Ta Rivala

Hi ku ya hi nkambisiso wun’wana, vavanuna va le Brazil va kwalomu ka 10,3 wa tiphesente lava se va hlanganyelaka timhaka ta masangu lava nga ni malembe ya 15 ku ya eka ya 64 va etlele ni munhu loyi va hlanganeke na yena eka Internet eka tin’hweti ta 12 leti hundzeke.—NDZAWULO YA RIHANYO YA LE BRAZIL.

Lwandle ra Arctic i khale ri funengetiwe hi ayisi leyikulu leyi tlakukeke timitara ta 80. Sweswi “ayisi [yoleyo] leyi pakelaneke ku ringana malembe yo tala . . . ku sele katsongo leswaku yi hela, ku nga xiendlakalo lexi hlamarisaka lexi nga ta endla leswaku swi olova ku va ku pfuleka tindlela ta swikepe leswi fambaka eNorth Pole.”—VAVIKI VA MAHUNGU VA REUTERS, LE CANADA.

Moscow na Vatican va tivise ku simekiwa ka ntirhisano lowu heleleke exikarhi ka vona.—VAVIKI VA MAHUNGU VA RIA NOVOSTI, LE RHAXIYA.

Kilimanjaro, ntshava yo leha swinene eAfrika, yi “lahlekeriwe hi tiphesente ta 26 ta ayisi leyi a yi yi funengetile exikarhi ka 2000 na 2007.”—PHEPHA-HUNGU RA DAILY NATION, RA LE KENYA.

Va Tshikilelekile Hambileswi Va Rhandzaka Ku Endla Swilo Hi Ndlela Ya Vona Vini

Phepha-hungu ra Daily Telegraph ra le London, ri vula leswaku hi ku ya hi vakambisisi van’wana, Britain i “tiko leri nga ni vanhu vo tala lava rhandzaka ku endla swilo hi ndlela ya vona vini emisaveni hinkwayo, lava tekaka munhu un’we a ri wa nkoka ku tlula vanhu vo tala.” Nkambisiso wun’wana wu kume leswaku vanhu va le Britain va ni ntshikilelo lowukulu swinene ni ku vilela. Swidyondzeki swin’wana swi pfumela leswaku ku rhandza ku endla swilo hi ndlela ya vona vini hi swona leswi va vangelaka ntshikilelo. Minkambisiso yi fanise vanhu va le Vupela-dyambu ni lava tshamaka eChayina ni le Taiwan. Ku kumiwe leswaku leswi vaaki va le Chayina ni va le Taiwan va rhandzaka ku tirha tanihi ntlawa ku tlula ku tirha va ri voxe, swi tikomba swi va pfuna ku va va nga titeki va ri swisiwana. Phepha-hungu ra Telegraph ri vula leswaku eVupela-dyambu, “vutianakanyi bya vanhu va kona . . . byi hi vangela ntshikilelo.”

Vukati Bya Vusodoma eKerekeni Ya Sweden

Hi October 2009, Kereke ya Lutere ya Sweden yi pfumele ku catisa vasodoma. Xiboho lexi xi tekiwe endzhakunyana ka tin’hweti ti nga ri tingani palamendhe ya le Sweden yi simeke nawu lowu pfumelelaka vasodoma ku tekana. Phepha-hungu ra Dagens Nyheter ri ri: “Leswi swi vula leswaku Kereke ya Sweden hi yona yo sungula eka tikereke letikulu emisaveni ku hambuka eka leswi vukati bya ntumbuluko byi vulaka swona, ku nga vuxaka exikarhi ka wanuna ni wansati.”

Tincece Ti Rila Hi Ririmi Rihi?

Hi ku ya hi vakambisisi va le Yunivhesiti ya Würzburg eJarimani, tincece ti sungula ku rila hi ku ya hi mpfumawulo wa ririmi ra vamana wa tona endzhakunyana ka masiku mambirhi ti velekiwile. Vakambisisi va thepe marilelo ya tincece ta 30 ta Mafurwa ni ta 30 ta Majarimani leswaku va kambisisa ndlela leyi mpfumawulo wa kona wu cinca-cincaka ha yona ni ku tlakuka. Ku rila ka tincece ta Mafurwa hakanyingi a ku sungula hi mpfumawulo wa le hansi kutani wu tlakuka, kasi wa tincece ta Majarimani hakanyingi a wu sungula hi mpfumawulo wa le henhla kutani wu hunguteka. Tincece leti hinkwato a ti tekelela mimpfumawulo leyi fanaka ni ya ririmi ra vatswari va tona. Hikwalaho ka sweswo, va pfumela leswaku vuswikoti byo dyondza ririmi byi sungula embelekweni naswona tincece ti sungula ku dyondza ririmi hi ku rila ka tona ko sungula.