Vantshwa Va Vutisa

Xana Ndzi Nga Wu Tirhisa Njhani Nkarhi Wa Mina Hi Vutlhari?

“Ndzi twe un’wana a ndzi vungunya a ku, loko u lava leswaku mina ndzi va endhawini yo karhi hi awara ya mune, ndzi fanele ku byeriwa leswaku ndzi fika endhawini yoleyo hi awara ya nharhu. Loko ndzi twa leswi, hi kona ndzi nga sungula ku swi xiya leswaku ndzi fanele ndzi tirhisa nkarhi wa mina hi vutlhari!”—Ricky.a

XANA i tiawara tingani leti engetelekeke leti u nga ti tirhisaka hi siku? Loko wo ti kuma, xana u nga ti tirhisela ku endla yini?

□ Ku dzumba ni vanghana

□ Ku etlela

□ Ku hlaya

□ Ku endla vutiolori

□ Swin’wana ․․․․․

I ntiyiso leswaku loko a wo kuma tiawara leti engetelekeke hi siku a wu ta ti tirhisela swilo swa nkoka, kambe khombo ra kona hileswaku sweswo a swi nge pfuki swi endlekile. Loko swi ri tano, xana u nga endla yini? Vantshwa vo tala va dyondze leswaku ku tirhisa nkarhi wa vona hi vutlhari swi va pfunile leswaku va kuma tiawara ti nga ri tingani leti engetelekeke leti va ti lavaka. Va tlhele va swi xiya leswaku ku tirhisa nkarhi wa vona hi vutlhari swi va hungutela ntshikilelo, swi endla leswaku va pasa exikolweni naswona swi endla leswaku vatswari va vona va va tshemba. A hi voneni leswaku ku tirhisa nkarhi wa wena hi vutlhari swi nga ku vuyerisa njhani.

Ntlhontlho Wo Sungula: Ku Endla Xiyimiso

Leswi nga ha ku sivelaka. Loko u ehleketa hi ku endla xiyimiso u vona onge sweswo swi ta ku tikisela! U rhandza ku tiendlela swilo u ntshunxekile naswona a wu swi lavi leswaku nkarhi wa wena wu lawuriwa hi xiyimiso.

Lexi endlaka u va ni xiyimiso. Hosi Solomoni u tsarile a ku: “Kunene makungu ya lava va gingiritekaka ma endla leswi pfunaka.” (Swivuriso 21:5) A swi kanakanisi leswaku Solomoni a a tshama a khomekile. A a tekile, a ri tatana naswona a ri hosi—swi nga endleka leswaku leswi hinkwaswo u swi endle a nga si va ni malembe ya 20! Loko a ya a kula u ye a khomeka ngopfu evuton’wini byakwe. Hilaha ku fanaka, swi nga ha endleka leswaku na wena sweswi u tshama u khomekile evuton’wini. Kambe swi nga ha endleka leswaku swilo swi ta ya swi nyanya loko u kula. Kutani i swa nkoka leswaku u sungula ku hleleka sweswi timhaka ti nga si biha!

Leswi tintangha ta wena ti swi vulaka. “Kwalomu ka tin’hweti ta tsevu leti nga hundza ndzi sungule ku tiendlela xiyimiso lexi ndzi nga ta xi landzela nkarhi na nkarhi. A ndzi ku ndzi ringeta ku tiolovisela swilo evuton’wini naswona swi tikomba swi ndzi vuyerisile swinene ku endla xiyimiso!”—Joey.

“Ku tsala leswi ndzi nga ta swi endla swa ndzi pfuna leswaku ndzi landzelela xiyimiso xa mina. Loko ndzi ri ni ntirho wo tala, mina na manana hi wu tsala ehansi kutani hi vona leswaku hi nga pfunana njhani leswaku hi wu endla.”—Mallory.

Leswi nga ta ku pfuna. Anakanya hi mhaka leyi: A hi nge u lava ku teka riendzo. Kutani xirho xin’wana ni xin’wana xa ndyangu xi hoxela bege ya xona endhawini yo veka mindzhwalo emovheni. Kambe leswi ti nga lo hoxeriwa kunene swi tikomba onge tibege ta n’wina a ti nge ngheni hinkwato. Xana u nga endla yini? U nga ha ti humesa hinkwato kutani u sungula ku ti paka naswona u rhanga hi letikulu. Hi ku endla tano, u ta kuma leswaku tibege ta n’wina se ta enela naswona hambi ku ri letitsongo ti ni ndhawu.

