Langutelo Ra Bibele

Madimona I Yini?

SWIPUKU, swinghunghumana, vatokoloxi, swikwembu swa masalamusi ni madimona i swivumbiwa swa moya leswi vanhu va vukhongeri byo hambana-hambana va pfumelaka eka swona naswona va swi tekaka swi ri leswinene kumbe leswo biha. Vanhu van’wana a va pfumeli nikatsongo leswaku ku ni swivumbiwa swa moya, hikuva va vula leswaku ko va swiyila-yila ntsena kumbe swilo leswi ngo anakanyeriwa kunene. I yini leswi Bibele yi swi vulaka malunghana ni mhaka leyi?

Bibele yi vula leswaku Muvumbi i Moya nileswaku swivumbiwa swakwe swo sungula leswi a swi vumbeke a ku ri swa moya. (Yohane 4:24; Vaheveru 1:13, 14) Ku tlula kwalaho, Bibele yi vulavula hi swivumbiwa swo biha swa moya, naswona minkarhi yin’wana yi kombetela eka swona tanihi madimona. (1 Vakorinto 10:20, 21; Yakobo 2:19) Kambe a yi dyondzisi leswaku Xikwembu xi vumbe madimona. Kutani, madimona i yini naswona swi tise ku yini leswaku ma va kona?

“Tintsumi Leti Dyoheke”

Loko Xikwembu xi vumbe swivumbiwa swa moya, xi swi nyike ntshunxeko wo tihlawulela leswaku swi kota ku tihlawulela ku endla leswinene kumbe leswo biha. Lexi vavisaka, endzhaku ka loko ku vumbiwe vanhu, tintsumi leti nhlayo ya tona yi nga tiviwiki ti hlawule ku endla swo biha ti xandzukela Xikwembu.

Xivumbiwa xo sungula xa moya ni lexi dumeke hi swilo swo biha lexi xandzukeke xi hundzuke Sathana. Yesu Kreste u te: “A nga yimanga a tiyile entiyisweni.” (Yohane 8:44) I yini lexi susumeteleke Sathana ku va a xandzukela Xikwembu? U sungule ku navela vugandzeri lebyi a byi fanela Muvumbi ntsena, naswona ku navela koloko ku n’wi susumetele ku tiendla xikwembu lexi phikizanaka ni Muvumbi. Hi ndlela yoleyo u tiendle “Sathana,” ku nga vito leri vulaka “mukaneti.” Endzhaku ka madzana ya malembe ku nga si fika Ndhambi ya Nowa, tintsumi tin’wana ti ve nyandza yin’we na Sathana, ti tshika xikhundlha xa tona xa le tilweni leswaku ti ambala mimiri ya vanhu va nyama kutani ti hanya laha misaveni. (Genesa 6:1-4; Yakobo 1:13-15) Loko Ndhambi yi sungula, “tintsumi leti dyoheke” leti ambaleke mimiri ya nyama ti tlhelele etilweni. (2 Petro 2:4; Genesa 7:17-24) Hi ku famba ka nkarhi, ti sungule ku vitaniwa madimona.—Deteronoma 32:17; Marka 1:34.

Kutani tintsumi leti nga yingisiki ti tikume ti ri exiyin’weni lexi nga faniki ni lexi a ti ri eka xona ti nga si xandzuka. Yudha 6 yi ri: “Tintsumi leti nga hlayisangiki xiyimo xa tona xo sungula kambe ti fularheleke vutshamo bya tona lebyi faneleke [Xikwembu xi] ti bohe hi timpecana leti nga riki na makumu emunyameni lowukulu, [xi] ti vekela vuavanyisi bya siku lerikulu.” Xikwembu a xi ma pfumelelanga madimona ku tlhela ma kuma malunghelo ya wona ya khale etilweni kambe xi ma veke “emigodini ya munyama lowukulu” wo fanekisela, laha ma nga ha kumiki ku voningeriwa ka moya.

Va ‘Xisa Misava Hinkwayo Leyi Akiweke’

Hambileswi madimona ma nga ha swi kotiki ku tihundzula vanhu, ma ha ri ni matimba lamakulu naswona ma ha swi kota ku kucetela miehleketo ni vutomi bya vanhu. Entiyisweni, Sathana ni madimona yakwe ya ntsandza vahlayi va ‘xisa misava hinkwayo leyi akiweke.’ (Nhlavutelo 12:9; 16:14) Njhani? Ngopfu-ngopfu hi ku tirhisa ‘tidyondzo ta madimona.’ (1 Timotiya 4:1) Tidyondzo leti ta mavunwa, leti hakanyingi ku nga ta vukhongeri, ti dlaye vanhu va timiliyoni mianakanyo leswaku va nga tivi ntiyiso malunghana ni Xikwembu. (2 Vakorinto 4:4) Xiya swin’wana swa swikombiso swa tidyondzo toleto.

