“Tshikani Ku Vilela”

“Mali hinkwayo leyi a yi ri eka akhawunti ya hina ya le bangi yi herile ku katsa ni leyi a hi yi vekele vana va hina. Hi hete tin’hweti to tala hi nga ri na mali.”

● A ndzi fambisa xikolo endhawini ya le makaya eIndiya, naswona swilo a swi famba kahle. Hi nkarhi wun’wana, ku kale ku tsarisa vana va kwalomu ka 500. Hiloko xikolo xin’wana lexi dumeke xa le dorobeni xi sungula ku rhumela tibazi endhawini ya ka hina naswona xi endle leswaku swi nga tiki ku tsarisa vana eka xona. Xisweswo, swichudeni swo tala leswi a swi nghena exikolweni xa mina swi ye swi ya nghena eka xikolo lexi xa le dorobeni. Entiyisweni, nhlayo ya swichudeni exikolweni xa mina yi hungutekile yi suka kwalomu ka 500 yi ya kwalomu ka 60. Loko ndza ha ku sweswo i switsongo, mutirhela-mfumo un’wana la rhangelaka swikolo u tshove ntwanano wa swa timali lowu a hi wu sayinile naswona ni sweswi wa ha ndzi kolota. Swilo se a swi yime hi nhloko hikuva a ndzi ri ni vatirhi vo tala exikolweni lava a ndzi fanele ndzi va holela.

Hi vulavule hi mhaka leyi tanihi ndyangu. Hinkwerhu a hi tiyimisele ku titsona swilo swin’wana tanihi leswi a hi tikarhatela ku yingisa xitsundzuxo xa Yesu xa leswaku hi va ni ‘tihlo ro olova’ etimhakeni ta timali—leswi hi marito man’wana swi vulaka ku nga lavi swilo swo tala leswi hi nga ta tsandzeka ku swi hakelela. (Matewu 6:22, 25) Ku ringana nkarhi wo karhi hi boheke ku nga ha wu tirhisi movha wa hina hileswi petirolo ni ku wu lunghisisa a swi durha swinene. Leswaku hi nga ha tirhisi mali yo tala ku xava swakudya, hi sungule ku swi xava loko se ri perile, laha nxavo wa swakudya leswi saleke wu chipeke. Hi tlhele hi hunguta nhlayo ya swilo leswi a hi swi dya siku ni siku.

Leswi hi nga Timbhoni ta Yehovha hi xiya leswaku i swa nkoka leswaku hi hlangana ni vapfumeri-kulobye eminhlanganweni ya Vukreste. (Vaheveru 10:25) Kutani hambileswi a hi hanya hi rikoko ra xilondza, hi tibyele leswaku a hi fanelanga hi xwa eminhlanganweni ni le tinhlengeletanweni hambiloko swi koxa leswaku hi ya etindhawini ta le kule. Ntirho wa hina wo dyondzisa vanhu Bibele wu katsa ku ya etindhawini ta le kule. A hi tirhisa xithuthuthu ku ya etindhawini teto ematshan’weni yo tirhisa movha. Xithuthuthu a xi swi koti ku khandziyisa vanhu lava tlulaka vambirhi hi nkarhi wun’we.

Hambiswiritano, sweswo a swi hi sivelanga ku hlanganyela hi xitalo entirhweni wolowo. Ematshan’weni ya sweswo, nsati wa mina ni n’wana wa hina wa nhwanyana va hete tiawara to tala va vulavula ni van’wana hi Bibele. Minkarhi yin’wana a va famba tikhilomitara ta tsevu ku ya eka ta nhungu leswaku va ya fambisela vanhu lava tsakelaka dyondzo ya Bibele emakaya ya vona. Mina ni n’wana wa mina wa jaha na hina hi endle matshalatshala lamakulu hi hete tiawara to tala hi dyondzisa van’wana hi Bibele.

Swilo se swa antswanyana hi tlhelo ra timali. Kambe leswi swi hi humeleleke tanihi ndyangu swi hi dyondzisile leswaku a hi fanelanga hi veka ntshembo wa hina eka rifuwo. Hi tlhele hi dyondza leswaku a hi fanelanga hi vilela ku tlula mpimo hi swilo leswi nga ehenhla ka matimba ya hina. Tsalwa ra Pisalema 55:22 ri hi khutaze ngopfu. Ri ri: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” Hi tivonele hi ya hina ku hetiseka ka marito wolawo hi nkarhi lowu a hi koka exilogweni hi tlhelo ra timali!—Xi lo nyikeriwa.