Vantshwa Va Vutisa

Ndzi Nga Endla Yini Leswaku Ndzi Tsakela Ku Hlaya Bibele?

Xana u yi hlaya rini Bibele? (Fungha nhlamulo yin’we)

□ Siku ni siku

□ Vhiki na vhiki

□ Nkarhi wun’wana ․․․․․

Hetisa xivulwa lexi landzelaka.

Loko ndzi nga swi tsakeli ku hlaya Bibele hakanyingi swi va swi vangiwa hi leswi ndzi nga . . . (Fungha tinhlamulo leti tirhaka eka wena)

□ Swi tsakeliki leswi ndzi swi hlayaka

□ Pfilunganyeka

□ Kavanyeteka

□ Swin’wana ․․․․․

XANA u twa u nga swi tsakeli ku hlaya Bibele? Loko swi ri tano, u nga ha pfumelelana na Will la nga ni malembe ya 18, loyi a nge, “Bibele yi nga ha tikomba yi nga tsakisi.” Hambiswiritano, u ya emahlweni a ku, “Yi nga ha tikomba yi nga tsakisi loko u nga yi hlayi hi ndlela leyi faneleke.”

Ha yini u fanele u dyondza ndlela yo hlaya Bibele? Xana wa swi lava ku tiva leswi engetelekeke malunghana ni ku

◼ endla swiboho leswinene?

◼ hlawula vanghana lavanene?

◼ langutana ni ntshikilelo?

Bibele yi ni xitsundzuxo lexinene ngopfu eka timhaka to tano ni tin’wana. I ntiyiso leswaku ku kuma xitsundzuxo xolexo swi nga ha lava matshalatshala lamakulu. Kambe ku endla matshalatshala wolawo swi fana ni ku lavisisa xuma: Loko swi ya swi tika ku lavisisa, u ta tsaka swinene loko u xi kuma!—Swivuriso 2:1-6.

U nga xi kumisa ku yini xuma lexi nga eBibeleni? Xibokisana lexi u nga xi tsemaka lexi nga le xineneni xi ta ku pfuna malunghana ni ndlela leyi u nga hlayaka Bibele ha yona kasi—lexi nga eka tluka leri landzelaka—xi ta ku pfuna leswaku u tiva leswi u nga ta swi hlaya ni ndlela leyi u nga ta swi hlaya ha yona. Nakambe, ringeta swiringanyeto leswi nga eka matluka lama landzelaka leswi ku tsakisaka.

Swihloko swin’wana leswi nge “Vantshwa Va Vutisa” swi kumeka eka Web site leyi nge, www.watchtower.org/​ype

Loko u swi kota ku nghena eka Internet, u nga swi kota ku hlaya Bibele eka Web site leyi nge, www.watchtower.org/e/bible

SWIVUTISO SWO ANAKANYISISA HA SWONA

Ku vuriwa leswaku loko u ta vuyeriwa eka nchumu wo karhi, swi titshege hileswaku u tikarhata ku fikela kwihi.

◼ Xana mhaka leyi i ntiyiso ku fikela kwihi loko swi ta emhakeni yo hlaya Bibele?

◼ U nga tinyika rini nkarhi wa leswaku u hlaya Bibele?

[Bokisi/Xifaniso lexi nga eka tluka 23]

NDLELA LEYI U NGA YI HLAYAKA HA YONA BIBELE

Loko u nga si hlaya . . . 

◼ Tiyiseka leswaku laha u tshameke kona a ku na pongo leswaku u ta dzikisa mianakanyo ya wena eka leswi u swi hlayaka.

◼ Khongelela leswaku Xikwembu xi ku pfuna u twisisa leswi u swi hlayaka.

Loko u ri eku hlayeni . . . 

◼ Tirhisa mimepe ni swifaniso swa timhaka ta le Bibeleni leswaku swi ku pfuna u vona swiendlakalo swa le Bibeleni hi mahlo ya mianakanyo.

◼ Anakanya hi xiyimo xa kona naswona u kambisisa vuxokoxoko bya kona.

◼ Hlaya tinhlamuselo ta le hansi ni tindzimana leti nga eka swikombo.

◼ Tivutise swivutiso swo tanihi leswi nge:

NTIYISO WA MHAKA: Yi endleke rini mhaka leyi? I mani la vuleke marito lawa? Xana marito lawa a ma kongomisiwe eka mani?

