Mindyangu Yin’wana Leyi Swilo Swi Yi Fambelaka Kahle—Xiyenge Xo Sungula

Hilaha nkandziyiso lowu wo hlawuleka wa Xalamuka! se wu swi kombiseke hakona, mindyangu leyi swilo swi yi fambelaka kahle yi na swona swiphiqo minkarhi yin’wana. Mhaka leyi a yi hlamarisi hikuva hi hanya enkarhini lowu Bibele yi wu vulaka “minkarhi ya mangava leyi swi nonon’hwaka ku langutana na yona.” (2 Timotiya 3:1) Ndyangu wun’wana ni wun’wana wu ta langutana na swona swiphiqo swo karhi.

Kambe tsundzuka leswaku ku va ndyangu wa wena swi wu fambela kahle a swi titsheganga hi ku va mi ri ni xin’wana ni xin’wana lexi mi xi lavaka. Kambe Yesu u te: “Va tsaka lava khathalaka hi xilaveko xa vona xa moya.” (Matewu 5:3) Mindyangu leyi khathalaka hi xilaveko xa yona xa moya hileswi yi hanyaka hi milawu ya Bibele yi kume ndlela leyi swilo swi nga yi fambelaka kahle ha yona, ku nga khathariseki swiyimo swo tika leswi yi langutanaka na swona. Xiya swikombiso leswi landzelaka.

Ku khathalela n’wana loyi a lamaleke. Nchumu wa nkoka lowu Bibele yi vulaka leswaku hi wu endla i ku khathalela swirho swa mindyangu ya hina, ku katsa ni leswi nga ni swilaveko swo hlawuleka. Yi ri: “Loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo naswona u bihe ngopfu ku tlula munhu la nga riki na ripfumelo.”—1 Timotiya 5:8.

Eka tluka 15, Victor, tatana un’wana wa laha Afrika Dzonga, u hlamusela ndlela leyi yena ni nsati wakwe va n’wi khathaleleke ha yona n’wana wa vona loyi a lamaleke, malembe lama tlulaka 40.

Ku kurisiwa hi vatswari lava nga riki va wena. Milawu ya Bibele yi nga pfuna munhu leswaku a titwa a ri ni xindzhuti hambiloko a lahliwe hi vatswari vakwe. Bibele yi vula leswaku Yehovha Xikwembu i “mupfuni” wa lava nga riki na tatana.—Pisalema 10:14.

Eka tluka 16, Kenyatta, nhwanyana wa le United States, u hlamusela ndlela leyi a dyondzeke ha yona ku tiyiselela mbitsi lowu a nga na wona hileswi a nga va tiviki vatswari vakwe.

Ku tiyiselela ku feriwa hi mutswari. Ku feriwa hi manana kumbe hi tatana swi nga ha ku vangela gome lerikulu. Bibele yi nga ku pfuna. Yehovha, Mutsari wa yona, i “Xikwembu xa nchavelelo hinkwawo.”—2 Vakorinto 1:3.

Eka tluka 17, Angela, nhwanyana wa le Australia, u hlamusela ndlela leyi vuxaka bya yena ni Xikwembu byi n’wi pfuneke ha yona leswaku a tiyiselela gome ra ku feriwa hi mutswari.

Mindyangu hinkwayo yi ni swiphiqo swo karhi leswi yi langutanaka na swona. Hilaha mintokoto leyi nga eka matluka lama landzelaka yi nga ta swi kombisa hakona, lava tirhisaka milawu ya Bibele va kume nchumu wa nkoka lowu va pfunaka leswaku va kota ku langutana ni swiphiqo swa vona.

[Bokisi/Swifaniso leswi nga eka tluka 15]

Ku Khathalela N’wana La Lamaleke

Hi ku vula ka Victor Maynes, wa laha Afrika Dzonga

“Hi mpfhuka Andrew a velekiwa, ha n’wi ambarisa, ha n’wi hlambisa naswona minkarhi yin’wana ha n’wi dyisa. Sweswi u ni malembe ya 44.”

HI XIYE leswaku swin’wana a swi nga fambi kahle loko Andrew a hlanganisa lembe kambe a nga swi koti ku famba. Kutani hi nkarhi wolowo, a a tshamela ku titivala. Hi n’wi tsutsumisele exibedlhele, laha madokodela ma hi byeleke leswaku u ni vuvabyi bya switshetshela. Kambe a a nga khomiwanga hi vuvabyi byebyo ntsena. Loko Andrew a ya emahlweni a kamberiwa ku kumiwe leswaku byongo byakwe a byi nga tirhi kahle.

