Ndzi Ta ‘Tlula Kukota Mhunti’

HI KU VULA KA FRANCESCO ABBATEMARCO

“Ha yini Xikwembu xi pfumelele leswaku leswi swi humelela? Ndzi fela yini?” Ndzi tivutise swivutiso leswi ko tala! A ndzi nga swi koti ku tiyisela mhaka ya leswaku ndzi ta heta vutomi bya mina ndzi famba hi xitulu xa lava lamaleke, ndzi nga swi koti ku tirhisa mavoko ni milenge ya mina.

HI 1962, edorobeni leritsongo ra le Italiya leri vitaniwaka Basilicata, a ku sele katsongo vutomi bya mina byi hela ndzi nga si velekiwa. Manana u ve ni swiphiqo swa ku bebula, kutani dokodela u n’wi tlhave tinayiti leti veke ni khombo lerikulu eka mina. Endzhaku ka masiku manharhu, manana u sungule ku rhurhumela, kutani miri wa mina lowutsongo na wona wu rhurhumela. Mavoko ni milenge ya mina swin’we ni tinsinga ta mina ta rito swi vavisekile.

Loko ndzi ri karhi ndzi kula, a swi ya swi ndzi tikela swinene ku amukela vulema lebyi. A ndzi ri ni ximbilwambilwana naswona a ndzi tshamela ku holovela vanhu. A ndzi titwa ndzi hambanile swinene ni vanhu van’wana naswona a ndzi vona onge vutomi bya mina a byi na xikongomelo. Loko ndzi ri ni malembe ya 25, a ndzi nga ha tsakanga nikatsongo. Leswi a ndzi nga swi twisisi leswaku hikwalaho ka yini Xikwembu xi pfumelele leswaku ndzi xaniseka hi ndlela leyi, ndzi fikelele xiboho lexi a xi vonaka xi twala—xa leswaku Xikwembu a xi kona.

Mavonelo Lama Hambaneke

Siku rin’wana nimixo eku heleni ka lembe ra 1987, loko ndzi ti tshamele exitulwini xa mina xa lava lamaleke, ku humelele majaha mambirhi lawa a ma ambale kahle. Ndzi vhele ndzi anakanya leswaku va lava ku vulavula na buti wa mina kutani ndzi va byela—swi ri karhi swi ndzi tikela swinene—leswaku buti a nga kona. Va hlamule va ku: “Hi lava ku vulavula na wena.” Sweswo swi ndzi hlamarisile hikuva a hi vangani lava a va tsakela ku vulavula na mina.

Va ndzi vutise va ku: “Xana wa tshemba leswaku Xikwembu xi kona?” Ndzi va hlamule hi ku hatlisa ndzi ku, “Sweswi ndzi nga te tani, ndzi nga swi tshembisa ku yini sweswo?” Hi sungule ku bula, hiloko va ndzi byela leswaku vona i swirho swa vandlha ra Timbhoni ta Yehovha. Va ndzi nyike buku leyi nge Life—How Did It Get Here? By Evolution or by Creation?a leyi ndzi yi amukeleke hambileswi a ndzi kanakana. Va vule leswaku va ta tlhela va vuya. A ndzi lava leswaku va nga ha vuyi.

Timbhoni letiya timbirhi ti tlhele ti vuya hilaha ti tshembiseke hakona, kutani hi yise bulo ra hina emahlweni. Ndzi tsundzuka tindzimana ta Bibele leti va ndzi hlayeleke tona, ku nga Esaya 35:5, 6: “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” Marito wolawo a ma chavelela hakunene kambe a ma nga fambelani ni leswi vutomi bya mina byi nga swona. A ndzi nga swi koti ni ku suka ndzi yima, a ndza ha vuli ku tlula kukota mhunti. Hambiswiritano, ndzi pfumerile ku dyondza Bibele na vona, kambe a ndzi nga tshembi leswaku Bibele yi nga ndzi pfuna hi swiphiqo swa mina. Mayelana ni mhaka ya leswaku siku rin’wana na mina ndzi ta kota ku famba ku fana ni vanhu van’wana, ntshembo wolowo a wu nga ri wa xiviri eka mina.

