Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g 3/10 matl. 18-21
  • Xana Swi Hoxile Loko U Lava Ku Va Wexe?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Xana Swi Hoxile Loko U Lava Ku Va Wexe?
  • Xalamuka!—2010
  • Swihloko
  • Tinhlokomhaka Tin'wana Leti Yelana Na Yona
  • Loko U Lava Ku Va Wexe
  • Loko U Tiendlela Vanghana
  • Ndlela Yo Tlhantlha Xiphiqo Xa Ku Lava Ku Va Wexe
  • Xana Swi Hoxile Loko U Lava Ku Va Wexe?
    Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1
  • Ha Yini Ku Ri Ni Milawu Yo Tala Ekaya?
    Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2
  • Ndzi Nga Wu Kuma Njhani Ntshunxeko Lowu Engetelekeke?
    Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1
  • Ndzi Fanele Ndzi Endla Yini Loko Vatswari Va Mina Va Holova?
    Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2
Vona Swo Tala
Xalamuka!—2010
g 3/10 matl. 18-21

Vantshwa Va Vutisa

Xana Swi Hoxile Loko U Lava Ku Va Wexe?

Tsala mfungho lowu ✔ etlhelo ka nhlamulo leyi u nga yi hlawulaka eka xiendlakalo ha xin’we xa leswi nga laha hansi.

1. U tigogele ekamareni ra wena, hiloko hi xitshuketa makwenu wa wena a nghena a nga gongondzanga.

◯ ‘A swi hoxanga . . . Na mina ndza nghena ndzi nga gongondzanga ekamareni ra makwerhu.’

◯ ‘A wu xiximi! Xana a wu ta ku yini loko a wu lo ndzi kuma ndza ha ri eku ambaleni?’

2. U vulavula ni munghana wa wena hi riqingho naswona mana wa wena u le kusuhi na wena, kutani a swi kanakanisi leswaku u le ku yingiseleni ka leswi u swi vulaka.

◯ ‘A swi hoxanga . . . A ku na nchumu lowu ndzi wu fihlaka.’

◯ ‘A ndzi swi rhandzi! Ndzi titwa onge ndzi lo vekiwa tihlo!’

3. Wa ha ku vuya ekaya, kutani vatswari va wena va sungula ku ku vutisela swivutiso. “U huma kwihi? A wu ya endla yini? A wu fambe na mani?”

◯ ‘A swi hoxanga . . . Ndzi tala ku va byela xin’wana ni xin’wana.’

◯ ‘Swa ndzi hlundzukisa! Vatswari va mina a va ndzi tshembi nikatsongo!’

A SWI kanakanisi leswaku loko wa ha ri ntsongo a wu nga swi teki swi ri swa nkoka ku va u tipfalela ekamareni ra wena. Loko tindzisana ta wena ti nghena ekamareni ra wena hi xitshuketa a wu nga ri na xiphiqo. Loko vatswari va wena va ku vutisa xivutiso, a wu va hlamula handle ko tiluma-luma. Hi nkarhi wolowo, un’wana ni un’wana a a swi tiva leswaku ku humelela yini evuton’wini bya wena. Sweswi ku nga ha va ni minkarhi leyi u navelaka onge u nga va fihlela swin’wana. Coreya la nga ni malembe ya 14 u ri: “Ndzi rhandza ku va ndzi nga va byeli swilo swin’wana.”

Ha yini wo na swi pfuketana u lava ku titshamela wexe ekamareni ra wena? Xivangelo xin’wana hileswi u kulaka. Hi xikombiso, ku cinca ka miri wa wena loko u ri emalembeni ya vuntshwa swi nga ku endla leswaku u karhateka swinene hi ndlela leyi u langutekaka ha yona hambi loko u tshama ni ndyangu wa ka n’wina. Nakambe loko u ri karhi u kula, u sungula ku titwa u lava ku anakanyisisa hi timhaka tin’wana u ri wexe ku tlula rini na rini. Leswi i xikombiso xa leswaku u hlakulela “vuswikoti byo ehleketa,” ku nga mfanelo leyi Bibele yi khutazaka muntshwa leswaku a va na yona. (Swivuriso 1:1, 4; Deteronoma 32:29) Hambi ku ri Yesu u ye “enhoveni leswaku a va swakwe” leswaku a ta anakanyisisa.—Matewu 14:13.

Phela wa ha ri ehansi ka vulawuri bya vatswari va wena naswona va ni mfanelo yo lava ku tiva leswi humeleleka evuton’wini bya wena. (Vaefesa 6:1) Kambe ku nga ha pfuka timholovo hileswi vona va lavaka ku tiva leswaku ku humelela yini evuton’wini bya wena kasi wena u lava ku titshamela wexe u anakanyisisa hi ku kula ka wena. Xana u nga langutana njhani ni xiphiqo xexo? A hi kambisiseni swiyimo swimbirhi laha ku nga pfukaka swiphiqo.

