Ndzi Tshike Vutikukumuxi Bya Mina Kutani Ndzi Kuma Ntsako

HI 1970, a a ndzi ri ni malembe ya 23 hi vukhale naswona a ndzi tikurisa. Laha a ndzi tirha kona eIvrea, le Italy, laha a ku endliwa kona mimovha, a a ndzi vekiwe tanihi matsalana lonkulu wa xiyimo xa le henhla. A a ndzi tiyimisele ku va munhu wa nkoka. Kambe a ndzi ri ni gome swinene naswona ndzi nga tsakanga. Ha yini?

Nuna wa mina u hete minkarhi ya yena yo tala a ri etibarheni a tlanga makariti ni vanghana va yena, kutani a ndzi siya ni ndzhwalo wo tala wa vutihlamuleri bya ndyangu. Vuxaka bya hina byi sungule ku tsekatseka. A hi holovisana hi timhaka titsongo ntsena. Hikwalaho ka sweswo, mianakanyo ya mina yi sungule ku tala hi miehleketo leyi hoxeke.

A ndzi ku: ‘Ku hava loyi a ndzi tsakelaka hakunene, va lava ku endla swilo hi ku tirhisa xikhundla xa mina ntsena.’ A ndzi tibyela ndzi ku: ‘Xikwembu a xi kona, hikuva loko xi ri kona xi nge pfumeleli ku xaniseka ni vubihi byo tala swonghasi. Vutomi ko va mphikizano wo ya eku feni ntsena.’ A ndzi twisisanga leswaku ha yini leswi swi ri hi ndlela leyi.

Ku Sungula Ka Ku Hundzuka

Siku rin’wana hi 1977, vambirhi va Timbhoni ta Yehova va gongondze enyangweni wa hina. Nuna wa mina, Giancarlo u va nghenisile, kutani va ya ekamareni ro tshama eka rona va ya vulavula. Kungu ra yena a ku ri leswaku va va vapfumeri va hundzuluko ku fana na yena, kambe hi vona lava hundzuleke ku anakanya ka yena!

Hi ku hatlisa Giancarlo u sungule ku hundzula vutomi bya yena. U ve la lehisaka mbilu swinene, a tinyika nkarhi ni nkhathalelo lowu engetelekeke wa mina ni nhwana wa hina. U ringete ku ndzi byela swilo leswi a a swi dyondza, kambe a ndzi heta bulo hi marito yo tlhava.

Kambe siku rin’wana loko Timbhoni ti ta, ndzi tshame ehansi, ndzi yingisela kahle. Va vulavule hi ku hela ka mafambiselo lawa ya swilo ni hi Mfumo wa Xikwembu, misava ya Paradeyisi, ni ku pfuxiwa ka vafi. Ndzi hlamale swinene! A ndzi etlelanga vusiku byinharhu lebyi nga landzela! A ndzi lava ku tiva swo tala, kambe vutikukumuxi byi ndzi sivele ku vutisa nuna wa mina swivutiso. Kutani siku rin’wana u ndzi byele hi ku tiyiseka a ku: “Namuntlha u ta yingisela. Ndzi ni tinhlamulo hinkwato ta swivutiso swa wena.” Kutani a ndzi andlalela mintiyiso ya Bibele.

Giancarlo u ndzi byele leswaku Yehova i vito ra Muvumbi, naswona mfanelo ya Yena leyikulu i rirhandzu, leswaku U rhumele N’wana wa Yena tanihi nkutsulo leswaku hi kuma vutomi lebyi nga heriki, ni leswaku endzhaku ka ku lovisiwa ka lavo biha eArmagedoni, Yesu Kriste u ta pfuxa vafi eku Fumeni ka yena ka Gidi ra Malembe. U vule leswaku lava pfuxiweke va ta hetiseka emianakanyweni ni le nyameni ni leswaku va ta va ni nkateko wo hanya hi laha ku nga heriki emisaveni ya Paradeyisi.

Siku leri landzelaka, ndzi fambe na nuna wa mina eHolweni ya Mfumo ro sungula. Endzhaku ka sweswo ndzi n’wi byele ndzi ku: “Vanhu lava va rhandzana. Ndzi lava ku hamba ndzi ta laha hikuva va tsakile hakunene.” Hi sungule ku ya eminhlanganweni nkarhi hinkwawo, kutani ndzi fambiseriwe dyondzo ya Bibele. Ndzi anakanyisise ngopfu hi leswi a ndzi swi dyondza naswona ndzi khorwisekile leswaku ndzi kume vanhu va ntiyiso va Xikwembu. Hi 1979 mina ni nuna wa mina hi kombise ku tinyiketela eka Yehova hi ku khuvuriwa.

