Langutelo Ra Bibele

Xana Loko U Langutana Ni Swiphiqo U Va U Xupuriwa Hi Xikwembu?

Wansati un’wana loyi a nga ni malembe ya va-50 endzhaku ka loko a kume leswaku u ni vuvabyi bya khensa u te: “Ndzi twa onge hi loko ndzi ri eku xupuriweni.” Loko a ehleketa hi swilo swo biha leswi a swi endleke malembe yo tala lama hundzeke u ri: “Leyi ku fanele ku ri ndlela leyi Xikwembu xi ndzi byelaka ha yona leswaku ndzi dyohile.”

LOKO vanhu vo tala va langutane ni maxangu, va vona onge Xikwembu xi le ku va xupuleni hikwalaho ka swilo swo biha leswi va tshameke va swi endla. Loko vo na swi pfuketana va va ni swiphiqo swo tala, u nga ha va twa va ku: “Hikwalaho ka yini swi humelela eka mina? Xana ndzi endle yini leswaku ndzi humeleriwa hi swilo leswi?” Xana hi fanele hi gimeta hi leswaku swiphiqo swa hina i xikombiso xa leswaku Xikwembu xi hi avanyisa hi ndlela yo vava? Xana maxangu lawa munhu a langutanaka na wona i nxupulo lowu humaka eka Xikwembu?

Vagandzeri Vo Tshembeka Va Langutane Ni Maxangu

Anakanya hi leswi Bibele yi swi vulaka mayelana ni wanuna la vuriwaka Yobo. Handle ka xilemukiso, u lahlekeriwe hi rifuwo rakwe hi xitshuketa. Endzhaku ka sweswo, vana vakwe va khume va dlayiwe hi xidzedze. Endzhakunyana ka sweswo, u hlaseriwe hi vuvabyi lebyi nyangatsaka. (Yobo 1:13-19; 2:7, 8) Maxangu wolawo ma endle leswaku Yobo a rila a ku: ‘Voko ra Xikwembu ri ndzi bile.’ (Yobo 19:21, Bibele Ya Xitsonga) Entiyisweni, Yobo u titwe onge Xikwembu a xi n’wi xupula, hilaha vo tala namuntlha va titwaka hakona.

Hambiswiritano, Bibele yi vula leswaku loko Yobo a nga si ringiwa, Xikwembu xi vule leswaku Yobo i “munhu la pfumalaka xisandzu, wo lulama, la chavaka Xikwembu naswona a kendlukaka eka leswo biha.” (Yobo 1:8) Tanihi leswi Xikwembu xi kombiseke leswaku xa n’wi amukela Yobo, swi le rivaleni leswaku maxangu lawa a langutaneke na wona a ma nga ri nxupulo lowu humaka eka Xikwembu.

Ntiyiso hi leswaku Bibele yi ni marungula ya vanhu vo hambana-hambana lava lulameke lava langutaneke na maxangu. Hambileswi a a ri nandza wa Xikwembu la tshembekaka, Yosefa u tiyisele malembe yo tala a pfaleriwe ekhotsweni a nga dyanga xa munhu. (Genesa 39:10-20; 40:15) Timotiya Mukreste la tshembekaka a a tshamela ‘ku vabya nkarhi ni nkarhi.’ (1 Timotiya 5:23) Hambi ku ri Yesu Kreste loyi a nga si tshamaka a dyoha, u khomiwe hi ndlela ya tihanyi loko a nga si fa hi ndlela leyi hlomulaka mbilu. (1 Petro 2:21-24) Hikwalaho swi hoxile ku gimeta hileswaku maxangu lawa ma hi welaka i xikombiso xa leswaku Xikwembu a xi hi tsakeli. Kambe loko ku nga ri Xikwembu lexi hi vangelaka maxangu, xana ma vangiwa hi mani?