Loko U Lava Ku Va Wexe

Ku ni swivangelo swo hlayanyana leswi twalaka leswi nga endlaka leswaku u lava ku va wexe. Kumbexana u lava ku “wisanyana.” (Marka 6:31) Kumbe loko u lava ku khongela, u nga ha endla hilaha Yesu a khutazeke vadyondzisiwa vakwe a ku, “nghena ekamareni ra wena, loko u pfale nyangwa wa wena, khongela eka Tata wa wena la nge xihundleni.” (Matewu 6:6; Marka 1:35) Kambe xiphiqo hileswaku loko wo pfala nyangwa wa kamara ra wena (loko u ri na rona), vatswari va wena va nga ha ehleketa leswaku a wu le ku khongeleni! Naswona tindzisana ta wena swi nga ha endleka ti nga swi twisisi leswaku u lava ku va wexe.

Leswi u nga swi endlaka. Ematshan’weni yo holova ni van’wana hileswi u lavaka ku va wexe, endla leswi landzelaka.

● Loko swi ta emhakeni ya vamakwenu, ringeta ku va vekela milawu yo hlayanyana leyi twisisekaka leswaku u kota ku kuma nkarhi wo va wexe. Loko swi laveka, kombela vatswari va wena va ku pfuna emhakeni leyi.

● Loko swi ta emhakeni ya vatswari va wena, ringeta ku twisisa mavonelo ya vona. Rebekah la nga ni malembe ya 16 u ri: “Minkarhi yin’wana, vatswari va mina va tshama va ndzi veke tihlo. Kambe entiyisweni loko a ndzi ri mutswari, a ndzi ta n’wi veka tihlo n’wana wa mina la nga muntshwa, ngopfu-ngopfu loko ndzi tiva miringo hinkwayo leyi vantshwa va langutanaka na yona namuntlha!” Ku fana na Rebekah, xana u nga swi twisisa swivangelo leswikulu leswi endlaka leswaku vatswari va wena va karhateka?—Swivuriso 19:11.

● Tikambisise hi vukheta kutani u tivutisa: ‘Xana hi mina la endleke leswaku vatswari va mina va ehleketa leswaku loko ndzi tipfalele ekamareni ndzi va ndzi ri eku endleleni ka nchumu wo biha? Xana ndzi tshamela ku va fihlela swin’wana hi vutomi bya mina lerova va ehleketa leswaku va fanele va tirhisa tindlela ta vukungundzwana ku tiva leswaku ku humelela yini evuton’wini bya mina?’ Entiyisweni, loko u tshamela ku byela vatswari va wena xin’wana ni xin’wana hi vutomi bya wena, a va nge tshameli ku ku ehleketelela swo biha.b

Goza leri u nga ri tekaka. Laha hansi, tsala leswi u nga swi vulaka leswaku u burisana ni vatswari va wena hi mhaka leyi.

․․․․․

Loko U Tiendlela Vanghana

Swi tolovelekile leswaku loko wa ha ri muntshwa u tiendlela vanghana ni vanhu lava nga riki swirho swa ndyangu wa ka n’wina. Nakambe swi tolovelekile eka vatswari va wena ku tivutisa leswaku i vamani vanghana va wena nileswaku u endla yini loko u ri na vona. Eka vatswari va wena, ku tiva sweswo ko va wun’wana wa mintirho ya vona. Hambiswiritano, wena u nga ha ehleketa leswaku ku karhateka ka vatswari va wena ku vangiwa hileswi va nga ku tshembiki. Amy la nga ni malembe ya 16 u ri: “Ndzi lava ku foneriwa eka selfoni ya mina ni ku rhumela ti-e-mail handle ko va vatswari va mina va hlometela timinete tin’wana ni tin’wana ta khume ni ku ndzi vutisa leswaku i mani loyi ndzi vulavulaka na yena.”

Leswi u nga swi endlaka. Ematshan’weni yo endla leswaku vanghana va wena va ku lwisa ni vatswari va wena, ringeta switsundzuxo leswi landzelaka.

● Vula hi ku kongoma leswaku i vamani vanghana va wena naswona tiyiseka leswaku vatswari va wena va va tiva. Phela u nge swi rhandzi leswaku vatswari va wena va ku fokisa, kambe va ta endla tano loko va nga va tivi vanghana va wena. Tsundzuka leswaku vatswari va wena va swi tiva leswaku vanghana lava u va hlawulaka va nga va ni nkucetelo lowukulu eka wena. (1 Vakorinto 15:33) Loko vatswari va wena va ya va va tiva ngopfu vanhu lava u tihungasaka na vona, swi nga ha endleka va nga karhateki malunghana ni vanghana lava u tihlawulelaka vona.

