Langutelo Ra Bibele

Xana Munhu A Nga Swi Kota Ku Rhandza Valala Vakwe?

Yesu Kreste u te: “Mina ndzi ri eka n’wina: Hambetani mi rhandza valala va n’wina, mi khongelela lava mi xanisaka; leswaku mi tikombisa mi ri vana va Tata wa n’wina la nge matilweni, tanihi leswi a tsuvukisaka dyambu ra yena eka vanhu vo homboloka ni lavanene naswona a nisaka mpfula yakwe ehenhla ka vanhu lava lulameke ni lava nga lulamangiki.”—Matewu 5:44, 45.

XANA u ehleketa leswaku vukhongeri byi pfuna vanhu leswaku va rhandzana ni ku hanyisana hi ku rhula kumbe byi endla leswaku va vengana ni ku dlayana? Namuntlha vanhu vo tala va vona onge vukhongeri byi susumetela vanhu leswaku va vengana ni ku dlayana, ngopfu-ngopfu loko byi hlangane ni tipolitiki naswona byi hlohlotela moya lowu tlakusaka rixaka kumbe tiko ro karhi. Kambe hilaha marito ya Yesu ma vulaka hakona, ‘vana va Xikwembu’ va ntiyiso, va xi tekelela hi ku rhandza vanhu van’wana, ku katsa ni valala va vona.

Un’wana wa malandza ya Xikwembu u te: “Loko nala wa wena a ri ni ndlala, n’wi phamele; loko a ri ni torha, n’wi nyike swakunwa . . . U nga pfumeli ku hluriwa hi swo biha, kambe hambeta u hlula swo biha hi leswinene.” (Varhoma 12:20, 21) Kambe, xana vanhu va nga swi kota hakunene ku kombisa rirhandzu ro tano emisaveni leyi avaneke? Timbhoni ta Yehovha ti hlamula hi ku tiyiseka leswaku swi nga koteka! Kambisisa xikombiso xa Yesu ni xa vadyondzisiwa vakwe vo sungula.

A Va Rhandza Valala Va Vona

Yesu u dyondzise vanhu ntiyiso malunghana ni Xikwembu naswona vanhu vo tala a va tsakela ku n’wi yingisela. Hambiswiritano, van’wana va n’wi kanetile hileswi a va nga si tshama va n’wi yingisela loko a dyondzisa kumbe hileswi a va kanganyisiwe hi valala vakwe. (Yohane 7:12, 13; Mintirho 2:36-38; 3:15, 17) Nilokoswiritano, Yesu u hambete a dyondzisa vanhu hinkwavo rungula leri ponisaka vutomi, ku katsa ni vakaneti vakwe. (Marka 12:13-34) Ha yini? Hikuva a a swi tiva leswaku van’wana va nga ha cinca vonelo ra vona kutani va pfumela leswaku i Mesiya ivi va yingisa tidyondzo leti nga eRitweni ra Xikwembu.—Yohane 7:1, 37-46; 17:17.

Hambi ku ri hi vusiku lebyi vakaneti lava hlomeke va n’wi khomeke ha byona a nga dyanga xa munhu, Yesu u kombise valala vakwe rirhandzu. Entiyisweni, u horise un’wana wa lava n’wi khomeke, loyi muapostola Petro a nga n’wi khemba hi banga. Hi nkarhi wolowo, Yesu u vule nawu wa nkoka lowu kongomisaka valandzeri vakwe va ntiyiso ninamuntlha. U te: “Hinkwavo lava khomaka banga va ta lova hi banga.” (Matewu 26:48-52; Yohane 18:10, 11) Endzhaku ka malembe ya kwalomu ka 30, Petro u tsale a ku: “Kreste u xanisekele n’wina, a mi siyela ntila leswaku mi landzelerisisa mikondzo yakwe. . . . Loko a xanisiwa, a nga xungetanga, kambe u hambete a tinyiketa eka [Xikwembu].” (1 Petro 2:21, 23) Swi le rivaleni leswaku Petro u dyondze leswaku valandzeri va ntiyiso va Kreste va fanele va va ni rirhandzu, ku nga ri moya wa ku rihisela.—Matewu 5:9.

Hinkwavo lava ‘landzelerisisaka mikondzo ya Yesu’ va kombisa rirhandzu ni tintswalo leti a a ri na tona. Timotiya wa Vumbirhi 2:24 yi ri: “Hlonga ra Hosi a ri fanelanga ri lwa, kambe ri fanele ri olova eka hinkwavo, . . . ri tikhoma eka leswo biha.” Timfanelo teto a ti ta vonaka eka ndlela leyi Vakreste va hanyaka ha yona, ku nga ku hanyisana ni van’wana hi ku rhula ni ku rivalelana.

