Kulu Ri Hundzule Vutomi Bya Mina

NCHUMU lowunene ngopfu lowu vatswari va nga wu endlelaka vana va vona i ku nghenisa vutivi hi ta Mutumbuluxi ni ku nghenisa ku navela ku n’wi tirhela. Mhangu leyi ndzi weleke loko ndza ha ri n’wana wa kondlo-a-ndzi-dyi yi ndzi pfune ku pfumela ntiyiso lowu.

Loko ndzi nga si hlamusela leswaku ku humelele yini enkarhini wolowo—ku tlula 20 wa malembe lama hundzeke—inge ndzi hlamusela switsongonyana hi vutomi bya mina loko ndza ha kula le dzongeni wa United States. Swi fambisana kahle ni ndlela leyi ndzi koteke ku langutana ni maxangu lama hetaka matimba ha yona.

Lexi Vumbeke Vutomi Bya Mina

Ndzi velekeriwe eBirmingham, le Alabama—xiphemu xa Deep South lexi nga ni xihlawuhlawu swinene—hi January 1955. Loko ndzi ri na malembe ya nhungu ntsena hi vukhale, bomo leyi bulukeke ekusuhi ni le kaya ra hina yi hlakate kereke hi nkarhi wa tidyondzo ta Xikolo xa Sonto. Vana va vantima lava chavisiweke, vo tala va vona lava a va ri tintangha ta mina, va humile va tlhava mukhosi; van’wana a va huma ngati va ri karhi va kolola. Mune wa vona a va file—va dlayiwe hi valungu.

Timhangu to tano a ti nga humeleli eDzongeni ntsena. Hi ximumu lexi tlhandlamaka vatirhi vanharhu vo lwela timfanelo ta vanhu va dlayiwile le Mississippi. Wolawo a ya ri masiku yo chavisa ya mpfilumpfilu wa tinxaka lowu khumbeke vo tala va hina.

Mana wa mina a a ri un’wana wa Timbhoni ta Yehovha, ivi Tatana a va un’wana wa vona hi 1966. Ku nga ri khale ndyangu wa ka hina hinkwawo a wu burisana ni vaakelani va hina hi ntshembo lowu sekeriweke eBibeleni wa misava leyintshwa ya ku rhula. (Pisalema 37:29; Swivuriso 2:21, 22; Nhlavutelo 21:3, 4) Hi Mugqivela wun’wana ni wun’wana hi ximumu eku heleni ka va-1960, a hi ya emasin’wini lama ku nga siki chumayeriwaka eka wona le handle ka Birmingham hi ya chumayela kona. Kwalaho, vanhu a va nga si tshama va twa hi Timbhoni ta Yehovha kumbe hi ta rungula ra Mfumo leri a hi ri chumayela. A va nga ri tivi hambi ku ri vito ra Xikwembu, Yehovha. (Pisalema 83:18) Eminkarhini yoleyo ya maxangu, a ndzi tiphina swinene hi ku vulavula ni vanhu hi ta xikongomelo xa Yehovha xo siva misava leyi ya khale yo homboloka hi paradeyisi ya le misaveni.—Luka 23:43.

Ku Tivekela Pakani eVuton’wini

Hi December 1969, ndzi kombise ku tinyiketela ka mina eka Yehovha hi nkhuvulo wa mati. Ndzi khongele Yehovha ivi ndzi boxa ku navela ka mina ka le mbilwini ko ya emahlweni ni vutirheli bya nkarhi hinkwawo tanihi ntirho-vutomi. Mavhiki ma nga ri mangani endzhakunyana, Tatana u averiwe ku pfuna vandlha leritsongo leri a ri ri eAdamsville, tikhilomitara ti nga ri tingani ku suka eBirmingham. Ku cinca loku ka nsimu ku tiyise ku navela ka mina ka ku va phayona, kumbe mutirheli wa nkarhi hinkwawo. Emalembeni ya mina ya le xikolweni xa le henhla, nkarhi wun’wana ni wun’wana lowu ndzi wu kumaka a ndzi phayona swa nkarhinyana, leswi a swi katsa ku heta kwalomu ka 75 wa tiawara evutirhelini n’hweti yin’wana ni yin’wana.

