Langutelo Ra Bibele

Xana Xikwembu Xi Kumeka Kun’wana Ni Kun’wana?

XIKWEMBU xi hlamuseriwa kahle tanihi lexi nga ni matimba hinkwawo ni lexi tivaka hinkwaswo. Hambiswiritano, loko va ringeta ku hlamusela vukulu bya Xikwembu ku ya emahlweni, van’wana va engetela nhlamuselo leyi nge—loyi a kumekaka kun’wana ni kun’wana. Va kholwa leswaku Xikwembu xi kumeka kun’wana ni kun’wana hi nkarhi wun’we.

Hambileswi tinhlamuselo leti ti nga kumekiki eBibeleni, leto sungula ti seketeriwa kahle hi tidyondzo ta Matsalwa. (Genesa 17:1; Vaheveru 4:13; Nhlavutelo 11:17) Kunene, Xikwembu xi ni matimba hinkwawo ni vutivi lebyi heleleke hikuva ku hava nchumu lowu xi nga wu voniki. Xana Xikwembu xi kumeka kun’wana ni kun’wana kumbe i munhu la nga ni ndhawu yo karhi leyi a tshamaka eka yona?

Xikwembu Xi Tshama Kwihi?

Etindzimaneni to hlayanyana ta Bibele, “matilo” ma hlamuseriwa tanihi “ndhawu ya [Xikwembu] yo tshama eka yona.” (1 Tihosi 8:39, 43, 49; 2 Tikronika 6:33, 39) Hambiswiritano, nhlamuselo yin’wana ya Bibele yi hlamusela vukulu bya Yehovha Xikwembu hi marito lama landzelaka: “Xana entiyisweni Xikwembu xi nga tshama ni vanhu emisaveni? Waswivo! Tilo, ina, tilo ra matilo a ri nge ku ringani.”—2 Tikronika 6:18.

Bibele yi ri: “Xikwembu i Moya.” (Yohane 4:24) Hikwalaho, xi tshama exivandleni xa moya lexi nga lawuriwiki hi vuako. Loko Bibele yi vulavula hi “matilo” tanihi ndhawu leyi Xikwembu xi tshamaka eka yona, yi kombetela eka ku tlakuka ka ndhawu leyi xi tshamaka eka yona leswaku yi hambane ni ndhawu leyi hi tshamaka eka yona. Phela, minkarhi yo tala Bibele yi dyondzisa leswaku vutshamo bya Xikwembu, byi hambane ngopfu ni vuako kambe hi hala tlhelo yi vulavula hi ndhawu yo karhi leyi xi tshamaka eka yona.—Yobo 2:1, 2.

Xikwembu I Munhu

Yesu u vulavule hi ndhawu leyi Yehovha a tshamaka eka yona loko a byela vadyondzisiwa vakwe a ku: “Endlwini ya Tatana ku ni vutshamo byo tala. . . . Ndzi ya mi lunghiselela ndhawu.” (Yohane 14:2) Xana Yesu u kongome kwihi? Eku heteleleni, u “nghenile . . . etilweni hi koxe, kutani a humelela emahlweni ka Xikwembu hi xiviri hikwalaho ka hina.” (Vaheveru 9:24) Mhaka leyi yi hi dyondzisa tinhla timbirhi ta nkoka hi Yehovha Xikwembu. Yo sungula, u ni vutshamo bya xiviri, ya vumbirhi, i munhu, ku nga ri matimba lama nga hlamuselekiki lama kumekaka kun’wana ni kun’wana.

Hi yona mhaka leyi Yesu a dyondziseke valandzeri vakwe leswaku va khongela va ku: “Tata wa hina la nge matilweni,” va kongomisa swikhongelo swa vona eka munhu, ku nga Yehovha, loyi a nga endhawini ya moya leyi vuriwaka matilo. (Matewu 6:9; 12:50) Dyondzo leyi a yi hundzukanga eka ndlela leyi vanhu va Xikwembu va dyondzisiweke ha yona ku khongela kwalomu ka malembe ya 1 500 lama hundzeke. Matsalwa ya khale swinene lama huhuteriweke hi Xikwembu ma tamele xikhongelo lexi landzelaka: “Languta ehansi u ri endhawini ya wena yo kwetsima leyi u tshamaka eka yona, ku nga matilo, u katekisa vanhu va wena.”—Deteronoma 26:15.

Moya Wo Kwetsima Wa Xikwembu Lowu Fikaka Kun’wana Ni Kun’wana

Hambileswi minkarhi yo tala Bibele yi vulavulaka hi ndhawu leyi Xikwembu xi tshamaka eka yona, yi tlhela yi vulavula hi moya wa xona lowo kwetsima tanihi lowu kumekaka kun’wana ni kun’wana. Mupisalema Davhida u vutise a ku: “Xana ndzi nga ya kwihi ndzi balekela moya wa wena, naswona ndzi nga ya kwihi ndzi balekela xikandza xa wena?” (Pisalema 139:7) Van’wana va pfilunganyiwe hi matsalwa yo tano kutani va nga ha vula leswaku Xikwembu xi kumeka kun’wana ni kun’wana. Kambe loko ku kambisisiwa mongo wa nhlamuselo leyi ni tindzimana tin’wana, swi va erivaleni leswaku moya wa Yehovha lowo kwetsima—kumbe matimba lama tirhaka—wu nga rhumeriwa hi yena endhawini yin’wana ni yin’wana evuakweni.

Ku fana na tatana loko a tshambuluta voko a vukarha vana vakwe, Yehovha na yena u tshambuluta voko ra yena—kumbe moya lowo kwetsima—exivandleni xa moya kumbe evuakweni leswaku wu hetisisa xikongomelo xa yena. Hi yona mhaka leyi mupisalema a yimbeleleke a ku: “Loko ndzo teka timpapa ta vurhonga, leswaku ndzi ta tshama elwandle leri nga ekule ngopfu, ni kwalaho voko ra wena ri ta ndzi kongomisa naswona voko ra wena ra xinene ri ta ndzi khoma.”—Pisalema 139:9, 10.

U Nga Va Munghana Wa Xikwembu

Hi ku titsongahata, Yehovha Xikwembu u pfumelela leswaku yena swin’we ni ndhawu leyi a tshamaka eka yona yi vitaniwa hi ndlela leyi vanhu va vulavulaka ha yona leyi fambisanaka swinene ni xiyimo xakwe. Hikwalaho ka sweswo, swi fana niloko a ‘korhamile a languta etilweni ni le misaveni.’ (Pisalema 113:6) Kambe, vanhu va nge pfuki va fane ni Xikwembu.

Yehovha u tlakukile swinene naswona u hlamarisa ngopfu lerova swa tika swinene ku n’wi hlamusela kahle hi ndlela leyi vanhu va vulavulaka ha yona. Kutani ke, hambileswi Matsalwa ma vulavulaka hi vutshamo byakwe bya le tilweni tanihi xivandla xo karhi, vanhu a va nge swi twisisi hi xitalo hi tlhelo ra moya.—Pisalema 139:6.

Hambiswiritano, swa chavelela ku twisisa Yehovha hi xiviri, ku xiya leswaku a hi munhu la nga hlamuselekiki kumbe matimba lama kumekaka kun’wana ni kun’wana evuakweni. Kambe i munhu loyi a tshamaka endhawini yo karhi naswona u ni timfanelo to tanihi rirhandzu ni ntwela-vusiwana. Vutivi byo tano byi pfulela vo tala ndlela yo va ni vutomi lebyi nga heriki ni ku va ni vunghana ni Lowa Matimba Hinkwawo evuakweni.—Yakobo 4:8.