Yehova U Ndzi Tiyisile
HI KU VULA KA EKUMBA OKOKA
NDZI tswariwe endyangwini wa “Vukriste” etikweni ra Afrika Xikarhi, naswona ndzi kule ndzi ri ni rirhandzu ra Xikwembu. Tatana wa mina a a ri munhu la chivirikaka eku chumayeleni, naswona hakanyingi a ndzi famba na yena loko a ya dyondzisa ekerekeni kumbe eka minongonoko ya swikhongelo emakaya ya munhu hi xiyexe. Tanihi leswi a ndzi tikomba ndzi ri jaha leri tinyiketeleke, vafundhisi van’wana va ndzi hlawule leswaku ndzi tirha etlhelo ka muprista eka Xilalelo. Va tlhele va ndzi byela leswaku siku rin’wana kumbexana ndzi ta dyondzela ku va muprista hi ndzexe.
Hambi swi ri tano, ni vusiku a ndzi ri muyimbeleri ni mucini la rhangelaka eka ntlawa wa kwalaho wa vuyimbeleri, Matumba-Ngomo. Eka xiyimo xexo, ndzi joyine majaha ni vanhwana va xifundza xa ka hina eka tinxaka hinkwato xa vunghwavava. Kambe ndza ha langutele ku va ni nsati wun’we ntsena ni leswaku eku heteleleni ndzi ya etilweni ku ya hanya ni “vakwetsimi.” A ndzi vonanga xilaveko xo basisa vutomi bya mina, hikuva, hi ku ya hi dyondzo ya Khatoliki, swidyoho swa mina a swi rivaleriwa madyambu man’wana ni man’wana ya Mugqivela hi ku tivula swidyoho.
Ku Sungula Ka Swiphiqo
Hi 1969, loko ndza ha dyondza ekholichi, ndzi sungule ku twa switlhavi emahlanganweni ya mina. A ndzi nga xi tivi lexi swi vangeke, kambe hi tin’hweti leti landzeleke, swi ye swi nyanya. Vatswari va mina, ku nga khathariseki leswaku i Makhatoliki lama tivekaka, va anakanye ku ndzi yisa eka tin’anga to hambana-hambana, leti vuleke leswaku un’wana u ndzi loyile, kambe leswaku hikwalaho ka swikhongelo ni mirhi ya vona, a ndzi ta horisiwa. Hambi swi ri tano, ndzi sungule ku famba hi ku khwita, kutani hi 1970, a ndzi nga koti ku famba nikantsongo, hambi loko ndzi tiseketela hi nhonga. Hi nkarhi wolowo, ndzi ehlekete leswaku masiku ya mina yo famba a ma ta hela ku nga ri khale.
Hi February 1972 tata wa mina eku heteleleni u ehlekete ku ndzi yisa exibedlhele eWembo Nyama. A ndzi ri exibedlhele hi nkarhi wo leha lerova va sungule ku ndzi vitana n’wini wa xona! Vanhu a va ta exibedlhele, va tshunguriwa, va famba, kutani hi nkarhi wo karhi endzhakunyana va tlhela va vuya hi xiphiqo xin’wana, naswona mina ndza ha ri kona! Tata wa mina a a fanele ku ya ekaya leswaku a ya tshovela rhayisi, kambe sweswi a a ndzi tekile, ndzi ri ni vana vambirhi, naswona nsati wa mina la rhandzekaka, hambi leswi a a ri na malembe ya 21 hi vukhale, a a ndzi hlayisa ni ku lava ntirho leswaku a ta khathalela swilaveko swa hina.
Hambi swi ri tano, a ndzi karhateke ngopfu hi xiyimo hinkwaxo. Emalembeni ya 24 hi vukhale, a ndza ha nyanya, vanghana va mina a a va tsakile, vo tala va vona sweswi a a va ri ni mintirho leyi tiyeke. Eka mina swi tikombe onge a swi ta antswa eka un’wana ni un’wana loko a ndzo tidlaya. Hikwalaho, ndzi avele vana va mina ni vamakwerhu wa mina xin’wana ni xin’wana lexi a ndzi ri na xona, handle ko va byela lexi a ndzi ri na xona emianakanyweni. Ndzi sale ndzi nga ri na nchumu handle ka hembe ya mina leyi ndzi yi rhandzaka leyi a ndzi lava ku lahliwa ha yona.