Endzhakunyana ka nkarhi, Timbhoni letiya ti ndzi rhambe ku ya eminhlanganweni eHolweni ya Mfumo ya le kusuhi. A ndza ha tsundzuki leswaku nkulumo leyi a yi sekeriwe eBibeleni a yi vulavula hi yini, kambe a ndzi xi rivali xinghana ni rirhandzu leri ndzi kombiweke rona hi Timbhoni. Ematshan’weni yo tshamela ku ndzi twela vusiwana, va ndzi endle leswaku ndzi titwa ndzi ri munhu. Hi Sonto yoleyo ndzi swi vonile leswaku laha ndzi faneleke ku va kona hi le Holweni ya Mfumo, hiloko ndzi sungula ku ya eminhlanganweni nkarhi ni nkarhi.

Ku Langutana Ni Swiphiqo Leswikulu

Ku dyondza Rito ra Xikwembu swi ndzi pfunile swinene. A swi fana niloko murhi lowu omeke wu sungula ku huma mafi nakambe. Ndzi sungule ku titwa hi ndlela leyi a ndzi ehleketa leswaku a ndzi nge he pfuki ndzi titwe ha yona. Swa tsakisa hakunene ku titwa ndzi hanyile! Ndzi titwe ndzi navela ku byela van’wana hi ntshembo lowunene lowu ndzi wu amukeleke. (Matewu 24:14) Kambe, a ndzi ta sungurisa ku yini ku chumayela? Ndzi kombele Yehovha leswaku a ndzi komba ndlela kutani ndzi endla xikhongelo xo enta mayelana ni ku navela ka mina ku chumayela.

Hi September 1991, ku tisiwe phayona (muchumayeri wa evhangeli wa nkarhi hinkwawo) evandlheni ra ka hina. Siku rin’wana loko ndzi ri endlwini ya yena, ndzi n’wi tivise leswaku ndzi navela ku chumayela. Leswi ndzi nga swi kotiki ku vulavula kahle, hi vulavule hi mhaka yo tsala mapapila ndzi tirhisa muchini wo thayipa. Mavoko ya mina lama lamaleke a ma ri xihinga. Hi ku pfuniwa hi phayona leri, ndzi ringete tindlela to tala. Ndzi ringete ku khoma penisele hi meno kutani ndzi tlhava-tlhava muchini hi yona. Hiloko ndzi ringeta ku tirhisa xihuku lexi namaketiweke ximhandzana leswaku ndzi kota ku thayipa. Kambe a ko fana ni kwala.

Endzhakunyana, loko hi ri karhi hi bula hi xiphiqo lexi, phayona leri a ri ndzi pfuna ri vule ri ri karhi ri tlanga ri ku: “U ni nhompfu ya kahle.” Ndzi vhele ndzi sungula ku thayipa ndzi tirhisa nhompfu ya mina kutani ndzi kuma leswaku swa tirha. Hi ndlela yoleyo, ndzi hetelele ndzi swi kotile ku thayipa. Ehleketa leswaku swi tika njhani ku lunghisa mapeletelo ya marito hi nhompfu! Ku nga ri kungani hi kume leswaku a swi ta olova ngopfu ku tirhisa khompyuta. Kambe, a ndzi ta yi kuma kwihi mali yo xava khompyuta! Ndzi rindze nkarhi lowunene kutani ndzi vulavula ni vatswari va mina. Ku nga ri kungani, ndzi sungule ku tirhisa khompyuta ku tsala mapapila.

Ku Navela Ka Mina Ku Hetisekile

Ndzi sungule hi ku tsalela vanghana ni maxaka, kutani ndzi ya ndzi tsalela vanhu lava tshamaka emugangeni wa ka hina ni le mitini leyi nga ekusuhi. Ku nga ri kungani se a ndzi tsalelana ni vanhu lava kumekaka eItaliya hinkwaro. A ndzi na marito yo hlamusela ntsako lowu ndzi nga na wona loko vanhu lava ndzi va tsalelaka va hlamula mapapila ya mina. Hi December 1991, ndzi pfumeleriwe ku va muhuweleri wa mahungu lamanene la nga khuvuriwangiki. Ndzi tlhele ndzi tsarisa eXikolweni xa Vutirheli bya le Tilweni, ku nga xikolo lexi khomiwaka vhiki ni vhiki emavandlheni ya Timbhoni ta Yehovha. Loko ndzi nyikiwa xiavelo xo nyikela nkulumo, ndzi xi lunghiselela kahle ndzi ri ekaya hi ku tirhisa khompyuta ya mina. Loko ndzi fika evandlheni, makwerhu un’wana u ya eplatifomo a ya hlaya leswi ndzi swi lunghiseleleke.

