Vantshwa Va Vutisa

Xana Ku Hlanganyela Timhaka Ta Masangu Swi Nga Endla Leswaku Hi Rhandzana Swinene?

Heather se u ni tin’hweti timbirhi ntsena a rhandzana na Mike, kambe u titwa onge i khale va tivana. Va rhumelana ti-SMS nkarhi na nkarhi, loko va belana riqingho va vulavula tiawara to tala, naswona va tikomba va vulavurisana kahle! Kambe tanihi leswi va tshameke emovheni lowu pakiweke nivusiku, Mike u lava swin’wana handle ka mabulo ntsena.

Eka tin’hweti timbirhi leti hundzeke, Mike na Heather a va khomana mavoko ni ku ntswontswana katsongo ntsena. Heather a a nga lavi ku endla swin’wana swo tlula sweswo. Kambe hi hala tlhelo a a nga lavi ku tshikiwa hi Mike. Ku hava munhu un’wana la n’wi endlaka a titwa a sasekile swinene ni ku titwa a ri wo hlawuleka. Naswona u tibyela a ku: ‘Phela mina na Mike ha rhandzana, . . . a swi tano ke?’

UNGA ha mbambela leswaku mhaka leyi yi kongome kwihi. Kambe u nga ha va u nga yi xiyi ndlela leyi ku hlanganyela timhaka ta masangu swi nga onhaka swilo ha yona exikarhi ka Mike na Heather. Kambisisa:

Loko u tlula nawu wa matimba ya ntumbuluko, wo tanihi nkoka misava, u nga weriwa hi khombo. Swi tano niloko u tlula nawu wo tanihi lowu nge: “Papalata vumbhisa.”a (1 Vatesalonika 4:3) Hi byihi vuyelo bya ku nga wu yingisi nawu lowu? Bibele yi ri: “Loyi a hanyaka hi vumbhisa u dyohela miri wa yena n’wini.” (1 Vakorinto 6:18) Marito lawa i ntiyiso ku fikela kwihi? Vona loko u ta swi kota ku xaxameta vuyelo byinharhu lebyi nga tsakisiki lebyi nga laha hansi, lebyi nga welaka lava hlanganyelaka timhaka ta masangu va nga si nghenela vukati.

1. ․․․․․

2. ․․․․․

3. ․․․․․

Sweswi languta leswi u swi tsaleke. Xana u katse swilo swo tanihi vuvabyi lebyi tlulelaka hi tlhelo ra rimbewu, ku va ni khwiri leri u nga ri laviki kumbe ku hlundzukisa Xikwembu? Lebyi i vuyelo lebyi khomisaka tingana lebyi nga kumiwaka hi un’wana ni un’wana loyi a tlulaka milawu ya Xikwembu ya mahanyelo malunghana ni vumbhisa.

Hambiswiritano, u nga ha ringeka. U nga ha tibyela u ku, ‘Ku hava lexi nga ta endleka eka mina.’ Phela vanhu hinkwavo va hlanganyela timhaka ta masangu. Tintangha ta wena exikolweni ta tibuma hileswi ti hlanganyelaka timhaka ta masangu naswona swi tikomba ti nga humeleriwi hi khombo. Kumbexana u ehleketa ni leswaku ku hlanganyela timhaka ta masangu swi nga endla leswaku mi rhandzana swinene, hilaha Heather loyi ku vulavuriweke ha yena eku sunguleni ka xihloko a a ehleketa hakona. Handle ka sweswo, i mani la lavaka ku hlekuriwa hikwalaho ka leswi a nga si tshamaka a hlanganyela timhaka ta masangu? Xana a swi antswi u vhela u hlanganyela timhaka ta masangu?

Yima kutani u ehleketa! Xo sungula, a hi vanhu hinkwavo lava hlanganyelaka timhaka ta masangu. I ntiyiso leswaku u nga ha hlaya tinhlayo leti kombisaka leswaku vantshwa vo tala swinene va hlanganyela timhaka ta masangu. Hi xikombiso, nkambisiso wun’wana wa le United States wu kume leswaku vantshwa vambirhi eka vanharhu etikweni rero va va se va sungule ku hlanganyela timhaka ta masangu loko va heta xikolo xa sekondari. Kambe sweswo swi tlhela swi vula leswaku muntshwa un’we eka vanharhu—ku nga nhlayo leyi nga riki yikulu ngopfu—a nga hlanganyeli timhaka ta masangu. Kutani, ku humelela yini eka lava hlanganyelaka timhaka ta masangu? Valavisisi va kume leswaku vantshwa volavo vo tala va kuma vuyelo byin’we kumbe byo tala lebyi landzelaka lebyi nga tsakisiki.

