Vantshwa Va Vutisa

Xana Ndzi Nga Ambala Yini?

Heather se u lunghekele ku famba kambe vatswari vakwe a va vona onge va lorha loko va vona ndlela leyi a ambaleke ha yona. Hiloko tata wakwe a hlamala ivi a ku: “Xana u ta famba u ambale hi ndlela yoleyo? Hi ku hlamala Heather a ku: “Ina, phela ndzi ya edorobeni ni vanghana va mina.” Hiloko mana wakwe a ku: “A wu nge fambi u ambale hi ndlela yoleyo!” Kutani Heather a sungula ku tiyimelela a ku: “Kambe Manana, leyi i ndlela leyi vantshwa hinkwavo va ambalaka ha yona . . . naswona swiambalo leswi swi kombisa leswi ndzi swi rhandzaka ni vumunhu bya mina!” Hiloko tata wakwe a n’wi holovela a ku: “Swa twala, kambe mina ni mana wa wena a hi yi rhandzi ndlela leyi u ambaleke ha yona! Tlhelela ekamareni ra wena u ya cinca hikuva loko u nga cinci a wu nge fambi!”

I KHALE vatswari ni vana va tshamela ku holova hikwalaho ka swiambalo. Swi nga endleka leswaku vatswari va wena na vona a va holova ni vatswari va vona loko va ha ringana na wena. Naswona swi nga endleka leswaku hi nkarhi wolowo a va titwa hi ndlela leyi u titwaka ha yona. Kambe sweswi se va kurile naswona mhaka ya swiambalo yi endla leswaku mi tshamela ku holova.

Wena u ri: Swiambalo leswi swa ndzi tsakisa.

Vona va ri: A swi languteki.

Wena u ri: Swiambalo leswi ndza swi rhandza!

Vona va ri: Swi pfuxa nyanyuko wa rimbewu.

Wena u ri: Swi chipile.

Vona va ri: Swa boha swi chipa. . . . Hikuva a swi pfali miri hinkwawo!

Xana yi kona ndlela leyi mi nga swi papalataka ha yona ku tshamela ku holova? Ina, yi kona. Megan loyi sweswi a nga ni malembe ya 23, wa swi tiva leswaku sweswo swi nga endliwa njhani. U ri: “A swi lavi leswaku mi kala mi holova. Mi nga pfumelelana.” Kambe, mi nga pfumelelana njhani? Xana sweswo swi vula leswaku u fanele u ambala onge u manana la nga ni malembe ya 40? A swi tano nikatsongo! Ku pfumelelana swi vula leswaku wena ni vatswari va wena mi vulavurisana hi swilo leswi mi nga twananiki ha swona ni ku kuma tindlela tin’wana leti nga ta tsakisa vatswari va wena swin’we na wena. Xana vuyelo byi ta va byihi?

1. U ta va u ambale kahle ku tlula ni tintangha ta wena.

2. Swi nga ha endleka vatswari va wena va nga tshameli ku xopaxopa swiambalo swa wena.

3. Loko vatswari va wena va vona leswaku u ambala kahle, va nga ha ku pfumelela leswaku u tiendlela ni swilo swin’wana.

Anakanya hi swiambalo swin’wana leswi u swi voneke eka Internet kumbe exitolo leswi u lavaka ku swi xava hi mbilu ya wena hinkwayo. Nchumu wo sungula lowu u faneleke ku wu endla i ku . . .

Anakanya Hi Milawu Ya Bibele

Lexi hlamarisaka hileswaku Bibele a yi vuli swo tala hi mhaka ya swiambalo. Entiyisweni, hi timinete ti nga ri tingani u nga kota ku hlaya Matsalwa hinkwawo lama vulavulaka hi maambalelo! Kambe hi nkarhi wolowo, u ta kuma swiletelo swa nkoka. Hi xikombiso:

◼ Bibele yi tsundzuxa vavasati leswaku va tisasekisa “hi xichavo ni mianakanyo yo hluteka.”a—1 Timotiya 2:9, 10.

