Langutelo Ra Bibele
Xana Vakreste Va Fanele Va Va Swisiwana?
YESU u tshame a byela jaha rin’wana leri fuweke leswaku ri fanele ri famba ri ya xavisa swilo swa rona hinkwaswo kutani ri avela swisiwana. Rungula ra kona ri vula leswaku jaha rero ri hlunamisiwe hi marito ya Yesu kutani ri famba ri ri ni gome, “hikuva a [ri] ri ni swilo swo tala.” Hiloko Yesu a byela vadyondzisiwa vakwe a ku: “Ku ta va nchumu wo nonon’hwa swinene eka lava nga ni mali leswaku va nghena emfun’weni wa Xikwembu!” Yesu u engetele a ku: “Swa olova swinene leswaku kamela yi hundza exuveni xa neleta ku ri ni ku va munhu la fuweke a nghena emfun’weni wa Xikwembu.”—Marka 10:21-23; Matewu 19:24.
Xana Yesu a a vula yini hi marito lawa? Xana rifuwo ni vugandzeri bya ntiyiso a swi fambisani? Xana Vakreste va fanele va tivona nandzu loko va ri ni mali yo tala? Xana Xikwembu a xi swi lavi leswaku va hanya vutomi bya ka byandlana?
Xikwembu Xi Amukela “Vanhu Va Mixaka Hinkwayo”
Eminkarhini ya khale, Xikwembu a xi si tshama xi vula leswaku Vaisrayele va hanya evuswetini. Hi xikombiso: Endzhaku ka loko va teke ndhawu leyi va averiweke yona, vanhu a va rima ni ku endla mintirho yin’wana leswaku va kuma swo tihanyisa swa vona ni swa varikwavo. Swilo swo kota ikhonomi, maxelo, rihanyo kumbe vutshila byo endla ntirho a swi hoxa xandla eka ndlela leyi matshalatshala ya vona ma nga ta humelela ha yona. Nawu wa Muxe wu lerise Vaisrayele leswaku va va ni musa eka loyi a nga tshukaka a va xisiwana. (Levhitika 25:35-40) Hi hala tlhelo, van’wana va fuwile. Bowasi, wanuna wa ripfumelo naswona wo tshembeka la veke kokwa wa Yesu Kreste, u hlamuseriwa tanihi “wanuna loyi a a ri ni rifuwo lerikulu.”—Rhuti 2:1.
Xiyimo lexi a xi cincanga hi nkarhi wa Yesu. Loko Yesu a vulavula ni jaha leri fuweke leri boxiweke eku sunguleni, a ku nga ri xikongomelo xakwe ku khutaza vanhu leswaku va va swisiwana. Ematshan’weni ya sweswo, a a dyondzisa dyondzo ya nkoka. Ku ya hi vonelo ra munhu, swi nga ha vonaka onge a swi nge koteki leswaku munhu la fuweke a titsongahata ni ku amukela tindlela ta Xikwembu ta ku ponisa. Hambiswiritano, Yesu u te: “Eka vanhu leswi a swi koteki, kambe eka Xikwembu swilo hinkwaswo swa koteka.”—Matewu 19:26.
Vandlha ra Vukreste ra lembe-xidzana ro sungula a ri amukela “vanhu va mixaka hinkwayo.” (1 Timotiya 2:4) A va katsa van’wana lava a va fuwile, van’wana va vona a va hanya kahle ni van’wana vo tala lava a va ri swisiwana. Van’wana va nga ha va va tihlengeletele xuma va nga si va Vakreste. Kasi eka van’wana, swiyimo swi lo va rhandza naswona va endle swiboho swa vutlhari, hi swona leswi endleke leswaku va hetelela va ri ni rifuwo.
