Langutelo Ra Bibele

Xana Xikwembu Xi Kun’wana Ni Kun’wana?

VANHU vo tala va tshemba leswaku Xikwembu xi tshama xi ri kun’wana ni kun’wana naswona xi le ka nchumu wun’wana ni wun’wana. Solomoni Hosi yo tlhariha u kombele Yehovha, a ku: “Onge wena u nga swi twa u ri ematilweni, ndhawu ya wena yo tshama eka yona.” (1 Tihosi 8:30, 39) Hikwalaho, hi ku ya hi Bibele Yehovha Xikwembu u ni ndhawu leyi a tshamaka eka yona. Solomoni u vule leswaku ndhawu yoleyo hi le “matilweni.” Kambe sweswo swi vula yini?

Minkarhi yin’wana Bibele yi tirhisa rito leri nge “matilo” ni leri nge “ematilweni” leswaku yi kombisa swilo swa xiviri leswi rhendzeleke misava. (Genesa 2:1, 4) Hambiswiritano, leswi Xikwembu xi tumbuluxeke swilo hinkwaswo, ndhawu leyi xi tshamaka eka yona yi ve kona xi nga si vumba swilo hinkwaswo. Xisweswo, Xikwembu xi hanya endhawini leyi nga rhendzeriwangiki hi swilo leswi hi nga kotaka ku swi vona. Hikokwalaho, loko Bibele yi vulavula hi matilo tanihi ndhawu leyi Yehovha Xikwembu a tshamaka eka yona, a yi kombeteli eka ndhawu yo karhi ya le matilweni kumbe exibakabakeni kambe yi va yi kombetela eka xivandla xa moya.

Xivono Lexi Hlamarisaka

Bibele yi hi nyika nhlamuselo leyi tsakisaka malunghana ni ndhawu leyi Yehovha a tshamaka eka yona, leyi kumekaka eka xivono lexi kombiweke muapostola Yohane. Exivonweni xexo, Yohane u vone rivanti ri pfuleka ematilweni kutani a twa rito ri ku eka yena: “Tlhandlukela haleno.”—Nhlavutelo 4:1.

Tlhandlakambirhi, Yohane u vone xivono lexi hlamarisaka xa Yehovha Xikwembu hi byakwe. Hi ku komisa u vone leswi: “A ku ri ni xiluvelo endhawini ya xona etilweni . . . Loyi a tshameke a a languteka ku fana ni ribye ra yaspere ni ribye ra risima ra muhlovo wo tshwuka, naswona ku ni nkwangulatilo lowu rhendzeleke xiluvelo, lowu langutekaka ku fana ni emeralda. . . . Exiluvelweni a ku humetela rihati ni marito ni ku dzindza ka tilo . . . Naswona emahlweni ka xiluvelo ku ni lwandle ro kota nghilazi leri fanaka ni kristala.”—Nhlavutelo 4:2-6.

Leyi i nhlamuselo leyi twalaka leyi kombisaka leswaku ndhawu leyi Yehovha a tshamaka eka yona yi xonge ngopfu naswona a yi nge pimanisiwi na nchumu. Nakambe xiya swilo leswi rhendzeleke xiluvelo xa Yehovha. Nkwangulatilo wu kombisa ku rhula. Rihati, mpfumawulo wa marito ni ku dzindza ka tilo swi kombisa matimba ya Xikwembu. Ku vangama ka lwandle swi kombisa ku tenga ka vanhu hinkwavo lava nga emahlweni ka Xikwembu.

Hambileswi swilo leswi swi hlamuseriweke eka xivono lexi swi nga swo fanekisela, swi hi byela swo tala malunghana ni ndhawu leyi Xikwembu xi tshamaka eka yona. Yehovha u hambeta a hlela swilo hi ndlela leyinene ematilweni. Ndhawu yakwe a yi na mpfilumpfilu.

Xana I Ntiyiso Leswaku Xikwembu Xi Kona Kun’wana Ni Kun’wana Minkarhi Hinkwayo?

