Yesu U Ni Matimba Ku Tlula Madimona

XANA wa swi tsundzuka leswaku swi tise ku yini leswaku yin’wana ya tintsumi ta Xikwembu yi hundzuka Sathana Diyavulosi?— Ku navela ka yona ku gandzeriwa hi swona swi yi endleke yi fularhela Xikwembu. Xana ti kona tintsumi leti nga hundzuka valandzeri va Sathana?— Ina, ti kona. Bibele yi ri i ‘tintsumi ta Sathana,’ kumbe madimona.—Nhlavutelo 12:9.

Xana tintsumi leti to biha, kumbe madimona, ta pfumela leswaku Xikwembu xi kona?— Bibele yi vula leswaku ‘madimona ma kholwa leswaku Xikwembu xi kona.’ (Yakobo 2:19) Kambe sweswi ma chuhile. Phela ma swi tiva leswaku Xikwembu xi ta ma xupula hikwalaho ka swilo swo biha leswi ma swi endleke. Xana ma endle yini?—

Bibele yi vula leswaku tintsumi leti ti siye kaya ra tona ematilweni kutani ti ta emisaveni ti ta tshama kona kukota vanhu. Leswi ti swi endle hikwalaho ko navela ku va ni vuxaka bya rimbewu ni vavasati vo saseka emisaveni. (Genesa 6:1, 2; Yudha 6) Xana wa swi tiva leswaku vuxaka bya rimbewu i yini?—

Vuxaka bya rimbewu hi loko wanuna ni wansati va hlangana hi ndlela yo hlawuleka. Endzhaku ka sweswo, n’wana u sungula ku kula ekhwirini ra manana. Kambe a a swi hoxile leswaku tintsumi ti va ni vuxaka bya rimbewu. Xikwembu xi vula leswaku i wanuna ni wansati lava tekaneke ntsena lava nga vaka ni vuxaka bya rimbewu. Xisweswo, loko n’wana a velekiwa, nuna ni nsati va ta swi kota ku n’wi wundla.

Loko tintsumi ti tihundzule vanhu va nyama kutani ti va ni vuxaka bya rimbewu ni vavasati emisaveni, vana va tona va kurile va va swihontlovila. A swi ri ni tihanyi naswona a swi xanisa vanhu. Hiloko Xikwembu xi tisa ndhambi leyikulu, xi lovisa swihontlovila leswi ni vanhu vo biha hinkwavo. Kambe xi byele Nowa leswaku a aka ngalava kumbe xikepe lexikulu, leswaku a ponisa vanhu va nga ri vangani lava a va endla leswi lulameke. Mudyondzisi Lonkulu u vule leswaku leswi humeleleke hi nkarhi wa Ndhambi, a hi fanelanga hi swi rivala.—Genesa 6:3, 4, 13, 14; Luka 17:26, 27.

Xana wa swi tiva leswaku ku endleke yini hi tintsumi to biha loko Ndhambi yi fika?— Ti tlhele ti tihundzula vanhu va moya kutani ti tlhelela etilweni. Kambe a swi nga ta koteka leswaku ti tlhela ti va tintsumi ta Xikwembu, xisweswo ti hundzuke tintsumi ta Sathana, kumbe madimona. Xana ku humelele yini hi vana va tona va swihontlovila?— Va dyiwe hi Ndhambi. Swi ve tano ni hi vanhu lavan’wana hinkwavo lava nga xi yingisangiki Xikwembu.

Ku sukela loko Ndhambi yi herile, Xikwembu a xa ha ma pfumelelanga madimona leswaku ma ticinca ma va vanhu va nyama. Kambe, hambileswi hi nga swi kotiki ku ma vona, madimona ma ha ringeta ku kucetela vanhu leswaku va endla swilo swo biha swinene. Sweswi ma kucetela vanhu leswaku va endla swilo swo biha ngopfu ku tlula enkarhini lowu hundzeke. Leswi swi vangiwa hi leswi ma hlongoriweke etilweni, ma lahleriwa emisaveni.

Xana wa swi tiva leswaku hikwalaho ka yini hi nga swi koti ku vona madimona?— Hikuva a ma vonaki. Kambe wona ma kona, ma hanya. Bibele yi vula leswaku Sathana u ‘xisa vanhu emisaveni hinkwayo’ naswona u pfuniwa hi madimona yakwe.—Nhlavutelo 12:9, 12.

Xana Diyavulosi swin’we ni madimona yakwe, va nga hi kanganyisa na hina?— Ina, va nga hi kanganyisa loko hi nga tivoneli. Kambe a hi fanelanga hi chava. Mudyondzisi Lonkulu u te: ‘Diyavulosi a nge ndzi endli nchumu.’ Loko hi tshama hi ri ekusuhi ni Xikwembu, xi ta hi sirhelela eka Diyavulosi ni madimona yakwe.—Yohane 14:30.

