Ku Va Ekusuhi Na Xikwembu Swi Ndzi Pfunile

A NDZI nga ri na mhaka ni vukhongeri. Vukhongeri hinkwabyo lebyi simekiweke, a byi ri vukanganyisi eka mina. A ndzi nga swi voni leswaku bya va pfuna swinene vanhu, a ndzi vona onge byi va endla va pfumala ntwela-vusiwana eka van’wana. Eku heleni ka va-1960, muungameri wa U.S. u dlayiwile naswona vanhu vo tala a va fa hikwalaho ka nyimpi le Vietnam. Misava a yi yime hi nhloko. Vutomi bya mina na byona a byi hohloka. Xana xi nga va xi ri kona Xikwembu lexi khathalaka hi mina kumbe vanhu van’wana loko swilo swi yime hi ndlela leyi?

A ndzi ri na malembe ya 27, naswona a ndzi tekiwile ndzi ri na vana vambirhi lavatsongo, naswona a ndzi tirha nkarhi lowu taleke evuhlayiselweni bya lava lahlekeriweke hi dzano, loko muakelani wa mina a sungula ku vulavula na mina hi Bibele. Lexi hlamarisaka, ndzi yingisile. A vulavula hi leswi a swi vuleke masiku ya makumu. Rungula rakwe a ri nga tolovelekanga, hi loko ndzi n’wi vutisa swivutiso. U ndzi siyele buku leyi nge Ntiyiso Lowu Yisaka eVuton’wini Lebyi Nga Heriki. Ndzi yi hlaye hi vusiku byin’we, ndzi pfula matsalwa hinkwawo, ivi ndzi sungula ku tivutisa, ‘Xana hakunene ndzi wu kumile ntiyiso?’

Loko ndzi wu kumile, a ku ri xiphiqo sweswi. Ndzi velekiwe emutini wa Vayuda, naswona nuna i Muyuda naswona ndzi ni vana vambirhi lavatsongo, maxaka na wona i Vayuda. A ndzi swi tiva leswaku va ta kukumuka loko ndzo va un’wana wa Timbhoni ta Yehovha. A ndzi nga swi lavi ku hlundzukisa maxaka ya mina hi nchumu lowu ndzi nga tiyisekiki ha wona; a ndzi fanele ndzi tiyiseka. Hi loko ndzi sungula ku dya tibuku ta Bibele. Ku nga si hela vhiki se a ndzi khorwisekile leswaku lowu i ntiyiso. A ndzi fanele ndzi dyondza ntiyiso. Hi loko ndzi sungula ku hlaya ni Timbhoni ta Yehovha. Endzhaku ka vhiki se a ndzi chumayela un’wana ni un’wana. Swi ndzi tsakisile ku tiva leswaku vito ra Xikwembu i Yehovha, ni leswaku xa khathala ha mina ni vanhu hinkwavo ni leswaku swa koteka ku kuma vutomi lebyi nga heriki aparadeyisini emisaveni. Ndzi khuvuriwe hi June 12, 1970.

Tanihi laha ndzi anakanyeke ha kona, ndyangu wa mina ni vingi va ndzi hlundzukerile, van’wana va ndzi lan’we kunene. Nuna wa mina a hamba a hlaya, minkarhi yin’wana a tshika, kambe a nga kalanga a va mupfumeri. Kambe, vana va mina, va swi kotile ku va Timbhoni ta Yehovha. Ku sukela khale a ndzi navela ku va mutirheli wa nkarhi hinkwawo, ndzi chumayela mahungu lamanene ya Mfumo wa Xikwembu hi yindlu na yindlu. Kambe ndyangu wa mina a wu kula naswona ndzi ri na nuna la nga riki mupfumeri. Hambi leswi a ndzi tirha, hi lahlekeriwe hi tindlu timbirhi hi ku tsandzeka ku hakela, naswona minkarhi yo tala a hi pfumala ni ndhawu yo tumbeta nhloko. Vutomi a byi tika.