Ndzi kunguhate ku dyondza vutshila leswaku ndzi tilunghiselela vutirheli bya nkarhi hinkwawo loko ndzi thwasile. Kambe hi lembe ra mina ro hetelela exikolweni xa le henhla, ndzi langutane ni ntlhontlho. A ndzi ri exikarhi ka ntlawa wa lava humeleleke kahle, kutani siku rin’wana ndzi yisiwe ekholichini ya le kusuhi leswaku ndzi ya tsala swikambelo swa dyondzo. Endzhaku ndzi vitaneriwe ehofisini ya mutsundzuxi. A a nyanyukile a tlhela a ndzi tsakela. Hi nyanyuko u te: “U bele henhla! U nga ya ekholichini yin’wana ni yin’wana leyi u yi hlawulaka!” A a lava leswaku ndzi sungula ku tata maphepha ya swikombelo swa xitlhuva-dyondzo hi wona nkarhi wolowo.

A ndzi nga tsakanga hikuva a ndzi nga swi lunghekelanga leswi. Xikan’we-kan’we ndzi n’wi hlamusele makungu ya mina yo va mutirheli wa nkarhi hinkwawo ni ku tirha ntirho wo tihanyisa wa nkarhinyana leswaku ndzi kota ku tihlayisa evutirhelini bya mina. Ndzi tlhele ndzi n’wi byela ni leswaku endzhakunyana, kukota leswi Timbhoni tin’wana ti swi endleke, ndzi nga ha kota ku ya tirha tanihi murhumiwa etikweni rimbe. Kambe a swi vonaka onge a a nga ndzi twi. U ringanyete leswaku ndzi hlawula sayense tanihi dyondzo-nkulu ni leswaku loko ndzi ya ekholichini ya le kusuhi, u ta tiyiseka leswaku ndzi kuma ntirho exivandleni xa sayense.

U te: “Gloria, vukhongeri bya wena byi vekele mahelo-vhiki, vatswari va wena va ha ta tama va tinyungubyisa ha wena.” A ndzi twa ndzi tsongahatiwile hi leswi a a endla onge pakani ya mina ya vutirheli bya nkarhi hinkwawo a yi vangiwa hi ku susumeteriwa hi vatswari va mina. U ndzi endle ndzi titwa ndzi boheka, onge hi loko ndzi fularhela rixaka ra ka hina ra vantima hi ku ala lunghelo leri ronghasi. Hambi swi ri tano, ndzi yime ndzi tiyile. Loko ndzi thwasile, ematshan’weni yo ya emahlweni ni dyondzo ya le kholichi, ndzi sungule ku tirha nkarhinyana tanihi matsalana.

Ndzi lave munhu wo phayona na yena kambe ndzi nga n’wi kumi. Loko mulanguteri la famba-fambaka a endzele vandlha ra ka hina, ndzi n’wi byele hi xiphiqo xa mina. U te: “A wu kali u lava munhu.” Ivi a tsala xiyimiso lexi ha xona ndzi nga kotaka ku tirha ntirho wa mina wo tihanyisa ndzi tlhela ndzi va ni nkarhi lowu ringaneleke wo phayona. Ndzi vone xiyimiso lexi xi ri xinene. A ndzi tsake ngopfu lerova ndzi veka February 1, 1975, tanihi siku ra mina ro sungula ku phayona.

Hambi swi ri tano, masiku ma nga ri mangani emahlweninyana, hi December 20, 1974, loko ndzi ri karhi ndzi famba ndzi ya ekaya ndzi huma exitolo lexitsongo xa kwalaho, ndzi balaseriwe hi kulu leri hahaka.