Endzhaku ko ringeta vutshunguri byo hambana-hambana, hi hetelele hi kume vutshunguri lebyi endleke leswaku vuvabyi byakwe bya switshetshela byi lawuleka. Nkarhi wun’wana a a boheka ku nwa maphilisi ya mixaka ya mune kanharhu hi siku. Entiyisweni, ku hava murhi lowu nga endlaka leswaku byongo byakwe byi tirha kahle. Hambileswi sweswi Andrew a nga ni malembe ya 44, u ehleketa ku fana ni n’wana loyi a nga ni ntlhanu kumbe tsevu wa malembe.

Madokodela ma ringanyete leswaku hi n’wi yisa endhawini yo hlawuleka leyi a a ta khathaleriwa eka yona kambe hi vone swi antswa ku tshama na yena. A hi ta swi kota ku khathalela swilaveko swa Andrew, kutani hi endle xiboho xo tshama na yena ekaya ku nga khathariseki swiphiqo leswi a hi ta langutana na swona.

Hikwalaho, hinkwerhu ka hina ekaya a hi n’wi khathalela. Vana va hina van’wana lava a hi tshama na vona ekaya, ku nga vanhwanyana vambirhi ni mufana un’we, ha va nkhensa hikuva va hi pfunile. Nakambe leswi hi nga Timbhoni ta Yehovha, swirho swa vandlha swa hi pfuna swinene. Minkarhi yin’wana va hi tisela swakudya kumbe va sala na Andrew loko hi ya eku chumayeleni kumbe va hi pfuna hi mintirho yin’wana.

Minkarhi hinkwayo hi tsundzuka tsalwa ra Esaya 33:24, leri nga ni xitshembiso xa Xikwembu xa leswaku “ku hava munhu la tshamaka kona la nga ta ku: ‘Ndza vabya.’” Ha tiyiseka swinene leswaku Xikwembu xi ta xi hetisisa xikongomelo xa xona xa leswaku xi tisa misava leyintshwa ni ku herisa mavabyi hinkwawo. (2 Petro 3:13) Hi wu langutele hi mahlo-ngati nkarhi lowu Andrew a nga ta hola ha wona. Hambileswi nkarhi wolowo wu nga si fikaka, ha ma tshemba marito ya Yesu ya leswaku loko hi rhangisa swilaveko swa Mfumo wa Xikwembu evuton’wini bya hina, hi ta swi kuma swilo leswi hi swi lavaka. (Matewu 6:33) Xikwembu xi xi hetisisile xitshembiso xexo minkarhi hinkwayo. A hi si tshama hi pfumala nchumu.

Entiyisweni, a hi vanhu hinkwavo lava nga kotaka ku khathalela xirho xa ndyangu ekaya loko xi vabya. Eka lava swi kotaka, nchumu wo sungula lowu ndzi nga va khutazaka leswaku va wu endla i ku khongela hi mbilu hinkwayo nkarhi ni nkarhi. (1 Petro 5:6, 7) Xa vumbirhi, khathalela n’wana wa wena u tlhela u n’wi rhandza swinene, naswona u nga tshuki u ehleketa leswaku a nge swi koti ku dyondza ku rhandza Yehovha Xikwembu. (Vaefesa 6:4) Xa vunharhu, khutaza ndyangu hinkwawo leswaku wu pfuneta. Xa vumune, tsundzuka leswaku ekaya hi kona laha n’wana wa wena a nga kombisiwaka rirhandzu lerikulu. I ntiyiso leswaku swiyimo swa mindyangu a swi fani. Hina a hi si tshama hi tisola hileswi hi tshamaka na Andrew ekaya. I n’wana tlhelo i wanuna la kuleke loyi ndzi n’wi rhandzaka swinene.

[Bokisi/Swifaniso leswi nga eka tluka 16]

Ku Kurisiwa Hi Vatswari Lava Nga Riki Va Wena

Hi ku vula ka Kenyatta Young, wa le United States

“Loko un’wana wa vatswari lava u tshamaka na vona a ri mutswari wa wena wa xiviri, swi vula leswaku u ta fana na yena. Kambe leswi mina ndzi kurisiweke hi vatswari lava nga riki va mina, a ndzi fani na vona. A ndzi swi tivi loko ndzi ri na wona maxaka lawa ndzi fanaka na wona.”

A NDZI swi tivi leswaku tata wa mina i mani naswona a ndzi si tshama ndzi n’wi vona mana wa mina. A a ri xilovekelo naswona a a tirhisa swidzidziharisi loko a ndzi tikile. Loko ndzi velekiwa ndzi yisiwe endhawini leyi ku khathaleriwaka vana lava nga riki na vatswari, naswona ndzi rhurhiseriwe etindhawini teto to hlayanyana loko ndzi nga si tekiwa hi mpatswa wun’wana leswaku wu ndzi kurisa ndzi nga si hlanganisa malembe mambirhi.