Siku rin’wana yindlu ya hina a yi fanele yi tekiwa. A hi fanele hi va lomba yindlu ya vona hi Sonto ni mixo, naswona a hi ri hava vuyo. Ndzi endle matshalatshala yo tala, ivi hi Mugqivela ni mixo ku nga siku leri rhangelaka ro hetelela, ndzi boha leswaku ndzi ta endla hi laha Yesu a vuleke ha kona eka Matewu 6:33—ndzi lava Mfumo ku sungula ivi ndzi rindzela Yehovha leswaku a ndzi nyika leswi ndzi swi lavaka. Hi loko ndzi ya evutirhelini bya mina bya nsimu. Ndza ha tsundzuka ndzi rila hikwalaho ka ku karhateka hi xiyimo lexi, kambe endzhaku ka ntlhanu wa timinete a ndzi antswa swinene. Minkarhi hinkwayo ndzi kume leswaku ku chumayela ku ni vuyelo lebyinene eka mina; ku ndzi endle ndzi kota ku langutana ni swiphiqo swa mina naswona moya wa Yehovha wu ndzi endla ndzi tsaka ni ku va la humelelaka naswona wu endla vutomi bya mina byi va ni xikongomelo. Hambi swi ri tano, loko ndzi fika ekaya hi siku rero, ndhawu a hi nga si yi kuma, kambe a ndzi antswa.

Madyambu wolawo hi kume riqingho ro huma eka vaxavisi va tindlu lava langutelaka xilaveko xa hina. A ku ri 11:30 p.m., naswona vaxavisi lava va tindlu a va karhetekile swinene hi mhaka ya leswi hi nga hava ko ya kona lerova va hi kumele ndhawu yo tshama ka yona swa xinkarhana ku kondza hi kuma yindlu leyi nga ya hina. Hi loko Timbhoni-kulorhi ti hi tleketlisa nhundzu hi ya eka yindlu yoleyo hi Sonto. Hi tshame kwalaho mavhiki manharhu nhundzu ya hina yi ri emabokisini ivi eku heteleleni hi ya endlwini ya hina loko se yi lulamile. A swi nga olovi, kambe Yehovha u hi nyike swilaveko swa hina. Leswi swi ndzi tiyisile swinene ni ku aka ripfumelo ra mina. A swi ri hi laha Hosi Davhida a vuleke ha kona eka Pisalema 37:25: “A nḍi ri lo’ntŝha, kutani nḍi dyuharile, kambe a nḍi v̌onanga l’a lulameke a ṭhikiwa, ni v̌ana v̌a yena v̌a kombela v̌uŝa bya v̌ona.”

A ku ri na swiphiqo malunghana ni ku tirhisiwa ka mali ya ndyangu. Minkarhi yin’wana a ndzi boheka ku lawula matirhiselo ya mali ni ku lulamisa xin’wana ni xin’wana. Ndzi ringete hi matimba hinkwawo leswaku ndzi hlayisa vukati hi malembe wolawo, ngopfu-ngopfu hinkwalaho ko rhandza Yehovha ni ndlela leyi a langutaka vukati ha yona, kambe endzeni ka mina a ndzi navela onge nuna wanga a nga cinca ivi a ta entiyisweni.

Minkarhi hinkwayo a ndzi khongelela ku va phayona ra nkarhi hinkwawo, ivi ndzi nghenela vuphayona bya nkarhinyana loko ndzi kuma nkarhi.a A ndzi swi tiva leswaku ku chumayela i ndlela yo antswa ni ya nkoka swinene evuton’wini bya mina. A ndzi rhandza Yehovha naswona a ndzi tsakela ku n’wi tirhela hi mbilu-hinkwayo. Ni vanhu a ndzi va rhandza naswona a ndzi tsakela ku va pfuna. Vutomi bya mina byo nonon’hwa byi ndzi endle ndzi vona leswaku misinya ya milawu ya Bibele ya pfuna, ni leswaku vanhu va lava ntshembo lowu Mfumo wu wu nyikaka. Kambe a ndzi karhateka hi leswaku loko ndzo ka ndzi nga tirhi, ndyangu wa mina wu ta sika. Hambi sweswi a hi hanya ku nonon’hwa.