Rito leri nge “xichavo” ri nga ha ku endla u karhateka. U nga ha tivutisa u ku, ‘Xana ndzi fanele ku ambala swiambalo leswi nga xongangiki ni leswi nga langutekiki?’ Nikatsongo! Loko swi ta emhakeni ya swiambalo, rito xichavo ri vula leswaku swiambalo swa wena swi fanele swi komba leswaku wa tixixima nileswaku u anakanyela ndlela leyi van’wana va titwaka ha yona. (2 Vakorinto 6:3) Swi tele swiambalo swo tano leswi xiximekaka. Danielle la nga ni malembe ya 23, u ri: “Swi nga ha tika ku swi hlawula kambe u nga swi kota ku ambala swiambalo leswi nga efexenini ni leswi xiximekaka.”

◼ Loko swi ta emhakeni ya swiambalo, Bibele yi vula leswaku u fanele u karhateka ngopfu hi “munhu la nge xihundleni wa mbilu,” kumbe “vumunhu bya [wena] lebyi nge xihundleni xa mbilu,” hilaha Bibele—Mahungu Lamanene yi vulaka hakona.—1 Petro 3:4.

Swiambalo leswi nga xiximekiki swi nga ha ku vangela mahlo ya vanhu kambe ku saseka ka wena ka le xihundleni ku ta endla leswaku u xiximiwa hi vanhu lavakulu ni hi tintangha ta wena. Xana hakunene tintangha ta wena ti nga ku xixima? Ina, hambi ku ri tona ti nga swi vona leswaku i vuphukuphuku ku ambala hi ndlela ya vudlakuta. Brittany la nga ni malembe ya 16, u ri: “Swa nyangatsa ku vona ndlela leyi vavasati va ringetaka ku koka vavanuna hi ndlela leyi va ambalaka ha yona.” Kay na yena wa pfumela. Loko a vulavula hi khale ka munghana wakwe u ri: “Swiambalo swakwe hinkwaswo a swi n’wi kokela mahlo ya vafana. A a lava leswaku vafana va n’wi gangisa naswona leswaku a endla tano, a a ambala swiambalo swa vudlakuta.”

Swiringanyeto Malunghana Ni Maambalelo: Papalata swiambalo leswi khutazaka vudlakuta. Swi ku endla u vonaka onge u ma rhandza ngopfu majaha naswona u vonaka u ri ni manyunyu. Nakambe swi nga endla leswaku majaha ma ku karhata ngopfu kumbe ma ku endla swin’wana swo tlula sweswo. Ku hambana ni sweswo, swiambalo leswi xiximekaka swi endla leswaku u saseka swi tlhela swi kombisa timfanelo letinene leti u nga na tona.

Twana Mavonelo Ya Vatswari Va Wena

A ku nge vi vutlhari ku ya exikolweni u ambale kahle kutani u fika u cinca u ambala swiambalo leswi nga xiximekiki. Vatswari va wena va ta ku tshemba loko u va byela ntiyiso hambi loko wo endla swilo va nga swi tivi. Entiyisweni u ta va u endla kahle loko u rhanga hi ku twa mavonelo ya vatswari va wena malunghana ni leswi u nga swi ambala.—Swivuriso 15:22.

Kambe ha yini u fanele u endla tano? U nga ha anakanya leswaku vatswari va wena a va lavi leswaku u ambala swiambalo leswi nga efexenini, kambe a swi tano nikatsongo. I ntiyiso leswaku vatswari va wena swi nga ha endleka va nga swi rhandzi swiambalo leswi u swi lavaka. Kambe minkarhi yin’wana leswi va swi vulaka swi nga ku pfuna. Nataleine la nga ni malembe ya 17 u ri: “Ndza ma tlangela mavonelo ya vatswari va mina hikuva a ndzi swi lavi ku huma endlwini ndzi ambale hi ndlela ya vudlakuta kumbe vanhu va vulavula ku biha ha mina hikwalaho ka ndlela leyi ndzi nga ambala ha yona.”

Handle ka sweswo, ntiyiso wa mhaka hi lowu: Loko wa ha tshama ni vatswari va wena, hi vona va ku lawulaka. (Vakolosa 3:20) Hambiswiritano, endzhaku ka loko u twisise mavonelo ya vona naswona vona va twisise ya wena, u nga hlamarisiwa hi ndlela leyi mi nga talaka ku pfumelelana ha yona. Hikwalaho ka sweswo, mi nga ha hetelela mi nga ha holovi hi mhaka ya swiambalo!