‘Vayimeri Va Kreste’ Lavo Rhula

Muapostola Pawulo u tsalele vapfumeri-kulobye a ku: “Hikokwalaho hi vayimeri lava khomelaka Kreste . . . Leswi hi nga vakhomeri va Kreste ha kombela hi ku: ‘Vuyelelanani ni Xikwembu.’” (2 Vakorinto 5:20) Vayimeri a va ngheneleli etimhakeni ta tipolitiki ni ta tinyimpi ta matiko lawa va rhumeriwaka eka wona naswona a va seketeli tiko ro karhi. Ntirho wa vona i ku seketela ni ku vulavulela tiko leri va humaka eka rona.

Swi tano ni hi vayimeri ni varhumiwa va Kreste. Va teka Yesu tanihi Hosi naswona va seketela Mfumo wakwe wa le tilweni hi ku chumayela vanhu mahungu lamanene hi ku rhula. (Matewu 24:14; Yohane 18:36) Hikwalaho Pawulo u tsalele Vakreste va le nkarhini wakwe a ku: “A hi lwi nyimpi hi ku ya hi leswi hi nga swona enyameni. Hikuva matlhari ya nyimpi ya hina a hi ya nyama, kambe Xikwembu hi xona xi ma nyikaka matimba leswaku ma wisetela . . . makungu ni swilo hinkwaswo leswi tlakukeke leswi lwisanaka ni vutivi bya Xikwembu.”—2 Vakorinto 10:3-5; Vaefesa 6:13-20.

Loko Pawulo a tsala marito wolawo, Vakreste a va ri eku xanisiweni ematikweni yo tala. Entiyisweni, a va ta va va rihiserile. Ematshan’weni ya sweswo, va hambete va rhandza valala va vona ni ku byela vanhu hinkwavo lava a va ta yingisa rungula ra ku vuyelelana ni Xikwembu. Buku leyi nge Encyclopedia of Religion and War yi ri: “Valandzeri va Yesu vo sungula va ale ku ya enyimpini ni le vusocheni,” hikuva a va teka mintirho yoleyo yi nga “fambisani ni rirhandzu leri Yesu a dyondziseke ha rona ni xileriso xa leswaku munhu u fanele a rhandza valala vakwe.”a

Ku fana ni Vakreste vo sungula, Timbhoni ta Yehovha ti teka Yesu tanihi Hosi ya tona. Ti tlhela ti n’wi teka tanihi Hosi ya Mfumo wa Xikwembu lowu nga ta tisa ku rhula ka xiviri ni nsirhelelo laha misaveni ku nga ri khale. (Daniyele 2:44; Matewu 6:9, 10) Hikwalaho, ku fana ni vayimeri ni varhumiwa, ti twarisa vunene bya Mfumo wolowo. Hi nkarhi lowu fanaka, ti tikarhatela ku va vaaka-tiko lavanene ematikweni lawa ti tshamaka eka wona, ti hakela swibalo ni ku yingisa milawu ya tiko loko yi nga lwisani ni milawu ya Xikwembu.—Mintirho 5:29; Varhoma 13:1, 7.

Hambiswiritano, lexi vavisaka hileswi minkarhi yin’wana vanhu va ehleketaka leswaku Timbhoni i vanhu vo biha, va vulavula ku biha ha tona naswona va ti xanisa ku fana ni Vakreste vo sungula. Kambe a ti rihiseli. Ematshan’weni ya sweswo, ti ringeta ku hanyisana hi “ku rhula ni vanhu hinkwavo,” hileswi ti tshembaka leswaku van’wana va vakaneti va tona va nga ha ‘vuyelelana ni Xikwembu’ kutani va va ni ntshembo wa ku hanya laha misaveni hilaha ku nga heriki.b—Varhoma 12:18; Yohane 17:3.

[Tinhlamuselo ta le hansi]

XANA U TSHAME U TIVUTISA?

◼ Xana Vakreste va fanele va va khoma njhani valala va vona?—Matewu 5:43-45; Varhoma 12:20, 21.

◼ Xana Yesu u endle yini loko a xanisiwa?—1 Petro 2:21, 23.

◼ Ha yini Vakreste vo sungula va ale ku ya enyimpini?—2 Vakorinto 5:20; 10:3-5.