Langutelo Ra Bibele
Xana Xikwembu Xi Hi Katekisa Hi Rifuwo?
“Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”—SWIVURISO 10:22.
XANA tsalwa leri ra Bibele leri tshahiweke laha henhla ri vula leswaku Xikwembu xi katekisa malandza ya xona hi rifuwo? Van’wana va tshemba leswaku swi tano. Twana leswi vuriweke hi muchumayeri ni mutsari wa Pentekosta ya le Australia: “Ebukwini ya mina ndzi ta ku byela hi leswaku hikwalaho ka yini u lava mali yo tala naswona xa vumbirhi leswaku u nga yi kumisa ku yini mali yo tala . . . Loko wo cinca miehleketo ya wena kutani u va ni langutelo lerinene hi mali, ndza tshemba leswaku u nga famba ehenhla ka mikateko naswona u humelela eka Xikwembu u tlhela u nga ha tshuki u va ni swiphiqo hi mali nakambe.”
Hambiswiritano, marito wolawo ma vula leswaku swisiwana a swi rhandzeki eka Xikwembu. Xana ku fuwa hi swilo leswi vonakaka swi kombisa mikateko ya Xikwembu?
Ku Katekisiwa Hi Xikongomelo
Rungula ra Bibele ri katsa minkarhi laha Xikwembu a xi katekisa malandza ya xona layo tshembeka. Hi xikombiso, Yakobo u siye kaya rakwe a ri ni nxongotelo ntsena kambe loko a tlhelela endzhaku ka malembe ya 20 a a ri ni tinyimpfu to tala, tihomu ni timbhongolo leti a ti endla swivala swimbirhi. Hi ku ya hi Bibele, rifuwo ra Yakobo a ku ri nyiko leyi a yi huma eka Xikwembu. (Genesa 32:10) Xikombiso xin’wana: Yobo u lahlekele hi swilo swa yena hinkwaswo, kambe Yehovha hi ku famba ka nkarhi u n’wi katekisile hi “14 000, ni tikamela ta 6 000 ni swipani swa tihomu swa 1 000 ni swipani swa timbhongolo ta mantswele swa 1 000.” (Yobo 42:12) Yehovha u fuwise Hosi Solomoni lerova ku fuma ka yena ka ha tiveka ni namuntlha.—1 Tihosi 3:13.
Hi hala tlhelo Bibele yi tamele swiendlakalo swo tala swa malandza yo tshembeka, lama a ma yingisa Xikwembu naswona ma ri swisiwana. Hakunene, Xikwembu a xi nga xupuli van’wana hi vusiwana kutani xi katekisa van’wana hi rifuwo. Kutani, xana xikongomelo xa Xikwembu a ku ri xihi loko xi katekisa van’wana hi rifuwo?
Nhlamulo yi titshege hi xiyimo xa kona. Rifuwo ra Yakobo a ri veka xisekelo xo aka rixaka, ni ku lunghiselela ku ta ka Mbewu leyi a yi tshembisiwile. (Genesa 22:17, 18) Rifuwo ra Yobo ri susa ku kanakana kwihi ni kwihi malunghana ni loyi a tiseleke Yobo maxangu, hi ndlela yoleyo ku tlakusiwa vito ra Yehovha. (Yakobo 5:11) Naswona Solomoni u tirhise rifuwo ra yena leri a ri nyikeke hi Xikwembu leswaku a aka tempele ya xiyimo xa le henhla. (1 Tihosi 7:47-51) Lexi tsakisaka, Yehovha u tlhele a tirhisa Solomoni ku tsala ntokoto wa yena n’wini lowu kombisaka leswaku rifuwo a ri pfuni ngopfu.—Eklesiasta 2:3-11; 5:10; 7:12.
Ndlela Leyi Xikwembu Xi Hi Katekisaka Ha Yona
Yesu u dyondzise valandzeri va yena ku va ni langutelo lerinene hi mali loko a ku eka vona “tshikani ku vilela” hi rifuwo. U kombisane na vona hi ku vula leswaku hambi ku ri Solomoni eka rifuwo hinkwaro leri a ri na rona a nga kalanga a nga ambala ku fana ni khon’wa ra le nsin’wini. Kutani, Yesu a ku: “Kutani, loko Xikwembu xi xi ambexa hi ndlela yoleyo ximila xa nhova, . . . xana a xi nge mi ambexi ngopfu, n’wina mi nga ni ripfumelo leritsongo?” Yesu u tiyisekise Vakreste leswaku loko valandzeri va yena vo rhangisa Mfumo ni ku lulama ka Xikwembu ku sungula, va ta engeteleriwa hi swakudya, swiambalo ni vutshamo. (Matewu 6:25, 28-33) Xana xitshembiso xexo xi hetiseke njhani?