Vutirheli Bya Nkarhi Hinkwawo

Enhlengeletanweni ya xifundza eku heleni ka lembe rero, ku nyikeriwe nkulumo leyi a yi khutaza hi ntirho wa nkarhi hinkwawo wa ku chumayela. Ndzi titwe ndzi susumeteleka ku nghenela ntirho wolowo, naswona ndzi ye eka Yehova hi xikhongelo hi mhaka yoleyo. Kambe hi nkarhi wolowo ndzi ve ni khwiri, kutani makungu ya mina ma kavanyeteka. Eka malembe ya mune lama nga landzela, hi ve ni vana vanharhu. Vambirhi va vona, va hlaseriwe hi ku tsana ko karhi ka miri, hi minkarhi leyi hambaneke. Lexi tsakisaka, va hlakarhele kahle.

Sweswi ndzi twe onge ndzi nge he tshiki makungu man’wana ni man’wana ya mina ya vutirheli bya nkarhi hinkwawo. Ndzi tshike ntirho wa mina wo tihanyisa ndzi khathalela vutihlamuleri bya mina tanihi wansati ni manana. Mina ni nuna wa mina hi endle makungu yo hanya hi mali ya munhu un’we, leswi vuleke ku tshika swilo leswi nga riki swa nkoka. Kambe, Yehova u hi fuwisile hi mikateko, a nga hi tshikanga hi va evuswetini kumbe hi pfumala.

Hi 1984 nhwana wa mina, loyi hi nkarhi wolowo a ri na malembe ya 15 hi vukhale naswona a ha ku khuvuriwa, u sungule ntirho wa nkarhi hinkwawo tanihi phayona. Hi nkarhi wolowo, nuna wa mina u vekiwe tanihi nkulu. Mina ke? Hi ku vona leswaku a ndzi nga ha ta swi kota ku phayona, ndzi tivekele pakani ya tiawara ta 30 hi n’hweti entirhweni wo chumayela. Ndzi yi fikelerile ivi ndzi tibyela ndzi ku: ‘Ndzi xumile! Ndzi endle swo tala.’

Hambi swi ri tano, vutikukumuxi byi tlhele byi va xiphiqo xa mina. (Swivuriso 16:18) Ndzi hambete ndzi anakanya hi ndlela leyinene leyi a ndzi tirha ha yona naswona a ndzi nga swi lavi ku endla nhluvuko wun’wana wa moya. Vumoya bya mina byi sungule ku tsana, naswona ndzi sungule ku lahlekeriwa hi timfanelo letinene leti a ndzi ri na tona. Kutani ndzi kume ndzayo leyi a ndzi yi lava.

Hi 1985 valanguteri vambirhi lava famba-fambaka kun’we ni vasati va vona va ve vaendzi ekaya ra hina loko va endla riendzo ra vona ra nkarhi na nkarhi ebandlheni ra ka hina. Hi ku xiya Vakriste lava lava titsongahataka, lava tinyiketelaka, hakunene swi ndzi endle leswaku ndzi tikambisisa. Ndzi lavisise mhaka ya vutitsongahati, hi ku tirhisa tibuku ta Sosayiti ya Watch Tower. Ndzi anakanye hi vutitsongahati lebyikulu lebyi Yehova a byi kombisaka loko a tirhisana na hina vanhu va vudyoho. (Psalma 18:35) Ndzi swi tivile leswaku a ndzi fanele ku hundzula mianakanyo ya mina.

Ndzi kombele Yehova leswaku a ndzi pfuna ndzi hlakulela vutitsongahati leswaku ndzi ta n’wi tirhela hi ndlela leyi a lavaka yona ni ku ndzi kongomisa leswaku ndzi tirhisa tinyiko leti ndzi nga na tona ku n’wi dzunisa ha tona. Ndzi tate fomo ya ntirho wa vuphayona, ndzi sungula ku n’wi tirhela entirhweni wa nkarhi hinkwawo hi March 1989.

Sweswi ndzi nga vula leswaku hakunene ndzi tsakile naswona ku mita vutikukumuxi bya mina, hi kona ku endleke leswaku ndzi tsaka. Ndzi kume xivangelo xa xiviri xo hanya—xi nga ku pfuna vambuyangwana va tiva leswaku Yehova, Xikwembu xa ntiyiso, a nga le kule ni lava va n’wi lavaka.—Hi ku vula ka Vera Brandolini.