Lexi Vangaka Swiphiqo Swa Hina

Bibele yi kombisa leswaku Sathana Diyavulosi hi yena a a vanga makhombo ya Yobo. (Yobo 1:7-12; 2:3-8) Ku tlula kwalaho, yi vula leswaku Sathana hi yena muvangi lonkulu wa swiphiqo swa hina namuntlha, loko yi ku: “Khombo eka misava ni lwandle, hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.” (Nhlavutelo 12:12) Leswi a nga “mufumi wa misava leyi,” Sathana u kucetele vanhu vo tala leswaku va endla swilo swo biha leswi vangeke maxangu yo tala ni nhlomulo.—Yohane 12:31; Pisalema 37:12, 14.a

Hambiswiritano, a hi fanelanga hi hatlisela ku sola Diyavulosi hi maxangu hinkwawo lawa hi langutanaka na wona. Hikwalaho ka xidyoho lexi hi tswariweke na xona ni ku nga hetiseki, hi tala ku endla swiboho swa vuphukuphuku leswi nga hi vangelaka swiphiqo. (Pisalema 51:5; Varhoma 5:12) Hi xikombiso, anakanya hi wanuna loyi a nga dyiki hi ndlela leyi faneleke a tlhela a nga wisi kahle hi vomu. Loko swilo sweswo swi ya hetelela swi n’wi vangele mavabyi, xana u fanele a sola Diyavulosi? Doo, wanuna loyi u tshovele vuyelo byo vava bya swiboho swa vuphukuphuku leswi a tiendleleke swona. (Vagalatiya 6:7) Emhakeni yo tano, swi hilaha xivuriso xa Bibele xi swi vekaka hakona, xi ku: “Vuphukuphuku bya munhu byi onha vutomi bya yena.”—Swivuriso 19:3, The New English Bible.

Xo hetelela, swi fanele swi xiyiwa leswaku swilo swo tala leswi nga tsakisiki leswi hi langutanaka na swona swi vangiwa hi “nkarhi ni xiendlakalo lexi nga languteriwangiki.” (Eklesiasta 9:11) Anakanya hi munhu loyi a hlaseriwaka hi mpfula leyikulu a nga swi langutelanga. Leswaku u ta tsakama ku fikela kwihi swi ta titshega hi laha a nga ta va a yime kona loko mpfula yi sungula ku na. Hilaha ku fanaka, eka “minkarhi [leyi] ya mangava leyi swi nonon’hwaka ku langutana na yona” swiyimo swo biha swi nga hatla swi endla leswaku maxangu lawa hi langutanaka na wona ma andza. (2 Timotiya 3:1-5) Leswaku swiyimo sweswo swi ta hi khumba ku fikela kwihi swi ta titshega hi nkarhi ni swiyimo leswi hi nga ha tsandzekaka ku swi lawula. Xana leswi swi vula leswaku hi ta tshama hi ri karhi hi weriwa hi maxangu?

Maxangu Hinkwawo MaTa Hela Ku Nga Ri Khale

Lexi tsakisaka, Yehovha Xikwembu u ta herisa maxangu hinkwawo ku nga ri khale. (Esaya 25:8; Nhlavutelo 1:3; 21:3, 4) Sweswi wa hi kombisa leswaku wa khathala hi hina hi ku hi “letela” ni ku hi nyika “nchavelelo lowu humaka eMatsalweni” leswaku hi kota ku langutana ni miringo sweswi loko ha ha rindzele vumundzuku lebyi tsakisaka lebyi nga ha riki ekule. (Varhoma 15:4; 1 Petro 5:7) Hi nkarhi wolowo lava va lulameke ematihlweni ya Xikwembu va ta kuma vutomi lebyi nga heriki emisaveni leyintshwa laha ku nga ta va ku nga ha ri na maxangu.—Pisalema 37:29, 37.

[Nhlamuselo ya le hansi]

XANA U TSHAME U TIVUTISA?

◼ Xana i vanhu lava endlaka swo biha ntsena lava weriwaka hi maxangu?—Yobo 1:8.

◼ Xana hi fanele hi sola Diyavulosi hikwalaho ka swiphiqo hinkwaswo leswi hi nga na swona?—Vagalatiya 6:7.

◼ Xana maxangu ma ta kala ma hela?—Nhlavutelo 21:3, 4.

[Marito lama tshahiweke exihlokweni lama nga eka tluka 29]

“Nkarhi ni xiendlakalo lexi nga languteriwangiki swa va wela hinkwavo.”—Eklesiasta 9:11