● Hi ku titsongahata vulavula ni vatswari va wena hi mhaka leyi. U nga va hehli hileswaku va rhandza timhaka ta wena. Ematshan’weni ya sweswo, u nga ha vula swilo swo fana ni leswi, “Ndzi twa onge nchumu wun’wana ni wun’wana lowu ndzi wu byelaka munghana wa mina wa xopaxopiwa. Hikwalaho ka sweswo, swa ndzi tikela swinene hambi ku ri ku bula ni vanghana va mina hi timhaka leti nga nyawuriki.” Kumbexana vatswari va wena a va nge he ngheneleli etimhakeni ta wena ni vanghana va wena.—Swivuriso 16:23.

● Tikambisise hi vukheta kutani u tivutisa: Xana ndzi tipfalela ekamareni ra mina hileswi ndzi lavaka ku va ndzexe kumbe hileswi ndzi lavaka ku endla swilo swin’wana exihundleni? Brittany la nga ni malembe ya 22 u ri: “Loko ku ri leswaku u tshama ni vatswari va wena naswona va karhateka hileswi u tshamaka u tipfalele ekamareni, u fanele u tivutisa u ku, ‘Ha yini ndzi fanele ndzi va tumbetela leswi ndzi swi endlaka loko ku ri leswaku a swi bihanga?’ Hi hala tlhelo, loko u lava ku va tumbetela swona swi vula leswaku swi bihile.”

Goza leri u nga ri tekaka. Laha hansi, tsala leswi u nga swi vulaka leswaku u burisana ni vatswari va wena hi mhaka leyi.

․․․․․

Ndlela Yo Tlhantlha Xiphiqo Xa Ku Lava Ku Va Wexe

Sweswi u ta va ni nkarhi wo ehleketisisa hi tindlela tin’wana to lulamisa xiphiqo xo karhi lexi ku karhataka malunghana ni ku lava ku va wexe.

Goza ro sungula: Kumisisa xiphiqo.

Hi le ka xiyimo xihi laha u nga ha titwaka u lava ku va ni nkarhi lowu engetelekeke wo va wexe?

․․․․․

Goza ra vumbirhi: Kambisisa mavonelo ya vatswari va wena.

Hi yihi mhaka leyi u ehleketaka leswaku yi ta va karhata swinene?

․․․․․

Goza ra vunharhu: Kuma tindlela to tlhantlha xiphiqo.

(a) Ehleketa hi ndlela yin’we leyi u nga ha vaka u hoxe xandla eka xiphiqo lexi nga kona handle ko swi xiya, kutani u yi tsala laha hansi.

․․․․․

(b) Hi yihi mindzulamiso leyi u nga yi endlaka malunghana ni nhlamulo ya wena leyi u yi tsaleke laha henhla?

․․․․․

(c) Hi yi ndlela leyi u nga tsakelaka leswaku vatswari va wena va ti tlhuvutsa ha yona timhaka leti ku karhataka?

․․․․․

Goza ra vumune: Vulavula na vona.

Hi nkarhi lowu faneleke, vulavula ni vatswari va wena hi leswi u swi tsaleke laha henhla.

Swihloko swin’wana leswi nge “Vantshwa Va Vutisa” swi kumeka eka Website leyi nge, www.watchtower.org/ype

[Tinhlamuselo ta le hansi]

a Mavito man’wana ma cinciwile exihlokweni lexi.

b Loko vatswari va wena va hambeta va tikomba onge a va ku tshembi, hi xichavo ehlisa moya kutani u va byela ndlela leyi u titwaka ha yona. Yingiserisisa swivangelo leswi va endlaka va karhateka naswona tiyiseka leswaku ku hava nchumu lowu u wu endlaka lowu vangaka xiphiqo lexi.—Yakobo 1:19.

SWIVUTISO SWO ANAKANYISISA HA SWONA

● Ha yini vatswari va wena va ri ni mfanelo yo lava ku tiva xin’wana ni xin’wana lexi humelelaka evuton’wini bya wena?

● Matshalatshala ya wena yo hlakulela vutshila byo vulavurisana kahle ni vatswari va wena ma nga ku pfuna njhani leswaku u vulavurisana kahle ni vanhu van’wana lavakulu enkarhini lowu taka loko se u kurile?

