Ha Yini Hi Ri Laha Misaveni?

HI KU ya hi Bibele, Xikwembu lexi vito ra xona ku nga Yehovha, xi ni vutlhari lebyikulu swinene. I Xihlovo xa matimba hinkwawo naswona i Mutumbuluxi wa vuako hinkwabyo. (Pisalema 83:18; 92:5) Ndzima yo sungula ya Bibele yi ri: “Eku sunguleni Xikwembu xi tumbuluxe matilo ni misava.” Endzhaku ka sweswo, Xikwembu xi vumbe munhu hi “xifaniso” xa xona—leswi vulaka leswaku u ni timfanelo to fana ni ta xona—naswona Xikwembu xi byele wanuna ni wansati leswaku va tswalana va andza va tata misava.—Genesa 1:1, 26, 28.

Xana leswi swi vula leswaku Xikwembu xi tumbuluxe vuako hinkwabyo ku katsa ni misava swin’we ni swiharhi ni swimilana swo tala leswaku swi ta tsakisa vanhu ntsena? Nakambe xana hi vumberiwe leswaku hi tiphina hi vutomi makume ma nga ri mangani ya malembe ntsena, hi dya, hi nwa ni ku tswala vana?

Hikwalaho Ka Yini Xikwembu Xi Hi Vumbile?

Yehovha Xikwembu u vumbe vanhu hikwalaho ka rirhandzu—a a lava leswaku vanhu va tiphina hi vutomi ni ku va ni ntsako. Swi le rivaleni leswaku Xikwembu xi tsakele ku tumbuluxa swilo swo hambana-hambana leswaku vanhu va ta tshama endhawini leyi rhendzeriweke hi swilo swo tala ni swo saseka. Xa nkoka swinene, vanhu a va ta va ni vuxaka lebyinene ni Muvumbi wa vona, va n’wi tiva va tlhela va vulavurisana na yena. A va vumberiwe ku hanya hilaha ku nga heriki ehansi ka swiyimo leswi hetisekeke ni leswi rhuleke.—Genesa 3:8, 9; Pisalema 37:11, 29.

Yehovha u tlhele a nyika vanhu ntirho lowu tsakisaka lowu a wu ta endla leswaku va va ni xikongomelo evuton’wini. Xikwembu xi byele vanhu vo sungula xi ku: “Tswalanani mi andza, mi tata misava, mi yi fuma, mi fuma tinhlampfi ta lwandle ni swivumbiwa leswi hahaka swa matilo ni swivumbiwa hinkwaswo leswi famba-fambaka ehenhla ka misava.” (Genesa 1:28) Mpatswa wo sungula ni vana va wona a va fanele va hundzula misava hinkwayo yi va paradeyisi yo tsakisa.

Swilo a swi fambanga hilaha Yehovha a a lave leswaku swi famba hakona.a Nilokoswiritano, xikongomelo xakwe xo sungula hi vanhu xi ta hetiseka.—Esaya 46:9-11; 55:11.

Hambiswiritano, ku navela loku munhu a nga na kona ko lava ku tiva Xikwembu ni ku va ni vuxaka lebyinene na xona ku vonaka hileswi a lavaka ku tiva leswaku xikongomelo xa vutomi i yini. Munhu u vumbiwe a ri xivumbiwa lexi tlhariheke, lexi navelaka ku kambisisa ni ku twisisa swilo, naswona Bibele yi vula leswaku munhu u ta hambeta a kuma vutivi lebyi tsakisaka bya Xikwembu ni bya ntumbuluko wa xona hilaha ku nga heriki.

Mutsari wa buku yin’wana ya Bibele u hlamusele xikongomelo xa munhu hi ndlela leyi: “Ndzi wu vonile ntirho lowu Xikwembu xi wu nyikeke vana va vanhu leswaku va wu endla. Swilo hinkwaswo xi swi endle swi saseka hi nkarhi wa swona. Ni nkarhi lowu nga riki na makumu xi wu veke embilwini ya vona, leswaku vanhu va nga pfuki va wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya eku heteleleni. Ndza swi tiva leswaku a ku na nchumu lexi antswaka eka vona ematshan’weni yo tsaka ni ku endla leswinene evuton’wini bya munhu; nileswaku munhu un’wana ni un’wana u fanele a dya, kunene a nwa, a kuma leswinene entirhweni wakwe hinkwawo wa matimba. I nyiko leyi humaka eka Xikwembu.” (Eklesiasta 3:10-13) Kutani vanhu va nge heti ku dyondza hi Xikwembu ni hi ntumbuluko wa xona.

Dyondza Hi Xikwembu

U nga tiva Yehovha hi ku kambisisa swilo leswi a swi tumbuluxeke. Mutsari wa buku yin’wana ya Bibele u vule leswaku “timfanelo ta [Xikwembu] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona.” (Varhoma 1:20) Hakunene rirhandzu, vutlhari ni matimba ya Yehovha swi vonaka eka ntumbuluko wakwe.

Xihlovo xin’wana xa nkoka lexi hi nga kumaka rungula leri engetelekeke malunghana ni Xikwembu i Bibele. Buku yoleyo leyi huhuteriweke yi hi byela swo tala hi Yehovha—mavonelo, timfanelo ni xikongomelo xakwe—ku tlula leswi hi nga swi dyondzaka loko hi kambisisa swilo leswi a swi tumbuluxeke.

Loko Bibele yi vulavula hi xikongomelo xa Xikwembu yi ri: “Loko ku ri matilo, i matilo ya Yehovha, kambe misava u yi nyike vana va vanhu.” (Pisalema 115:16) Swi le rivaleni leswaku ndhawu leyinene ntsena leyi vanhu va faneleke va tshama eka yona eka vuako lebyi hinkwabyo hi le misaveni, leyi Yehovha a yi tumbuluxeleke xikongomelo xexo.

Kutani, xana ku vuriwa yini hi vuako hinkwabyo lebyikulu? Xana tinyeleti hinkwato leti hi rhendzeleke ti tumbuluxeriwe ku endla leswaku dyambu ni tipulanete swi tshama endhawini leyinene leswaku ku va ni swilo leswi hanyaka laha misaveni? Xana swilo leswi nga exibakabakeni swi tumbuluxeriwe ku sasekisa matilo nivusiku? Hi fanele hi pfumela leswaku ku ni swilo swo tala leswi hi nga swi tiviki. Kambe sweswo i mhaka leyinene! Ha yini?

Ku hanya hilaha ku nga heriki a swi nge endli leswaku vanhu va kota ku twisisa swilo hinkwaswo leswi Xikwembu xi nga swi endla ni leswi xi nga ta swi endla. Xi lava leswaku hi hanya vutomi lebyi nga heriki naswona hi tshama hi tsakile. Ku hanya hilaha ku nga heriki emisaveni hi ntsako swi ta endla leswaku vanhu lava yingisaka va va ni nkarhi lowunene wo dyondza swilo swo tala swinene malunghana ni vuako hinkwabyo.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

Munhu u vumbiwe a ri xivumbiwa lexi tlhariheke, lexi navelaka ku kambisisa ni ku twisisa swilo

[Swifaniso leswi nga eka tluka 10]

Bibele yi kombisa leswaku misava yi tumbuluxeriwe leswaku vanhu va tiphina eka yona