Langutelo Ra Bibele

Xana Xikwembu Xi Lava Leswaku U Va Xigwili?

“Xikwembu xi ndzi katekisile! Ndzi ta va xigwili!”

“Ndzi lava ku va xigwili hikuva Xikwembu ni tintsumi hinkwato va lava leswaku ndzi va xigwili.”

“Xikwembu xa hi pfuna leswaku hi kuma rifuwo.”

“Swilo swi ndzi fambela kahle hikwalaho ka Buku leyi [ku nga Bibele].”

MARITO lawa ma kombisa vonelo ra mintlawa yo tala ya vukhongeri leyi vulaka leswaku munhu u va xigwili hikwalaho ka leswi Xikwembu xi n’wi katekisaka. Va chumayela leswaku loko u endla swilo leswinene emahlweni ka Xikwembu, xi ta ku endla leswaku u va xigwili sweswi xi tlhela xi ku nyika hakelo enkarhini lowu taka. Dyondzo leyi yi tsakeriwa hi vanhu vo tala naswona tibuku leti yi seketelaka ti xaviwa ngopfu. Kambe xana “dyondzo leyi ya leswaku munhu u va xigwili hikwalaho ko seketeriwa hi Xikwembu” yi pfumelelana ni leswi Bibele yi swi dyondzisaka?

Entiyisweni, Muvumbi wa hina loyi Bibele yi n’wi vitanaka “Xikwembu lexi tsakeke” u lava leswaku hi tiphina evuton’wini nileswaku swilo swi hi fambela kahle. (1 Timotiya 1:11; Pisalema 1:1-3) Ku tlula kwalaho, u katekisa lava n’wi tsakisaka. (Swivuriso 10:22) Kambe eka hina namuntlha, xana nkateko wolowo wu vonaka hi loko munhu a fuwile? Nhlamulo yi va erivaleni loko hi twisisa leswaku xikongomelo xa Xikwembu hi nkarhi lowu hi hanyaka eka wona xi le kusuhi ni ku hetiseka.

Xana Lowu I Nkarhi Wa Ku Va Xigwili?

Enkarhini lowu hundzeke, Yehovha Xikwembu u katekise malandza ya yena man’wana hi rifuwo, yo kota Yobo na Hosi Solomoni. (1 Tihosi 10:23; Yobo 42:12) Kambe, vanhu vo tala lava chavaka Xikwembu a va nga fuwanga ku katsa na Yohane Mukhuvuri na Yesu Kreste. (Marka 1:6; Luka 9:58) Leswi swi hi byela yini? Bibele yi hi byela leswaku Xikwembu xi tirhisana ni malandza ya xona hi ku pfumelelana ni xikongomelo xa xona malunghana na wona hi nkarhi wolowo. (Eklesiasta 3:1) Xana nawu wolowo lowu kongomisaka wu tirha njhani eka hina namuntlha?

Vuprofeta bya Bibele byi paluxa leswaku hi hanya “[emakumu] ya mafambiselo ya swilo” kumbe “emasikwini yo hetelela” ya misava leyi. Enkarhini wolowo a ku ta va ni tinyimpi, mavabyi, tindlala, ku tsekatseka ka misava ni vanhu lava nga riki na mahanyelo lamanene, ku nga makhombo lawa se ma hlaseleke vanhu hi ndlela leyikulu ku sukela hi 1914. (Matewu 24:3; 2 Timotiya 3:1-5; Luka 21:10, 11; Nhlavutelo 6:3-8) Hi ku komisa, misava leyi yi fana ni xikepe lexi nga le kusuhi ni ku mbombomela! Hikwalaho ka sweswo, xana swa twala leswaku Xikwembu xi nga katekisa malandza ya xona hinkwawo hi rifuwo, kumbe xi ta endla leswaku hi va ni swilo swin’wana?

Yesu Kreste u fanise nkarhi lowu hi hanyaka eka wona ni masiku ya Nowa. U te: “Kukota leswi a va ri xiswona emasikwini wolawo ya le mahlweni ka ndhambi, va dya, va nwa, vavanuna va teka ni vavasati va hlomisiwa, ku fikela siku leri Nowa a ngheneke ha rona engalaveni; nileswi va nga lemukangiki nchumu ku fikela loko ndhambi yi fika yi va kukula hinkwavo, swi ta va tano ni hi vukona bya N’wana wa munhu.” (Matewu 24:37-39) Yesu u tlhele a fanisa masiku lawa hi hanyaka eka wona ni masiku ya Lota. Vaakelani va Lota eSodoma ni le Gomora a va ‘dya, va nwa, va xava, va xavisa, va byala va tlhela va aka.’ Yesu u ye emahlweni a ku: “Kambe esikwini leri Lota a humeke ha rona eSodoma ku ne ndzilo ni xivavula swi huma etilweni, swi va lovisa hinkwavo. Swi ta va tano esikwini leri N’wana wa munhu a nga ta hlavuteriwa ha rona.”—Luka 17:28-30.