Loko xitsundzuxo xa Bibele xi landzeleriwa, mikateko ya swilo swa moya ya kumeka. (Swivuriso 10:22) Hambiswiritano, u kuma ni mikateko ya mixaka yin’wana. Hi xikombiso, Rito ra Xikwembu ri lerisa Vakreste: “Muyivi a nga ha tlheli a yiva, kambe ematshan’weni ya sweswo a a tirhe hi matimba.” (Vaefesa 4:28) Yi tlhela yi vula leswaku “loyi a tirhaka hi voko ro loloha u ta pfumala, kambe voko ra munhu la gingiritekaka hi rona leri nga ta fuwisa munhu.” (Swivuriso 10:4) Ku vula ntiyiso, Vakreste lava tirhaka hi matimba va landzela xitsundzuxo lexi, hakanyingi va rhandzeka exikarhi ka vatirhi. Sweswo swi nga va nkateko.
Nakambe Bibele yi dyondzisa Vakreste ku papalata makolo ya ku gembula, mukhuva lowu nyamisaka wa ku dzaha, ni mukhuva lowu hlakataka miri wa ku kukutlela byala. (1 Vakorinto 6:9, 10; 2 Vakorinto 7:1; Vaefesa 5:5) Lava landzelelaka xitsundzuxo lexi va kuma leswaku mali leyi va yi tirhisaka ya hunguteka naswona rihanyo ra vona ra antswa.
Swa Nkoka Ngopfu Ku Tlula Silivhere Kumbe Nsuku
Hambiswiritano, ku humelela hi swilo leswi vonakalaka a hi nge titshegi hi swona ntsena tanihi xikombiso xa ku amukeriwa hi Xikwembu ni mikateko leyi humaka eka xona. Hi xikombiso, Yesu u paluxe vusiwana bya xiyimo xa moya xa Vakreste va le Lawodikiya loko a ku eka vona: “Leswi u nge: ‘Ndzi fuwile, ndzi kume rifuwo naswona a ndza ha lavi nchumu nikatsongo,’ kasi a wu tivi leswaku u dyisa mbitsi ni ku twisa vusiwana ni leswaku u xisiwana, u fe mahlo naswona u swerile.” (Nhlavutelo 3:17) Hilaha ku hambaneke, eka lava nga swisiwana hi swilo leswi vonakaka kambe va ri Vakreste lava nga ni rihanyo lerinene emoyeni le Smirna Yesu u te: “Ndzi tiva nhlomulo ni vusiwana bya wena—kambe u fuwile.” (Nhlavutelo 2:9) Vakreste lava swi nga ha endleka leswaku a va koka exilogweni hi swa timali hikwalaho ko xaniseriwa ku tshama va tshembekile, kambe hambiswiritano a va ri ni rifuwo leri tlulaka silivhere ni nsuku ekule.—Swivuriso 22:1; Vaheveru 10:34.
Yehovha Xikwembu u katekisa matshalatshala ya lava va lwelaka ku endla ku rhandza ka yena. (Pisalema 1:2, 3) U va nyika matimba ni rifuwo leri lavekaka ku langutana ni miringo, ku wundla mindyangu ya vona, ni ku rhangisa Mfumo wakwe. (Pisalema 37:25; Matewu 6:31-33; Filipi 4:12, 13) Hikwalaho, ematshan’weni yo languta ku va ni swilo leswi vonakaka tanihi xikombiso xo va ni mikateko ya Xikwembu, Vakreste va ntiyiso va lwela ku va lava ‘fuweke hi mintirho leyinene.’ Hi ku hlakulela vuxaka lebyikulu ni Muvumbi, Vakreste “va tivekela hi ku hlayiseka masungulo lamanene ya nkarhi lowu taka.”—1 Timotiya 6:17-19; Marka 12:42-44.