Mhaka ya leswaku Yehovha u ni ndhawu leyi a tshamaka eka yona, yi kombisa leswaku a nga kumeki kun’wana ni kun’wana minkarhi hinkwayo. Loko swi ri tano, xana a nga swi tivisa ku yini swilo leswi humelelaka? (2 Tikronika 6:39) Ndlela yin’wana leyi a yi tirhisaka i moya lowo kwetsima kumbe matimba lama tirhaka. Mupisalema u tsale a ku: “Xana ndzi nga ya kwihi ndzi balekela moya wa wena, naswona ndzi nga ya kwihi ndzi balekela xikandza xa wena? Loko ndzo tlhandlukela etilweni, u ta va u ri kona; loko ndzo andlala sangu ra mina eSheol, waswivo, u ta va u ri kona.”—Pisalema 139:7-10.

Leswaku hi twisisa ndlela leyi moya lowo kwetsima wa Xikwembu wu tirhaka ha yona evuakweni hinkwabyo, anakanya hi dyambu. Ri tshama endhawini yin’we, kambe ri kota ku voninga emisaveni hinkwayo. Hilaha ku fanaka Yehovha Xikwembu u ni ndhawu leyi a tshamaka eka yona. Kambe a nga endla xin’wana ni xin’wana lexi a xi rhandzaka evuakweni hinkwabyo. Tlhandlakambirhi, Yehovha a nga tirhisa moya wakwe lowo kwetsima leswaku a vona nchumu wun’wana ni wun’wana lowu humelelaka kun’wana ni kun’wana hi nkarhi wihi na wihi. Ku engetela kwalaho, 2 Tikronika 16:9 yi ri: “Loko ku ri Yehovha, mahlo yakwe ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.”

Nakambe Xikwembu xi ni swivumbiwa swa moya leswi xi swi lawulaka, ku nga tintsumi. Bibele yi vula leswaku swivumbiwa sweswo swi nga fika eka madzana ya timiliyoni—tibiliyoni kumbe ku tlula.a (Daniyele 7:10) Rungula ra Bibele ri ni swikombiso swo hlayanyana leswi kombisaka laha tintsumi ti tirheke tanihi vayimeri va Xikwembu, ivi ti ta laha misaveni ti ta vulavula ni vanhu naswona ti tlhela ti ya vikela Xikwembu. Hi xikombiso, hi nkarhi wa Abrahama tintsumi ti kambisise xivilelo lexi a xi ri kona emutini wa Sodoma na Gomora. Swi le rivaleni leswaku Xikwembu xi hlawule ku lovisa miti yoleyo endzhaku ko kuma xiviko lexi humaka eka tintsumi teto.—Genesa 18:20, 21, 33; 19:1, 13.

Hikokwalaho, Bibele yi kombisa leswaku a xi kona xilaveko xo va Yehovha Xikwembu a kumeka hinkwako-nkwako. Hi ku tirhisa moya wakwe lowo kwetsima swin’we ni tintsumi, u kota ku tiva nchumu wun’wana ni wun’wana lowu humelelaka eka swivumbiwa swakwe.

Entiyisweni Bibele yi nga hi pfuna leswaku hi n’wi tiva ku antswa Muvumbi wa hina. Eka yona hi dyondza leswaku Xikwembu xi tshama ematilweni, ku nga ndhawu ya moya ku nga ri matilo lawa hi ma vonaka. Kwalaho xi tshama ni timiriyadi ta swivumbiwa swa moya leswi nga ni matimba. Naswona ndhawu leyi xi tshamaka eka yona yi rhurile, yi tlakukile naswona yi tengile. Bibele ya hi tiyisekisa leswaku hi nkarhi lowu faneleke vanhu va ta tsakela ku hanya laha misaveni leyi nga ta va yi ri ni ku rhula hilaha swi nga ha kona etilweni.—Matewu 6:10.

[Nhlamuselo ya le hansi]

XANA U TSHAME U TIVUTISA?

● Xana Xikwembu xi kun’wana ni kun’wana?—1 Tihosi 8:30, 39.

● Xana moya wa Xikwembu wu nga fika kwihi?—Pisalema 139:7-10.

[Marito lama tshahiweke exihlokweni lama nga eka tluka 29]

Dyambu ri yime endhawini yin’we kambe ri kota ku voninga endhawini leyikulu swinene. Hilaha ku fanaka Xikwembu xi ni ndhawu leyi xi tshamaka eka yona kambe moya wa xona lowo kwetsima wu nga fika kun’wana ni kun’wana laha xi lavaka kona evuakweni hinkwabyo