Langutelo Ra Bibele

Leswi Endlaka Marito Ya Wena Ma Va Ya Nkoka

Loko vanhu va ri karhi va tibulela endzhaku ka nhlengeletano, holobye-nkulu loyi a a nga swi xiyi leswaku xikurisa-marito a xi si timiwa, u vitane wansati la dyuhaleke loyi a ku ri ro sungula a n’wi vona kutani a sungula ku gungula a vula leswaku vatirhi vakwe a va fanele va nga n’wi vitananga mukhegula loyi. Loko vanhu va twa sweswo va tsemeke nhlana. Tanihi leswi a ti onheleke vito, a nga winanga eka nhlawulo lowu veke kona endzhaku ka masiku ya nhungu.

A KU na munhu la nga kotaka ku lawula ririmi rakwe hi ndlela leyi hetisekeke. (Yakobo 3:2) Hambiswiritano, xiendlakalo lexi nga laha henhla xi kombisa ndlela leyi leswi hi swi vulaka swi nga khumbaka van’wana ha yona. Ndhuma ya wena, leswi u navelaka ku swi endla evuton’wini ni vuxaka bya wena ni van’wana, swi titshege hi ndlela leyi u vulavulaka ha yona.

Xana wa swi tiva leswaku leswi u swi vulaka swi va khumba ku fikela kwihi van’wana? Bibele yi vula leswaku leswi u swi vulaka swi kombisa leswaku u munhu wa njhani. Yesu u te: “Nomu wu vulavula leswi mbilu yi taleke swona.” (Matewu 12:34) I swa nkoka ku xiyisisa leswi u swi vulaka hikuva swi kombisa ndlela leyi u titwaka ha yona ni leswi u swi ehleketaka. Xana Bibele yi nga pfuna emhakeni leyi? Xiya tinhla leti landzelaka.

Ndlela Yo Antswisa Ndlela Leyi U Vulavulaka Ha Yona

Loko munhu a nga si vulavula u rhanga hi ku ehleketa. Leswaku u antswisa leswi u swi vulaka, u fanele u kambisisa u tlhela u antswisa ndlela leyi u ehleketaka ha yona. Xiya ndlela leyi ku tirhisa Rito ra Xikwembu swi nga swi khumbaka ha yona leswi u swi ehleketaka ni leswi u swi vulaka.

Nghenisa swilo leswinene embilwini ya wena. Loko Bibele yi hlamusela swilo sweswo leswinene yi ri: “Xo hetelela, vamakwerhu, swilo swin’wana ni swin’wana swa ntiyiso, swilo swin’wana ni swin’wana swa ntikelo lowukulu, swilo swin’wana ni swin’wana swo lulama, swilo swin’wana ni swin’wana swo tenga, swilo swin’wana ni swin’wana leswi rhandzekaka, swilo swin’wana ni swin’wana leswi ku vulavuriwaka kahle ha swona, hinkwaswo leswi nga kona swa vunene ni hinkwaswo leswi nga kona leswi dzunekaka, hambetani mi xiya swilo leswi.”—Vafilipiya 4:8.

Ku tirhisa ndzayo leyi swi ta ku pfuna leswaku u bakanya miehleketo leyi nga riki yinene. Tsundzuka leswaku leswi u swi vonaka ni leswi u swi hlayaka hi swona leswi u ehleketaka ha swona. Kutani leswaku u papalata miehleketo leyi nga basangiki, u fanele u fambela ekule ni swilo leswi nga pfuniki nchumu. Sweswo swi vula ku papalata vuhungasi lebyi katsaka madzolonga ni nhlambha. (Pisalema 11:5; Vaefesa 5:3, 4) Ematshan’weni ya sweswo, dzikisa mianakanyo ya wena eka swilo leswi baseke ni leswinene. Bibele yi nga ku pfuna leswaku u endla tano. Hi xikombiso, hlaya Swivuriso 4:20-27; Vaefesa 4:20-32 na Yakobo 3:2-12. Kambisisa ndlela leyi ku tirhisa Matsalwa lawa swi nga ku pfunaka ha yona leswaku u antswisa leswi u swi vulaka.a

Anakanyisisa hileswi u nga ta swi vula. Swivuriso 12:18 yi ri: “U kona la vulavulaka handle ko anakanya ku fana ni ku tlhava ka banga, kambe ririmi ra lavo tlhariha ra horisa.” Loko u xiya leswaku minkarhi yo tala u “tlhava” van’wana hi marito, swi ta ku pfuna ku rhanga hi ku anakanyisisa loko u nga si vulavula. Tirhisa ndzayo ya vutlhari leyi nga eka Swivuriso 15:28 leyi nge: “Mbilu ya lowo lulama ya anakanyisisa leswaku a ta hlamula; kambe nomu wa lavo homboloka wu phyaphyarha swilo swo biha.”