I swa nkoka leswaku hi swi tiva swilo swo biha leswi madimona ma nga ringetaka ku hi kucetela leswaku hi swi endla. Kutani tivutise. Hi swihi swilo swo biha leswi madimona ma swi endleke loko ma ri emisaveni?— Loko Ndhambi yi nga si fika, ma ve ni vuxaka bya rimbewu ni vavasati, ku nga nchumu lowu a wu nga fanelanga wu endliwa hi tintsumi. Namuntlha madimona ma tsaka loko vanhu va nga wu yingisi nawu wa Xikwembu malunghana ni vuxaka bya rimbewu. Wa nga ndzi byela, I vamani lava faneleke ku va ni vuxaka bya rimbewu?— U be kona, i vanhu lava tekaneke ntsena.

Namuntlha vafana ni vanhwanyana van’wana va va ni vuxaka bya rimbewu, kambe a va fanelanga va endla tano. Bibele yi vulavula hi ‘xirho xa rimbewu’ xa wanuna kumbe xiluma. (Levhitika 15:1-3) Xirho xa rimbewu xa wansati xi vuriwa hlunu. Yehovha u vumbe swirho leswi swa miri leswaku swi tirhiseriwa xikongomelo xo hlawuleka, lexi xi faneleke xi hetisisiwa hi vanhu lava tekaneke ntsena. Madimona ma tsaka loko vanhu va endla swilo leswi Yehovha a swi yirisaka. Hi xikombiso, madimona ma tsaka loko mufana ni nhwanyana va khoma-khomana swirho swa rimbewu. A hi swi lavi ku tsakisa madimona, a swi tano ke?—

Ku ni nchumu wun’wana lowu madimona ma wu rhandzaka kambe Yehovha a wu vengaka. Xana wa wu tiva nchumu wa kona?— I madzolonga. (Pisalema 11:5) Madzolonga hi loko vanhu va khoma van’wana hi tihanyi, va va xanisa. Phela hi swona leswi a swi endliwa hi vana va madimona lava a va ri swihontlovila.

Nakambe madimona ma rhandza ku chavisa vanhu. Minkarhi yin’wana ma tiendla vanhu lava feke. Ma nga ha vulavula hi marito lama fanaka ni ya vanhu lava feke. Hi ku endla leswi, ma kanganyisa vanhu vo tala, ma va endla va anakanya onge vanhu lava feke va hanya naswona va nga vulavula ni lava hanyaka. Phela madimona ma endla leswaku vanhu vo tala va pfumela leswaku ku ni swipuku.

Kutani hi fanele hi tivonela leswaku Sathana ni madimona yakwe va nga hi kanganyisi. Bibele ya hi tsundzuxa: ‘Sathana u ringeta ku tihundzula ntsumi leyinene, ni lava va n’wi tirhelaka va endla tano.’ (2 Vakorinto 11:14, 15) Kambe u nga xisiwi, madimona ma ni khombo. A hi vone leswaku ma nga hi endla njhani leswaku hi fana na wona.

Hi kwihi laha vanhu va yaka kona loko va lava ku vona madzolonga, vuxaka bya rimbewu lebyi nga fanelangiki, vanhu va moya ni swipuku?— Xana a va swi voni kona eka switori ni tifilimi tin’wana leti kombisiwaka eka thelevhixini, eka mintlangu ya khompyuta ni ya tivhidiyo, eka Internet ni le tibukwini leti nga ni switori leswi hlekisaka? Loko hi endla swilo leswi, xana hi ta va hi tshinela eka Xikwembu kumbe hi ta va hi tshinela eka Diyavulosi ni madimona yakwe? U swi vonisa ku yini?—

U ehleketa leswaku i mani loyi a lavaka leswaku hi yingisa ni ku hlalela swilo swo biha?— Ina, i Sathana ni madimona yakwe. Kutani ke, xana mina na wena hi fanele hi endla yini?— Hi fanele hi hlaya, hi yingisela ni ku hlalela swilo leswi nga swinene ni leswi nga ta hi pfuna leswaku hi tirhela Yehovha. Hi swihi swin’wana swa swilo leswinene leswi hi nga swi endlaka?—

Loko hi endla swilo leswinene, a hi fanelanga hi chava madimona. Yesu u ni matimba ku tlula madimona naswona ma n’wi chava. Siku rin’wana madimona ma huwelele Yesu ma ku: “Xana u tele ku ta hi lovisa?” (Marka 1:24) Xana a hi nge tsaki loko ku fika nkarhi wa leswaku Yesu a herisa Sathana ni madimona yakwe?— Enkarhini wa sweswi, hi nga tiyiseka leswaku Yesu u ta hi sirhelela eka madimona loko hi yingisa yena ni Tata wakwe la nga etilweni.