“Tsalelani Anton Mapapila!”
● Anton, jaha leri nga Mbhoni ya Yehovha leri nga emalembeni ya kondlo-a-ndzi-dyi a ri tshama eximutanini lexi nga xoxe xa Schelkan eStavropol’ Kray le Rhaxiya. Loko a ha ri ntsongo u khomiwe hi vuvabyi lebyi tsanisaka misiha lebyi nga tshungulekiki naswona hakanyingi byi dlaya munhu a nga si fika emalembeni ya 20. Loko Anton a ri ni malembe ya kaye, a a nga ha swi koti ku famba hambi ku ri yima.
Yevgeny ni nsati wakwe Diana va hlangane na Anton loko va endzela vandlha ra Timbhoni. Diana u ri: “Anton a a lamarile swinene, kambe a a tiyile hi tlhelo ra moya. Leswi buti wakwe a dlayiweke hi vuvabyi lebyi fanaka loko a ri ni malembe ya 19, Anton na yena a a swi tiva leswaku a nge hanyi nkarhi wo leha. Kambe a a tsakile naswona a a ri ni ntshembo hi vumundzuku.”
Diana ni nuna wakwe va khutaze Anton leswaku a engetela nkarhi lowu a wu hetaka a ri karhi a chumayela. Va n’wi byele leswaku a tsala mapapila, a tsalela vanhu lava tshamaka eswimitanini leswi nga swoxe. Hi 2005, u tsale mapapila ya kwalomu ka 500 kutani a ma rhumela eka swimitana leswi nga ekusuhi ni laha a a tshama kona. Kambe lexi n’wi heteke matimba hileswaku a ku hlamulanga munhu. Hambileswi a a hele matimba, u ye emahlweni a tsala mapapila naswona u khongele hi mbilu hinkwayo a kombela nkongomiso malunghana ni ndlela leyi a nga wu engetelaka ha yona nkarhi lowu a wu hetaka a ri karhi a chumayela ku nga khathariseki xiyimo xakwe.
Siku rin’wana loko Anton a ri eku hlayeni ka phepha-hungu u vone papila leri tsariweke hi wansati loyi a a vabya naswona a a lava ku chaveleriwa. Anton u n’wi tsalele papila naswona marito man’wana lama tshahiweke eka phepha-hungu rero hi lawa: “Hambileswi vuvabyi bya mina byi nga tshungulekiki, ku hlaya Bibele swi ndzi pfuna leswaku ndzi langutela vumundzuku ndzi ri ni ntshembo. Ndza swi rhandza ku tsaleriwa mapapila naswona ndzi tshama ndzi ma languterile.”
Papila leri ri n’wi khumbe swinene wansati loyi lerova a hlamula eka phepha-hungu rero. Laha a ri tsariwe kona a ku ri ni nhloko-mhaka leyi nge “Tsalelani Anton Mapapila!” U kombise ku tlangela ka yena xikhutazo xo hlaya Bibele lexi a xi ri eka papila ra Anton, naswona u engetele a ku: “A hi pfuneni Anton! Hlamulani mapapila lawa a ma tsalaka mi tlhela mi n’wi tsalela. Jaha leri ri lava ku khutaziwa!” Magazini wolowo wu tlhele wu tsala ni adirese ya Anton.
Anton u sungule ku kuma mapapila eka poso leyitsongo leyi a yi ri endhawini ya ka vona naswona hi siku a a kuma mapapila ya kwalomu ka 30! Mapapila wolawo a ma huma etikweni hinkwaro ra Rhaxiya, ku katsa ni le Baltics, eJarimani ni le Furwa. U kume mapapila ya madzana eka vanhu lava a va hlaya phepha-hungu rero. Diana u ri: “A a nga tikoti hi ku tsaka. Sweswi se a a ri ni vanhu va madzana lava a nga va tsalelaka leswaku a va byela hi leswi a swi pfumelaka eBibeleni.”
Anton u hete lembe ni tin’hweti to karhi a ri karhi a burisana ni vanhu lava a va n’wi tsalela naswona u va byele hi ntiyiso lowu nga eBibeleni. Hakatsongo-ntsongo loko mavoko ya yena ma ya ma tsana, u sungule ku ma hlayela ehenhla mapapila yakwe. Anton u fe hi September 2008 a ri ni malembe ya 20. Hambileswi a a lamarile, ripfumelo rakwe ni ndlela leyi a a wu rhandza ha yona ntirho wo chumayela swi n’wi pfune leswaku a khumba timbilu ta vanhu va madzana.