Mati Lama Nga Endlaka Munhu A Kuma Vutomi Lebyi Nga Heriki
Yesu a a ri karhi a hundza hi le mutini wa Samariya lowu nga en’walungwini wa Yerusalema. A a karhele naswona a a khomiwe hi torha. Loko a ha tshame ekusuhi ni xihlovo, u kombele ku keriwa mati hi wansati wa Musamariya. Wansati yoloye u hlamarile loko Muyuda a n’wi kombela mati, tanihi leswi eka lembe-xidzana ro sungula Vayuda ni Vasamariya a va nga tirhisani.
Wansati loyi a pfilunganyekeke u vutise Yesu a ku: “Ha yini wena, hambileswi u nga Muyuda, u kombela leswaku ndzi ku nyika u nwa, kasi mina ndzi wansati wa Musamariya?”
Yesu u te: “Loko a wu yi tiva nyiko ya mahala ya Xikwembu ni loyi a vulaka eka wena a ku, ‘Ndzi nyike ndzi nwa,’ a wu ta va u kombele eka yena, kutani a a ta va a ku nyike mati lama hanyaka.”
Yesu u ye emahlweni a ku: “Un’wana ni un’wana loyi a nwaka mati lawa u ta tlhela a twa torha. Mani na mani la nwaka mati lawa ndzi nga ta n’wi nyika wona a nge he tlheli a twa torha, kambe mati lawa ndzi nga ta n’wi nyika wona ma ta va nseledyana wa mati lama pfelelaka ma nyika vutomi lebyi nga heriki.”—Yohane 4:1-15.
Xana Yesu a a vulavula hi mati ya muxaka muni?
BIBELE yi vitana Muvumbi, Yehovha Xikwembu yi ku i “xihlovo xa mati lama hanyaka.” (Yeremiya 2:13) Vutomi i nyiko leyi humaka eka Xikwembu naswona ku va kona ka hina a swi titsheganga ntsena hi ku nwa mati ya xiviri kambe ni hi mati lawa Yesu a vulavuleke ha wona.
Namuntlha ku ni xilaveko lexikulu xa tinhlamulo ta swivutiso swa nkoka swinene evuton’wini ku tlula rini na rini. Ku nga vuriwa leswaku vanhu lava nga eka pulanete leyi va karhatekile swinene hikuva a va na wona nkongomiso lowunene etimhakeni leti ta nkoka. Vanhu va lava tinhlamulo ta xihatla ta swivutiso swo tanihi leswi nge: Lava feke va kwihi? Xana ku na ntshembo wa leswaku hi ta tlhela hi va vona? Ha yini Xikwembu xi pfumelela ku xaniseka? Xana enkarhini lowu taka tinyimpi, vugevenga, ndlala ni mavabyi swi ta va swi nga ha ri kona? Timbhoni ta Yehovha ti tshemba leswaku tinhlamulo leti enerisaka ta swivutiso leswi ti nga kumeka eRitweni ra Xikwembu, ku nga Bibele.
Loko Yesu a vulavula ni wansati wa Musamariya exihlobyeni hilaha swi boxiweke hakona eku sunguleni, a a vulavula hi mati lama nyikaka vutomi ya ntiyiso lowu hi nga wu kumaka eRitweni ra Xikwembu. Timbhoni ta Yehovha ta ku rhamba leswaku u nwa mati yo tenga ya ntiyiso. Xirhambo lexi xi hlamuseriwe ebukwini yo hetelela ya Bibele, xi ri: “Mani na mani la khomiweke hi torha a a te; mani na mani la swi navelaka a a nwe mati ya vutomi mahala.”—Nhlavutelo 22:17.
Leswaku u dyondza swo tala mayelana nileswi Mfumo wa Xikwembu wu nga ta va endlela swona vanhu, tihlanganise ni Timbhoni ta Yehovha eHolweni ya Mfumo ya le kusuhi na laha u tshamaka kona kumbe u tsalela eka adirese leyi faneleke eka leti longoloxiweke eka tluka 5 ra magazini lowu. U nga ha tlhela u pfula Web site leyi nge www.watchtower.org.
[Bokisi leri nga eka tluka 8, 9]
XANA VUKHONGERI BYI SWI KOTILE KU DYONDZISA VANHU NTIYISO?
Rungula ra ntiyiso leri phyuphyisaka a ri nge kumiwi hi ku ya ekerekeni kumbe hi ku tivula mukhongeri. Ntiyiso hileswaku vukhongeri byo tala namuntlha byi nyanyise swiphiqo leswi vanhu va nga na swona namuntlha ematshan’weni yo swi tlhantlha. Xiya xikombiso xin’we: Hi minkarhi ya nyimpi, Makhatoliki ma dlaye Makhatoliki-kulobye, Maprotestente ma dlaye Maprotestente-kulobye, laha hinkwavo a va kombela Xikwembu leswaku xi va pfuna va hlula!
Ku engetela kwalaho ku ni swiviko swo tala swa ku tikhoma ko biha loku endliwaka ekerekeni, leswi katsaka vafundhisi lava yiveke timali ta kereke va ti tirhisa hi vusopfa kumbe lava xaniseke vana hi tlhelo ra rimbewu. Entiyisweni, mati lama kumekaka eka vukhongeri byo tala ma thyakile. (Nhlavutelo 17:4-6; 18:1-5) Xiyimo lexi xi hilaha Bibele yi xi hlamuselaka hakona eka Tito 1:16, yi ku: “Va vula erivaleni leswaku va tiva Xikwembu, kambe va xi landzula hi mintirho ya vona.” Minkarhi yo tala, vukhongeri a byi swi kotanga ku tima torha ra vanhu eminkarhini leyi vanhu a va lava ku va ni vuxaka ni Xikwembu.
[Bokisi/Xifaniso lexi nga eka tluka 9]
Eka tindzima ta 19 ta buku leyi nge Xana Bibele Yi Dyondzisa Yini Hakunene? leyi nga ni matluka ya 224, ku ni tinhlamulo ta le Bibeleni ta swivutiso swa nkoka swo tanihi leswi nge:
“Hi xihi xikongomelo xa Xikwembu hi misava?”
“Lava feke va kwihi?”
“Xana hi hanya ‘emasikwini yo hetelela?’”
“Ha yini Xikwembu xi pfumelela leswaku ku va ni ku xaniseka?”
[Xifaniso lexi nga eka tluka 9]
U nga kuma ‘mati ya ntiyiso’ eHolweni ya Mfumo leyi nga endhawini ya ka n’wina