Enyangweni Wa Rifu

Loko ndzi etlele lahaya hansi, a ndzi vona ngati ya mina ya vutomi yi ri karhi yi halaka. Ndzi tsundzuka ndzi ehleketa leswaku ndzi ta fa. Ndzi kombele Yehovha leswaku a ndzi pfumelela ku hanya nkarhinyana leswaku ndzi kota ku pfuna Manana ku twisisa leswaku mhangu leyi hetaka mongo yo kota leyi a yi ta humelela hambi endyangwini wa vanhu lava va khomekeke hi laha ku heleleke hi ku tirhela Yehovha. Hambi leswi a hi tolovelane ni tsalwa ra Bibele leri nge, “nkari ni khombo i ŝa hikwav̌o,” a ndzi nga anakanyi leswaku a hi swi lunghekerile ku langutana ni mhangu yo tano leyikulu.—Eklesiasta 9:11.

Kulu ri ndzi be tlhelo ra ximatsi ra nhamu, ri vavisa misiha ya longo. Ku vulavula ni ku hefemula ka mina swi khumbekile. A ndzi nga languteriwanga ku hanya ku tlula masiku mambirhi. Ivi va ku “mavhiki mambirhi.” Kambe ndzi hambete ndzi hanya. Loko ndzi khomiwa hi nyumoniya, ndzi rhurhiseriwe eka xihefemurisi lexi rharhanganeke swinene. Hi ku famba ka nkarhi, xiyimo xa mina xi yime ndhawu yin’we, ivi ku endliwa makungu yo ndzi hlakarherisa.

Miringo Yo Hlakarherisa

Mavhiki ma nga ri mangani yo sungula a ndzi nga ri na gome. Ntsena a ndzi titwa ndzi tsanile. Un’wana ni un’wana le Spain Rehabilitation Center, eBirmingham a a ri ni tintswalo naswona a a va ndzi endlela swilo hi ku tinyiketela. Ndzi sungule ku twa hi vatirhi leswaku vadokodela a va ndzi langutele ku lamalela makumu, ndzi etlela hi nhlana vutomi bya mina hinkwabyo. A ndzi hlayeriwa eka ntlawa wa C2 wa vulema bya milenge ni mavoko, leswi vulaka leswaku a va anakanya leswaku ndzi ta tshama endzeni ka xihefemurisi vutomi bya mina hinkwabyo, ndzi nga swi koti ku vulavula handle ka ku hlevetela ntsena.

Madokodela ma ndzi nghenise thumbu ra kholokholo leri a ndzi hefemula ha rona. Endzhakunyana mutivi wa matirhelo ya mahahu u ndzi nghenise thumbu leritsongo ku vona loko ri ta ndzi pfuna ku kota ku vulavula. Hambi swi ri tano, ni sweswo a swi pfunanga nchumu. Ivi va heta hi ku vula leswaku ku tsandzeka ka mina ku vulavula a ku vangiwa hi misiha leyi onhakeke. Hi nkarhi wolowo ndzi sungule ku va ni gome, naswona a ku ri hava lexi hambi mani a nga xi vulaka lexi a xi ta ndzi endla ndzi titwa ku antswa. Rito rin’wana ni rin’wana ra musa a ri ndzi tlhava tanihi nhlekulo. Kutani a ndzi tshamela ku rila.

Ndzi xiye leswaku loko ku ri ni nchumu lowu kavanyetaka vumoya bya hina, ku ni swilo swimbirhi leswi nga pfunaka—xikhongelo xa nkarhi na nkarhi eka Yehovha ni ku tirha swinene evutirhelini, u byela van’wana hi mintiyiso ya Bibele. (Swivuriso 3:5) Entiyisweni, ku khongela a swi olova. Sweswo a ndzi swi kota. Kambe xana exiyin’weni xa mina, ku tirha hi laha ku engetelekeke evutirhelini, a ndzi ta swi kotisa ku yini?

