Xana Mali I Sathana?

Nhlamulo ya Bibele

Doo! Ku na xivulavulelo lexi nga duma lexi nge “mali i Sathana.” Kambe Bibele a yi vuli swona leswaku mali i Sathana naswona a yi vuli leswaku mali hi yona yi vangaka swilo hinkwaswo swo biha. Bibele yi vula leswaku “ku rhandza ngopfu mali i rimitsu ra leswo biha hinkwaswo.”a—1 Timotiya 6:10, Bibele Mahungu Lamanene.

Bibele yi ri yini hi mali?

Bibele yi vula leswaku loko hi yi tirhisa kahle mali, yi nga hi pfuna naswona yi nga va “xisirhelelo.” (Eklesiasta 7:12) Nakambe yi tlhela yi bumabumela lava kombaka van’wana malwandla hi ku va nyika leswi va nga na swona ku katsa ni mali.—Swivuriso 11:25.

Kambe Bibele yi tlhela yi hi lemukisa leswaku hi nga endli mali yi va ya nkoka swinene ku tlula swilo hinkwaswo evuton’wini. Yi ri: “Mi nga rhandzi mali, kambe enerisekani hi swilo leswi mi nga na swona.” (Vaheveru 13:5) Leswi hi swi dyondzaka i ku, a hi fanelanga hi rhangisa mali kumbe hi hlongorisa rifuwo. Ku ri na sweswo, hi fanele hi eneriseka hi swakudya, swiambalo ni ndhawu yo tshama.—1 Timotiya 6:8.

**Hikwalaho ka yini Bibele yi hi tsundzuxa leswaku hi nga rhandzi mali?**

Vanhu va makwanga a va nge byi kumi vutomi lebyi nga heriki. (Vaefesa 5:5) Xivangelo xin’wana hileswaku makwanga i muxaka wun’wana wa ku gandzela swifaniso kumbe wa vugandzeri bya mavunwa. (Vakolosa 3:5) Kasi xin’wana, vanhu lava nga ni makwanga loko va ri karhi va lavana ni tindlela to kuma leswi va swi lavaka hakanyingi va cinca ni mahanyelo lamanene. Swivuriso 28:20 yi ri: ‘Lava hatliselaka ku kuma rifuwo a va nge tshami va nga ri na nandzu.’ Va nga ha endla ni milandzu leyikulu yo fana ni ku xungeta van’wana leswaku va ta kuma mali, ku khoma nkuzi, vukungundzwana, ku tlhakisa kumbe ku dlaya.

Hambiloko munhu loyi a rhandzaka mali a nga endli swilo swo biha ku nga ha va ni switandzhaku swin’wana. Bibele yi ri: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuphukuphuku loku va vavisaka.”—1 Timotiya 6:9.

Hi vuyeriwa njhani loko hi yingisa xitsundzuxo xa Bibele xa leswaku hi nga rhandzi mali?

Loko hi nga pfumeleli mali yi hi endlisa swilo leswi hi swi tivaka leswaku swi hoxile hi ta va ni xindzhuti naswona Xikwembu xi ta hi tsakela xi tlhela xi hi seketela. Xikwembu xi tshembisa lava lavaka ku xi tsakisa hi timbilu ta vona hinkwato xi ku: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Vaheveru 13:5, 6) Xi tlhela xi hi tiyisekisa leswaku “munhu wo tshembeka u ta kuma mikateko yo tala.”—Swivuriso 28:20.

Matsalwa lama vulavulaka hi mali

Eklesiasta 7:12: ‘Mali i xisirhelelo.’

Leswi ri vulaka swona: Loko hi tirhisa mali kahle yi nga hi pfuna yi tlhela yi hi sirhelela.

Luka 12:15: “Hambiloko munhu a ri ni swilo swo tala, vutomi byakwe a byi humi eka swona.”

Leswi ri vulaka swona: Mali a hi nchumu wa nkoka swinene evuton’wini naswona a yi nge hi ponisi.

1 Timotiya 6:10: “Ku rhandza mali i rimitsu ra mixaka hinkwayo ya swilo swo biha. Van’wana va hambukisiwile eripfumelweni naswona va titlhave hinkwako hi switlhavi swo tala hikwalaho ka ku rhandza mali.”

Leswi ri vulaka swona: Mali a yi bihanga. Kambe vanhu lava rhandzaka mali lava rhangisaka yona eka hinkwaswo va tivangela swiphiqo swo fana ni mavabyi lama vangiwaka hi ku tirha yi nga chayi ni ku hohlokeriwa hi mindyangu.

Vaheveru 13:5: “Mi nga rhandzi mali, kambe enerisekani hi swilo leswi mi nga na swona.”

Leswi ri vulaka swona: Ematshan’weni yo hlongorisa mali, hi ta va hi tlharihile loko hi eneriseka hi ku va ni swilo swa nkoka.

Matewu 19:24: “Swi olova ngopfu ku va kamela yi hundza embhoveni wa neleta ku ri ni ku va munhu la fuweke a nghena eMfun’weni wa Xikwembu.”

Leswi ri vulaka swona: Yesu a ha ku rhamba jaha ra xifumi leswaku ri n’wi landzela. Jaha rero ri arile hikuva a ri rhandza ngopfu rifuwo ra rona. Kutani Yesu u hi lemukisa leswaku loko munhu a rhangisa mali eka swilo hinkwaswo ku tlula ni Xikwembu u ta lahlekeriwa hi vutomi lebyi nga heriki.

a Tibibele tin’wana ti hlamusela tsalwa leri hi ndlela leyi: “Ku rhandza mali i rimitsu ra mixaka hinkwayo ya swilo swo biha.”