Ndzi Be Nkalanga, Hi Loko Mupfinyi A Hlanula Swirhendze

Hi loko ku humelela nchumu wun’wana evuton’wini bya mina lowu ndzi tiyisekiseke leswaku minkarhi hinkwayo Yehovha wa ndzi langutela. Munhu un’wana u tshove a nghena endlwini ya mina a lava ku ndzi pfinya. U ndzi hlasele ndzi etlele, loko ndzi pfuka, u vule leswaku loko ndzo ba nkalanga kumbe ku baleka u ta ndzi dlaya. Hambi leswi a ndzi tshukile, Yehovha u ndzi pfunile leswaku ndzi tiya ndzi kota ku anakanya ku khongela ni ku vona leswaku ndzi nga endla yini. A ndzi swi tiva leswaku Bibele yi ri yini hi ku ba nkalanga, kambe ndzi tlhele ndzi vona leswaku swi nga ha endleka a ndzi dlaya loko ndzo rila, naswona loko vana va mina vo pfuka, a a ta va dlaya. A ndzi vona onge ana se ndzi file, ivi ndzi khongela eka Yehovha leswaku a sirhelela vana va mina loko ndzo fa. Hambi swi ri tano, ndzi be nkalanga hi laha Bibele yi vulaka ha kona. (Deteronoma 22:26, 27) Mupfinyi u balekile. Vusiku byebyo a ndzi vona onge ndzi ta fa hakunene. Ndzi hambete ndzi va ekusuhi na Yehovha.

Ndzi tshike ntirho wa mina ivi ndzi sungula ku tirha tanihi phayona ra nkarhi hinkwawo hi 1975. Ndzi phayone malembe ya tsevu naswona nuna wa mina a a hakelela swilo hinkwaswo. Lexi vavisaka, ndzi khomiwe hi vuvabyi bya chukela ndza ha ri ntsongo naswona nkarhi wun’wana ndzi vabye ngopfu. Leswaku ndzi hambeta ndzi hanya a ndzi titshega swinene ha Yehovha. Ku nga khathariseki swiyimo swa mina, lawa a ku ri malembe yo tsakisa ni lawa ndzi endleke swo tala ha wona ku fikela hi nkarhi wolowo. Yehovha u ndzi katekise hi swichudeni swo tala swa Bibele leswi endleke nhluvuko ku kondza swi khuvuriwa. Van’wana na vona va ve maphayona hi ku famba ka nkarhi.

Kutani ke, hi 1980, vutomi bya hina byi hohlokile. Ku humelele nchumu lowu hi hambaniseke mina ni nuna wanga. Vana va mina a va karhatekile swinene, kambe hinkwalaho ka vona, ndzi ringete ku hlayisa vukati, kambe nuna wa mina a a nga ri na mhaka ni matshalatshala ya mina. Hi ku vona leswi, ndzi vone swi fanerile ku dlaya vukati hi ku pfumelelana ni Matsalwa. Ku famba ka yena ku khumbe vana va mina swinene.

Ndzi hambete ndzi phayona hi nkarhi lowu naswona ndzi swi kotile ku khomelela ku ringana lembe. Hambi swi ri tano, ntombhi ya mina, hi ku tsandzeka ku langutana ni xiyimo lexi, yi sungule ku xandzuka, yi xandzukela mina swin’we ni ntiyiso. Hikwalaho ka mahanyelo yakwe, ndzi tshike vuphayona hi nkarhi wolowo. Leswi a swi ndzi khomanga kahle; ndlela leyi a ndzi hanya ha yona a yi kavanyetiwile. Ndzi titwe ndzi ri ndzexe, ndzi vona onge a ndza ha ri na nchumu handle ka Yehovha.

Hi nkarhi lowu, Yehovha u ndzi pfune hi vamakwerhu vambirhi lava rhandzekaka lava ndzi pfuneke swinene hambi loko va nga swi tivi. Un’wana a ri mulanguteri la famba-fambaka, naswona un’wana a ri nkulu wa vandlha rin’wana loyi a xi tiva xiyimo xa hina, tanihi leswi a tshameke a dyondza ni nuna wa mina. A ndzi na wona marito yo ringana yo nkhensa Yehovha hi vavanuna lava. A ndzi nge va rivali.

Endzhakunyana, ntombhi ya mina yi tekiwe ehandle ka ntiyiso, ya ha ri yitsongo. Leswi swi vavise ndyangu, swi hi siya hi ri egomeni lerikulu. Jaha ra mina na rona, hi ku hatlisa ri tikhomele ndlela ya rona. Ndzi hambete ndzi khongela Yehovha leswaku a pfuna ndyangu wa mina leswaku wu tlhelela entiyisweni. A ndzi va rhandza swinene, a ndzi tsakela ntsena ku va vona va tshame ekusuhi na Yehovha. Lexi a ku ri xikhongelo xa mina evuton’wini bya mina loko ndzi ri entiyisweni. Nkarhi lowu a wu vava ngopfu ku tlula malembe ya 20 lawa a ndzi ri evukatini ha wona—hambi leswi na wona a ma bihile. Hambi swi ri tano, a ndzi swi tiva leswaku Yehovha u ta pfula ndlela, naswona a ndzi fanele ku endla ku rhandza ka yena ku nga khathariseki swiyimo leswi nga kona.