[Bokisi/Swifaniso leswi nga eka tluka 19]

LESWI TINTANGHA TA WENA TI SWI VULAKA

“Loko vana va byela vatswari va vona xin’wana ni xin’wana, vatswari a va nge vi na swivangelo swo hlaya ti-email ta vona ni ti-SMS ku tiva leswaku ku humelela yini evuton’wini bya vona.”

“A ndzi nge hlundzuki loko vatswari va mina vo hlaya ti-email ta mina. Loko muthori a ri ni mfanelo yo hlaya ti-email ta vatirhi vakwe, ha yini vatswari va nga fanelanga va hlaya ti-email ta vana va vona?”

“Vatswari a va swi lavi leswaku u humeleriwa hi swilo swo biha, kutani minkarhi yin’wana va nga ha tikomba onge va lava ku nghenelela etimhakeni ta wena leti nga xihundla. Sweswo a swi lulamanga. Kambe entiyisweni a ndzi ta endla nchumu lowu fanaka loko a ndzi ri mutswari.”

[Swifaniso]

Eden

Kevin

Alana

[Bokisi leri nga eka tluka 21]

EKA VATSWARI

● N’wana wa wena wa jaha u tigogele ekamareni rakwe. Xana u fanele u nghena u nga gongondzanga?

● N’wana wa wena wa nhwanyana u siye selfoni yakwe tanihi leswi a a hatlisela ku ya exikolweni. Xana u fanele u hlaya ti-SMS takwe?

Swivutiso leswi a swi olovi ku swi hlamula. Hi hala tlhelo, u ni mfanelo yo tiva leswaku ku humelela yini evuton’wini bya n’wana wa wena ni vutihlamuleri byo n’wi sirhelela. Hi hala tlhelo, a wu fanelanga minkarhi hinkwayo u tshama u veke n’wana wa wena tihlo ni ku langutisa xin’wana ni xin’wana lexi a xi endlaka. Kutani, xana u nga swi endla njhani sweswo hi ku ringanisela?

Xo sungula, xiya leswaku loko n’wana wa wena a lava ku va yexe a swi vuli swona leswaku minkarhi hinkwayo u le ku endleni ka nchumu wo biha. Hakanyingi sweswo swa endleka loko a ri karhi a kula. Ku va vantshwa va va voxe swi va pfuna ku ringeta swilo loko va ri karhi va aka xinghana ni ku anakanyisisa hi swiphiqo swa vona va tirhisa ‘matimba ya vona ya ku anakanya.’ (Varhoma 12:1, 2) Nakambe swi va pfuna leswaku va hlakulela vuswikoti byo anakanya, ku nga mfanelo ya nkoka leyi va faneleke va va na yona leswaku swi va fambela kahle loko se va kurile va ri ni vutihlamuleri. (1 Vakorinto 13:11) Swi tlhela swi va nyika nkarhi wo anakanyisisa va nga si hlamula swivutiso swo tika.—Swivuriso 15:28.

Xa vumbirhi, xiya leswaku loko u ringeta ku lawula nchumu wun’wana ni wun’wana lowutsongo evuton’wini bya n’wana wa wena swi nga ha endla leswaku a ku hlundzukela ni ku ku xandzukela. (Vaefesa 6:4; Vakolosa 3:21) Xana sweswo swi vula leswaku u fanele u tshika ku lava ku tiva leswaku ku humelela yini evuton’wini byakwe? Nikatsongo, hikuva wa ha ri mutswari. Hambiswiritano, xikongomelo xa wena i ku pfuna n’wana wa wena leswaku a va ni ripfalo leri leteriweke. (Deteronoma 6:6, 7; Swivuriso 22:6) Eku heteleleni, nkongomiso i wa nkoka ku tlula ku tshama u n’wi veke tihlo.

Xa vunharhu, bula hi mhaka leyi ni n’wana wa wena. Yingisela swivilelo swakwe. Xana wu kona nkarhi lowu u nga kombisaka ha wona leswaku wa n’wi anakanyela n’wana wa wena? (Vafilipiya 4:5) Byela n’wana wa wena leswaku u ta n’wi nyika nkarhi wo va yexe ntsena loko a ta wu tirhisa hi ndlela leyinene. N’wi byele leswaku ku ta humelela yini loko a nga yingisi naswona loko swi fanerile n’wi xupule hilaha u vuleke hakona. Tiyiseka leswaku u nyika n’wana wa wena nkarhi wo va yexe kambe u nga tshiki mfanelo ya wena yo va mutswari la khathalaka.

[Xifaniso lexi nga eka tluka 20]

Loko u nga tshembekanga u nge languteli leswaku u tshembiwa tanihi leswi u nga languteriki ku holeriwa loko u nga tirhanga

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela