Burisana Ni Vanhu

● Xiya xiendlakalo lexi landzelaka. Vanhu va vula leswaku Sam wa ha ri endzhaku hi thekinoloji. I khale a nga swi lavi ku tirhisa swilo swa thekinoloji, ku nga yona ndlela yo tshama u ri karhi u burisana ni swirho swa ndyangu ni vanghana. Munhu un’wana ni un’wana, ku katsa ni vana va Sam lava nga emalembeni ya kondlo-a-ndzi-dyi va vula leswaku va lava ku tshama va ri karhi va burisana ni vanhu. Loko Sam a tlanga ni xinhwanyetana xakwe xa malembe ya 16 u te: “Ndza wu tsundzuka nkarhi lowu vanhu a va vulavula va langutanile!”

Kutani Sam u cince langutelo rakwe. U ehlekete hi vanhu lava se a nga ni malembe a nga si va vona kumbe ku vulavula na vona. U tlhele a ehleketa hi swirho swa ndyangu leswi tikombaka swi khomekile swinene lerova a nga swi koti ku burisana na swona. Sam u tibyele leswi, ‘Loko ndzi lava ku tshama ndzi ri karhi ndzi burisana ni vanhu lava, ndzi fanele ndzi sungula ku tirhisa endlelo lerintshwa.’ Hi nkarhi wolowo, a ku ri exikarhi ka lembe-xidzana ra vu-20 ematiko-xikaya ya le United States. Kutani Sam, loyi a ku vuriwa leswaku wa ha ri endzhaku hi thekinoloji, u vone swi antswa leswaku a xava riqingho.

Teka xiendlakalo lexi u xi tisa eka 2012. Nathan, ntukulu wa Sam wa ha ku heta ku burisana na Roberto na Angela hi riqingho, ku nga vanghana vakwe lava rhurheleke etikweni rin’wana. Hi ku hlamarisiwa hi ndlela leyi nkarhi wu tsutsumaka ha yona, Nathan u te: ‘Ndzi hetelele ku bula na vona eka malembe ya khume lama hundzeke!’

Eka malembe lama hundzeke, Nathan a a titwa a tsakile loko a fonelana ni swirho swa ndyangu ni vanghana vakwe lava tshamaka ekule. Kambe sweswi swi tikomba onge munhu un’wana ni un’wana u tirhisa Web site yo endla xinghana eka Internet ku burisana ni vanhu, ku katsa ni vana va Nathan va kondlo-a-ndzi-dyi.

Vanhu va vula leswaku Nathan wa ha ri endzhaku hi thekinoloji. U te: “Ndza wu tsundzuka nkarhi lowu a wu vulavula ni munhu hi riqingho.” Kambe se u cince langutelo rakwe, u ri: ‘Loko ndzi lava ku tshama ndzi ri karhi ndzi burisana ni vanhu lava, ndzi fanele ndzi sungula ku tirhisa endlelo lerintshwa.’

Xana u tshame u titwa hi ndlela leyi Nathan a titwaka ha yona? Hi ntumbuluko vanhu va tsakela ku tshama va ri karhi va burisana. (Genesa 2:18; Swivuriso 17:17) Leswi vo tala va endlaka tano hi ku tirhisa ti-Web site to endla xinghana eka Internet, i yini leswi u faneleke u swi tiva ha tona?