, nkarhi na nkarhi ndzi tirha tanihi phayona ra nkarhinyana, ndzi tirhisa tiawara ta 60 kumbe ku tlula evutirhelini hi n’hweti. Leswi swi lava xiyimiso lexinene, matshalatshala lama engetelekeke ni nseketelo wa vapfumeri-kulorhi. Moya wa vona wa vuphayona wa ndzi khutaza. Manana na yena u veka xikombiso lexinene hi ku tirha tanihi phayona ra nkarhi hinkwawo kumbe ra nkarhinyana hambi a langutane ni maxangu, vuvabyi ni ntlhontlho wo kurisa vana va nkombo endyangwini lowu avaneke hi tlhelo ra vukhongeri.

Loko Ndzi Ri Swanga

Loko ndzi ri ni malembe ya 24, ndzi ehlekete ku ya tshama ndzi ri swanga. Ku rhurhela ka mina le xiyengeni xa Bensonhurst le Brooklyn ku ve nkateko. Vandlha ra Marlboro a ri kotisa ndyangu lowu hlanganeke. A swi tiyisa ripfumelo hakunene ku va na vona! Hambi leswi a ku ri ni timovha timbirhi kumbe tinharhu evandlheni, vamakwerhu va moya a va ndzi yisa eka minhlangano hinkwayo. Kambe a ndzi tshamanga nkarhi wo leha.

Hi ku titwa ndzi tsandzekile hi ku helela, ndzi vuyele endyangwini wa ka hina, ndzi khomiwa hi gome ku ringana malembe manharhu. Ximbilwambilwana xi ku be. Kutani ku vuya ni miehleketo ya ku tisunga ni tindlela tin’wana ta ku tisunga. Rifu a ri chavisa. Kambe ndzi titshege eka Xikwembu ivi ndzi tshembisa leswaku ndzi ta tlangela nyiko ya xona ya vutomi. Nchavelelo ni ndzayo ya rirhandzu hi le ka vakulu. Leswi, kun’we ni xikhongelo, dyondzo ya mina n’wini, ku lehisela ndyangu wa ka hina mbilu ni mpfuno wun’wana lowukulu, swi ololoxe mianakanyo ya mina.

Hi Xihondzo xo Rindza, Yehovha u nyike vutlharhi malunghana ni gome, hi vunene. Ina, wa va khathalela vanhu vakwe ni ku twisisa mintlhaveko ya hina. (1 Petro 5:6, 7) Hi ku famba ka nkarhi, gome lerikulu ri hungutekile. Endzhaku ka malembe ya khume, Yehovha wa ha ndzi pfuna ku langutana ni ku vilela ni gome. Minkarhi yin’wana ku titwa ndzi nga pfuni ha nchumu ku lave ku ndzi heta matimba. Hambi swi ri tano, xikhongelo, dyondzo ya Bibele ni ndyangu wa ka hina wa moya i swipfuneto leswinene leswi ponisaka.

Endzhaku ko lava ndhawu yin’wana yo tshama ka yona kambe ndzi nga humeleli, ndzi endle xiboho xa ku tshama ni ndyangu wa ka hina vutomi bya mina hinkwabyo. Kutani Yehovha a hlamula swikhongelo swa mina. Ku kumeke ndhawu exiyengeni xa Bedford-Stuyvesant le Brooklyn. Eku heleni ka ximumu xa 1984, ndzi rhurhele kona naswona ndza ha tshama kona ku sukela enkarhini wolowo.

Swirho swa Vandlha ra Lafayette leri nga ni rirhandzu a swi ndzi rhwala ndzi ya eminhlanganweni hi musa. Ndza ha yi tsundzuka kahle Dyondzo ya Buku ya Vandlha yo sungula leyi ndzi yeke ka yona. A yi khomiwe eka xithezi xa vumune—naswona a ku nga ri na khexe! I Yehovha ntsena a nga ndzi pfuna ndzi khandziya switepisi sweswo. Hi ku famba ka nkarhi ndzi nyikiwe ndhawu leyi fambekaka ku antswa. Naswona sweswi Yehovha u ndzi katekise hi lunghelo ro va ni Dyondzo ya Buku ya Vandlha ekaya ka mina.

Moya lowunene wa vuphayona wa nghena eka vandlha leri. Loko ndzi fika, a ku ri ni maphayona ya kwalomu ka 30, ni van’wana va ndzi khathalerile. Moya wa ku hiseka wu ndzi khutaze ku hamba ndzi va phayona ra nkarhinyana.

Hi April 1989 Vandlha ra Lafayette ni ra Pratt ma ake Holo leyintshwa ya Mfumo exitarateni lexi yindlu ya mina yi nga ka xona. Swi endleke hi nkarhi wa kona, hikuva hikwalaho ka ku vaviseka kun’wana ka miri, ku famba a ku ri xiphiqo nakambe. Hambi swi ri tano, hi rihlaka ro kotisa movha, ni ku pfuniwa hi vamakwerhu va moya va xinuna ni va xisati, ku famba ku ya ni ku vuya eminhlanganweni a swi tsakisa. Ndzi wu tlangela swinene mpfuno wo tano wa rirhandzu!

Ku Tlangela Nseketelo Wa Xikwembu

Hambi leswi milenge ya mina yi nga tiyangiki, mbilu ya mina yi tiyile. Dyondzo leyinene yi endle vutomi byi olovanyana, kambe Xikwembu xi ndzi tiyisile. Minkarhi yin’wana a ndzi nga swi tivi leswaku swakudya ndzi ta swi kuma kwihi, kambe Yehovha u ndzi seketerile naswona u ve Muphameri la tshembekaka. Hakunene, marito ya Davhida i ya risima eka mina: “A nḍi ri l’ontŝha, kutani nḍi dyuharile, kambe a nḍi v̌onanga l’a lulameke a ṭhikiwa, ni v̌ana v̌a yena v̌a kombele v̌uŝa bya v̌ona.”—Pisalema 37:23-25.

Minkarhi yo tala Yehovha u ndzi pfunile ku hlayisa xiyimo xa Matsalwa hi ku ndzi pfuna ku ala ku amukela ngati loko ku endliwa vuhandzuri. (Mintirho 15:28, 29) Tata wa mina wa ha ku fa. Ku lahlekeriwa hi munhu loyi ndzi n’wi toloveleke hi ndlela leyi a swi twisa ku vava. Matimba ya Yehovha hi wona ntsena ma ndzi humeseke eka miringo leyi ni yin’wana.

Rihanyo ra mina ri nga ha ya ri tsana, kambe ku tshembela ka mina eka Xikwembu ni vuxaka bya mina na xona i vutomi bya mina. Mawaku ntsako lowu ndzi nga na wona hi ku va exikarhi ka vanhu va Yehovha ni ku va ni nseketelo wa yena lowu tshembekaka!