Leti Humaka Eka Vahlayi

Ndhawu Yo Khathalela Vanhu Lava Nga Ni Vuvabyi Lebyi Nga Tshungulekiki—Hi Xihi Xikongomelo Xa Yona? (July 2011) Tanihi leswi ndzi tirhaka ku khathalela swigulana, ndzi leteriwe endhawini leyi vanhu lava nga ni vuvabyi lebyi nga tshungulekiki va khathaleriwaka eka yona naswona ndzi vula ndzi tiyisile leswaku leswi mi swi tsaleke eka Xalamuka! ya July 2011 i ntiyiso. Tindhawu to khathalela vanhu va muxaka lowu i ta nkoka swinene namuntlha. Ndzi wu langutele hi mahlo-ngati Mfumo wa Xikwembu, laha ku nga riki na munhu la nga ta ku, “Ndza vabya,” naswona Xikwembu xi nga ta sula mihloti hinkwayo ematihlweni ya hina.—Esaya 33:24; Nhlavutelo 21:3, 4.

M. R. wa le Italy

Xana Nxorhonxorho Wa Wena Wa Kholokholo Wu Tirha Kahle? (May 2009) Ndzi ba mandla ndzi vuyelela hi xihloko lexi. Enkarhini lowu hundzeke ndzi xiye leswaku ku na leswi nga tshamisekangiki eka nxorhonxorho wa mina, kambe a ndzi endlanga nchumu ha swona. Endzhaku ko hlaya xihloko lexi, ndzi ye eka dokodela naswona u ndzi byele leswaku ndzi khomiwe hi vuvabyi lebyi vuriwaka Graves’ disease. Lexi tsakisaka hileswaku byi voniwe byi nga si ya kule. Ndza nkhensa swinene.

T. K. wa le Japani

Buku Leyi U Nga Yi Tshembaka—Xiyenge 1-7 (November 2010–May 2011) Ndza wu tlangela swinene ntirho lowu mi wu endleke eka swihloko leswi swa nxaxamelo leswi a swi vulavula hi mimfumo leyi a yi ri ni matimba eminkarhini ya Bibele. Ndzi nga tsaka swinene loko swo hlanganisiwa ivi swi endliwa broxara. Swihloko leswi, leswi vulavulaka hi matimu swi nga susumetela munhu ku xixima Yehovha, Mutsari wa vuprofeta lebyi bya le Bibeleni.

G. H. wa le United States

Vantshwa Va Vutisa . . . I Yini Leswi Ndzi Faneleke Ndzi Swi Tiva Hi Ku Endla Xinghana Eka Internet? (July 2011) Ndza nkhensa swinene hi xihloko lexi. Ndzi ni malembe ya 26 naswona a ndzi lava ku nghena eka Web site yo endla xinghana eka Internet, ku nga ri hileswi a ndzi lava ku va ni vanghana vo tala, kambe hileswi vanhu vo tala a va ndzi khutaza ku endla tano. Xihloko lexi xi ndzi pfunile swinene. U nga va na vona vanghana hambiloko u nga yi tirhisi Web site yo endla xinghana eka Internet.

M. P. wa le Philippines

A ndzi ehleketa leswaku xihloko lexi xi ta vulavula ku biha hi ku endla xinghana eka Internet. Kambe a xi nga voyameli tlhelo rin’we. Xi hlamusele ndlela leyi swi pfunaka ha yona ni ndlela leyi hi nga tisirhelelaka ha yona eka makhombo lama nga ha tshukaka ma va kona. Xi ndzi dyondzise ndlela yo va ni vuxiyaxiya loko ndzi hoxa vuxokoxoko bya xihundla eka Internet.

C. W. wa le United States

Swihundla Leswi Tisaka Ntsako eNdyangwini (October 2009) Xalamuka! leyi yo hlawuleka yi wu pfunile swinene ndyangu wa hina. Ndzi ma rhandzile swinene mabokisi lawa a ma ku, “Ringeta xitoloveto lexi” lawa a ma humelela eka swihloko leswi hinkwaswo. Swiringanyeto leswi kongomeke leswi nyikeriweke kwalaho se ha swi tirhisa ekaya ka mina.

H. H. wa le Korea

Swivutiso Swo Bula Ha Swona eNdyangwini Inkomu hi swihloko leswi, leswi humaka nkarhi na nkarhi. Xinhwanyetana xa hina lexi nga ni malembe ya tsevu xi rhandza xiyenge lexi nge, Vana Va Lava-lava Swifaniso swin’we ni ku swi penda. Swihloko leswi swi pfuna vatswari leswaku va letela vana va vona ku sukela loko va ha ri tincece. Ku khathala ka n’wina hi vana swa tlangeriwa swinene.

M. P. wa le Poland