Leswi a ndzi ri tlangela swinene rirhandzu leri Yehovha a ndzi kombiseke rona, ndzi swi vonile leswaku goza leri ndzi faneleke ku ri teka i ra ku tinyiketela eka yena kutani ndzi khuvuriwa. Ndzi kanye mbilu kutani ndzi vulavula ni vatswari va mina hi xiboho lexi ndzi xi tekeke. A va nga swi lavi kambe leswi a ndzi tiyimisele hi mbilu hinkwayo a ndzi nga chavi nchumu. Hi mpfuno wa Yehovha ni Timbhoni–kulorhi, ndzi khuvuriwile hi August 1992. A ndzi tsake ngopfu hileswi buti ni nsati wakwe a va ri kona loko ndzi khuvuriwa!

Ku Cinca Ndlela Leyi Ndzi Ehleketaka Ha Yona

Loko ndzi ya ndzi twisisa leswi ndzi swi dyondzaka eRitweni ra Xikwembu, ndzi vone swi fanerile ku cinca mavonelo ya mina lama hoxeke hi vumunhu bya mina. Ndzi swi xiyile leswaku, hikwalaho ka vulema bya mina, a ndzi nga swi lavi ku pfuna van’wana naswona a ndzi ri ni vutianakanyi. Ndzi lwe hi matimba leswaku ndzi lahla mikhuva yoleyo. A swi lava leswaku ndzi va munhu la titsongahataka naswona ndzi boheke ku swi amukela leswaku ndza wu lava mpfuno wa van’wana.

Ndzi tlhele ndzi lwa ni moya wa ku tshamela ku tiputa vusiwana ni ku tivona ndzi nga pfuni nchumu. Ndzi tidyondzise ku hleka swin’wana swa swiyimo leswi eku sunguleni a swi ndzi hlundzukisa. Siku rin’wana loko hi ri karhi hi chumayela hi yindlu ni yindlu, eka muti wun’wana hi kume xinhwanyetana. Mbhoni yin’wana ya leti a ndzi famba na tona yi xi vutise loko vatswari va xona va ri kona. Xinhwanyetana lexi xi huwelele xi ku: “Mhane, ku ni vavanuna vambirhi ni nuna un’wana wo vabya haleno.” Loko mana wa xinhwanyetana lexi a fika, u khomiwe hi tingana loko a ndzi vona lerova a a nga tivi leswaku a nga ku yini. Un’wana wa vanghana va mina u te: “Kahle-kahle, i vavanuna vambirhi lava vabyaka ni un’we la hanyeke kahle.” Kutani hinkwerhu hi n’wayitela, kutani hi ve ni bulo lerinene.

Ku Navela Ku Endla Leswi Engetelekeke

Endzhaku ka loko ndzi khuvuriwile ndzi tirhe tanihi phayona ra nkarhinyana ku ringana tin’hweti ta kaye, a ndzi kota ku heta tiawara ta 60 hi n’hweti entirhweni wo chumayela. Hambiswiritano, a ndzi lava ku endla swo tala. Ku nga ri kungani ndzi sungule ku tirha tanihi phayona ra nkarhi hinkwawo, ndzi heta nkarhi wo tala entirhweni wo chumayela. Tin’hwetinyana to sungula loko ndzi ri karhi ndzi phayona a swi tika. Vanhu vo tala a va ehleketa leswaku ndzi famba ndzi kombela mali loko ndzi fika etindlwini ta vona, leswi a swi ndzi nyumisa ni ku nyumisa Timbhoni leti a ndzi famba na tona.