Ku ni xiendlakalo xin’wana lexi ndza ha xi tsundzukaka kahle. A ndza ha phayona, naswona a hi ri hava mali, kambe a hi lava R200 leswaku hi ta kota ku hanya vhiki rero ni ku hakelela swo famba ha swona hi ya entirhweni. A ndzi tirha masiku mambirhi hi vhiki. Hi ntolovelo a ndzi fanele ndzi rindza vhiki hinkwaro leswaku ndzi ta kuma mali ya mina—ya kwalomu ka R114. A ndzi ri hava mali yo xava swakudya, a ndza ha vuli yo khandziya ha yona. Madyambu lama landzeleke ndzi dyondze Bibele ni nsati un’wana loyi a swi koteke ku ndzi pfuna hi mathikithi ya xitimela.

Mixo lowu landzeleke a ku ri Ravuntlhanu. Ndzi ye ndzi ya teka poso, kutani a ku ri na mapapila mambirhi. Rin’wana a ku ri cheke leyi a yi fanele yi fika hi vhiki leri nga ta tlhandlama. Yi teke masiku manharhu ntsena ku ta fika eka mina. A swi hlamarisa. A ndza ha lava R86 kumbe R87 leswaku ndzi kota ku hanya. Eka mvhilopo yin’wana a ku ri ni cheke ya R86 ku nga mali leyi a ndzi yi pfumala. Lexi hlamarisaka eka leswi, hi leswaku hi February lembe rero, hulumendhe yi ndzi he mali yo xava mafurha yo voninga yindlu ya mina. Sweswi a ku ri August, xisweswo yi vule leswaku yi ndzi kolota mali yo ringana R86—ya August, ya mafurha yo voninga yindlu? Leswaku i yini lexi va endleke va anakanya leswaku a va ndzi kolota xo karhi, naswona ku tlhela ku va mafurha yo voninga yindlu hi August, a ndzi swi tivi? Leswi swi ndzi tiyise ripfumelo swinene!

Swilo Leswi Vonakaka A swi Anelanga

Ndzi sungule ku tirha nkarhi hinkwawo ivi ndzi dyondza tikhomphyuta eka ntirho lowu a ndzi wu endla. Malembe lawa a ndzi nga phayoni ha wona a ma tika. Hambi leswi a ndzi ri na ntirho wa kahle naswona ku ri ro sungula ndzi va ni mali yo nyawulanyana swin’we ni swilo leswi vonakaka, a ndzi nga tsakanga. Vana a va tihanyela va ri voxe naswona va ri na swiphiqo swo nonon’hwa swinene. N’wana wa mina wa wanhwana a a ri karhi a tlhelela entiyisweni kambe a ha ri na swiphiqo. Jaha ra mina na rona a ri ri na swiphiqo. Endzhaku ka nkarhi, ndzi vone onge ndzi lahlekeriwa hi vuxaka bya mina bya le kusuhi na Yehovha lebyi a ndzi byi tlangela swinene. A ndzi swi vona leswaku ndzi ya ndzi va ekule na Yehovha hambi loko van’wana va nga swi voni. A ndzi ya eka minhlangano hinkwayo, ndzi hlaya, ndzi ya ensin’wini, kambe a swi nga enelanga. Ndzi ringete ku tinyika nkarhi wo va ni vanghana va mina, kambe ni sweswo a swi pfunanga nchumu.

Ndzi sungule ku titwela vusiwana. Ndzi sungule ku anakanyisisa swinene, ndzi tikamba. Xana a ku ri na swin’wana swo antswa leswi ndzi nga vaka na swona? Kavula, hi leswi ana Sathana a lava swona. A ku ri ro sungula ndzi sungula ku kokeleka eka vatirhi-kulorhi. Embilwini yanga ndzi te, ‘Ndzi ta va chumayela.’ Ndzi va chumayerile hakunene. Kambe endzeni ka mina a ndzi swi vona leswaku mbilu ya mina yi sungula ku honisa swilo leswi yi nga fanelangiki ku swi honisa. A ku ri swiphiqo leswi nga endzeni ka mina. A ku ri mina xiphiqo xa kona. Ripfalo ra mina leri leteriweke hi Bibele a ri ndzi tshikanga. Ivi ndzi khongela eka Yehovha.

