Vululami Bya Xiviri Ehansi Ka Mfumo Wa Xikwembu

VUPROFETA bya Bibele byi kombisa leswaku ku nga ri khale misava leyi hi hanyaka eka yona yi ta siviwa hi misava leyintshwa ya Xikwembu. Ku tlula kwalaho, emisaveni yoleyo ku ta va ni hulumendhe yin’we—Mfumo wa Xikwembu lowu Hosi ya wona ku nga Yesu Kreste. (Nhlavutelo 11:15) Mfumo wa Xikwembu wu ta byi tisa njhani vululami? Wu ta byi tisa hi ku tirhisa tindlela timbirhi.

1. Wu ta herisa vuhomboloki hi ku herisa mimfumo leyi nga riki na vululami ni leyi nga swi enerisiki swilaveko swa vanhu. Daniyele 2:44 yi ri: “Emasikwini ya tihosi teto [tihulumendhe] Xikwembu xa le tilweni xi ta veka mfumo . . . Wu ta pfotlosa kutani wu herisa mimfumo leyi hinkwayo [ya vanhu], kambe wona wu ta tshama hilaha ku nga riki na makumu.”

2. Wu ta herisa lavo homboloka kambe wu sirhelela lavo lulama. Pisalema 37:10 yi ri: “Hi nkarhinyana, lowo homboloka a nge he vi kona.” Ndzimana 28 yi ri: “Yehovha u rhandza vululami, naswona a nge va siyi lava tshembekeke vakwe.”

“Lava tshembekeke” va ta vona ku hetiseka ka marito lawa Yesu a ma vuleke exikhongelweni xakwe xa xikombiso. U te: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Hi kwihi ku rhandza ka Xikwembu hi misava?

Loko Mfumo Wa Xikwembu Wu Fuma Misava . . .

Vukanganyisi ni ku tshikileriwa swi ta hela. Loko Vaheveru 1:9 yi vulavula hi Yesu Kreste yi ri: “U rhandze ku lulama, naswona u venge ku kala nawu.” Yesu loyi a nga ta va Mufumi wo lulama u “ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. . . . [U] ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya [yena].”—Pisalema 72:12-14.

Ku ta va ni swakudya swo tala. “Kunene misava yi ta humesa swimila swa yona; Xikwembu, Xikwembu xa hina xi ta hi katekisa.” (Pisalema 67:6) “Ku ta va ni mavele yo tala emisaveni; ma ta khapakhapa etinhlohlorhini ta tintshava.” (Pisalema 72:16) Siku rin’wana Yesu u nyike magidi ya vanhu swakudya hi singita naswona leswi a ku ri xikombiso xa leswi a nga ta swi endla ehansi ka Mfumo wa Xikwembu.—Matewu 14:15-21; 15:32-38.

Vululami a byi nge kavanyetiwi hi ku nga hetiseki ka vanhu. “A xi kona xivumbiwa lexi nga vonakiki emahlweni ka [Xikwembu], kambe swilo hinkwaswo swi lo dla, swi paluxeka erivaleni ematihlweni ya loyi hi nga ta tihlamulela eka yena.” (Vaheveru 4:13) Malunghana na Kreste ha hlaya: “A nge avanyisi hi ku ya hi leswi a swi vonaka ematihlweni ya yena, kumbe a tshinya hi ku ya hi leswi twiwaka hi tindleve takwe ntsena. Kutani u ta avanyisa swisiwana hi ku tshembeka, naswona u ta tshinya hi vunene ku pfuna lavo rhula emisaveni.”—Esaya 11:3, 4.

Mfumo Wa Xikwembu Wu Le Kusuhi!

Swiyimo swa misava leyi, leswi yaka swi nyanya swi kombisa leswaku ku nga ri khale vanhu vo homboloka va ta herisiwa laha misaveni. Pisalema 92:7 yi ri: “Loko lavo homboloka va hluka ku fana ni ximila ni vanhu hinkwavo lava hanyaka hi swo biha va rhumbuka, va swi endlela leswaku va ta loviseriwa makumu.” I yini leswi u nga swi endlaka leswaku u amukeleka eka Xikwembu kutani u va exikarhi ka lava nga ta pona? Yesu Kreste u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Xana wa byi lava vutivi byebyo bya risima? Loko swi ri tano, ku fana na Heide, Dorothy na Firuddin lava ku vulavuriweke ha vona, ha yini u nga buli ni Timbhoni ta Yehovha hi mhaka yoleyo? Ti ta swi tsakela ku hlamula swivutiso leswi u nga na swona handle ko ku hakerisa.

[Bokisi/Xifaniso lexi nga eka tluka 9]

KU TIYISELA LOKO VUTOMI BYI TIKA

Emily, loyi a tshamaka eUnited States, u khomiwe hi mfukuzana ya ngati loko a ri ni malembe ya nkombo. Loko vanghana vakwe va pfa va khomiwa hi vuvabyi byo tanihi mukhuhlwana, yena u hete malembe a ri karhi a tiyisela vutshunguri lebyikulu, ku katsa ni vutshunguri bya mfukuzana byo tirhisa tikhemikhali. U ri: “Mfukuzana ya ngati ya chavisa!”

Hambileswi vutomi byi nga n’wi oloveliki, Emily a nga lan’wanga. U wu langutele hi mahlo-ngati nkarhi lowu ehansi ka Mfumo wa Xikwembu “ku [nga riki na] munhu la tshamaka kona la nga ta ku: ‘Ndza vabya.’” (Esaya 33:24) U ri: “Tsalwa leri ndzi ri rhandzaka ngopfu i Marka 12:30 leyi nge: ‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.’ Loko ndzi khongela, Yehovha wa ndzi tiyisa. Ndza n’wi tlangela swinene hileswi a ndzi nyikeke ndyangu, vandlha ni ntshembo wa vutomi lebyi nga heriki emisaveni leyintshwa leyi nga ta va Paradeyisi. Ntshembo lowu wa ndzi chavelela swinene.”

[Swifaniso leswi nga eka matluka 8, 9]

Ehansi ka Mfumo wa Xikwembu vanhu ta tiphina hi swakudya swo tala, vululami bya xiviri ni hi vutomi, ku nga ri na xihlawu-hlawu