Mindyangu Ya Vukati Bya Vumbirhi Leyi Humeleleke

A HO TSHAMA SWIN’WE NTSENA

Elise, n’wana wa nhwanyana wa Philip la nga ni malembe ya 20 a a tshama ni tata wakwe naswona a a endla mintirho yo tala ya le kaya. Endzhaku ka loko Philip a tekane na Louise, xana a swi ta koteka leswaku mana wa vumbirhi na Elise va va ni vuxaka lebyinene?

Louise: Eku sunguleni a swi tika. Ndzi rhandza ku tshama ekaya ndzi tiendlela mintirho ya le kaya.

Elise: Louise u fike a cinca yindlu hinkwayo a tlhela a lahla swilo swo tala leswi a hi ri na swona. Siku rin’wana ndzi tshame ndzi ringeta ku khweta, hiloko ndzi veka swin’wana endhawini leyi nga riki yona hikuva a ndzi nga swi tivi leswaku leswin’wana swi ye kwihi. Leswi swi hlundzukise Louise naswona swi hi holovisile, hiloko ndzi heta vhiki ndzi nga n’wi vulavurisi.

Louise: Siku rin’wana ndzi byele Elise ndzi ku, “A ndzi swi tivi leswaku se hi fanele hi endla yini, kambe a ndzi nge swi koti ku hanya hi ndlela leyi.” Hi madyambu ya siku rero u te a ta kombela ku rivaleriwa. Ndzi n’wi angarhile kutani havumbirhi hi rila.

Elise: Louise a nga swi susanga swifaniso swin’wana swa mina leswi a swi ri ekhumbini, naswona Tatana a nga ma susanga mavoni lawa a ndzi ma veke ekamareni leri hi dzumbaka eka rona. Swi nga ha twala swi nga nyawuli, kambe ku va va siye swilo sweswo swi endle ndzi swi vona leswaku yindlu leyi ndzi nga kulela eka yona a yi cincanga hi ku helela. Ndza yi tlangela swinene ndlela leyi Louise a yi khathalelaka ha yona ndzisana ya mina ya jaha loko yi hi endzerile. Se swi endla malembe mambirhi ndzi tshama na Louise naswona hi kona ndzi sungulaka ku n’wi teka tanihi xirho xa ndyangu wa ka hina.

Louise: Ndza swi vona leswaku mina na Elise a ho tshama swin’we ntsena, kambe se hi vanghana.

“KU RHULA I KA NKOKA SWINENE”

Anton a a ri ni vana vanharhu loko a tekana na Marelize eka malembe ya tsevu lama hundzeke naswona Marelize na yena a a ri ni vana vanharhu.

Anton: Hi teka masiku yo wisa hi ya dzima matende tanihi ndyangu naswona hi tinyika nkarhi wo va ni n’wana ha un’we. Swi hi tekele malembe yo hlayanyana leswaku hi titwa hi ri ndyangu wun’we, naswona swiphiqo swo tala leswi a hi langutana na swona swi tlhantlhekile.

Marelize: Hi swi vona swi ri swa nkoka ku teka vana hinkwavo tanihi va “hina” ku nga ri “va wena kumbe va mina.” Ndzi tsundzuka siku leri a ndzi hlundzukisiwe hi ku vona onge Anton a nga n’wi tshinyanga kahle un’wana wa vana va mina va majaha kutani a nyika n’wana wakwe wa nhwanyana xitulu xa le mahlweni emovheni. Ndzi dyondze leswaku ku rhula i ka nkoka swinene ku tlula ku tshama eka xitulu xa le mahlweni. Hi ringeta ku ringanisela, hambileswi swi nga oloviki ku va khoma hi ndlela leyi fanaka.

Hi hala tlhelo, ndzi ringeta ku nga vulavuli hi minkarhi yo tsakisa leyi hi tshameke hi va na yona ni ndyangu wa hina wo sungula, hikuva lava a va nga ri kona va nga titwa va pfaleriwe ehandle. Ematshan’weni ya sweswo, ndzi tlangela ndyangu lowu hi nga na wona sweswi.

“RHANGA HI KU BUMABUMELA”

Francis u tekane na Cecelia eka malembe ya mune lama hundzeke. Ndyangu wa vona wu vumbiwa hi vana vanharhu va Cecelia lava se va kuleke ni xifanyetana xa Francis lexi nga emalembeni ya kondlo-a-ndzi-dyi.

