Rungula Ro Pfuna Vanhu

Vakreste va ntiyiso va twarisa mahungu lamanene erivaleni. (Filp. 2:17) Leswaku rungula leri ri fikelela vanhu vo tala, ku hoxiwe tibroxara ta nkoka, swiphephana ni swihloko, hi tindzimi ta 20, eka adirese ya Internet ya www.watchtower.org. Web-site leyi a yi endleriwanga ku tivisa Timbhoni ta Yehovha hi minkandziyiso leya ha ku humesiwaka. Xikongomelo xa yona i ku nyika vanhu rungula leri kongomeke leri humaka eBibeleni, leri Timbhoni ta Yehovha ti ri dyondzisaka.

Ku nga ri khale, ka ha ku engeteriwa minkandziyiso yo hlayanyana eka Web-site ya hina ya ximfumo. Ku nghenisiwe broxara leyi nge I Yini Leswi Xikwembu Xi Swi Languteleke Eka Hina? hi tindzimi to tlula 220. Nakambe, ku sukela eka nkandziyiso wa Xihondzo xo Rindza xa January 1 ni Xalamuka! ya January 8, 2004, adirese ya Web-site ya hina se ya tsariwa etlukeni ro hetelela.

U nga yi tirhisa njhani Web-site leyi? Swi nga endleka u hlangana ni munhu la tsakelaka kambe a vulavula ririmi rimbe. Loko a swi kota ku nghena eka Internet, u nga ha n’wi komba adirese ya Web-site leyi tsariweke etlukeni ro hetelela ra Xihondzo xo Rindza kumbe ra Xalamuka! Hi ndlela yoleyo a nga kota ku pfa a tihlayela broxara leyi nge Leswi Xi Swi Languteleke, hi ririmi ra rikwavo loko a ha rindze leswaku u n’wi tisela minkandziyiso yin’wana hi ririmi ra rikwavo. Xin’wana lexi u nga xi endlaka, u nga ha hundzisela vito ra yena eka vandlha kumbe ntlawa lowu tirhisaka ririmi ra munhu yoloye.