● Dyondzo ya leswaku lava feke va ha hanya. Madimona ma xisa vanhu leswaku va pfumela leswaku lava hanyaka va nga vulavurisana ni lava feke hi ku va endla va vona vanhu lava nga riki va xiviri, va twa marito lama nga riki kona ni hi tindlela tin’wana ta vuxisi. Ku engetela kwalaho, vuxisi lebyi byi endla vanhu van’wana va pfumela vunwa bya leswaku moya wa munhu wu hambeta wu hanya loko a fa. Hambiswiritano, Bibele yi vula hi ku kongoma yi ku: “Lava feke, a va tivi nchumu nikatsongo.” (Eklesiasta 9:5, 6) Leswi va ‘rheleleke eku miyeleni,’ a va swi koti hambi ku ri ku dzunisa Xikwembu.—Pisalema 115:17.a

● Ku hohloka ka mahanyelo. Yohane wo Sungula 5:19 yi ri: “Misava hinkwayo yi le hansi ka matimba ya lowo homboloka.” Sathana ni madimona yakwe va tirhisa matimba ya vona ku kucetela swihaxa-mahungu ni swilo swin’wana leswaku swi haxa dyondzo yo biha ya leswaku vanhu a va fanelanga va lwisana ni ku navela ka nyama loko va ringiwa. (Vaefesa 2:1-3) Hi yona mhaka leyi mahanyelo yo biha ya muxaka wihi na wihi, ku katsa ni timhaka ta masangu leti hundzeletiweke swi tinyikeke matimba. Mahanyelo wolawo ma kala ma tekiwa ma ri lama tolovelekeke, kasi milawu ya Bibele hakanyingi yi tekiwa yi ri leyi hundzeriweke hi nkarhi kumbe leyi nga amukeliki mahanyelo man’wana lamantshwa.

● Ku hlohlotela vungoma. Muapostola Pawulo u hlangane ni nandza wa xisati loyi a a ri ni “dimona ra vungoma,” leri a ri endla leswaku “a tisela vini vakwe mpindzulo lowukulu hi ku tirhisa vutshila bya ku bvumba.” (Mintirho 16:16) Leswi Pawulo a a swi tiva leswaku nhwanyana yoloye a a kuma matimba wolawo eka dimona, u ale ku n’wi yingisa. Ku engetela kwalaho, a a nga lavi ku khunguvanyisa Xikwembu, lexi tekaka mixaka hinkwayo ya vungoma—ku katsa ni vungoma bya tinyeleti ni ku kombela swilo eka swikwembu—tanihi leyi nyenyetsaka.—Deteronoma 18:10-12.

Tisirhelele Eka Madimona

U nga tisirhelela njhani eka mimoya yo biha? Bibele ya hlamula: “Tivekeni ehansi . . . ka Xikwembu; kambe mi kaneta Diyavulosi, kutani u ta mi balekela.” (Yakobo 4:7) Hi yingisa nawu wolowo loko hi hanya hi tidyondzo leti nga eBibeleni, ku nga yona ntsena buku yo kwetsima leyi n’wi paluxaka hi ku helela Sathana, madimona yakwe ni “marhengu” ya vona. (Vaefesa 6:11; 2 Vakorinto 2:11) Nakambe Bibele yi hi byela leswaku mimoya yo biha, ku katsa ni hinkwavo lava kanetaka Xikwembu, a va nge hanyi hilaha ku nga heriki. (Varhoma 16:20) Swivuriso 2:21 yi ri: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona.”

[Nhlamuselo ya le hansi]

XANA U TSHAME U TIVUTISA?

● Xana Xikwembu xi tumbuluxe madimona?—2 Petro 2:4.

● Xana u nga swi kota ku vulavula ni vafi?—Eklesiasta 9:5, 6.

● U nga tisirhelela njhani eka madimona?—Yakobo 4:7.

[Xifaniso lexi nga eka tluka 21]

Madimona ma ringeta ku kucetela vanhu hi tindlela to tala