Ndzi kombele va ndyangu wa mina leswaku va ndzi tisela tikopi ta timagazini ta Xihondzo Xo Rindza ni Xalamuka! ni swipfuneto swin’wana swo dyondza Bibele leswi a hi swi tirhisa evutirhelini hi nkarhi wolowo, swo kota Ntiyiso Lowu Yisaka eVuton’wini Lebyi Nga Heriki, Ku Rhula ka Ntiyiso ni Nsirhelelo—Swipfa Ka Xihi Xihlovo?, na Xana Vutomi Lebyi Byo Va Na Sweswi Ntsena? Tibuku leti a va ti veka etindhawini to hambana-hambana ekamareni ra mina. Hakanyingi vatirhi a va ndzi languta hi ntwela-vusiwana ivi va vutisa: “Murhandziwa, xana xi kona lexi ndzi nga ku endlelaka xona?”

A ndzi ta tlhava buku hi mahlo, ivi hi ku vendzavendzisa milomu, ndzi kombela munhu yoloye leswaku a ndzi hlayela. A ndzi hlayela nkarhi lowu munhu yoloye a wu heteke a ndzi hlayela tanihi tiawara ta mina ta le nsin’wini. Ku kombisa ku ba mandla ka mina leswi munhu yoloye a ndzi hlayeleke, hakanyingi a ndzi n’wi ha nyiko ya buku kumbe magazini. Tona a ndzi titeka ti ri leti ndzi ti fambiseke. Loko munhu a ndzi hlayela ra vumbirhi, a ndzi ri teka ri ri riendzo ro vuyela. Ku hlanganyela evutirhelini hi ndlela leyi swi ndzi khutazile, ku kota makhadi, swiluva ni maendzo lama kufumetaka mbilu ya vamakwerhu va Vakreste lavo tala.

Endzhaku ka tin’hweti to hlaya to hlakarherisiwa, a ndzi kota ku tlakusa nhloko ya mina switsongo ntsena. Kambe a ndzi tiyimisele ku engetela ku chukachukisa miri. Ivi ndzi kombela nkarhi lowu engetelekeke wa vutshunguri byo olola miri ni vutshunguri byo endla ntirho wo karhi. Loko ndzi kombele ku tshamisisiwa erihlakeni ra mavhilwa, ndzi byeriwe leswaku a swi nga ta koteka, tanihi leswi a ndzi nga swi koti ku tlakusa nhloko ya mina yi yima leswaku ndzi tshama ndzi ololokile. Hambi swi ri tano ndzi kombele leswaku va ringeta.

Endzhaku ka mpfumelelo wa vadokodela, mutshunguri loyi a a ndzi langutela u ndzi pfunile a ndzi tlhandleka erihlakeni ra mavhilwa. Va ndzi bohelele hi tibandhichi ta ka ace, ku suka exifuveni ku ya exisutini, ku suka endzhumbyini ku ya etsolweni, ni ku suka etsolweni ku ya enkondzweni. A ndzi fana ni ntsumbu-omiswa. Leri a ri ri endlelo leri anakanyeriweke ka ha ri emahlweni ku tiyisekisa leswaku matsutsumelo ya ngati ya mina ya tshama erivilweni rin’we, ni ku sivela ku tsana ka nsusumeto wa ngati. Swi tirhile! Kambe, a ndzi pfumeleriwa ku tshama awara yin’we ntsena nkarhi wun’wana ni wun’wana. Kambe ku tshama a ndzi tshama—endzhaku ko heta 57 wa masiku ndzi ganame hi nhlana!

Eku Heteleleni Ndzi Ya Ekaya!

Eku heteleleni, endzhaku ka ntlhanu wa tin’hweti leto leha, thumbu ra mina ro hefemula ra kholokholo ri humesiwile, kutani ndzi pfumeleriwe ku ya ekaya. A ku ri hi May 1975. Endzhaku ka sweswo, a ndzi hamba ndzi ya ndzi tlhela ndzi vuya le xivandleni xa ku hlakarherisiwa, ndzi yela vutshunguri. Eku sunguleni ka ximumu xa 1975, ndzi sungule ku ya evutirhelini bya Vukreste hi rihlaka ra mina ra mavhilwa. A ndzi nga koti ku endla swo tala, kambe a ndzi humile swin’we ni vanghana.