Tata wa mina wa muwundli u ndzi byele leswaku loko mutirhi wa le ndzhawulweni leyi pfunaka vanhu a n’wi kombe xifaniso xa mina, sweswo swi n’wi endle a namba a lava ku ndzi teka ndzi ya tshama na vona. Ndzi nambe ndzi sungula ku rhandza mana wa mina wa muwundli. Ndzi n’wi byele leswaku i mana wa mina nileswaku ndzi lava ku famba na yena ekaya rakwe.

Hambiswiritano, loko ndza ha ri n’wana a ndzi tshama ndzi chuhile leswaku ndzi ta endla nchumu wun’wana lowu hoxeke ivi va ndzi tlherisela endhawini leyi ku khathaleriwaka vana lava nga riki na vatswari. A ndzi tibyele leswaku a ndzi fanelanga ndzi va ni swipfukela kumbe ndzi vabya ku fana ni vana van’wana. A ndzi ringeta hi tindlela hinkwato leswaku ndzi nga khomiwi hi mukhuhlwana. Vatswari va mina a va tshamela ku ndzi byela leswaku va ndzi rhandza nileswaku a va nge ndzi lahli.

Sweswi ndzi kurile, kambe minkarhi yin’wana ndzi titwa onge vatswari lava ndzi wundlaka a va ndzi rhandzi ku fana ni vana lava kurisiweke hi vatswari va vona. Loko ndza ha ringeta ku tichavelela hi ku tibyela leswaku va ndzi rhandza, munhu un’wana u ta ndzi byela a ku, “U fanele u nkhensa swinene leswi u nga ni vatswari lavanene lava endleke hinkwaswo leswi nga ematimbeni ya vona leswaku va kota ku ku teka va ya tshama na wena.” Sweswo swa ndzi tsakisa kambe marito wolawo ma ndzi endla ndzi ehleketa leswaku mina ndzi ni xiphiqo xo karhi nileswaku va endle matshalatshala lamakulu leswaku va ndzi rhandza.

Swa ndzi tikela ku pfumela leswaku swi nga ha endleka ndzi hetelela ndzi nga n’wi tivanga tata wa mina wa xiviri. Minkarhi yin’wana ndzi twa ku vava hileswi manana a nga tshikangiki ku tirhisa swidzidziharisi ni ku nwa byala ku tlula mpimo leswaku a kota ku tshama na mina, onge hiloko a ndzi nga ri wa nkoka. Minkarhi yin’wana ndzi n’wi twela vusiwana. Ndzi pfa ndzi ehleketa leswaku loko ndzo tshuka ndzi hlangana na yena, ndzi ta n’wi byela leswaku swilo swi ndzi fambela kahle evuton’wini nileswaku a nga fanelanga a karhateka hileswi a ndzi tshikeke.

Vatswari lava ndzi tshamaka na vona i Timbhoni ta Yehovha naswona yin’wana ya tinyiko ta nkoka leti va ndzi nyikeke tona i vutivi bya Bibele. Minkarhi hinkwayo ndzi chaveleriwa hi marito ya Pisalema 27:10 lama nge: “Loko tatana na manana vo ndzi tshika, Yehovha u ta ndzi teka.” Hakunene marito wolawo ma ve ntiyiso eka mina. Ku kurisiwa hi vatswari volavo swi ndzi vuyerisile hi tindlela to karhi. Hi xikombiso, ndzi rhandza vanhu—ku tiva ndlela leyi va kuleke ha yona ni ndlela leyi va hanyaka ha yona—kumbexana hileswi ndzi nga va tiviki vatswari va mina. Ku rhandza vanhu i swa nkoka ngopfu-ngopfu entirhweni wa Vakreste wo chumayela. Ku va Mbhoni ya Yehovha ni ku vulavula ni van’wana hi Bibele swi ndzi endla ndzi va ni xindzhuti ni ku va ni xikongomelo evuton’wini. Loko ndzi tshikilelekile, ndza famba ndzi ya chumayela vanhu van’wana. Ku dyondzisa vanhu Bibele swi ndzi pfunile leswaku ndzi tolovelana na vona. Munhu un’wana ni un’wana u ni swilo swo tsakisa leswi a nga ku byelaka swona malunghana ni vutomi byakwe.

[Bokisi/Swifaniso leswi nga eka tluka 17]

Loko U Feriwe Hi Mutswari

“Loko tatana a fa, ndzi titwe ndzi nga ha sirhelelekanga. Munhu loyi a a tiva swilo hinkwaswo ni loyi a a ta lulamisa swilo hinkwaswo evuton’wini bya mina a a nga ha ri kona.”

