Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g 1/10 matl. 10-11
  • I Yini Siku Ra Vuavanyisi?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • I Yini Siku Ra Vuavanyisi?
  • Xalamuka!—2010
  • Swihloko
  • Tinhlokomhaka Tin'wana Leti Yelana Na Yona
  • Siku Ra Vuavanyisi—Ha Yini Ri Laveka?
  • Yesu U Avanyisa “Lava Hanyaka”
  • Ku Avanyisiwa Ka “Lava Feke”
  • A Wu Fanelanga U Ri Chava
  • Xana I Yini Siku Ra Vuavanyisi?
    Xana Bibele Yi Dyondzisa Yini Hakunene?
  • Siku Ra Ku Avanyisa—Nkarhi Wa Ntshembo!
    Xihondzo xo Rindza Xi Huwelela Mfumo Wa Yehovha—1991
  • Ku Ta Humelela Yini Hi Siku Ra Vuavanyisi?
    Xihondzo xo Rindza Xi Huwelela Mfumo Wa Yehovha—2012
  • Tinhlamulo Ta Swivutiso Swa Bibele
    Xihondzo xo Rindza Xi Huwelela Mfumo Wa Yehovha—2015
Xalamuka!—2010
g 1/10 matl. 10-11

Langutelo Ra Bibele

I Yini Siku Ra Vuavanyisi?

Bibele yi vula leswaku Xikwembu “xi veke siku leri xi nga ni xikongomelo xo avanyisa misava.” (Mintirho 17:31) Vanhu vo tala a swi va khomi kahle ku tiva leswaku va ta avanyisiwa hi ndlela yo karhi. Xana na wena u titwa hi ndlela yoleyo?

LOKO swi ri tano, swi ta ku chavelela ku tiva leswaku Siku ra Vuavanyisi i lunghiselelo ra rirhandzu leri nga ta tisela vanhu mikateko leyikulu—ku katsa ni lava feke. (Matewu 20:28; Yohane 3:16) Ha yini Siku ra Vuavanyisi ri laveka? Xana ku ta humelela yini hi “siku” rero?

Siku Ra Vuavanyisi—Ha Yini Ri Laveka?

Loko Xikwembu xi veke vanhu emisaveni, a xi nga va vekanga kwalaho hi xikongomelo xa ku va va ringiwa leswaku va ta ya tshama exivandleni xin’wana enkarhini lowu taka. Xi va vumbele leswaku va hanya hilaha ku nga heriki eka yona. Hambileswi mpatswa wo sungula a wu hetisekile emirini ni le mianakanyweni, wu xandzukele Xikwembu. Hikwalaho ka sweswo, wu lahlekeriwe hi ntshembo wo hanya hilaha ku nga heriki naswona wu endle leswaku vatukulu va wona va va ni xidyoho ni ku va vangela rifu.—Genesa 2:15-17; Varhoma 5:12.

Siku ra Vuavanyisi ku ta va nkarhi wa gidi ra malembe laha vanhu va nga ta va ni lunghelo ro tlhela va kuma leswi lahliweke hi Adamu na Evha.a Xiya leswaku Mintirho 17:31, leyi tshahiweke laha henhla yi vula leswaku Siku ra Vuavanyisi ri ta khumba lava tshamaka ‘emisaveni leyi akiweke.’ Vanhu lava endleke leswo lulama va ta hanya laha misaveni hilaha ku nga heriki ehansi ka swiyimo leswi hetisekeke. (Nhlavutelo 21:3, 4) Xisweswo, Siku ra Vuavanyisi ri ta endla leswaku xikongomelo xa Xikwembu xo sungula hi vanhu ni misava xi hetiseka.

Xikwembu xi hlawule Kreste Yesu leswaku a va Muavanyisi. Bibele yi vula leswaku Yesu u ta “avanyisa lava hanyaka ni lava feke.” (2 Timotiya 4:1) I vamani “lava hanyaka” lava nga ta avanyisiwa? Swi ta endlekisa ku yini leswaku lava feke va tlhela va hanya ‘emisaveni leyi akiweke’?

Yesu U Avanyisa “Lava Hanyaka”

Sweswi hi le kusuhi swinene ni ku herisiwa ka mafambiselo lawa ya swilo lawa ku profetiweke ha wona, laha Xikwembu xi nga ta herisa mavandla hinkwawo yo homboloka ya vanhu ni vubihi. Lava nga ta pona loko ku herisiwa mafambiselo lawa i vanhu “lava hanyaka,” lava nga ta avanyisiwa.—Nhlavutelo 7:9-14; 19:11-16.

Hi nkarhi wolowo wa vuavanyisi, lowu nga ta teka malembe ya 1 000, Kreste Yesu swin’we ni vavanuna ni vavasati va 144 000 lava pfuxeriweke ku ya hanya etilweni va ta fuma misava. Va ta va tihosi ni vaprista, va endla leswaku vanhu vo tshembeka va kuma vuyelo bya gandzelo ra nkutsulo ra Yesu ni ku vuyetela mimiri ni mianakanyo ya vona exiyin’weni lexi hetisekeke.—Nhlavutelo 5:10; 14:1-4; 20:4-6.

