Ta Rivala

Ndzawulo ya Timhaka ta Vukhongeri eSerbia yi amukele xikombelo xo tsarisa nhlangano wa le nawini lowu yimelaka Timbhoni ta Yehovha. Hi ku ya hi tirhekhodo ta hulumendhe, Timbhoni ta Yehovha ti sungule ku va kona etikweni rero hi va-1930.

Ku ringanyetiwa leswaku 95 wa tiphesente ta vuyimbeleri lebyi kopiweke eka Internet emisaveni hinkwayo hi 2009 a byi nga ri enawini.—MAGAZINI WA TIME, WA LE U.S.A.

Ku Tsekatseka Ka Misava—“Timhangu Leti Dlayaka Vanhu Vo Tala Swinene

United Nations International Strategy for Disaster Reduction leyi ntsindza wa yona wu nga eGeneva, eSwitzerland yi ri: “Ku tsekatseka ka misava ku vange timhangu leti dlayeke vanhu vo tala swinene eka malembe ya khume lama hundzeke.” Eka vanhu lava feke hikwalaho ka timhangu enkarhini lowu, lava lavaka ku endla tiphesente ta 60 va dlayiwe hi ku tsekatseka ka misava. “Mhangu [leyi] ya ntumbuluko” yi hambeta yi xungeta vutomi bya vanhu, tanihi leswi madoroba ya nhungu eka ya khume lama nga ni vaaki vo tala emisaveni hinkwayo ma nga endhawini leyi talaka ku va ni ku tsekatseka ka misava. Eka malembe ya khume lama hundzeke, vanhu lava tlulaka 780 000 va dlayiwile eka timhangu ta 3 852.

Ntirho Lowu Nga Ni Khombo

Nhlangano wa Misava Hinkwayo wa Vuhaxi lowu ntsindza wa wona wu nga eVienna, eAustria wu vule leswaku “vateki va mahungu va 110 va dlayiwile hikwalaho ka ntirho wa vona hi 2009, leswi endleke leswaku n’wexemu ku va lembe leri veke ni mafu yo tala eka malembe ya khume lama hundzeke” eka ntirho lowu. Xiviko xi vula leswaku emalembeni ya sweswinyana vanhu va va va lava “ku dlaya vateki va mahungu hi vomu” ematikweni lawa ku lwiwaka eka wona yo fana ni Afghanistan, Iraq, Pakistan na Somalia. Sweswo swi endle leswaku vateki va mahungu va tsandzeka ku haxa ro tala naswona “va nga koti ku twisisa . . . swiendlakalo leswi rharhanganeke” ematikweni wolawo. Eka malembe ya khume lama hundzeke Iraq a ku ri rona tiko leri nga ni khombo ngopfu eka vateki va mahungu, ri landzeriwa hi Philippine, Colombia, Mexico na Rhaxiya.

Switirhisiwa Swo Chipa Leswi Humaka eMatikweni Man’wana Swi Hungute Vukhamba

Xiviko xa mahungu ya Reuters lexi humaka eLondon, lexi tshahaka James Treadwell, mudyondzisi wa dyondzo ya swa vugevenga eYunivhesiti ya Leicester, eNghilandhi xi ri: “Ku rhumeriwa ka switirhisiwa swa elektroniki swo chipa” swi nga ha hunguta vukhamba eBritain.” Hi xikombiso, leswi michini leyintshwa yo tlanga ti-DVD yi xaviwaka hi mali ya le hansi swinene swi vula leswaku makhamba a ma vuyeriwi loko ma yi xavisa. Treadwell u vule leswaku “a swi pfuni nchumu ku yi yiva.” Hambiswiritano, ku hungutiwa ka nxavo wa switirhisiwa leswi a swi herisanga vugevenga. Ematshan’weni ya sweswo, sweswi makhamba ma yiva swilo leswi durhaka ngopfu ni leswi xavisekaka hi ku olova, ‘swo fana ni tiselfoni ni ti-iPod, leti vanhu va tshamaka va ti khomile.’ Xisweswo, makhamba ya khale se ma endla vugevenga byin’wana byo fana ni ku tekela vanhu swilo swa vona.