Francis: Ndzi ringeta ku va la nghenekaka naswona ndzi papalata ku hatla ndzi khunguvanyeka. Hi tala ku dya swin’we naswona hi tirhisa nkarhi wolowo ku bula tanihi ndyangu. Ndzi tlhela ndzi khutaza hinkwavo ku pfuneta eka mintirho ya le kaya tanihi leswi sweswo swi pfunaka ndyangu hinkwawo.

Cecelia: Ndzi tinyika nkarhi wo va ni n’wana ha un’we ni ku va nyika ndleve loko va ndzi byela leswi va chavisaka ni leswi va pfilunganyaka. Loko hi ri eku buleni tanihi ndyangu, hi ringeta ku rhanga hi ku bumabumela kutani hi vula laha hi faneleke hi antswisa kona. Loko ndzi endla swihoxo, ndza swi pfumela ndzi tlhela ndzi kombela ku khomeriwa.

KU KURISIWA HI VATSWARI VAMBIRHI LAVA NGA RIKI VA MINA

Yuki, la nga ni malembe ya 20, u hetelele ku vona tata wakwe loko a ri ni malembe ya ntlhanu. Hi ku famba ka nkarhi mana wakwe u tekane na Tomonori, kambe u fe loko Yuki a ri ni malembe ya khume. Endzhaku ka malembe ya ntlhanu, Tomonori, tata wakwe wa vumbirhi u tekane na Mihoko naswona Yuki u tikume se a tshama ni vatswari vambirhi lava nga riki va yena.

Yuki: Loko Tata wa mina wa vumbirhi a ndzi byela leswaku u lava ku tlhela a teka nsati un’wana, ndzi tibyele leswi, “A ndzi swi lavi ku va ni Mana wa vumbirhi. Se ku cince swo tala endyangwini wa ka hina.” A ndzi swi amukelanga sweswo naswona a ndzi n’wi khomanga kahle.

Mihoko: Hambileswi nuna wa mina a nga ndzi sindzisangiki leswaku ndzi teka n’wana wakwe wa jaha loyi a nga riki n’wana wakwe wa xiviri tanihi n’wana wa mina, ndzi ringete ku va ni vuxaka lebyinene na Yuki. Hi endle hinkwaswo leswi hi nga swi kotaka leswaku hi n’wi seketela eka ndlela leyi a toloveleke ku endla swilo ha yona, ku katsa ni swilo swa moya, ndlela leyi a tihungasaka ha yona ni ku lalela swin’we na yena hi tlhela hi bula na yena loko hi heta. Ndzi tlhele ndzi n’wi twisisa ku antswa endzhaku ka loko hi bule hi ndlela leyi a titwaka ha yona hikwalaho ko feriwa hi mana wakwe.

Endzhaku ka loko ndzi tikile a hi karhateka ngopfu hi Yuki naswona a hi lava leswaku na yena a titwa a ri xirho xa ndyangu. Hi n’wi pfumelele ku va a dyisa ricece ra hina, a ri hlambisa ni ku ri cinca lerhi naswona a hi n’wi bumabumela eka vanhu hikwalaho ka leswi a a swi endla. Ricece ra hina Itsuki ri kule ri n’wi rhandza ngopfu Yuki. Hambileswi a ri nga si ma tiva marito lama nge “papa” kumbe “mama,” a ri swi tiva ku vula rito leri nge niinii—leswi vulaka buti.

Yuki: I swa ntumbuluko ku titwa u ri ni xivundza loko u tshama ni vatswari lava nga riki va wena. U nga ha ringeta ku hlamusela van’wana xiyimo xa wena, kambe va nga swi twisisi. Ndza tsaka ku vula leswaku Vakreste-kulobye va ndzi seketerile swinene. Sweswi a ka ha ri na leswi ndzi vilerisaka hi mana wa mina wa vumbirhi. Wa ndzi tsundzuxa naswona ndza swi kota ku n’wi phofulela ta le mbilwini.

[Marito lama tshahiweke exihlokweni lama nga eka tluka 9]

Lehisa mbilu, mindyangu ya vukati bya vumbirhi yi nga va ni tsako yi tlhela yi humelela