“Risimu Ri Nga Endla Singita”

● Juliana a ku ri mukhegula un’wana la rhandzekaka wa Mukreste wa le Philippines loyi a a ri ni vuvabyi bya Alzheimer. A a nga ha tsundzuki nchumu hambi ku ri vana vakwe. Hambiswiritano, a ndzi n’wi endzela nkarhi wun’wana ni wun’wana loko ndzi ye endhawini leyi a a tshama eka yona.

Juliana a a tshama a ri emubedweni a langute ehandle hi le fasitereni. A swi tika ku tshama na yena hikuva a a nga ha ndzi tsundzuki. A a ndzi honolela kambe a a nga endli nchumu ku kombisa leswaku a a ndzi tiva. Ndzi n’wi vutisile ndzi ku: “Xana wa ha ehleketa hi Yehovha?” Ndzi n’wi byele hi ntokoto wun’wana naswona ndzi n’wi vutisa swivutiso swin’wana swo hlayanyana, kambe a swi nga vonaki leswaku wa swi twisisa. Hiloko ndzi sungula ku yimbelela. Leswi a swi endleke swi ndzi khumbe mbilu!

Juliana u hundzuluxe nhloko a ndzi languta, kutani a sungula ku yimbelela! Ndzi boheke ku hatla ndzi miyela hikuva a ndzi nga ri tivi hinkwaro risimu rero ra Xitagalog hi nhloko. Kambe Juliana u ye emahlweni a yimbelela. A a ti tsundzuka tilayini hinkwato tinharhu ta risimu rero. Hi ku hatlisa, ndzi kombele munhu loyi a ndzi ri na yena leswaku a ndzi lombela buku ya tinsimu eka Mbhoni yin’wana leyi tshamaka ekusuhi ni kwalaho. U vuye na yona hi ku hatlisa. A ndzi nga yi tivi nomboro ya risimu rero kambe ndzi nambe ndzi pfula tluka ra kona. Kutani hi nkarhi wolowo hi yimbelele swin’we risimu rero hinkwaro! Loko ndzi vutise Juliana loko ti ri kona tinsimu tin’wana leti a ti tsundzukaka, u sungule ku yimbelela risimu rin’wana ra khale ra Xifilipino leri vulavulaka hi ta rirhandzu.

Ndzi te eka yena: “E-e Juliana, a ndzi vuli risimu ra le ka xiya-ni-moya kambe ra le Holweni ya Mfumo.”a Kutani ndzi sungule ku yimbelela risimu rin’wana ebukwini ya hina ya tinsimu, hiloko a sungula ku yimbelela na mina. Mahlo yakwe a ma kombisa leswaku u tsakile. Gome hinkwaro ri nyamalarile kutani a sungula ku n’wayitela.

Hi nkarhi wolowo, vaakelani va humele ehandle hi ku tsutsuma va lava ku twa leswaku mpfumawulo wa ku yimbelela wu twakala kwihi. Va yime hi le fasitereni va hi langutisa ni ku hi yingisela. A swi tsakisa ku vona ndlela leyi vuyimbeleri byi khumbeke mbilu ya Juliana ha yona! Byi n’wi susumetele ku tsundzuka marito ya risimu rero.

Ntokoto lowu wu ndzi dyondzise leswaku a wu nge swi tivi leswi nga fikelelaka timbilu ta lava nga swi kotiki ku twisisa kumbe ku vulavula. Hambi ku ri risimu ri nga endla singita.

Endzhakunyana ka xiendlakalo lexi nga laha henhla, Juliana u file. Ndzi tsundzuke ntokoto lowu loko ndzi yingisele vuyimbeleri lebyintshwa lebyi khumbaka mbilu, lebyi humesiweke hi Timbhoni ta Yehovha hi 2009. U nga ha vutisa Timbhoni ta Yehovha ta laha u tshamaka kona malunghana ni ndlela leyi u nga byi kumaka ha yona vuyimbeleri lebyi tsakisaka ni lebyi khumbaka mbilu.

[Nhlamuselo ya le hansi]