Ndlela Leyi Swi Nga Swa Nkoka Ha Yona Ku Komba Van’wana Rirhandzu
PROFESA un’wana la tshungulaka vana lava nga ni vuvabyi bya miehleketo, u byele manana un’wana la nga tivula hi mahahla a ku: “Tshama u ri karhi u va vukarha.” Manana loyi a a kombele profesa leswaku a n’wi nyika switsundzuxo swo kurisaka vana vakwe. Profesa u tlhele a ku: “Vana va nga kombisiwa rirhandzu hi tindlela to hambana-hambana, to fana ni ku va vukarha, ku va ntswontswa, ku va byela leswaku wa va rhandza, ku va twisisa, ku va tsakela, ku va nyika swilo, ku va rivalela ni ku va tshinya loko swi fanerile. A hi fanelanga hi gimeta hileswaku vana va hina va swi tiva leswaku ha va rhandza.”
Swi tikomba onge Tiffany Field, mukongomisi wa Vandla ra Vulavisisi bya ku Khumba Vana eYunivhesiti ya Miami, exifundzheni xa Florida, le U.S.A., u pfumelelana ni marito lama vuriweke laha henhla. U te: “Ku khumba vana hi ndlela leyi kombisaka nkhathalelo i swa nkoka swinene leswaku va kula kahle ku fana ni ku dya swakudya leswi nga ni rihanyo ni ku endla vutiolori.”
Xana vanhu lavakulu va swi lava ku kombiwa rirhandzu hi tindlela teto? Ina. Claude Steiner, mutivi wa ta vutshunguri bya mianakanyo, u gimete ndzavisiso wakwe hi ku vula leswaku ku khutaziwa hi marito kumbe hi swiendlo i swa nkoka leswaku hi tshama hi tsakile ku nga khathariseki leswaku hi ni malembe mangani. Laura, muongori la khathalelaka ntlawa lowukulu wa vadyuhari, u ri: “Ndzi xiye leswaku ku komba vadyuhari rirhandzu swa pfuna swinene. Loko u va kombisa musa naswona u va khumba hi ndlela leyi kombisaka nkhathalelo, u endla leswaku va ku tshemba naswona va endla hinkwaswo leswi u va byelaka swona hi mbilu hinkwayo. Ku tlula kwalaho, ku va komba rirhandzu ro tano swi kombisa leswaku u xixima xindzhuti xa vona.”
Ku engetela kwalaho, munhu la kombaka van’wana rirhandzu wa tsaka swin’we ni lava a va kombaka rirhandzu. Hilaha Yesu Kreste a tshameke a vula hakona, “ku nyika swi tisa ntsako lowukulu ku tlula ku amukela.” (Mintirho 20:35) Swi tsakisa ngopfu loko rirhandzu ri kombiwa vanhu lava karhatekeke, lava tshikilelekeke kumbe lava titekaka va ri swikangalafula. Swiendlakalo swo tala eBibeleni swi hlamusela ndlela leyi vanhu vo tano va pfuniweke ha yona.
Ehleketa ndlela leyi ‘wanuna loyi a a tele nhlokonho,’ loyi a a hlongoriwe emutini lowu a a tshama eka wona, a faneleke a chaveleleke ha yona loko Yesu Kreste hi byakwe a n’wi khumba hi ndlela ya rirhandzu!—Luka 5:12, 13; Matewu 8:1-3.
Ehleketa ndlela leyi Daniyele, wanuna la dyuhaleke la nga muprofeta, a faneleke a ve ni matimba swinene ha yona loko ntsumi ya Xikwembu yi n’wi tiyisile hi xikhutazo lexi chavelelaka ni ku n’wi khumba kanharhu. Ku khumbiwa koloko hi ndlela ya rirhandzu ni marito lama khutazaka hi swona leswi Daniyele a a swi lava leswaku a hlakarhela tanihi leswi a a karhele swinene emirini ni le mianakanyweni.—Daniyele 10:9-11, 15, 16, 18, 19.
Siku rin’wana, vanghana lava rhandzekaka va muapostola Pawulo va fambe tikhilomitara ta kwalomu ka 50 va suka aEfesa va ya eMileta leswaku va ya hlangana na yena. Loko a ri na vona kwalaho, u va byele leswaku a nge he tlheli a va vona. Hakunene u fanele a khutazeke ngopfu loko vanghana vakwe vo tshembeka ‘va n’wi vukarhile kutani va n’wi ntswontswa’!—Mintirho 20:36, 37, Bibele—Mahungu Lamanene.
Xisweswo, Bibele ni vulavisisi lebyi endliweke manguva lawa swi hi khutaza leswaku hi rhandzana. Loko hi endla tano hi ta va ni rihanyo lerinene naswona hi ta tshama hi tsakile. Kutani swi le rivaleni leswaku a hi vana ntsena lava faneleke va kombiwa rirhandzu swi huma embilwini.