LESWI YI VULAKA SWONA: Ndzi nga n’wi hlamusela njhani munhu un’wana mhaka leyi?

NKOKA WA RUNGULA LERI: Ha yini Yehovha Xikwembu a tsale rungula leri eRitweni rakwe? Xana ri ndzi byela yini hi vumunhu byakwe kumbe ndlela leyi a endlaka swilo ha yona? Hi tihi tinhla leti ndzi nga ti tirhisaka evuton’wini bya mina?

Endzhaku ka loko u hlayile . . . 

◼ Endla ndzavisiso lowu engetelekeke. Tirhisa tibuku leti kandziyisiweke hi Timbhoni ta Yehovha, to tanihi buku leyi nge Insight on the Scriptures swin’we ni leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna,” loko ti ri kona hi ririmi ra wena.

◼ Tlhela u khongela. Byela Yehovha leswi u swi dyondzeke ni ndlela leyi u lavaka ku swi tirhisa ha yona evuton’wini bya wena. N’wi nkhense hikwalaho ka Rito rakwe, ku nga Bibele.

[Bokisi/Xifaniso lexi nga eka tluka 24]

XANA U TA YI HLAYISA KU YINI BIBELE?

Leswi u nga hlawulaka ku swi endla . . . 

□ U nga yi hlaya ku suka eku sunguleni ku ya emakumu.

□ U nga ha yi hlaya hi ku ya hi ku tlhandlamana ka minkarhi, hi ku ya hi ku tlhandlamana ka tibuku kumbe hi ku ya hi ku landzelelana ka swiendlakalo.

□ Siku ni siku hlaya xiyenge xo hambana xa Matsalwa.

Musumbhunuku: Matimu lama tsakisaka (Genesa ku ya eka Estere)

Ravumbirhi: Vutomi ni tidyondzo ta Yesu (Matewu ku ya eka Yohane)

Ravunharhu: Vandlha ra Vukreste ro sungula (Mintirho)

Ravumune: Vuprofeta ni nkongomiso wa mahanyelo (Esaya ku ya eka Malakiya, Nhlavutelo)

Ravuntlhanu: Swiphato ni tinsimu leti khumbaka mbilu (Yobo, Tipisalema, Risimu Ra Solomoni)

Mugqivela: Vutlhari byo hanya hi byona (Swivuriso, Eklesiasta)

Sonto: Mapapila lama yaka emavandlheni (Varhoma ku ya eka Yudha)

Ku nga khathariseki leswaku u hlawula ku yi hlaya hi ndlela yihi, tiyiseka leswaku u landzelela ndlela yoleyo! Veka mfungho lowu ✔ loko u heta ku hlaya ndzima yin’wana ni yin’wana, kumbe u ti fungha hi ndlela yin’wana tindzima leti u ti hlayeke.

Tsema xibokisana lexi eka magazini lowu u xi veka eBibeleni ya wena!

[Bokisi/Dayagramu leyi nga eka tluka 24]

ENDLA MATSALWA MA HANYA!

Kuma tindlela ta ku endla leswaku leswi u swi hlayaka swi ku tsakisa. Hi xikombiso:

□ Xaxameta mavito ya vanhu hi ku ya hi mindyangu ya vona.

□ Mpfampfarhuta. Hi xikombiso, loko u hlaya hi munhu wo karhi wo tshembeka, xiya ndlela leyi timfanelo ta munhu yoloye ni swiendlo swakwe swi endleke leswaku a katekisiwa ha yona.—Swivuriso 28:20.

[Dayagramu]

Munghana wa Xikwembu

↑ Ku yingisa

↑ Ku tshembeka

↑ ↑

Abrahama

□ Dirowa swifaniso leswi fambisanaka ni mhaka leyi u yi hlayaka.

□ Dirowa swifaniso swo olova leswi kombisaka swiendlakalo hi ku landzelelana ka swona. Hlamusela leswi humelelaka eka xiendlakalo ha xin’we.

□ Endla miako leyitsongo, yo tanihi ngalava ya Nowa.—Hi xikombiso, vona Xalamuka! ya January 2007, tluka 22.

□ Hlayela ehenhla u ri ni vanghana va wena kumbe swirho swa ndyangu. Xiringanyeto: Avela munhu un’we leswaku a hlaya rungula ro karhi. Van’wana va nga ha averiwa ku hlaya swiyenge leswi vona va nga vanhu vo karhi eka ndzima leyi mi yi hlayaka.

□ Hlawula rungula ro karhi kutani u ri endla onge u le ku hlayeni ka mahungu. Hlamusela xiendlakalo xexo hi tindlela to hambana-hambana hi ku katsa “mimbulavurisano” ni vatlangi-nkulu ni vanhu lava swi voneke hi mahlo.

□ Hlayani rungula leri munhu wo karhi a endleke xiboho xa vuphukuphuku ivi a anakanya leswaku swilo swi ta famba kahle! Hi xikombiso, anakanya hi ku va Petro a landzule Yesu. (Marka 14:66-72) Xana hi swihi swilo swin’wana lewi Petro a a ta va a swi endlile exiyin’weni xolexo xo tika?

□ Hlalela kumbe u yingisela tidrama ta le Bibeleni leti rhekhodiweke.

□ Titsalele drama ya wena n’wini. Hlamusela ni leswi dyondziwaka eka rungula ra kona.—Varhoma 15:4.

XIRINGANYETO: Tlanga drama leyi ni vanghana va wena va nga ri vangani.

[Bokisi/Xifaniso lexi nga eka tluka 25]

LESWI NGA KU KHUTAZAKA

◼ Tivekele pakani! Laha hansi tsala siku leri u nga ta tsakela ku sungula nongonoko wa wena wo hlaya Bibele ha rona.

․․․․․

◼ Hlawula xiyenge xa Bibele lexi ku tsakisaka. (Vona bokisi leri nge “Xana U Ta Yi Hlayisa Ku Yini Bibele?”) Kutani laha hansi tsala xiyenge xa Bibele lexi u nga ta rhanga u xi hlaya.

․․․․․

◼ Rhanga hi ku hlaya nkarhi wo koma. Ni ku heta timinete ta 15 u hlaya Bibele swa antswa ku ri ni ku nga yi hlayi nikatsongo. Tsala laha hansi leswaku u nga veka nkarhi wo tanihi kwihi wo hlaya.

․․․․․

Xiringanyeto: Vana ni Bibele leyi u yi tirhiselaka ku hlaya ha yona ntsena. Tsala tinhla eka yona. Fungha tindzimana leti nga ta nkoka swinene eka wena.

[Bokisi/Swifaniso leswi nga eka tluka 25]

LESWI TINTANGHA TA WENA TI SWI VULAKA

“Ndzi ringeta ku hlaya xiphemu xo karhi xa Bibele loko ndzi nga si ya eku etleleni. Leswi swi ndzi pfuna leswaku ndzi kuma nchumu wo karhi lowunene lowu ndzi nga ta anakanyisisa ha wona loko ndzi ri karhi ndzi etlela.”—Megan.

“Ndzi heta timinete ta 15 ndzi ri karhi ndzi hlaya ndzimana yin’we. Ndzi hlaya nhlamuselo yin’wana ni yin’wana ya le hansi, ndzi languta swikombo hinkwaswo swa matsalwa leswi nga etlhelo ndzi tlhela ndzi endla ndzavisiso lowu engetelekeke. Minkarhi yin’wana timinete ta 15 ta hela ndzi nga si heta ku endla ndzavisiso eka ndzimana yin’we, kambe ndlela leyi ndzi hlayaka ha yona yi endla leswaku ndzi kuma rungula ro tala swinene!”—Corey.

“Ndzi tshame ndzi hlaya Bibele hi tin’hweti ta khume. Loko ndzi yi hlayisa sweswo ndzi xiye ndlela leyi swiphemu swo hambana-hambana swa Bibele swi fambisanaka ha yona, ku nga mhaka leyi a ndzi nga si tshama ndzi yi xiya.”—John.

[Bokisi leri nga eka tluka 25]

HLAWULA!

□ Hlawula xiendlakalo. Bibele yi ni timhaka to tala ta xiviri leti tsakisaka. Hlawula mhaka leyi ku tsakisaka, kutani u yi hlaya ku sukela eku sunguleni ku ya emakumu.

Xiringanyeto: Leswaku u kuma swiringanyeto swa ndlela leyi u nga dyondzaka leswi engetelekeke ha yona eka rungula leri u ri hlayaka, vona tluka 292 ra buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, leyi kandziyisiweke hi Timbhoni ta Yehovha.