Ringeta ku tivekela pakani. Eka n’hweti leyi landzelaka, ringeta ku tikhoma leswaku u nga vuli marito yo sungula lawa u ma ehleketaka, ngopfu-ngopfu loko u hlundzukile. Ematshan’weni ya sweswo, tsundzuka Matsalwa lama nga eka xihloko lexi kutani u tikarhata leswaku u vulavula hi ndlela ya vutlhari, ya rirhandzu ni yo rhula. (Swivuriso 15:1-4, 23) Leswi a hi swona ntsena leswi u faneleke u swi endla.

Khongela u kombela Xikwembu xi ku pfuna. Mutsari un’wana wa Bibele u khongele a ku: “Marito ya nomu wa mina ni ku anakanyisisa ka mbilu ya mina a ku tsakise emahlweni ka wena, Wena Yehovha.” (Pisalema 19:14) Byela Yehovha Xikwembu leswaku u navela ku tirhisa ririmi ra wena hi ndlela leyi nga ta n’wi tsakisa naswona yi nga ta tlhela yi endla leswaku vanhu van’wana va swi tsakela ku tshama na wena. Swivuriso 18:20, 21 yi ri: “Vula marito lamanene—sweswo swi ta ku tsakisa. Marito ma nga tisa vutomi kumbe rifu!”—Contemporary English Version.

Tirhisa Rito ra Xikwembu tanihi xivoni. Bibele yi fana ni xivoni lexi u nga tilangutaka eka xona. (Yakobo 1:23-25) Hi xikombiso, loko u ri karhi u anakanyisisa hi milawu yinharhu ya Bibele leyi landzelaka, tivutise, ‘Xana ndlela leyi ndzi vulavulaka ha yona yi njhani?’

“Loko nhlamulo yi olova, yi tlherisa vukarhi, kambe rito leri tlhavaka ri pfuxa ku hlundzuka.” (Swivuriso 15:1) Xana u vulavula hi ndlela yo rhula?

“Rito ro bola ri nga humi enon’wini wa n’wina, kambe a ku hume rito rin’wana ni rin’wana lerinene leri akaka hi ku landza xilaveko xa kona, leswaku ri nghenisa leswi tsakisaka eka lava swi twaka.” (Vaefesa 4:29) Xana marito ya wena ma va aka lava nga ekusuhi na wena?

“Marito ya n’wina a ma ve ni nsovo nkarhi hinkwawo, ma lungiwe hi munyu, leswaku mi tiva ndlela leyi mi faneleke ku hlamula un’wana ni un’wana ha yona.” (Vakolosa 4:6) Xana wa ringeta ku endla leswaku marito ya wena ma va ni nsovo naswona ma va khoma kahle lava ma twaka, hambiloko u hlundzukile?

Loko u lulamisa swihoxo leswi u swi vonaka exivonini, u ta languteka eka van’wana u tlhela u titwa u ntshunxekile. Ku ta endleka leswi fanaka loko u antswisa ndlela leyi u vulavulaka ha yona hi ku tirhisa xivoni lexi, ku nga Rito ra Xikwembu.

[Nhlamuselo ya le hansi]

XANA U TSHAME U TIVUTISA?

● Xana leswi u swi vulaka swi kombisa yini ha wena?—Luka 6:45.

● U fanele u vulavula njhani ni vanhu van’wana?—Vaefesa 4:29; Vakolosa 4:6.

● I yini leswi u nga swi endlaka leswaku u antswisa ndlela leyi u vulavulaka ha yona?—Pisalema 19:14; Vafilipiya 4:8.

[Xifaniso lexi nga eka tluka 11]

Leswi hi swi vulaka swi khumba ndhuma ya hina ni vuxaka lebyi hi nga na byona ni vanhu van’wana