Enkarhini wun’wana eku sunguleni ka 1976, ndzi vitaneriwe ku ta kamberiwa nakambe hi va ka VRS (Vocational Rehabilitation Services [Mafambiselo ya Vahlakarherisi yo Nyika Mintirho]), vandla leri hakelelaka ku hlakarherisiwa ka mina. A ndzi anakanya leswaku ndzi endla nhluvuko. A ndzi dyondza ku mpfampfarhuta hi pende ndzi tirhisa burachi leyi ndzi yi lumeke hi meno. Hi ku tirhisa nhonga hi ndlela yoleyo, a ndzi sungula ku tsala hi muchini naswona swilo swin’wana a ndzi swi tsala hi penisele. Leswi va ka VRS a va hakelela kwalomu ka vutshunguri bya mina hinkwabyo, a va lava ku kuma ndlela yo ndzi kumela ntirho, ni leswaku ndzi va xirho xa vandla leri lexi endlaka nhluvuko.

Mutsundzuxi a a vonaka a twisisa eku sunguleni, kambe a sungula ku ndzi kombela ku ringeta ku vulavulela ehenhla. Enkarhini wolowo a ndzi kota ntsena ku vulavula switsongonyana ndzi nga hleveteli. Ivi a ndzi vutisa: “Xana u nga tshama u ololoka?”

A ndzi swi kotanga.

A ku: “Chukuvanyisa rintiho rin’we.”

Loko ndzi tsandzeka ni ku endla sweswo, u hime xitsalo xakwe ehenhla ka desika ra yena ivi hi rito ro hlundzuka a ku: “A wu pfuni nchumu!”

Ndzi byeriwe ku ya ekaya ndzi yimela riqingho rakwe. A ndzi xi twisisa xiphiqo xakwe. A ku nga si tshama ku va ni muvabyi eSpain Rehabilitation Center loyi a a ri ni vulema lebyikulu kukota bya mina. Mali yo hakelela switirho leswi va swi tirhisaka kwalaho yi tele ngopfu, naswona munhu loyi a a ri ni vutihlamuleri byo endla swiboho a a nga ri na minkongomiso mayelana ni leswaku a endla yini hi muvabyi loyi a lamaleke kukota mina. Kambe, a swi vavisa ku vuriwa la nga pfuniki nchumu, hikuva ana se a ndzi sungule ku titwa hi ndlela yoleyo.

Masiku ma nga ri mangani endzhakunyana, ndzi kume riqingho ivi ndzi byeriwa leswaku a ndzi nga ha ri enongonokweni. A ndzi titwa ndzi cukumetiwile. Kutani sweswo swi ndzi vangele nhlaselo wun’wana wa gome.

Ku Hlula Gome

Kutani ndzi anakanye tsalwa ra Pisalema 55:22, leri nge: “Nyiketa Yehova e timhaka ta wena, o ta ku seketela.” Nchumu wun’we lowu a ndzi karhateka ha wona a ku ri ndzhwalo wa timali eka vatswari va mina, ivi ndzi khongela ha swona.

Xiyimo xa mina xa gome a xi ndzi khumba swinene emirini, lerova hi nkarhi wa ntsombano wa muganga hi ximumu xolexo a ndzi nga swi koti ku tshama ndzi ololoka. Ndzi yingisele nongonoko ndzi etlele. Leswi swi vitaniwaka ntirho wa vuphayona byo pfuna swi boxiwile entsombanweni wolowo wa 1976, ivi wu ta emianakanyweni ya mina. Vuphayona byo pfuna byi lava u heta 60 wa tiawara ntsena hi n’hweti evutirhelini, avhareji ya tiawara timbirhi ntsena hi siku. A ndzi vona onge sweswo ndzi nga swi kota. Endzhakunyana, ndzi kombele ndzisana ya mina ya xisati Elizabeth ku ndzi pfuna hi nghenela vuphayona byo pfuna. A a anakanya leswaku a ndzi vungunya, kambe loko ndzi yise xikombelo xa mina xo phayona hi August, na yena u yise xa yena.

