Ku Tshembeka Swa Vuyerisa

“Xinkwa lexi kumiweke hi mavunwa xi tsakisa munhu, kambe endzhaku ka sweswo nomu wakwe wu ta tala rikhwarha.”—Swivuriso 20:17.

XANA swi lava leswaku munhu a va ni vukanganyisi leswaku swi ta n’wi fambela kahle etimhakeni ta mabindzu? Nikatsongo! Hakanyingi loko munhu a nga tshembeki u tivangela swiphiqo. Ha yini? Hikuva munhu la tshembekaka wa tshembiwa ku ri ni munhu la nga tshembekiki. Vutshembeki byi endla leswaku munhu a tshembiwa, ku nga mfanelo leyi nga ta endla leswaku swi n’wi fambela kahle evuton’wini.

Nkoka Wo Tshembeka

Ku tshembeka ka wena swi endla leswaku swilo swi ku fambela kahle—ku nga khathariseki leswaku wa swi xiya kumbe a wu swi xiyi. Ntokoto wa Franz loyi a tshahiweke exihlokweni lexi hundzeke wu kandziyisa yinhla leyi. U ri: “Loko ndzi sungula ku tirha, vathori va mina va ndzi kambele hi tindlela to tala ndzi nga swi xiyi, va lava ku vona leswaku ndzi tshembeka ku fikela kwihi. Endzhaku ka sweswo, hiloko ndzi kuma leswaku va swi vonile leswaku ndza tshembeka. Hikwalaho ka sweswo, ndzi nyikiwe vutihlamuleri lebyi engetelekeke ni ntshunxeko naswona vathori va mina va ndzi hakerile hikwalaho ko tshembeka ka mina. Ndza swi tiva leswaku va kona van’wana lava nga endlaka ntirho wa mina ku antswa ni lava nga tlhariha ku ndzi tlula. Ku tlula kwalaho, ndzi anakanya leswaku ntirho wa mina wu sirhelelekile hikwalaho ka leswi vathori va mina va ndzi tshembaka.”

Papalata Tindlela Leti Nga Ni Khombo

David, n’wamabindzu la boxiweke exihlokweni lexi nga hundza u te: “Loko ndzi vona vanhu va tlula milawu leswaku va tivuyerisa, ndzi tibyele leswi, ‘Hambiloko munhu a nga hatli a kumiwa, kambe siku rin’wana swi ta n’wi khela matluka.’ Hi marito man’wana, ku nga tshembeki swi ta hetelela swi ku vangele swiphiqo. Hi pfulekeriwe hi tindlela to tala to nghena eka mabindzu lama kanakanisaka kambe hi ti bakanyele etlhelo. Hi ku famba ka nkarhi, tikhampani to tala leti a ti katseka eka mabindzu wolawo ti nyamalarile naswona vanhu van’wana va gweviwile. Khampani ya hina yi ma papalatile makhombo wolawo.”

Loko Ken wa le dzonga-vuxa bya Afrika a simeke purasi ra tihomu, a a ta va a ringekile leswaku a fumbarherisa vatirhela mfumo leswaku a hatla a kuma leswi a swi xavaka ematikweni man’wana nileswaku a papalata ku hakela xibalo. U ri: “Vini va mapurasi yo tala va endle tano. Leswi hi endleke swilo hi ku tshembeka, swi hi tekele malembe ya khume leswaku purasi ra hina ri famba khwatsi. Xana leswi swi hi vuyerisile? Ina! Lava a va fumbarherisa a va tshamela ku karhatiwa hi vatirhela mfumo volavo lava a va koxa mali leyi engetelekeke.”

Ku Langutana Ni Swiphiqo Swa Ikhonomi

Loko bindzu ri koka exilogweni, swi nga ha ku veka ekhombyeni ro endla vukanganyisi. Hambiswiritano, swiyimo swo tano swi nga ha kombisa leswaku u swi teka swi ri swa nkoka ku fikela kwihi ku tshembeka.

Xiya xikombiso xa Bill loyi bindzu rakwe ro aka ri nga n’wi fambela ximatsi hi nkarhi lowu xiyimo xa ikhonomi a xi nga tsakisi le United States. U ri: “Vanhu vo tala lava a hi va akela tindlu a va hi hakelanga mali leyi a va hi kolota yona ya madzana ya magidi ya tirhandi. Loko bindzu ra hina ri sungula ku tsekatseka, ndzi bule ni un’wana loyi a a ri ni bindzu ro fana ni ra mina, loko a nga swi kota ku thola un’wana wa hina. Ku nga si hela masiku mambirhi, mina ni vatirhi va mina vo tala hi thoriwile. Ndzi byeriwe leswaku ndhuma ya mina yo wu endla kahle ntirho ni ku tshembeka ka mina a swi tiviwa.”

Vanhu hinkwavo lava mintokoto ya vona yi boxiweke laha henhla i Timbhoni ta Yehovha. Ndlela leyi va ma fambisaka ha yona mabindzu ni mahanyelo ya vona swi sekeriwe eBibeleni. Hilaha u nga swi vonaka hakona, ematshan’weni yo tirhisa vukanganyisi leswaku mabindzu ya vona ma humelela, ku tshembeka ka vona ku endle leswaku swilo swi va fambela khwatsi.

Kambe, minkarhi hinkwayo ku ta va ni swiyimo leswi vonakaka onge ku nga tshembeki swa vuyerisa. Xana ku vuyeriwa hi tlhelo ra timali hi swona ntsena leswi kombisaka ku humelela?

[Marito lama tshahiweke exihlokweni lama nga eka tluka 6]

Ku tshembeka ka wena swi endla leswaku swilo swi ku fambela kahle—ku nga khathariseki leswaku wa swi xiya kumbe a wu swi xiyi

[Xifaniso lexi nga eka tluka 7]

“Ndzi byeriwe leswaku ndhuma ya mina yo wu endla kahle ntirho ni ku tshembeka ka mina a swi tiviwa.”—Bill, wa le United States