Xalamuka! Yi Ponise N’wana La Nga Siki Velekiwa

● Wansati un’wana wa le Mexico la vuriwaka Anita a a ri ni vana vanharhu naswona a a tikile.a U byele nuna wakwe leswaku a a nga lavi n’wana un’wana nileswaku a a ta endla xin’wana ni xin’wana leswaku a nga vi na yena. U kale a vula leswaku u ta tidlaya! Hi nkarhi wolowo, Anita a a dyondza Bibele ni Mbhoni yin’wana ya Yehovha kambe a wu nga nyawuli nhluvuko lowu a a wu endla. U te: “A ndzi titlakusa.”

Mbhoni leyi a yi dyondza na Anita yi n’wi hlamusele milawu ya Bibele leyi vulavulaka hi ku dlaya n’wana la ha riki embelekweni. Hi xikombiso, yi kombe Anita leswaku vutomi bya n’wana la nga si velekiwaka bya kwetsima eka Xikwembu. Le Israyele wa khale loko munhu a vavise wansati la tikeke kutani yena kumbe n’wana wakwe la nga si velekiwaka o fa, Nawu wa Xikwembu a wu lerise leswaku munhu yoloye a dlayiwa. (Eksoda 21:22, 23)b Kambe Anita a a nga rhiyanga ndleve. Se a a endle xiboho xo susa khwiri.

Anita u te: “Munhu un’wana u ndzi byele leswaku loko ndzo titlhava hi neleta ya xidzidziharisi xo karhi, ndzi nga susa khwiri hi nkarhi wolowo. Kutani ndzi xave xidzidziharisi xexo ivi ndzi kombela munghana wa mina leswaku a ndzi tlhava. U endle tano kambe a ku humelelanga nchumu. Endzhaku ka nkarhi ndzi kume leswaku munghana wa mina a a nga lavi ku hlanganyela eswidyohweni swa mina, kutani u cince xidzidziharisi xexo hi vukungundzwana kutani a ndzi tlhava hi neleta leyi nga ni mati lama baseke.”

Nilokoswiritano, Anita u hambete a lava tindlela to susa khwiri. Loko se a ri ni tin’hweti tinharhu a tikile, u kume dokodela la pfumeleke ku n’wi susa khwiri. Loko ka ha sele masiku ya tsevu leswaku Anita a ya eka dokodela yoloye, Mbhoni liya yi n’wi nyike kopi ya xihloko lexi nge “Diary of an Unborn Child,” lexi nga enkandziyisweni wa Xalamuka! ya May 22, 1980, (ya Xinghezi). Xihloko xexo xi gimete hi marito lama nge: “Manana u ndzi dlaye namuntlha.” Marito wolowo ma n’wi tseme nhlana naswona u rile tiawara to hlayanyana. U te: “Xihloko xexo xi ndzi pfule mahlo eku heteleleni.”

Anita u veleke xinhwanyetana lexi hanyeke kahle. U ri: “Namuntlha ndzi kume lunghelo ro tiva Yehovha, loyi ndzi n’wi rhandzaka hi mbilu ya mina hinkwayo.” Nakambe u dyondzisa n’wana wakwe Rito ra Xikwembu leswaku na yena a ta n’wi rhandza swinene Yehovha. Hakunene, n’wana wakwe wa nhwanyana u vule leswaku vutomi byakwe u byi kolota Xikwembu, hikuva xo sungula, hi xona Munyiki wa vutomi naswona xa vumbirhi, tidyondzo leti nga eRitweni ra xona, hilaha ku vulavuriwaka ha tona eka Xalamuka!, hi tona leti n’wi poniseke.

[Tinhlamuselo ta le hansi]