□ Hlawula Evhangeli. Hlaya Matewu (Evhangeli yo sungula ku tsariwa), Marka (leyi tiviwaka hi ku koma ni hi ku hlamusela swiendlakalo swo tala leswi tsakisaka), Luka (leyi vulavulaka hi ndlela yo hlawuleka hi xikhongelo ni hi vavasati), kumbe Yohane (leyi nga vulavuliki ngopfu hi leswi Tievhangeli letin’wana ti vulavuleke ha swona).

Xiringanyeto: Loko u nga si yi hlaya, hi ku komisa hlaya rungula leri vulavulaka hi buku yoleyo ya Bibele swin’we ni mutsari wa yona leswaku u ta swi twisisa kahle leswaku i yini lexi endlaka Evhangeli yoleyo yi hambana ni letin’wana.

□ Hlawula pisalema. Hi xikombiso:

Loko u titwa u ri ni xivundza naswona u vona onge a wu na vanghana, hlaya Pisalema 142.

Loko u titwa u hetiwe matimba hi ku tsana ka wena, hlaya Pisalema 51.

Loko u kanakana loko milawu ya Xikwembu yi ri ya nkoka, hlaya Pisalema 73.

Xiringanyeto: Tshama u ri ni nxaxamelo wa tipisalema leti u ti hlayeke leti ku khutazaka swinene.

[Bokisi leri nga eka tluka 26]

DZIKA SWINENE

◼ Anakanya hi xiyimo xa kona. Kambisisa nkarhi lowu swi endlekeke ha wona, ndhawu ya kona ni swilo leswi a swi endleka hi nkarhi wa kona.

Hi xikombiso: Hlaya Ezekiyele 14:14. Xana Daniyele a ri ni malembe mangani loko Yehovha a vula leswaku yena i xikombiso lexinene swin’we na Nowa na Yobo?

Lexi nga ku pfunaka ku kuma nhlamulo: Ezekiyele ndzima 14 yi tsariwe endzhaku ka malembe ya ntlhanu Daniyele a ri evuhlongeni eBabilona—kumbexana loko a ri emalembeni ya kondlo-a-ndzi-dyi.

Rungula ra nkoka leri u nga ri kumaka hi ku endla ndzavisiso: Xana Daniyele a ri ntsongo ngopfu lerova Yehovha a a nga ta ku xiya ku tshembeka kakwe? Hi swihi swiboho leswinene leswi a nga swi endla leswi nga endla leswaku a katekisiwa? (Daniyele 1:8-17) Xana xikombiso xa Daniyele xi nga ku pfuna njhani leswaku u endla swiboho leswinene?

◼ Kambisisa vuxokoxoko bya kona. Minkarhi yin’wana u nga kambisisa rito rin’we kumbe mambirhi.

Xikombiso: Ringanisa Matewu 28:7 na Marka 16:7. Ha yini Marka a vule leswaku ku nga ri khale Yesu a a ta humelela eka vadyondzisiwa vakwe ni le ka “Petro”?

Lexi nga ku pfunaka ku kuma nhlamulo: Marka a a nga ri kona loko swilo leswi swi humelela; entiyisweni u kume rungula ra yena eka Petro.

Rungula ra nkoka leri u nga ri kumaka hi ku endla ndzavisiso: Ha yini Petro a titwe a chavelelekile loko a twa leswaku Yesu a a lava ku tlhela a n’wi vona? (Marka 14:66-72) Yesu u swi kombise njhani leswaku i munghana wa xiviri eka Petro? U nga xi tekelela njhani xikombiso xa Yesu kutani na wena u va munghana wa xiviri eka van’wana?

◼ Endla ndzavisiso lowu engetelekeke. Tirhisa minkandziyiso leyi sekeriweke eBibeleni leswaku u kuma tinhlamuselo.

Xikombiso: Hlaya Matewu 2:7-15. Xana vangoma va swilo swa le mpfhukeni va n’wi endzele rini Yesu?

Lexi nga ku pfunaka ku kuma nhlamulo: Vona Xihondzo xo Rindza xa January 1, 2008, tluka 31, lexi kandziyisiweke hi Timbhoni ta Yehovha.

Rungula ra nkoka leri u nga ri kumaka hi ku endla ndzavisiso: Yehovha u wu khathalele njhani hi tlhelo ra nyama ndyangu wa ka va Yesu loko wu ri aEgipta? Xana ku tshemba Xikwembu swi nga ku pfuna njhani leswaku u langutana ni swiyimo leswi tshikilelaka?—Matewu 6:33, 34.