Swiringanyeto Malunghana Ni Maambalelo: Loko u ri karhi u ringeta swiambalo, u nga anakanyisisi ntsena hileswi u swi vonaka exivonini. Swiambalo leswi xiximekaka swi nga ha va leswi nga xiximekiki loko u tshama ehansi kumbe u korhama u teka nchumu wo karhi. Loko swi koteka, yingisela leswi mutswari wa wena kumbe munghana la wupfeke a ku byelaka swona.

Swihloko swin’wana leswi nge “Vantshwa Va Vutisa” swi kumeka eka Web site leyi nge www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

Anakanya hi swiambalo leswi u lavaka ku swi xava. Kutani tivutise:

◼ Xana swiambalo leswi swi ta ndzi kombisa ndzi ri munhu wa njhani?

◼ Xana vanhu van’wana va nga titwa njhani hi swona?

◼ Xana ndzi lava leswaku va tsaka kumbe va khomiwa hi tingana loko va ndzi vona?

[Bokisi/Swifaniso leswi nga eka tluka 19]

Xipfuneti xa ndlela yo hlawula swiambalo

Swiletelo: Endla kopi ya tluka leri. Kombela vatswari va wena leswaku va tata kholomu leyi nga le xineneni loko wena u tata leyi nga le ximatsini. Loko mi hetile, nyika vatswari va wena phepha ra wena ivi vona va ku nyika ra vona kutani mi bula hi tinhlamulo ta n’wina. Xana ku kona laha mi nga tsala tinhlamulo leti hambaneke? Xana mi dyondze yini hi mavonelo ya n’wina, lawa eku sunguleni a mi nga ma tivi?

KHOLOMU YA WENA KHOLOMU YA VATSWARI VA WENA

․․․․․ Swiambalo swa mavito ․․․․․ Swiambalo swa mavito

․․․․․ Swi ku kokela mahlo ․․․․․ Swi ku kokela mahlo ya vanhu va rimbewu rin’wana eka vanhu va rimbewu ro hambana ni ra wena

․․․․․ Swi rhandziwa hi ․․․․․ Swi rhandziwa hi tintangha ta wena tintangha ta wena

․․․․․ Swa ku fanela ․․․․․ Swa ku fanela

․․․․․ Nxavo wa swona ․․․․․ Nxavo wa swona

․․․․․ Swin’wana ․․․․․ ․․․․․ Swin’wana ․․․․․

◼ Leswi vatswari va mina va ◼ Leswi hi nga ta swi vula nga ha swi vulaka ro sungula ro sungula hi swiambalo hi swiambalo leswi swakwe hi leswi

□ “A wu nge pfuki u swi □ “A wu nge pfuki u swi xavile swiambalo leswi!” xavile swiambalo leswi!”

□ “Kumbexana u nga □ “Kumbexana u nga swi xava.” swi xava.”

□ “Swi kahle, u nga □ “Swi kahle, u nga swi xava.” swi xava.”

◼ Xivangelo-nkulu lexi nga ◼ Xivangelo-nkulu lexi endlaka ha endlaka leswaku va nga hi nga swi tsakeli swi tsakeli hileswaku swiambalo swakwe hileswaku

□ “Swi pfuxa nyanyuko □ “Swi pfuxa nyanyuko wa rimbewu.” wa rimbewu.”

□ “A swi languteki.” □ “A swi languteki.”

□ “Swi le fexenini.” □ “Swi le fexenini.”

□ “Swi hi khomisa tingana □ “Swi hi khomisa hina tingana.” hina vatswari va wena.”

□ “Swi durha ngopfu.” □ “Swi durha ngopfu.”

□ Swin’wana ․․․․․ □ Swin’wana ․․․․․

XANA HI NGA TIRHISANA EMHAKENI LEYI?

◼ Xana langutelo ra ◼ Xana hina vatswari hi vatswari va mina ri nga ala swiambalo leswi hileswi ndzi pfuna njhani? hi nga swi rhandziki?

․․․․․ □ Ina □ Kumbexana □ Doo!

◼Xana swi kona leswi ◼ Xana swi kona leswi nga nga endliwaka leswaku endliwaka leswaku swiambalo sweswo swi swiambalo sweswo swi languteka? languteka?