Swi tano ni hi vutomi bya wena. Loko u heta nkarhi wa wena eka swilo leswi nga pfuniki nchumu, swi nga ha endleka leswaku u nga wu kumi nkarhi wo endla swilo swa nkoka evuton’wini, kutani minkarhi hinkwayo rhanga hi ku endla swilo swa nkoka. Endzhaku ka sweswo, u ta swi vona leswaku u na wona nkarhi lowu engetelekeke wo endla leswin’wana!—Vafilipiya 1:10.

Hi swihi swilo swa nkoka leswi u lavaka ku swi endla?

․․․․․

Sweswi tlhelela emhakeni yo hlela swilo swa wena—tsala swilo leswi u faneleke u swi endla, kambe u sungula hi leswi nga swa nkoka. Loko u endla tano, u ta va na wona nkarhi lowu engetelekeke wo endla swilo swin’wana leswitsongo. Kambe tsundzuka leswaku a wu nge vuyeriwi hi ndlela leyi fanaka loko wo sungula hi swilo leswitsongo!

Leswi u nga swi endlaka. Tsala swilo leswi u lavaka ku swi endla ehansi, kambe u sungula hileswi nga swa nkoka. Kumbexana swilo leswi nga xaxametiwa laha hansi swi nga ku pfuna.

□ Khalendara leyi nga eriqinghweni

□ Xibukwana

□ Khalendara leyi eka khompyuta

□ Khalendara leyi nga tshamaka etafuleni

Ntlhontlho Wa Vumbirhi: Ku Namarhela Xiyimiso

Leswi nga ha ku sivelaka. Loko xikolo xi huma u lava ku wisa kutani u hlalela thelevhixini timinete ti nga ri tingani. Kumbexana a wu lava ku fika u hlaya tibuku ta wena, kambe loko u nga si sungula ku nghena SMS yi ku rhamba leswaku mi ya hlalela filimi. Wa swi tiva leswaku nkarhi wa filimi a wu nge cinciwi, kambe u nga tivekela nkarhi wo hlaya tibuku nivusiku. U tibyela u ku: ‘Loko ntirho wu ndzi talerile ndza swi kota ku wu endla hinkwawo hi nkarhi wun’we.’

Lexi endlaka u landzela xiyimiso xa wena. U ta pasa kahle exikolweni loko u dyondza hi nkarhi lowu mianakanyo ya wena yi nga kavanyetekiki hi ku olova. Loko u nga xi landzeli xiyimiso lexi u nga tiendlela xona swi nga ku vangela ntshikilelo. Kutani ha yini u tivangela ntshikilelo hi ku sungula ku hlaya nivusiku ngopfu? U ehleketa leswaku u ta va u ri njhani loko u pfuka hi xamundzuku xa kona? Swi nga ha endleka u nga swi koti ku pfuka, u titwa u tshikilelekile, se swi boha leswaku u endla swilo hi ku tsutsuma naswona swi nga ha endleka leswaku u nga fiki hi nkarhi exikolweni.—Swivuriso 6:10, 11.

Leswi tintangha ta wena ti swi vulaka. “Ndzi rhandza ku hlalela thelevhixini, ku tlanga katara ni ku dzumba ni vanghana va mina. Swilo leswi a swi hoxanga; kambe minkarhi yin’wana swi endla leswaku u nga ha vi na mhaka ni swilo swa nkoka kutani u sungula ku endla swilo hi ku tsutsuma.”—Julian.

Leswi nga ta ku pfuna. Loko u endla xiyimiso, u nga tsali ntsena leswi u faneleke u swi endla, kambe katsa ni leswi wena u swi rhandzaka. Julian u ri: “Swa ndzi olovela ku endla leswi ndzi lavaka ku swi endla loko ndzi tiva leswaku ku na swin’wana leswi ndzi swi rhandzaka leswi ndzi nga ta swi endla endzhaku sweswo.”

Mhaka yin’wana leyi nga ku pfunaka hi leyi: Tivekele pakani-nkulu leyi u lavaka ku yi fikelela naswona u tivekela tipakani letitsongo leti nga ta ku pfuna leswaku u yi fikelela. Joey la nga ni malembe ya 16, loyi a nga boxiwa eku sunguleni u ri: “Ndzi lava ku va mudyondzisi wa Bibele wa nkarhi hinkwawo. Pakani yoleyo yi ndzi pfuna leswaku ndzi namarhela xiyimiso xa mina leswaku ndzi ta kota ku lunghekela vutomi bya ku tshama ndzi khomekile.”

Leswi u nga swi endlaka. Hi tihi tipakani ta xiviri leti u navelaka ku ti fikelela eka tin’hweti ta tsevu leti nga ta landzela?