Hilaha ku fanaka, vamakwerhu lava nga Vakreste namuntlha a va ringani hi timali. Hinkwavo va lwela ku landzela nkongomiso wa Bibele etimhakeni ta mali, hikuva ku rhandza swilo leswi vonakaka swi nga ha hlasela un’wana ni un’wana. Dyondzo leyi Yesu a yi dyondziseke malunghana ni jaha leri fuweke leri a ri ri hosi yi endla leswaku Mukreste un’wana ni un’wana a xiya ndlela leyi mali ni swilo leswi vonakaka swi nga lawulaka munhu ha yona.—Marka 4:19.
Xitsundzuxo Hi Lava Fuweke
Hambileswi Bibele yi nga ku soliki ku va ni rifuwo, kambe ya ku sola ku rhandza mali. Pawulo, mutsari wa Bibele u te: “Ku rhandza mali i rimitsu ra mixaka hinkwayo ya swilo swo biha.” U vule leswaku hi ku bakanya swilo swa moya hikwalaho ko navela ku fuwa, “van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.”—1 Timotiya 6:10.
Lexi tsakisaka, Pawulo u nyikele swiletelo leswi kongomeke eka lava fuweke. U te: “Lerisa lava fuweke emafambiselweni ya sweswi ya swilo leswaku va nga titekeli ehenhla, naswona va nga veki ntshembo wa vona erifuweni leri nga tiyangiki, kambe va wu veka eka Xikwembu, lexi hi nyikaka swilo hinkwaswo hilaha ku fuweke leswaku hi tiphina.” (1 Timotiya 6:17) Swi le rivaleni leswaku ku ni khombo ra leswaku vanhu lava fuweke va nga ha tikukumuxa kutani va tivona va tlakukile ku tlula van’wana. Nakambe, va nga ha ringeka va ehleketa leswaku rifuwo ri nga va nyika nsirhelelo wa xiviri—ku nga nchumu lowu hi nga wu kumaka ntsena hi ku helela eka Xikwembu.
Vakreste lava fuweke va fanele va xiya makhombo lawa hi ku “fuwa hi mintirho leyinene.” Mintirho leyi yi katsa ku “hanana, va tiyimisela ku avelana ni van’wana,” va pfuna lava va pfumalaka. (1 Timotiya 6:18) Vakreste—lava fuweke ni lava nga swisiwana—va nga ha tirhisa swin’wana leswi va nga na swona leswaku va hangalasa mahungu lamanene ya Mfumo wa Xikwembu, ku nga nchumu lowu Vakreste va ntiyiso va wu tekaka wu ri wa nkoka namuntlha. Moya lowu wa ku hanana wu kombisa langutelo lerinene hi swilo leswi vonakaka naswona wu susumetela munhu leswaku a rhandzeka eka Yehovha Xikwembu na Yesu Kreste, lava rhandzaka munhu la nyikaka a tsakile.—Matewu 24:14; Luka 16:9; 2 Vakorinto 9:7.
Swilo Swa Nkoka Swinene
Swi le rivaleni leswaku a wu kona nawu lowu vulaka leswaku Vakreste va fanele va va swisiwana. Naswona a va fanelanga va ‘tiyimisela ku fuwa.’ (1 Timotiya 6:9) Va tirha hi matimba ntsena leswaku va kota ku hanya kahle. Hi ku ya hi swivangelo swo hambana-hambana ni xiyimo xa ikhonomi xa laha va tshamaka kona, matshalatshala ya vona ma ta fambisana ni swiyimo swa ndhawu.—Eklesiasta 11:6.
Ku nga khathariseki leswaku va yime njhani hi tlhelo ra timali, Vakreste va fanele va tiyimisela ku “tiyiseka hi swilo swa nkoka swinene.” (Vafilipiya 1:10) Hi ku rhangisa swilo swa nkoka ku sungula “va tivekela hi ku hlayiseka masungulo lamanene ya nkarhi lowu taka, leswaku va ta khomelela swinene evuton’wini bya xiviri.”—1 Timotiya 6:19.