Mahungu Lamanene Eka Internet

Enguveni ya hina ya thekinoloji, vanhu van’wana va kuma rungula leri humaka eka switirho swa tielektroni, ku katsa na Internet. Hikwalaho Sosayiti yi nghenise rungula leri pakanisaka eka Internet malunghana ni ripfumelo ni mintirho ya Timbhoni ta Yehovha.

Ndhawu ya hina ya Internet Web yi ni adirese ya http://www.watchtower.org naswona yi ni swiphephana, tibroxara ni swihloko swa Xihondzo xo Rindza ni Xalamuka! leswi hlawuriweke swa Xinghezi, Xichayina (Lexi olovisiweke), Xijarimani, Xirhaxiya ni Xipaniya kun’we ni tindzimi tin’wana. Ana se tibuku leti nga eka Web leyi ta kumeka emavandlheni naswona ta tirhisiwa ensin’wini. Xikongomelo xa Web ya hina a hi ku humesa tibuku letintshwa, kambe i ku endla leswaku vanhu va kuma rungula leri hi ku tirhisa maendlelo ya tielektroni. A swi bohi leswaku munhu a ti tsalela rungula eka Internet malunghana ni Timbhoni ta Yehovha, ntirho wa hina kumbe leswi hi swi pfumelaka. Web ya hina ya ximfumo yi ni rungula lerinene eka mani na mani la ri lavaka.

Hambileswi ndhawu ya hina yi nga riki na wona marungula ya tielektroni (E-mail), yi ni tiadirese ta poso ta marhavi ya misava hinkwayo. Xisweswo, vanhu va nga tsala leswaku va kuma rungula leri engetelekeke kumbe va kuma ku pfuniwa eka Timbhoni leti nga ekusuhi na vona. Wa pfumeleriwa ku nyika munhu wihi na wihi adirese ya Internet leyi nga laha henhla la nga ha vaka a sungule ku dyondza ntiyiso wa Bibele hi ku tirhisa maendlelo lawa.