Vuyelo Lebyi Nga Tsakisiki #1: KU VA NI GOME. Vantshwa vo tala lava hlanganyeleke timhaka ta masangu va nga si nghenela vukati va vula leswaku va tisorile endzhaku ka nkarhi hikwalaho ka sweswo.

Vuyelo Lebyi Nga Tsakisiki #2: KU NGA HA TSHEMBANI. Endzhaku ka loko varhandzani va hlanganyele timhaka ta masangu, va sungula ku tivutisa va ku, ‘Xana a nga kona munhu un’wana loyi a tshamake a etlela na yena?’

Vuyelo Lebyi Nga Tsakisiki #3: KU NGA TSHEMBEKI. Endzhaku ka loko varhandzani va hlanganyele timhaka ta masangu, jaha ri tala ku tshika ntombhi ya rona kutani ri ya rhandzana ni yin’wana.

Vuyelo Lebyi Nga Tsakisiki #4: KU HELA MATIMBA. Ntombhi yi rhandza ngopfu jaha leri nga ta yi sirhelela, ku nga ri leri nga ta tlanga ha yona.

Ku engetela eka leswi tsariweke laha henhla, xiya mhaka leyi: Majaha yo tala ma vule leswaku a ma nge pfuki ma teke ntombhi leyi ma tshameke ma etlela na yona. Hikwalaho ka yini? Hikuva ma tsakela ku teka ntombhi leyi nga nhwana!

Xana sweswo swa ku hlamarisa kumbexana hambi ku ri ku ku hlundzukisa? Loko swi ri tano, hambi u ntombhi kumbe jaha, tsundzuka leswi: Ntiyiso wa mhaka malunghana ni ku hlanganyela timhaka ta masangu u nga si nghenela vukati wu hambane swinene ni leswi kombisiwaka eka tifilimi ni le ka TV. Tikhampani leti endlaka tifilimi ti endla leswaku ku hlanganyela timhaka ta masangu loko wa ha ri muntshwa swi vonaka swi tsakisa naswona ku ri ndlela yo kuma rirhandzu ra xiviri. Kambe u nga xisiwi! Lava nga ha ringetaka ku ku yenga leswaku u hlanganyela timhaka ta masangu u nga si nghenela vukati, va lava ntsena ku enerisa ku navela ka vona vini. (1 Vakorinto 13:4, 5) Xana munhu loyi a ku rhandzaka hakunene a nga hoxa vutomi bya wena ekhombyeni ni ku ku twisa ku vava? (Swivuriso 5:3, 4) Naswona xana munhu loyi a khathalaka hakunene hi wena a nga ku ringa leswaku u veka vuxaka bya wena ni Xikwembu ekhombyeni?—Vaheveru 13:4.

Ntiyiso wa mhaka hileswaku loko u hlanganyela timhaka ta masangu u nga si nghenela vukati, miri wa wena u wu chicha xiyimo hi ku nyikela hi nchumu wa nkoka. (Varhoma 1:24) A swi hlamarisi leswi vanhu vo tala va titwaka va hele matimba ni ku nga pfuni nchumu endzhaku ka loko va hlanganyele timhaka ta masangu, onge hiloko va tshike hi vomu leswaku xirho xa risima xa miri wa vona xi yiviwa! U nga pfumeleli sweswo swi endleka eka wena. Loko munhu a ringeta ku ku yenga leswaku u etlela na yena hi ku vula a ku, “Loko a wu ndzi rhandza, a wu ta swi endla leswi,” n’wi hlamule hi ku tiyiseka u ku, “Loko a wu ndzi rhandza, a wu nga ta ndzi kombela!”