Elizabeth a a pfuka ni mixo ivi a khathalela swilaveko swa mina swa munhu hi xiyexe. Kutani hi sungula ku veka vumbhoni hi riqingho. Leswi a swi katsa ku bela vanhu riqingho ivi hi bula na vona hi mikateko leyi Xikwembu xi yi vekeleke vanhu ehansi ka vulawuri bya Mfumo wa xona. A hi tsala ni mapapila, ngopfu-ngopfu yo ya eka vanhu lava a va lava nchavelelo. Hi mahelo-vhiki va ndyangu kumbe vanghana a va famba na mina evutirhelini bya yindlu na yindlu ndzi ri erihlakeni ra mina ra mavhilwa. I ntiyiso, leswi ndzi nga kotiki ku tirhisa mavoko ni milenge ya mina, a ndzi koti ku endla nchumu handle ko vula rungula ra Mfumo, ndzi tshaha matsalwa, kumbe ndzi kombela van’wana va ya hlaya eBibeleni.

Hi siku ro hetela ra n’hweti, a ndza ha saleriwe hi 6 wa tiawara ku endla 60 ya mina leyi lavekaka. Elizabeth a a nga ri kona leswaku a ndzi pfuna, kutani ndzi kombela mana wa mina ku ololoxa nhlana wa rihlaka ra mina ra mavhilwa leswaku ndzi kota ku tshama ndzi ololokile. Kutani, hi ku tirhisa rinhi ra nomu, ndzi hete tsevu wa tiawara ndzi tsala mapapila hi muchini. A ku vanga na vuyelo byo biha! Lexi ndzi xi tivaka hi leswaku a ndzi karhele!

Xikhongelo Xa Mina Xi Hlamuriwa

Hi vhiki leri landzeleke, ndzi tshame ndzi ololokile erihlakeni ra mina ra mavhilwa, ndzi ye eSpain Rehabilitation Center ku ya kamberiwa. Dokodela wa mina loyi a a nga si tshama a ndzi vona hi mpfhuka ndzi humesiwa enongonokweni eku sunguleni ka lembe rolero, a a hlamarile. A a hlamarisiwe hi nhluvuko wa mina. U vutisile: “Xana u endle yini?” Ndzi nga si heta ni ku hlamusela hi vutirheli bya hina, u ndzi nyike ntirho.

Mupfuni wakwe u ndzi vutisisile, kutani a tsakisiwa hi leswi a ndzi swi endla evutirhelini. U ndzi kombele leswaku ndzi nghenela leswi vitaniwaka nongonoko wa muvabyi la nga xikombiso. Laha a ndzi ta tirha swin’we ni muvabyi un’wana loyi ndzi n’wi pfunaka. Mayelana ni vutirheli bya hina, u te: “Ana leswi hi leswi vanhu va ka n’wina va swi endlaka, kumbe a swi tano?” Ndzi averiwe ku pfuna muvabyi loyi a a lamale hi mpimo wo lava ku ringana ni wa mina.

Hi ndlela yo karhi mahungu ya leswi a ndzi swi endla evutirhelini hi mpfuno wa ndyangu wa ka hina swi fike eka va ka VRS. A va hlamale ngopfu lerova ku bumabumeriwe leswaku ndzi nga tlhela ndzi amukeriwa nakambe enongonokweni. Leswi a swi vula leswaku ndyangu wa ka hina a wu ta kuma mali yo hakelela switirho leswo hlawuleka ni nkhathalelo lowu a ndzi wu lava leswaku ndzi ya emahlweni ni ntirho wa mina. A ndzi swi vona leswaku Xikwembu xi hlamule swikhongelo swa mina.

Xiyimo Xa Mina Xi Yima Ndhawu Yin’we

Mpimo wa ku hlakarhela ka mina wu fike laha ndzi kotaka ku tlakusa nhloko, ndzi yi hundzula, ni ku tshama ndzi ololoka. Lexi tsakisaka, ndzi hlakarhele hi laha ku heleleke ku kota ku vulavula. Hi ku tirhisa rinhi ra nomu, ndzi kota ku tsala, ku tsala hi muchini, ku tirhisa riqingho leri nga khomiwiki, ni ku mpfampfarhuta hi ku tirhisa pende. Yin’wana ya mimpfampfarhuto ya mina ya pende yi nghenisiwe eminkombisweni ya mimpfampfarhuto yo tirhisa pende leyi endliweke hi nomu. Ndzi ya hinkwako-nkwako hi rihlaka ra mina ra mavhilwa leri nga ni njhini leri ndzi ri kongomisaka hi kunupu ya xilebvu. Xitlakusi xa gezi xi tlakusa rihlaka ra mina ra mavhilwa xi ri nghenisa evheneni ya hina, kutani hi ndlela leyi va nga ndzi yisa kun’wana ni kun’wana laha ndzi lavaka ku ya kona.

Ndzi ve ni swiphiqo swo tala swo hefemula—nyumoniya i nxungeto wa hi masiku. Minkarhi yin’wana a ndzi lava okisijini ni vusiku. Hi 1984, ndzi lave ku fa endzhaku ko tluleriwa hi vuvabyi. A ndzi tshamela ku ya exibedlhele minkarhi yo hlayanyana. Kambe ku sukela hi nkarhi wolowo rihanyo ra mina ri antswile. Ku sukela hi 1976, ndzi kote ku phayona swa nkarhinyana kan’we kumbe kambirhi hi lembe. Kambe a ndzi nga titwi ndzi enerisekile. A ndza ha anakanya hi makungu lawa a ndzi ri na wona loko ndza ha ri n’wana wa kondlo-a-ndzi-dyi lama kavanyetiweke hi kulu.

Ndzi Fikelela Pakani Ya Mina

Hi September 1, 1990, ndzi kale ndzi nghenela ntirho wa vuphayona bya nkarhi hinkwawo, xisweswo ndzi hetisisa ku navela ka mina ka loko ndza ha ri n’wana. Hi nkarhi wa tin’hweti ta xixika loko ku titimela, ndzi veke vumbhoni hi ku tsala mapapila ni ku tirhisa riqingho leri nga khomiwiki. Kambe loko maxelo ya sungula ku kufumela, na mina ndzi hlanganyele evutirhelini bya yindlu na yindlu. Lembe hinkwaro, ndzi fambisa tidyondzo ta Bibele ndzi ri ekaya hi ku tirhisa riqingho leri nga khomiwiki.

Ndzi rindzele vumundzuku lebyinene hi mahlo-ngati emisaveni ya Paradeyisi loko Kreste Yesu na Yehovha Xikwembu va ndzi chicha erihlakeni leri ra mavhilwa. Siku na siku ndzi khensa Yehovha hikwalaho ka switshembiso swakwe swa rihanyo lerinene ni vuswikoti byo “tlula kukota tinhlangu.” (Esaya 35:6) Ndzi ta tsutsuma hi laha ndzi nga kotaka ha kona ndzi tsutsumela ni nkarhi lowu lahlekeke, kutani ndzi ta dyondza ku gada hanci.

Loko ndza ha rindzele nkarhi wolowo, ndzi ni ntsako lowu nga hlamuselekiki hi ku va un’wana wa vanhu va Yehovha lava tsakeke ni ku hlanganyela hi laha ku teleke evutirhelini sweswi.—Hi ku vula ka Gloria Williams.

[Swifaniso leswi nga eka tluka 15]

Vutirheli bya mina bya Vukreste—ku famba hi yindlu na yindlu, ku vula vumbhoni hi riqingho, ku tsala mapapila

[Xifaniso lexi nga eka tluka 16]

Mimpfampfarhuto ya mina ya pende yi nghenisiwe enkombisweni wa mimpfampfarhuto ya pende leyi endliweke hi nomu