Hi ku vula ka Angela Rutgers, wa le Australia

TATANA u fe emalembeni ya khume lama hundzeke loko ndza ha ri muntshwa. Loko ka ha sele tin’hweti ta tsevu a nga si fa, u endliwe vuhandzuri naswona loko a ha ri exibedlhele leswaku a hlakarhela, dokodela u hi byele leswaku ku hava nchumu wun’wana lowu a nga n’wi pfunaka ha wona. Manana a a lava ku tiva leswi engetelekeke hi ta xiyimo lexi tatana a a ri eka xona, kambe buti wa mina u titivarile loko a twe leswaku ku hava lexi dokodela a nga xi endlaka naswona mina ndzi sale ndzi pfilunganyekile. Endzhaku ka tin’hweti ta tsevu tatana u file.

Ku hundze nkarhi wo karhi ndza ha pfilunganyekile. A ndzi lava leswaku vanghana va mina va twisisa ndlela leyi a ndzi titwa ha yona kambe a ndzi nga swi lavi leswaku va ndzi tshandzisa hileswi ndzi feriweke hi tatana. Kutani ndzi endle matshalatshala ya leswaku vanghana va mina va nga ri voni gome leri a ndzi ri na rona. Hi hala tlhelo, leswaku ndzi ya emahlweni ndzi tsakela ku va na vona, ndzi endle onge hinkwaswo a swi famba kahle evuton’wini bya mina, kambe a swi nga ri tano. Loko ndzi tsundzuka ndlela leyi a ndzi endla swilo ha yona hi nkarhi wolowo, ndza swi vona leswaku vanghana va mina a va ndzi lehisela mbilu.

Xana ndzi tivona nandzu leswi Tatana a feke? Ina. Ndzi navela onge nkarhi ni nkarhi a ndzi fanele ndzi n’wi byele leswaku “Ndza n’wi rhandza.” Ndzi navela onge a ndzi fanele ndzi n’wi angarhe minkarhi yo tala kumbe ku heta nkarhi wo tala na yena. Hambileswi ndzi tshamelaka ku vula ndzi ku, ‘A a nga ta swi lava leswaku ndzi tivona nandzu,’ kambe sweswo swa ha ndzi karhata.

Tanihi leswi ndzi nga Mbhoni ya Yehovha, ndzi chaveleriwa hi ntshembo wa le Bibeleni wa leswaku vafi va ta pfuxiwa. (Yohane 5:28, 29) Ndzi ringeta ku ehleketa leswaku tatana u ye entsungeni naswona u ta vuya siku rin’wana, kambe siku ra kona a ndzi ri tivi. Lexi hlamarisaka, loko vanhu va ku, “Tata wa wena u ta pfuxiwa eku feni,” eku sunguleni sweswo a swi nga ndzi chaveleli nikatsongo. Loko ku ri mina, ‘A ndzi lava tatana sweswi!’ Kambe xifaniso xexo xa leswaku tatana u ye entsungeni xi ndzi pfunile. A xi kombisa leswaku enkarhini lowu taka ku ta va ni ku pfuxiwa ka vafi, naswona xi tlhele xi ndzi pfuna leswaku ndzi tiyiselela gome ra ku feriwa.

Vakreste-kulorhi va ndzi pfune swinene. Ndzi tsundzuka Mukreste un’wana loyi a ndzi byeleke leswaku a swi n’wi tikela ku vulavula na mina hi ta rifu ra tatana, kambe u vule leswaku nkarhi hinkwawo a a tshamela ku ehleketa hi mina swin’we ni ndyangu wa ka hina. A ndzi tshamela ku ehleketa hi marito wolawo. Hambileswi van’wana a va nga vuli nchumu kambe marito wolawo ma ndzi chavelerile hikuva sweswo a swi vula leswaku va tshama va ri karhi va ehleketa hi mina ni ndyangu wa ka hina.

Endzhaku ka tin’hweti ta mune Tatana a file, Manana u sungule ku tirhisa nkarhi wakwe wo tala entirhweni wo chumayela naswona ndzi vone leswaku sweswo a swi n’wi nyika ntsako lowukulu. Kutani na mina ndzi sungule ku hlanganyela na yena entirhweni wolowo. Ya hlamarisa ndlela leyi ku pfuna van’wana swi ku pfunaka ha yona leswaku u tiyiselela gome. Swi ndzi pfune leswaku ndzi ri tshemba swinene Rito ra Yehovha ni switshembiso swakwe nileswaku ndzi nga ehleketi ngopfu hi gome leri ndzi langutaneke na rona.