Hi Lava Leswaku Ku Xaniseka Ku Herisiwa!
Khieu u sungule ku xaniseka endzhaku ka loko ku dlayiwe tata wakwe hileswi a tshikeke tihomu ti nghena ensin’wini ya mavele leyi a yi ri ekusuhi ni laha a a tshama kona. Hi ku famba ka nkarhi, mana wakwe ni sesi wakwe va dlayiwe hi ntlawa wa makhomunisi wa le Cambodia lowu vuriwaka Khmer Rouge. Endzhaku ka sweswo, Khieu u vavisiwe hi bomo leyi fuhlekiweke. U tshame masiku ya 16 enhoveni a ha yimele ku pfuniwa. Nenge wakwe a wu fanele wu tsemiwa. Khieu u te: “A ndzi vona ku fa swi antswa.”
SWI nga ha endleka u swi xiyile leswaku ku xaniseka a ku hlawuli. Timhangu ta ntumbuluko, mavabyi, ku lamala, vugevenga ni timhangu tin’wana swi nga hlasela vanhu hinkwavo va nga swi langutelanga. Minhlangano yo phalala yi tirhe hi matimba leswaku yi sivela kumbe ku pfuna vanhu lava xanisekaka. Kambe, xana matshalatshala ya yona ma ve ni vuyelo byihi?
Xiya xikombiso lexi—ku lwisana ni ndlala. Phepha-hungu ra Toronto Star ri vula leswaku timhangu ta ntumbuluko ti siye vanhu vo tala va nga ri na makaya ni swakudya. Ri tlhele ri vula leswaku “matshalatshala lama endliwaka hi minhlangano leyi pfunetaka ku hunguta ndlala a ma vonaki hikwalaho ka ku andza ka madzolonga.”
Varhangeri va tipolitiki, va ta ntshamisano ni vutshunguri va ringetile ku hunguta ku xaniseka kambe ko fana ni kwala! Minongonoko yo antswisa xiyimo xa ikhonomi yi tsandzekile ku herisa vusweti. Mirhi yo tlhavela, tiphilisi ni michini ya xiyimo xa le henhla yo endla vuhandzuri a swi nge swi koti ku herisa vuvabyi hinkwabyo. Maphorisa ni vakondleteri va ku rhula vo khondla mavoko va tilangutela loko vugevenga byi ya byi andza.
Ha yini ku ri ni ku xaniseka konghasi? Xana Xikwembu xi ni mhaka ni ku xaniseka ka vanhu? Timiliyoni ta vanhu ti kume tinhlamulo ta swivutiso leswi eBibeleni, hilaha hi nga ta swi vona hakona.