Miri wa wena i nchumu wa nkoka lowu u nga fanelangiki u tlanga ha wona. Kombisa leswaku u ni xivindzi xo yingisa nawu wa Xikwembu wa ku balekela vumbhisa. Kutani, loko wo nghenela vukati siku rin’wana, u ta hlanganyela timhaka ta masangu. Naswona u ta tiphina hi tona hi ku helela handle ko karhateka ni ku tisola, leswi hi ntolovelo swi karhataka munhu la hlanganyeleke timhaka ta masangu a nga si nghenela vukati.—Swivuriso 7:22, 23; 1 Vakorinto 7:3.

Swihloko swin’wana leswi nge “Vantshwa Va Vutisa” swi kumeka eka Website leyi nge www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

● Hambileswi ku hlanganyela timhaka ta masangu u nga si nghenela vukati swi nga ha vonakaka swi tsakisa eka vanhu lava nga hetisekangiki, ha yini wena u nga fanelanga u swi endla?

● U nga endla yini loko un’wana a ku kombela leswaku u etlela na yena?

[Bokisi/Swifaniso leswi nga eka tluka 27]

LESWI VANGHANA VA WENA VA SWI VULAKA

“Ku vula ntsena leswaku a wu swi lavi a swi nge n’wi tshikisi munhu la ku kombelaka leswaku u etlela na yena ku va a ringeta nakambe. Kambe mhaka hileswaku u ala njhani. Loko u vula hi moya wo rhula leswaku a wu swi lavi kambe swi tikomba onge wa kanakana, a nge ku tekeli enhlokweni. U fanele u swi vula hi ku tiyiseka!”

“Ku vula ntsena leswaku a wu swi lavi a hi minkarhi hinkwayo swi pfunaka. Hambi ku ri ku va byela tidyondzo leti u pfumelaka eka tona swi nga ha endleka swi nga tirhi. Ndzi tiva van’wana lava tibumaka hileswi va koteke ku yenga Mukreste leswaku a endla swilo swo homboloka. Minkarhi yin’wana swo lava ntsena u n’wi fularhela u famba. Swa tika ku endla tano, kambe swa pfuna.”

“Tanihi leswi u nga Mukreste, u ni timfanelo leti nga ta ku endla leswaku u rhandzeka eka van’wana. Kutani u fanele u xalamuka naswona u ala loko va ku kucetela leswaku u endla swilo swo biha. Ti teke ti ri ta nkoka timfanelo toleto. U nga endli nchumu lowu nga ta endla leswaku u lahlekeriwa hi tona.”

[Swifaniso]

Diana

James

Joshua

[Bokisi leri nga eka tluka 28]

VANA XIKOMBISO LEXINENE EKA YENA!

Loko u rhandzana ni ntombhi yo karhi, xana wa n’wi khathalela hakunene? Kutani n’wi kombe leswaku u ni . . . 

● xivindzi xo hlayisa milawu ya Xikwembu

● vutlhari byo papalata swiyimo leswi ringaka

● rirhandzu ro khathalela swilaveko swakwe

Loko u endla tano, a swi kanakanisi leswaku ntombhi ya wena yi ta titwa hilaha Muxulami a titweke hakona, la nga te: “Murhandziwa wanga i wa mina na mina ndzi wa yena.” (Risimu ra Solomoni 2:16) Hi ku komisa, vana xikombiso lexinene eka yena!

Vona Swivuriso 22:3; 1 Vakorinto 6:18; 13:4-8.

[Bokisi leri nga eka tluka 28]

XIRINGANYETO

Loko swi ta emhakeni ya leswaku u fanele u tikhoma njhani loko u ri ni munhu wa rimbewu leri hambaneke ni ra wena, nawu lowunene lowu u faneleke u wu landzela hi lowu: U nga endli nchumu lowu a wu nga ta swi tsakela ku va vatswari va wena va ku vona u ri karhi u wu endla.

[Xifaniso lexi nga eka tluka 28]

Ku hlanganyela timhaka ta masangu u nga si nghenela vukati swi fana ni ku tirhisa nyiko ya Xikwembu hi ndlela yo biha. Swi fana ni ku teka xifaniso xo saseka lexi un’wana a ku nyikeke xona u xi tirhisa tanihi mete wa le nyangweni