Ku Sungula Ka Vutomi Lebyintshwa
Kutani un’wana wa Timbhoni ta Yehova u averiwe mubedo lowu nge kusuhi ni wa mina. Hambi leswi a a nga voni hi tihlo rin’we ni ku va ekhombyeni ro lahlekeriwa hi matimba yo vona hi lerin’wana, hi xihatla u sungule ku veka vumbhoni eka mina lebyi humaka eBibeleni hi ta Yehova ni Mfumo. Endzhaku ka masikunyana, u humile exibedlhele, kambe u ndzi nyikete eka nkhathalelo wa Timbhoni tin’wana leti ti n’wi endzeleke. Endzhaku ka mabulo lama engetelekeke, lava na vona a va fanele ku suka, kambe un’wana wa vona u ye mahlweni a dyondza na mina hi ku tirhisa mapapila. Nakambe u ndzi nyike tibuku to hambana-hambana to dyondza Bibele, leti ndzi ti hlayeke hi ntsako lowukulu.
Hi ndlela leyi ndzi amukele swakudya swa moya, naswona ku karhateka ka mina hakantsongo-ntsongo ku cincele eka ntsako. Swi tikombe onge kereke ya mina a yi ndzi nyika “asidi” ndzi nwa, kambe sweswi a ndzi kuma mati ya vutomi mahala. Ndzi nkhense Yehova embilwini ya mina hi ku ndzi ntshunxa eka vupfumeri bya vukholwa-hava, ku fana ni Vunharhu-un’we, ku nga fi ka moya-xiviri, ku chava vafi ni ku gandzela vakokwana.
Sweswi ndzi lave ku suka exibedlhele. Kutani ndzi twe leswaku mindyangu yimbirhi ya vatirheli va nkarhi hinkwawo a yi ta averiwa eWembo Nyama, kutani ndzi anakanye ku tshama ku kondza yi fika. Mawaku ntsako lowu ndzi veke na wona loko eku heteleleni va tile va ndzi kuma emubedweni wa mina exibedlhele! Sweswi a ndzi swi kota ku ya emahlweni ni dyondzo ya mina ya Bibele ni munhu ematshan’wini ya ku tirhisa poso.
Endzhaku ka masikunyana, ndzi vutisile loko va ri ni minhlangano eHolweni ya Mfumo, hi laha ndzi hlayeke ha kona eka timagazini. Hi musa va ndzi byele leswaku a va khoma minhlangano ya vona hinkwayo eka yindlu leyintsongo ya byanyi leyi un’wana wa vona a a tshama eka yona. Nakambe va vule leswaku a va ta tsakela ku ndzi yisa kona hi bayisikiri! Ku nga khathariseki switlhavi swo vava elongweni ra mina ni le mahlanganeni ya mina hinkwawo, hi ntsako ndzi ve kona eka mihlangano hinkwayo. Loko ndzi fikelele timfanelo, a ndzi swi kota hambi ku ri ku yisa xiviko n’hweti yin’wana ni yin’wana tanihi muhuweleri la nga khuvuriwangiki, ku sukela hi April 1974.
Tin’hweti tinharhu endzhakunyana, ndzi kombise ku tinyiketela ka mina eka Yehova hi ku nyuperisiwa ematini. Ndzi veke vumbhoni eka vatirhi va vuongori exibedlhele, eka vavabyi lava nga kwalaho, eka varhumiwa va Maprotestente lava endzeke ni le ka swirho swa ndyangu wa mina—ku nga khathariseki nkaneto lowu tiyeke wa lava vo hetelela. Hi nkarhi lowu, ndzi veke vumbhoni ndzi etlele emubedweni kumbe ndzi famba hi xitulu xa vavabyi lexi xibedlhele xi ndzi lombeke xona ku kondza loko ndzi ta xava xa mina.
Ku Tiyisela Ku Tise Mimpfuno
Ku nga khathariseki nkaneto wa ndyangu wa mina, ndzi ye emahlweni ndzi famba hi ndlela ya Yehova naswona ndzi katekisiwe hi laha ku fuweke. Nsati wa mina u teke xiyimo xa yena xa ntiyiso naswona u khuvuriwile hi 1975. Hi kunguhate ku tshama eKatako-Kombe, laha ana se a ku ri ni bandlha leri simekiweke. Vatswari va mina va karhatekile hi hina hikuva un’wana u va byele leswaku Timbhoni hinkwato a ti ta dlayiwa hi 1975. Loko hi ale ku tshika ku hlanganyela ka hina, va tshike ku hi rhumela swakudya, kutani hi pfumale ngopfu hi tlhelo ra swa nyama. Ndza tsundzuka leswaku eka xiendlakalo xin’wana n’wana wa mina lontsongo u wele ehansi hikwalaho ka ndlala endzhaku ka loko hi hete siku ni hafu hi nga ri na swakudya. Kambe hi nkarhi wolowo vamakwerhu va hina va Vukriste va hi tisele tinhlampfi ni swakudya. Endzhakunyana, vatswari va mina va sungule ku hi pfuna nakambe, kambe vamakwerhu va hina a va tshikanga ku hi pfuna hi tlhelo ra swilo leswi vonakaka.
Hi February 1975 voko ra mina ra xinene ri omile kutani ri sungula ku lala ri nga ha tirhi. Kambe ndzi hlayise ripfumelo ra mina naswona a ndzi tiyimisele ku ya emahlweni ndzi tirhela Yehova hi ntsako. Ndza tsaka ku vula leswaku voko ra mina endzhakunyana ri tiyile nakambe, naswona ndza ha ri tirhisa ni namuntlha, leswi ndzi pfunaka ku pfula Bibele ya mina ni ku tirhisa tibuku ta Sosayiti.
Ku Va Ni Xivindzi eMahlweni Ka Valawuri
Hi 1977 khomixinara wa kwalaho u ndzi hehlile emahlweni ka khomixini ya xifundza, leyi a ya ha ku khoma phayona ro hlawuleka ebandlheni ra le kusuhi. Siku rin’wana socha ri te eka mina ni papila ra xirhambo. Ndzi khongele ni ndyangu wa mina, ndzi khutaza bandlha kutani ndzi famba na yena. Hi ku pfuniwa hi moya wa Yehova, ndzi swi kotile ku nyikela nhlamulo leyi tiyeke eka swihehlo naswona endzhaku ka bulo ro leha ni valawuri va tiko ni va nyimpi, ndzi ntshunxiwile kun’we ni phayona ro hlawuleka.
Tin’hwetinyana endzhaku, ndzi vitaniwe hi khomixinara un’wana, kutani nakambe, hi mpfuno wa Yehova, ndzi swi kotile ku yimela mahungu lamanene hi ntsako ni xivindzi. Ndzi ve ni bulo ro leha ni munhu loyi, kutani emakumu ka rona, u ndzi ntshunxile naswona u susumete xitulu xa mina xa vavabyi hi yexe, xi huma ehofisini ya yena. Kutani u vulavulele ehansi a ku: “Tana ekaya ra mina madyambu lawa.” Endzhaku ka maendzo yo tala ndzi kote ku sungula dyondzo ya Bibele na yena. Eku heteleleni, ndzi ve ni tidyondzo ta nkombo ta le kaya ta Bibele ni vanhu vo hambana-hambana evulawurini. Vo tala va vona va ve kona eka minhlangano ya bandlha leyi lunghiseleriweke kwalaho.
Ntirho Wo Hlawuleka
Ndzi kombele Yehova ku ndzi pfuna ku hetisisa xiboho xa mina xo n’wi tirhela hi matimba ya mina hinkwawo ku nga khathariseki vuvabyi bya mina. Handle ko tsarisa hi ximfumo, ndzi ringete ku fikelela swilaveko swa phayona ra nkarhinyana. Yehova u ndzi pfunile leswaku ndzi humelela, kutani ndzi tate xikombelo xa ntirho lowu hi n’hweti ya June ku ya ka October. Kutani Sosayiti yi amukele xikombelo xa mina xo va phayona ra nkarhi hinkwawo, naswona ndzi sungule ntirho lowu hi November 1976. Hi September 1977 ntsako wa mina a wu helerile loko ndzi kume xiavelo xo va phayona ro hlawuleka eka bandlha ra le Katako-Kombe.