Entiyisweni a swi hoxanga ku dya, ku nwa, ku nghenela vukati, ku xava ni ku xavisa. Swi nga va ni khombo ntsena loko hi khomeka swinene lerova hi nga wu tekeli enhlokweni nkarhi lowu hi hanyaka eka wona. Hikwalaho tivutise, ‘Xana Xikwembu a xi ta va xi hi rhandza loko xo hi katekisa hi swilo leswi nga ta hi kavanyeta?’a Phela, a xi ta va xi hi hoxa ekhombyeni. Xikwembu xa rirhandzu a xi nge pfuki xi swi endlile sweswo!—1 Timotiya 6:17; 1 Yohane 4:8.

Lowu I Nkarhi Wo Ponisa Vutomi Bya Vanhu!

Enkarhini lowu wa nkoka ematin’wini ya vanhu, vanhu va Xikwembu va ni ntirho wa xihatla lowu va faneleke va wu endla. Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Timbhoni ta Yehovha ti teka marito wolawo ma ri ya nkoka swinene. Hikwalaho ti khutaza vaakelani va tona leswaku va dyondza hi Mfumo wolowo va tlhela va dyondza hi leswi Xikwembu xi swi languteleke eka vona leswaku va kuma vutomi lebyi nga heriki.—Yohane 17:3.

Hambiswiritano, Xikwembu a xi langutelanga leswaku malandza ya xona yo tshembeka ma titsona ntsako. Ematshan’weni ya sweswo xi lava leswaku ma eneriseka hi swilo swo tihanyisa ha swona leswaku ma ta kota ku xi tirhela hi mbilu hinkwayo. (Matewu 6:33) Xona xi ta tiyiseka leswaku ma swi kuma leswi ma swi pfumalaka. Vaheveru 13:5 yi ri: “Mukhuva wa n’wina wa vutomi a wu pfumale rirhandzu ra mali, mi ri karhi mi eneriseka hi swilo leswi nga kona. Hikuva [Xikwembu] xi te: ‘Ndzi nga ka ndzi nga ku tshiki naswona ndzi nga ka ndzi nga ku fularheli.’”

Xikwembu xi ta hetisisa marito wolawo hi ndlela leyi hlamarisaka loko xi sirhelela “ntshungu lowukulu” wa vagandzeri va ntiyiso eka makumu ya mafambiselo lawa ya swilo leswaku wu ya hanya emisaveni leyintshwa ya ku rhula, laha wu nga ta tiphina hi rifuwo ra xiviri. (Nhlavutelo 7:9, 14) Yesu u te: “Ndzi tile leswaku va [valandzeri vakwe lavo tshembeka] ta kuma vutomi ni leswaku va byi kuma hi xitalo.” (Yohane 10:10) ‘Vutomi byebyo byo tala’ a byi vuli ku va ni rifuwo ro tala sweswi emisaveni leyi, kambe byi vula ku kuma vutomi lebyi nga heriki eParadeyisini ehansi ka Mfumo wa Xikwembu.—Luka 23:43.

U nga xisiwi hi dyondzo leyi kanganyisaka ya leswaku munhu u va xigwili hi leswi a seketeriwaka hi Xikwembu, leyi entiyisweni yi kavanyetaka munhu leswaku a nga tirheli Xikwembu hi mbilu hinkwayo. Kambe yingisa marito ya Yesu ya rirhandzu ni ya xihatla, lama nge: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi, kutani hi xitshuketa siku rero ri mi wela hi xihatla ku fana ni ntlhamu.”—Luka 21:34, 35.

[Nhlamuselo ya le hansi]

XANA U TSHAME U TIVUTISA?

◼ Xana lowu i nkarhi wo endla yini?—Matewu 24:14.

◼ Yesu u fanise nkarhi wa hina ni minkarhi ya vamani lava ku vulavuriwaka ha vona eBibeleni?—Matewu 24:37-39; Luka 17:28-30.

◼ I yini leswi hi faneleke hi swi papalata loko hi lava ku kuma vutomi lebyi nga heriki?—Luka 21:34.

[Marito lama tshahiweke exihlokweni lama nga eka tluka 13]

Dyondzo ya leswaku munhu u va xigwili hi leswi a seketeriwaka hi Xikwembu, entiyisweni yi kavanyeta munhu leswaku a nga tirheli Xikwembu hi mbilu hinkwayo