․․․․․ ․․․․․

XIBOHO

․․․․․

[Bokisi/Swifaniso leswi nga eka tluka 20]

LESWI TINTANGHA TA WENA TI SWI VULAKA

“I swinene ku ambala swiambalo leswi nga efexenini ntsena loko swi nga lwisani ni milawu ya Bibele. Swi tele swilo swo saseka leswi u nga swi xavaka leswi nga solekiki.”—Derrick.

“Loko ndza ha ri muntshwa, a ndzi lava ku tiendlela swilo. A ndzi nga swi rhandzi ku byeriwa leswi ndzi faneleke ndzi swi ambala. Kambe hi ku famba ka nkarhi, ndzi xiye leswaku vanhu a va nga ndzi xiximi kukondza ndzi sungula ku yingisela leswi vatswari va mina ni vanhu van’wana lavakulu a va ndzi byela swona.”—Megan.

“Loko ndzi vona vanhwanyana van’wana va ambale swiambalo leswi nga xiximekiki, ndzi namba ndzi nga ha va xiximi. Hi hala tlhelo, loko ndzi vona vanhu va ambale swiambalo leswi xiximekaka swi tlhela swi saseka, ndzi namba ndzi tibyela ndzi ku, ‘Leyi hi yona ndlela leyi ndzi lavaka leswaku vanhu va ndzi languta ha yona.’”—Nataleine.

[Bokisi/Xifaniso lexi nga eka tluka 21]

XANA KU VURIWA YINI HI VAFANA?

Milawu ya Bibele leyi ku buriweke ha yona exihlokweni lexi ya tirha ni le ka vafana. Ambala hi ndlela yo xiximeka. Endla leswaku munhu wa le xihundleni a vonaka. Loko u lava ku xava swiambalo, tivutise: ‘Xana swi ta ndzi kombisa ndzi ri munhu wa njhani? Xana swi ta kombisa leswi ndzi nga xiswona hakunene?’ Tsundzuka leswaku swiambalo swi kombisa leswaku u munhu wa njhani. Tiyiseka leswaku swiambalo swa wena swi kombisa tidyondzo leti u ti pfumelaka!

[Bokisi leri nga eka tluka 21]

EKA VATSWARI

Anakanyisisani hi marito lama nga eku sunguleni ka xihloko lexi naswona swi tekeni onge Heather i n’wana wa n’wina wa nhwanyana. Hakunene ma swi xiya leswaku xiketi lexi a xi ambaleke xa vonikela swinene. Mi nga namba mi ku, “Tlhelela ekamareni ra wena u ya cinca, handle ka swona, a wu yi helo!” Sweswo swi nga ha endla leswaku a ya cinca. Phela, a xi kona lexi n’wana wa n’wina a nga xi endlaka handle ko mi yingisa. Kambe, xana mi nga n’wi dyondzisa njhani leswaku a cinca mianakanyo yakwe ku nga ri swiambalo swakwe ntsena?

◼ Xo sungula, pfunani n’wana wa n’wina leswaku a khathala swinene hi vuyelo lebyi nga vangiwaka hi ku ambala swiambalo leswi nga xiximekiki. Tsundzukani leswaku n’wana wa n’wina la nga emalembeni ya kondlo-a-ndzi-dyi a nga swi lavi ku tekiwa a ri xiphukuphuku kumbe ku tikokela mahlo swi nga fanelanga. N’wi lehiseleni mbilu mi n’wi komba leswaku a hi swinene ku ambala swiambalo leswi nga xiximekiki.b Burisanani na yena hi tindlela tin’wana leti a nga ambalaka ha tona.

◼ Xa vumbirhi, “ku anakanyela ka n’wina a ku tiviwe.” (Vafilipiya 4:5) Tivutiseni, ‘Xana swiambalo swakwe a hi swi rhandzi kumbe swi lwisana ni milawu ya Bibele?’ (2 Vakorinto 1:24) Loko ku ri leswaku a mi swi rhandzi, swi nga antswa leswaku mi n’wi pfumelela a swi ambala.

◼ Xa vunharhu, mi nga n’wi byeli ntsena leswaku swiambalo swakwe a swi amukeleki, kambe n’wi pfuneni leswaku a kuma swiambalo leswi amukelekaka. Sweswo swi ta va ni vuyelo lebyinene.

[Nhlamuselo ya le hansi]