I Yini Lexi Endlaka Vanhu Va Swi Rhandza?
EKA n’hweti leyi nga hundza, hi yihi ndlela yo burisana ni vanhu leyi u yi tirhiseke?
Ku burisana mi langutanile
Ku tsala papila kumbe khadi hi voko
Riqingho
SMS
Ku rhumelana marungula
Ku vulavula ni mu nhu hi khompyuta mi ri karhi mi vonana eka yona
Web site yo endla xinghana eka Internet
A ku si tshama ku va ni tindlela to tarisa xileswi to burisana ni vanhu leti munhu a nga hlawulaka eka tona, naswona hinkwato ti ni vuyelo lebyinene ni leswi endlaka swi tika. Xiya swikombiso leswi landzelaka:
KU BURISANA MI LANGUTANILE
Vuyelo lebyinene: U kota ku vona ndlela leyi xikandza xa munhu xi langutekaka ha yona, ku twa ndlela leyi a vulavulaka ha yona ni ku tshuka-tshuka kakwe.
Lexi endlaka swi tika: Havumbirhi bya n’wina mi fanele mi hlangana.
KU TSALA PAPILA KUMBE KHADI HI VOKO
Vuyelo lebyinene: Ri kombisa xinghana naswona ri kongomisiwa eka munhu wo karhi.
Lexi endlaka swi tika: Swi teka nkarhi ku tsala naswona swi teka masiku leswaku ri ya fika laha ri yaka kona.
Vuyelo lebyinene: Yi nga tsariwa ni ku rhumeriwa hi xihatla.
Lexi endlaka swi tika: A wu swi koti ku yi vona kahle ndlela leyi munhu loyi a yi tsaleke a titwaka ha yona naswona swa olova ku yi twisisa hi ndlela leyi hoxeke.
Vanhu van’wana va vula leswaku ndlela leyinene yo tshama u ri karhi u burisana ni vanhu i ku tirhisa ti-Web site to endla xinghana eka Internet. Ku ni ti-Web site ta madzana to endla xinghana eka Internet naswona leyi nga duma swinene—Facebook—yi tirhisiwa hi vanhu va kwalomu ka 800 wa timiliyoni! Magazini lowu vuriwaka Time wu ri: “Loko Facebook a yi ri tiko, a ku ta va tiko ra vunharhu lerikulu emisaveni hinkwayo naswona a ri ta va ri landzela Chayina na Indiya.” Ku endla xinghana eka Internet i yini naswona ha yini swi dumile swinene?
Ku endla xinghana eka Internet i ku tirhisa Web site leyi endlaka leswaku vanhu lava yi tirhisaka va kota ku tsalelana ni vanghana va vona lava va hlawuleke. Jean la nga ni malembe ya 21 u ri: “Hi yona ndlela leyinene yo tshama u ri karhi u burisana ni vanhu. Ku endla xinghana eka Internet i ndlela leyinene yo rhumelelana ni vanghana va wena swifaniso leswi u nga ha vaka u swi teke eka riendzo ro karhi kumbe eka xiendlakalo xo karhi.”
Ha yini u nga nambi u tsala papila? Van’wana va nga ha vula leswaku ‘swi dya nkarhi,’ naswona swa durha loko ku ri leswaku u fanele u ri rhumela ni swifaniso. Ha yini u nga tirhisi riqingho? Na rona ri dya nkarhi hikuva u fanele u fonela munhu ha un’we, naswona swi nga ha endleka van’wana va nga kumeki kumbe va va va khomekile loko u va fonela. Ku vuriwa yini hi e-mail? Danielle la nga ni malembe ya 20 u te: “Vanhu a va ha hlamuli ti-e-mail naswona hambiloko vo hlamula, swi nga ha endleka va teka mavhiki va nga si hlamula. Ndzi tsala leswi ndzi nga le ku swi endleni eka Web site yo endla xinghana eka Internet ivi vanghana va mina na vona va endla tano. Loko hi pfula ti-Web site leti hi endlaka xinghana eka tona, hi namba hi tiva leti humelelaka naswona swa olova!”
Leswi a swi vuli swona leswaku marungula hinkwawo lama nghenisiwaka eka ti-Web site to endla xinghana eka Internet i yo hungasa ntsena. Hi xikombiso, loko ku humelele mhangu yo karhi—yo tanihi ku tsekatseka ka misava ni tsunami leswi onheke tindhawu tin’wana le Japani hi March 11, 2011—vanhu vo tala va nghene eka ti-Web site to endla xinghana eka Internet leswaku va tiva loko vanghana ni maxaka ya vona ma ha hlayisekile.
Xiya xikombiso xa Benjamin la tshamaka eUnited States. U ri: “Tinqingho a ti nga tirhi endzhaku ka tsunami leyi hlaseleke eJapani. Munghana wa mina u ndzi byele leswaku u tsalele munghana wa hina lonkulu wa xisati wa le Tokyo e-mail, kambe a nga hlamulanga. Hi nkarhi wolowo ndzi tirhise selfoni ya mina leswaku ndzi nghena eka Web site yo endla xinghana eka Internet. Ndzi te loko ndzi yi pfula, hiloko ndzi kuma rungula leri a ri hoxeke a vula leswaku u ponile naswona u ta hi byela to tala hi ku famba ka nkarhi.”
Benjamin u ye emahlweni a ku: “Leswaku ndzi tivisa vanghana va mina lava n’wi tivaka lava a va nga ri na yona Web site yo endla xinghana eka Internet, ndzi boheke ku va rhumela ti-e-mail ha un’we-un’we. Swi ndzi tekele nkarhi ku kuma ti-e-mail adirese ta vona ni ku va tsalela. Va hlamule endzhaku ka masiku ma nga ri mangani. Ha un’we wa vona swi n’wi tekele kwalomu ka mavhiki mambirhi a nga si hlamula! Lexi endleke leswaku va hlwela ku hlamula hileswi a va rhumeriwa ti-e-mail to tala swinene hi vanhu van’wana. I ngi ku londzovotiwe nkarhi wo tala loko a ku lo tirhisiwa ti-Web site to endla xinghana eka Internet. Endzhaku ka timinete ti nga ri tingani, hinkwavo a va ta va swi tivile leswaku u ponile!”
Swi le rivaleni leswaku ku endla xinghana eka Internet swi ni vuyelo byo karhi lebyinene. Kambe, xana swi ni makhombo yo karhi? Loko swi ri tano, hi wahi naswona u nga ma papalata njhani?
[Bokisi/Swifaniso leswi nga eka tluka 5]
NDLELA LEYI YI TIRHAKA HA YONA
1. Tsala rungula eka Web site ya wena.
2. Vanhu hinkwavo lava u va hlawuleke leswaku va va vanghana va wena va kuma rungula leri u ri tsaleke loko va pfula ti-Web site ta vona naswona u kuma leswi va swi tsaleke loko u pfula ya wena.