Ndzi swi kotise ku yini ku hetisisa leswi? Ndzi hlanganise nsimu hi xitulu xa mina xa vavabyi hi mpfuno wa nsati wa mina la rhandzekaka ni vamakwerhu ebandlheni. Minkarhi yin’wana a ndzi famba ndzi ri swanga hi tinhonga. Hakanyingi a ndzi wa. Kutani a ndzi rindza, ndzi nga tshukunyuki ehansi, ku kondza loko muhundzi wa ndlela a ndzi pfuna ku pfuka kutani a ndzi nyika tinhonga ta mina. Nkarhi hinkwawo a ndzi tsundzuka ku tiyimisela ka vaapostola ni vadyondzisiwa va Yesu. (Mintirho 14:21, 22; Vaheveru 10:35-39) Nkarhi wun’wana ni wun’wana loko ndzi wa, ndzi khongele leswaku Yehova a nga ndzi tshiki ndzi hela matimba, kambe, ematshan’wini ya sweswo, a ndzi nyika matimba yo ya emahlweni ndzi n’wi tirhela. Nkarhi hinkwawo a ndzi tsundzuka xitshembiso lexi hlamarisaka lexi rhekhodiweke evuprofeteni bya Esaya, leswaku “ŝilema ŝi ta tlula kukota tinhlangu.”—Esaya 35:6.
Loko ndzi andzisa ntirho wa mina swinene, hi laha a ndzi swi kota ku hlula vulema bya miri. Hi 1978 ndzi ve ni lunghelo ro va kona eka Xikolo xa Vutirheli bya Mfumo eLubumbashi, leswi katseke ku famba ntsengo wa 2 000 wa tikhilomitara hi lori, xikepe ni xitimela. Entiyisweni, hi riendzo leri Yehova u ndzi nyike matimba lamakulu. (Esaya 12:2; 40:29) Sweswi ndzi nga tlhela ndzi famba—hi ku nonon’hweriwa lokukulu—ku ya fika eka 100 wa timitara handle ko pfuniwa hi tinhonga. Ndza tiyiseka leswaku Yehova u yingisile xikhongelo xa mina le ndzhaku hi 1973 xo ndzi nyika matimba yo n’wi tirhela hi ku tiyimisela.
Xiavelo Lexintshwa
Hi 1984, endzhaku ka malembe ya nkombo ebandlheni ra le Katako-Kombe, ndzi kume xiavelo lexintshwa xo tirha ni bandlha ra le Lodja-Centre. Lembe rin’we endzhakunyana hi sungule dyondzo leyintshwa ya buku eka 12 wa tikhilomitara ku suka kwalaho, naswona hi ku hatlisa hi sungule yin’wana eka 30 wa tikhilomitara ku suka eka yoleyo. Leyi ya le ndzhaku hi ku hatlisa yi xiyiwe tanihi ntlawa lowu nga woxe naswona hi 1988 wu amukeriwe tanihi bandlha, laha sweswi ndzi tirhaka kona tanihi nkulu.
Ku phayona ku ndzi pfunile swinene, hi tlhelo ra moya ni ra nyama. Loko ndzi ri entirhweni, hi tinhonga ta mina, a ndzi swi kota ku hetisisa vutiolori lebyi bumabumeriweke hi madokodela. Sweswi ndzi ni matimba swinene ku tlula loko ndzi sungula ku phayona, naswona ku navela ka mina i ku tiyisela entirhweni lowu ku ya fika emakumu. Ndzi tiyimisele ku vona ndlela leyi Yehova a nga ta ndzi pfuna ha yona ku “tlula kukota tinhlangu” hi nkarhi lowu ndzi nga ta va ndzi nga ha fanelanga ku tiyiselela switlhavi leswi vavaka swa vuvabyi lebyi.
Hi mbilu ya mina hinkwayo, ndzi nkhensa Tata wa hina wa le tilweni, loyi a ndzi nyikeke matimba, xivindzi ni ntirho wa nkarhi hinkwawo. Sweswi ndzi ni malembe ya 36 hi vukhale, naswona endzhaku ka malembe ya 11 entirhweni wa vuphayona, ndzi langutele ku ya emahlweni, ku nga khathariseki leswi vumundzuku byi nga ha vaka na swona. Ndzi tiyimisele ku tirhisa matimba ya mina hinkwawo ya nkoka ku xixima ni ku dzunisa Yehova Xikwembu lexikulu.