I Yini Leswi U Swi Tivaka Hi Timbhoni Ta Yehovha?

KUTANI muviki yoloye u vulavurisane ni ndyangu lowu nga Timbhoni. Vuyelo byi ve byihi? U tsale a ku: “Langutelo ra mina hi tona ri cince hi ku hatlisa loko ndzi nghene ekaya ra tona! Kumbexana vanhu a va ti tivi kahle, kumbe hinkwerhu hi hatlisela ku ti avanyisa. Na mina a ndzi ri tano. Kutani ndzi kume leswaku a ndzi endla xihoxo.”—Cecilie Feyling, wa phepha-hungu ra Jydske Vestkysten.

Loko muyimeri wa ndzawulo ya vukorhokeri bya vanhu eswitolo swo tala eYuropa a vulavula hi ntirhisano lowu a veke na wona ni Timbhoni ta Yehovha etimhakeni ta ntirho, u kume leswaku i vatirhi lava tshembekaka. Hikwalaho ka sweswo, u lava ku ti thola.

Timbhoni ta Yehovha ti dume hi ntirho wa tona wo chumayela. Ti kume leswaku vanhu van’wana a va swi rhandzi ku bula hi Bibele kasi van’wana va swi rhandza. Entiyisweni, vanhu lava tlulaka nkombo wa timiliyoni etikweni rin’wana ni rin’wana va dyondza Bibele ni Timbhoni nkarhi na nkarhi, naswona swin’wana swa swichudeni leswi swi hetelela swi va vadyondzisi va Bibele. Hi xikombiso, eUnited States, xiviko xa Huvo ya Tikereke ta Tiko xi vula leswaku eka vukhongeri lebyikulu bya 25, i mune wa byona ntsena lebyi nhlayo ya swirho swa byona yi andzeke, naswona byin’wana bya byona i Timbhoni ta Yehovha.

Ha yini vanhu va timiliyoni va dyondza Bibele ni Timbhoni? Tidyondzo teto ti fambisiwa njhani? Xana swichudeni sweswo ku languteriwe leswaku swi va Timbhoni na swona? Hambiloko u nga swi tsakeli ku va Mbhoni ya Yehovha, u ni mfanelo yo kuma tinhlamulo leti nga ntiyiso. Kutani u nga yingiseli mavarivari yo biha kambe lavisisa ntiyiso. Swivuriso 14:15 yi ri: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.”

Onge magazini lowu wa Xalamuka! wu nga ku pfuna leswaku u ti twisisa kahle Timbhoni ta Yehovha ni ku ku nyika rungula leri nga ntiyiso malunghana na tona. Entiyisweni, leswi u nga eku hlayeni ka magazini lowu swa tikomba leswaku u ni mianakanyo yo hluteka ni leyi twisisaka. Kutani ringeta ku endla leswi: Loko u ri karhi u hlaya swihloko swa mune leswi landzelaka ni mabokisi lama fambisanaka na swona, hlaya matsalwa lama kombisiweke eBibeleni ya wena.a Ku ta va vutlhari ku endla tano naswona swi ta kombisa leswaku u ni “mianakanyo yo hluteka” hilaha Bibele yi vulaka hakona.—Mintirho 17:11.