Ku engetela kwalaho, vo tala evandlheni a swi va tikela ku ndzi twisisa loko ndzi vulavula, naswona a va nga swi tivi leswaku va nga ndzi pfunisa ku yini. Kambe, hi ku pfuniwa hi Yehovha ni mpfuno wo pfumala vutianakanyi lowu vamakwerhu va moya va ndzi nyikeke wona, hi ku famba ka nkarhi xiyimo xi ye xi antswa. Sweswi vanhu a va ha ndzi teki tanihi wanuna la fambaka hi xitulu xa lava lamaleke kambe va ndzi teka tanihi un’wana wa Timbhoni ta Yehovha loyi a ringetaka ku pfuna van’wana leswaku va dyondza hi swikongomelo swa Xikwembu.

Hi July 1994, ndzi ye exikolweni xa maphayona lexi tekeke mavhiki mambirhi. Kwalaho, hi dyondze misinya ya milawu ya Matsalwa leyi kongomisaka ntirho wa hina wo chumayela ni ku endla vadyondzisiwa. Hi tlhele hi leteriwa hi tindlela leti pfunaka evutirhelini bya hina bya nsimu. A ndzi fanele ku hlula swihinga swo karhi leswaku ndzi ta va kona exikolweni, hikuva xikolo lexi a xi khomeriwe eka ndhawu leyi nga le kule ni le kaya hi kwalomu ka 60 wa tikhilomitara. A swi nga koteki leswaku ndzi etlela ekule ni le kaya, kutani Timbhoni ti cincanile hi ku ndzi heleketa exikolweni nimixo ni ku ndzi landza nimadyambu. Hi nkarhi wa swakudya un’wana wa tona a a ndzi tlakula a ndzi yisa exithezini xa vumbirhi laha hinkwerhu a hi dyela kona.

Vutihlamuleri Lebyikulu

Hi March 2003, ndzi vekiwe ku va nkulu wa vandlha. Xiavelo lexi xi lava leswaku ndzi tirha hi matimba ku pfuna van’wana. Sweswi ndzi swi twisisa kahle leswaku Yesu a a vula yini loko a ku: “Ku nyika swi tisa ntsako lowukulu ku tlula ku amukela.” (Mintirho 20:35) Ndzi tirha ni huvo ya vakulu ya kahle swinene, naswona va ndzi pfunile leswaku ndzi kota ku tolovela xiavelo xa mina. Ndzi titwa ndzi rhandziwa hi vandlha hinkwaro—ngopfu-ngopfu vantshwa—xisweswo va ndzi rhamba loko va ri ni swo karhi leswi va swi endlaka. Va swi vona leswaku ndzi hlula swihinga leswaku ndzi ta tirhela Yehovha, naswona vo tala va ndzi kombela leswaku ndzi va pfuna ku tlhantlha swiphiqo swa vona.

Ndzi dyondze leswaku munhu a nga tsaka ku nga khathariseki xiyimo xa miri wakwe. Leswi nga swa nkoka i ku amukeriwa hi Yehovha ni ku endla ku rhandza ka yena. Ngopfu-ngopfu ndza tsaka naswona ndza swi tlangela swinene leswi ndzi nga ni ntshembo wa leswaku ku nga ri khale ndzi ta famba ndzi nga tirhisi xitulu xa lava lamaleke. Ina, ndzi langutele ku “tlula kukota mhunti” ni ku gandzela Xikwembu xa ntiyiso hilaha ku nga heriki.—Esaya 35:5, 6.

[Nhlamuselo ya le hansi]

[Marito lama tshahiweke exihlokweni lama nga eka tluka 22]

Sweswi vanhu a va ndzi teki tanihi wanuna la fambaka hi xitulu xa lava lamaleke kambe va ndzi teka tanihi un’wana wa Timbhoni ta Yehovha loyi a ringetaka ku pfuna van’wana leswaku va dyondza hi swikongomelo swa Xikwembu

[Xifaniso lexi nga eka tluka 21]

Ndzi lunghiselela nhlangano wa vandlha hi ku tirhisa nhompfu ya mina ku thayipa