Nchumu Wa Nkoka Eka Mbilu Ni Rihanyo

“Mbilu yo rhula i vutomi bya xivumbiwa xa nyama lexi hanyaka.”—SWIVURISO 14:30.

“Mbilu leyi tsakeke i muhanyisi lonene.”—SWIVURISO 17:22.

● Marito wolawo lama khumbaka mbilu ma vuriwe hi Hosi Solomoni wa le Israyele eka malembe ya 3 000 lama hundzeke.a Kambe, xana marito wolowo i ntiyiso? I yini leswi madokodela ma swi vulaka?

Loko Journal of the American College of Cardiology yi vulavula hi vanhu vo rhula ni lava hatlaka va hlundzuka yi te: “Mindzavisiso leya ha ku endliwaka yi kombisa leswaku vanhu lava tshamaka va hlundzukile va tala ku khomiwa hi vuvabyi bya mbilu [CHD (coronary heart disease)].” Kambe magazini lowu wu tlhele wu ku: “Ku sivela ni ku tshungula vuvabyi bya mbilu hi ndlela leyinene a swi katsi . . . ku tshungula munhu hi ku tirhisa mirhi ni tiphilisi ntsena kambe ni ndlela leyi munhu a titwaka ha yona hi ku hlundzuka ni rivengo.” Hakunene mbilu yo rhula yi endla leswaku munhu a va ni rihanyo lerinene hilaha Bibele yi vulaka hakona.

Ku endlaka leswi fanaka loko munhu a tshama a tsakile. Loko Dok. Derek Cox, mutivi wa rihanyo wa le Scotland a vulavula eka xiviko xa mahungu xa BBC u te: “Loko u tshama u tsakile a swi nge olovi leswaku u khomiwa hi mavabyi ku fana ni vanhu lava tshamaka va hlundzukile.” U tlhele a ku: “Vanhu lava tshamaka va tsakile a va tali ku karhatiwa hi vuvabyi bya mbilu ni byo oma swirho.”

I yini leswi endlaka leswaku vutlhari bya Solomoni—loko hi nga katsi bya vatsari lavan’wana va Bibele—byi va bya nkoka namuntlha? Nhlamulo ya kona ya olova. “Xikwembu xi ya emahlweni xi nyika Solomoni vutlhari ni ku twisisa hi mpimo lowukulu.” (1 Tihosi 4:29) Ku tlula kwalaho, vutlhari byebyo byi tsariwe hi ndlela yo olova leswaku vanhu hinkwavo va ta vuyeriwa naswona i mahala!

Hikwalaho, u ta vuyeriwa swinene loko u swi endla mukhuva ku hlaya Bibele siku ni siku. Tanihi leswi vanhu va timiliyoni ana se va kumaka ntsako lowukulu, “loko vutlhari byi nghena embilwini ya wena ni vutivi byi tsakisa moya-xiviri wa wena, vuswikoti byo ehleketa byi ta ku rindza, ku twisisa ku ta ku hlayisa.” (Swivuriso 2:10, 11) Leswi swa chavelela hakunene!

[Nhlamuselo ya le hansi]