A ndzi tirha nkarhi lowu taleke. A ndzi lava ku tshika ku hlengeleta xuma. A ndzi famba ku suka le Long Island ndzi ya eWall Street tiawara tinharhu hi siku. A swi dya nkarhi wo tala! Nakambe, ku fambisana ni vanhu va misava exitimeleni a swi nga ndzi pfuni. Ndzi sungule ku vulavula ni vakulu ivi ndzi ya etinhlengeletanweni hi mahelo-vhiki leswaku ti ndzi pfuna ku anakanyisisa hi swilo swa nkoka. A ku ri ro sungula evuton’wini bya mina ndzi yima kahle hi tlhelo ra swilo leswi vonakaka, hi loko ndzi tivutisa leswaku swi onhake kwihi? Endzhaku ko khongela nkarhi wo ringana lembe, ndzi anakanyisisa hi ku cinca vutomi bya mina, ndzi swi kotile ku byi cinca.

Ndzi rhurhele endhawini ya le Brooklyn Heights. Ndzi tshame ndzi ri endzela vandlha leri naswona a ndzi swi tiva leswaku vumoya bya rona hi lebyi ana ndzi lavaka byona. Ku ni Timbhoni to tala to tshembeka, leti tirheke nkarhi hinkwawo malembe yo tala—hi loko ndzi sungula ku tshamiseka. Ku nga si hela tin’hweti ta tsevu se a ndzi swi lungherile ku tshika ntirho-vutomi wa mina ivi ndzi phayona. Ndzi lave ntirho wa xinkarhana naswona hi 1984, ndzi tlhele ndzi hlawuriwa tanihi phayona ra nkarhi hinkwawo.

Emalembeni lawa hinkwawo, Yehovha u ndzi katekise hi ndlela leyi hlamarisaka, na hi ntokoto wo tala swinene. Ndzi ringetile ku va ni xivindzi ni ku dyondza eka ndzingo wun’wana ni wun’wana. A swi nyumisi ku va ni swiphiqo; xidyoho xi vangiwa hi ku ka u nga yi tirhisi misinya ya milawu ya Bibele loko u tlhantlha swiphiqo. Laha Brooklyn, a ndzi vanga na swona swiphiqo leswi ndzi veke na swona loko ndza ha ku amukela ntiyiso. Mali a ya ha ri xiphiqo. A ndza ha karhatiwi hi nuna la nga pfumeriki. Mbilu yanga yi ongoriwile. Ndzi katekisiwe hi vana vo tala va moya.

Kambe minkarhi hinkwayo, ku tshama ku ri na swiphiqo ni swiyimo leswintshwa. Hi 1987, jaha ranga, Marc, ri khomiwe hi ntshikilelo lowukulu wa mianakanyo, kambe Yehovha u hi pfunile emhakeni leyi. Marc u tiendla a fanelekela malunghelo ya ntirho evandlheni, u endla kahle swinene. Nhwana wanga, Andrea, u vuyile entiyisweni naswona u khuvuriwile, u kurisela vana vakwe entiyisweni. Leswi se hi tshinelaka swinene eka nhlomulo lowukulu, ndzi swi languterile leswaku swiphiqo swi ta hambeta swi va kona naswona swi nga ha endleka swi va swikulu, kambe minkarhi hinkwayo Yehovha u ta hi pfuna leswaku hi hlula swihinga kumbe mintlhontlho leyi nga ha taka.

Hakunene, Yehovha u ndzi pfunile leswaku ndzi va ni vutomi lebyi tsakisaka ni lebyi vuyerisaka. Ndzi tiyimisele ku tirhisa vutomi bya mina hinkwabyo, ndzi tshinela ekusuhi na yena, ni ku endla ku rhandza ka yena.—Hi ku vula ka Marlene Pavlow.

[Nhlamuselo ya le hansi]

[Xifaniso lexi nga eka tluka 30]

Marlene Pavlow, phayona ra nkarhi hinkwawo ra mahungu lamanene ya Mfumo