․․․․․

Hi yihi pakani leyi u navelaka ku yi fikelela eka malembe mambirhi lama nga ta landzela, naswona i yini leswi u faneleke u swi endla sweswi leswaku u ta yi fikelela?

․․․․․

Ntlhontlho Wa Vunharhu: Ku Va La Baseke Ni Ku Hleleka

Leswi nga ku sivelaka. Kumbexana wa tivutisa leswaku xana ku va la baseke ni ku hleleka swi fambisana njhani ni ku tirhisa nkarhi wa wena hi vutlhari. Phela swa olova ku nga hleleki. Swi nga ha endleka leswaku loko u lava ku basisa kamara ra wena, u tshamela ku tibyela leswaku u ta ri basisa mundzuku, ivi u hetelela u nga ha ri basisanga! Swi nga ha endleka leswaku a wu na mhaka nileswaku kamara ra wena ra basa kumbe a ri basi, eka wena swo fana. Kambe i swa nkoka ku basisa laha u tshamaka kona.

Lexi endlaka u endla tano. Ku swi hlela kahle swilo swa wena swi nga ku pfuna leswaku u hlayisa nkarhi, ngopfu-ngopfu loko u ta lava swo karhi. Leswi swi ta tlhela swi ku pfuna leswaku u va ni ku rhula ka mianakanyo.—1 Vakorinto 14:40.

Leswi tintangha ta wena ti swi vulaka. “Minkarhi yin’wana loko ndzi nga swi hlelanga kahle swiambalo swa mina, u kuma leswaku swilo swin’wana leswi ndzi swi lavaka swi tumbele ehansi ka swona!”—Mandy.

“Ndzi hete vhiki ndzi nga xi voni xipachi xa mina. Mhaka leyi yi ndzi tshikilele ngopfu. Ndzi xi kume endzhaku ka loko ndzi basise kamara ra mina.”—Frank.

Leswi nga ta ku pfuna. Ringeta ku veka swilo endhawini ya swona hi ku hatlisa endzhaku ka loko u swi tirhisile. Swi ta ku olovela ku basisa ni ku kuma swilo leswi u swi lavaka loko nkarhi na nkarhi u titoloveta ku hatla u hlela swilo ematshan’weni yo swi tshika swi rhanga swi hangalaka.

Leswi u nga swi endlaka. Ringeta ku tshama u hlelekile. Veka swilo hinkwaswo hi ku hleleka kutani u vona loko swi ta ku olovisela vutomi.

U nga ha dyi nkarhi! Hi swihi swiringanyeto leswi nga exihlokweni lexi leswi ku pfuneke swinene?

․․․․․

Ndzi ta ringeta swiringanyeto leswi ku ringana vhiki rin’we kumbe mavhiki ya ․․․․․ ku vona loko swi ta ndzi pfuna.

Swihloko swin’wana leswi nge “Vantshwa Va Vutisa” swi kumeka eka Web site leyi nge, www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

◼ Xana u lava ku etlela tiawara tingani leswaku u ta kota ku endla swilo kahle?

◼ I mani loyi u nga ta n’wi kombela leswaku a ku pfuna hi xiyimiso xa wena?

◼ Loko ku ri leswaku u ni xiyimiso lexi u xi tirhisaka, xana hi yihi mindzulamiso leyi u faneleke u yi endla?

[Bokisi/Xifaniso lexi nga eka tluka 20, 21]

Hi vhiki vantshwa va le xikarhi ka malembe ya 8 na 18 va tirhisa nkarhi wa vona va endla leswi landzelaka:

17

va ri ni vatswari va vona

30

va ri exikolweni

44

va ri ku hlaleleni ka thelevhixini, va tlanga mintlango ya vhidiyo, va rhumelana marungula ni ku yingisela vuyimbeleri

XANA NKARHI WA MINA NDZI WU HETA NDZI RI KARHI NDZI ENDLA YINI?

Tsala tiawara leti u ti tirhisaka vhiki rin’wana ni rin’wana

u hlalela thelevhixini: ․․․․․

u tlanga mintlango ya vhidiyo: ․․․․․

u tirhisa khompyuta: ․․․․․

u yingisele vuyimbeleri: ․․․․․

Ntsengo: ․․․․․

Tiawara leti ndzi nga ti tirhiselaka swilo swa nkoka swinene: ․․․․․

[Xifaniso lexi nga eka tluka 20]

Loko u rhangisa swilo leswi nga pfuniki nchumu, u nge vi na wona nkarhi wo endla swilo swa nkoka