Vana Lava Hlaseriweke Hi Vaprista Hi Rimbewu, Va Boxa Hinkwaswo

“EKA malembe ya khume lama hundzeke, kereke kumbe valawuri va vanhu va pote vaprista va Rhoma Khatoliki va kwalomu ka 400 ekereni kumbe emaphoriseni, hikwalaho ka ku hlasela vana hi rimbewu,” hi ku vula ka U.S.News & World Report. Sweswinyana, a ku khomiwe nhlengeletano ya tiko ya lava hlaseriweke le Chicago, Illinois. Vo tala va boxe erivaleni ndlela leyi va hlaseriweke ha yona hi vaprista lava hlaselaka vana hi rimbewu.

Kambe NCR (National Catholic Reporter) yi vula leswaku swivulavuri swi phindha-phindhe mhaka yin’wana eka nhlengeletano yoleyo hinkwayo: “Nhlaselo wo sungula i wa rimbewu; wa vumbirhi ni lowu vavisaka swinene, i wa miehleketo.” Nhlaselo lowu wa vumbirhi wu humelela loko kereke yi ala ku yingisa vahlaseriwa, yi nga swi tekeli enhlokweni swihehlo swa vona, naswona yi ringeta ntsena ku sirheleta vaprista va yona lava dyoheke. NCR ya vika: “Hambi swa twala kumbe a swi twali, va kombise vafundhisi va Khatoliki tanihi lava nga swirho swa ntlawa lowu thyakeke ni lowu nga leteriwangiki kahle, lava voyameleke ngopfu eku hlayiseni ka malunghelo ni matimba ku tlula ku khathalela swilaveko swa vangheni va kereke.” Swivulavuri swo hlayanyana swi fananise leswi ni Ndzhundzunuko, lowu pandzeke kereke hi le xikarhi hi lembe xidzana ra vu-16.

Hi ku ya hi khale ka muprista Richard Sipe la hundzukeke mutshunguri wa mianakanyo ni mutivi-nkulu wa nhlaselo wa rimbewu hi vafundhisi va Khatoliki, u ri, hambi loko va ala swihehlo leswi, swa tikomba “leswaku va swi tiva le ndzeni ka vona vini naswona va khumbeka hi voxe eka xiphiqo lexi.” U engeterile: “Kereke ya swi tiva naswona ana a yi tiva swo tala hi ta swiendlo leswi swa rimbewu swa vaprista va yona. Yi swi honisile, yi swi tshika, yi swi tumbeta naswona yi fihla swiendlo leswikulu swa rimbewu swa vaprista va yona.”

Kutani, a swi hlamarisi leswi vo tala lava hlaseriweke va mangalelaka kereke. NCR yi tshaha gqweta rin’wana leri tirhanaka swinene ni milandzu yo tano ri ri karhi ri vula leswaku ku ni milandzu ya vaprista lava hlaseleke vana hi rimbewu eka xifundzha xin’wana ni xin’wana xa leswa 188 leswi nga le United States leswi lawuriwaka hi vafundhisi-nkulu. U vula leswaku handle ka nawu wa le hubyeni mindziho yi fike kwalomu ka R885 000 eka nandzu ha wun’we. U.S.News & World Report yi vula leswaku milandzu yo tano ana se yi vangele kereke ku hakela R1 180 000 000, mali leyi yi nga ha tlakuka yi ya ka R2 950 000 000 loko ku fika lembe ra 2000. Naswona Phepha ra le Canada ra ha ku vika sweswinyana leswaku kwalomu ka 2 000 wa lava hlaseriweke hi tlhelo ra rimbewu loko va ha ri vana eka tindhawu ta 22 ta vana lava nga swisiwana leti fambisiwaka hi kereke ni mavandla ya ta mianakanyo le Quebec, va mangalela tikereke ta tsevu hi R3 304 000 000 eka milandzu leyi.

Kambe lexi tsakisaka, gqweta leri ri boxiweke le henhla ra le U.S. leri yimelaka vahlaseriwa va 150 lava hlaseriweke hi rimbewu hi vaprista ematikweni ya 23, ri vula leswaku a ri si n’wi kuma munhu loyi a a swi lavaka ku ya ehubyeni. Hinkwavo va sungule hi ku ringeta ku kuma vuavanyisi “eka fambiselo ra vafundhisi va kereke.” NCR yi heta hi ku: “Swi tikomba onge vahlaseriwa va ya etihubyeni, loko se va tsandzekile eka tindhawu tin’wana hinkwato.”