Hi Siku ra Vuavanyisi, Sathana ni madimona yakwe va ta siveriwa leswaku va nga ha kuceteli vanhu. (Nhlavutelo 20:1-3) Hambiswiritano, loko Siku ra Vuavanyisi ri hela, Sathana u ta pfumeleriwa ku ringa munhu un’wana ni un’wana la hanyaka ku vona loko a tshembekile eka Xikwembu. Lava tshamaka va tshembekile eka Xikwembu va ta va va hlule ndzingo lowu Adamu na Evha va tsandzekeke ku wu hlula. Xisweswo, va ta fanelekela ku kuma vutomi lebyi nga heriki emisaveni leyintshwa ya Paradeyisi. Lava hlawulaka ku xandzukela Xikwembu va ta loviseriwa makumu, ku fana na Sathana ni madimona yakwe.—Nhlavutelo 20:7-9.

Ku Avanyisiwa Ka “Lava Feke”

Bibele yi vula leswaku hi Siku ra Vuavanyisi vafi “va ta [pfuka va] yima.” (Matewu 12:41) Yesu u vule leswaku “nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma, lava endleke swilo leswinene va pfukela evuton’wini, lava a va hanya hi swilo swo biha va pfukela eku avanyisiweni.” (Yohane 5:28, 29) Laha a ku vulavuriwi hi mimoya ya lava feke leyi hambanisiweke ni mimiri ya yona. Vafi a va tivi nchumu nikatsongo naswona a va na moya lowu salaka wu hanya loko va file. (Eklesiasta 9:5; Yohane 11:11-14, 23, 24) Yesu u ta pfuxa lava etleleke eku feni leswaku va tlhela va hanya emisaveni.

Xana lava pfuxiweke va ta avanyisiwa hikwalaho ka swilo leswi va swi endleke va nga si fa? Doo! Bibele yi dyondzisa leswaku “loyi a feke, xidyoho xa yena xi hlanguriwile.” (Varhoma 6:7) Xisweswo, ku fana ni vanhu lava nga ta pona loko mafambiselo lawa ma lovisiwa, lava pfuxeriweke evuton’wini laha misaveni va ta avanyisiwa “hi ku ya hi swiendlo swa vona” leswi va swi endleke hi Siku ra Vuavanyisi. (Nhlavutelo 20:12, 13) Swiendlo swa vona leswi va nga ta swi endla hi nkarhi wolowo hi swona leswi nga ta vula loko ku pfuxiwa ka vona eku feni ku ta hetelela ku endla leswaku va kuma vutomi lebyi nga heriki kumbe va pfuxeriwa eku lovisiweni. Vo tala va lava nga ta pfuxeriwa evuton’wini ku ta va ro sungula va dyondza hi Yehovha Xikwembu ni hi milawu ya xona leyi va faneleke va yi hlayisa leswaku va kuma vutomi. Va ta va ni lunghelo ro hanya hi ku pfumelelana ni ku rhandza ka Xikwembu naswona va kuma vutomi lebyi nga heriki laha misaveni.

A Wu Fanelanga U Ri Chava

Siku ra Vuavanyisi a ku nge vi nkarhi wa ku leteriwa hi Xikwembu ntsena, kambe ku ta tlhela ku va nkarhi wa leswaku lava hanyaka va tirhisa leswi va swi dyondzeke kutani va tiphina hi mikateko leyi tisiwaka hi ku endla tano. Vona hi mahlo ya mianakanyo ndlela leyi u nga ta tsaka ha yona loko u tlhela u hlangana ni varhandziwa va wena lava pfuxiweke eku feni naswona hinkwenu mi hambeta mi fikelela xiyimo lexi hetisekeke!

Vona hi mahlo ya mianakanyo ndlela leyi u nga ta tsaka ha yona loko u tlhela u hlangana ni varhandziwa va wena lava pfuxiweke eku feni

Eku heleni ka Siku ra Vuavanyisi, Xikwembu xi ta pfumelela Sathana leswaku a ringa vanhu ku vona loko va tshembekile eka xona. Kambe ku hava nchumu lowu faneleke wu ku vilerisa kumbe wu ku chavisa. Eku heleni ka Siku ra Vuavanyisi, hinkwavo lava hanyaka va ta va va hlomiseriwe ku langutana ni ndzingo lowu wo hetelela. Kutani Siku ra Vuavanyisi ku ta va ndlela yo hetisisa xikongomelo xa Xikwembu xa ku herisa vuyelo hinkwabyo bya xiendlo xo sungula xa ku xandzukela Xikwembu entangeni wa Edeni.

a EBibeleni rito leri nge “siku” ri nga kombetela eka nkarhi lowu ku leha ka wona ku nga faniki. Hi xikombiso, vona Genesa 2:4.

XANA U TSHAME U TIVUTISA?

  • I yini Siku ra Vuavanyisi?—Mintirho 17:31.

  • I vamani lava nga ta avanyisiwa?—2 Timotiya 4:1.

  • Xana Siku ra Vuavanyisi ri ta teka nkarhi wo tanihi kwihi?—Nhlavutelo 20:4-6.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela